1-2. (a) Etumwalaka ndyoka li li muJesaja 41:10, olya li lya gumu ngiini omumwameme Yoshiko? (b) Olye ta vulu okumona mo uuwanawa metumwalaka ndyoka lyaJehova?

OMUMWAMEME omudhiginini gwedhina Yoshiko, okwa li a uvu onkundana ombwinayi. Okwa li a lombwelwa kundohotola kutya oku na ko owala oomwedhi dhontumba, a ka likole oombeke. Mbela okwi inyenge ngiini? Yoshiko okwa li a dhimbulukwa ovelise ndjoka e hole mOmbiimbeli, Jesaja 41:10. (Lesha.) Okwa lombwele ndohotola a ngungumana kutya ye ina tila, oshoka Jehova oku li pamwe naye. * Etumwalaka tali hekeleke ndyoka li li movelise ndjoka, olya kwathele omumwameme ngoka i inekele muJehova thiluthilu. Ovelise ndjoka otayi vulu wo oku tu kwathela tu kale twa ngungumana, uuna tu li monkugo yi na onkambe. Opo tu uve ko kutya ongiini tayi vulu oku tu kwathela, natu ka kundathaneni tango kutya omolwashike Jehova a li a gandja etumwalaka ndyoka kuJesaja.

² Tango, Jehova okwa li a longitha Jesaja a nyole oohapu ndhoka, opo a hekeleke Aajuda mboka ya li taya ka falwa muupongekwa muBabilonia. Nonando ongawo, Jehova etumwalaka ndyoka ka li owala e li nunina Aajuda mboka ya li muupongekwa, ihe aapiya ye ayehe sigo okunena. (Jes. 40:8; Rom. 15:4) Otu li ‘momathimbo omadhigu’ okukaliwa mugo, notwa pumbwa etsomukumo ndyoka li li membo lyaJesaja, shi vulithe nale. — 2 Tim. 3:1.

3. (a) Omauvaneko geni ge li muJesaja 41:10, enyolo lyomumvo 2019? (b) Omolwashike twa pumbwa omashilipaleko gomauvaneko ngoka?

³ Moshitopolwa shika, otatu ka gandja eitulomo komauvaneko gaJehova gatatu ngoka tage tu kwathele tu koleke eitaalo lyetu.  Oga popiwa muJesaja 41:10: (1) Jehova ota ka kala pamwe natse, (2) oye Kalunga ketu, nosho wo kutya (3) ote ke tu kwathela. Omashilipaleko * ngoka otwe ga pumbwa, oshoka otage ke tu kwathela, uuna twi iyadha momaudhigu, ngaashi Yoshiko. Iinima iiwinayi mbyoka tayi ningwa muuyuni, ohayi tu etele wo omaupyakadhi. Yamwe yomutse otatu idhidhimikile omapataneko, tage tu ziilile komapangelo omanankondo. Natu ka kundathaneni omashilipaleko ngoka gatatu koolimwe noolimwe.

4. (a) Eshilipaleko lini tatu ka kundathana tango? (Tala wo enyolo lyopevi.) (b) Omomikalo dhini Jehova he tu lombwele nkene e tu uvitile? (c) Oohapu dhaJehova ohadhi ku gumu ngiini?

⁴ Jehova okwe tu shilipaleke tango noohapu ndhika tadhi ti: “Ino tila — ongame ndi li pungoye!” * Jehova oha ulike kutya oku li pamwe natse, moku tu kwathela nomoku tu ulukila ohole ye. Ndhindhilika nkene a holola olukeno lwe nankene e tu uvitile. Okwa ti: “Ou na ondilo momeho gandje, molwashoka owa simana nondi ku hole.” (Jes. 43:4) Kapu na nando oshinima shimwe tashi vulu okuningitha Jehova kaa kale we e tu hole, oshoka ohole ye yoku tu hola oya kolelela. (Jes. 54:10) Ohole ye nuukuume we, ohayi tu kwathele tu kale tu na omukumo. Ota vulu oku tu gamena kunena, ngaashi owala a li a gamene Abram (Abraham) kuume ke. Jehova okwe mu lombwele a ti: “Abram, ino tila. Otandi ku shigi kiiponga.” — Gen. 15:1.

5-6. (a) Otu shi shi ngiini kutya Jehova okwa hala oku tu kwathela, uuna tu li muupyakadhi? (b) Oshike tatu ilongo koshiholelwa shomumwameme Yoshiko?

⁵ Otu shi kutya Jehova ohe tu kwathele, uuna tu li muudhigu, molwaashoka okwa uvanekela oshigwana she a ti: “Ngele to pitile momeya, ondi li pungoye, nongele ku na omilonga dhomeya, itadhi ku ninginitha. Ngele to pitile momulilo, ito lunguna po, nomalaka gomulilo itage ku fike.” (Jes. 43:2) Oohapu ndhoka odha hala okutya shike?

⁶ Jehova ina uvaneka kutya ota kutha po omaupyakadhi ngoka haga dhigupaleke onkalamwenyo, ihe pompito opo tuu mpoka, ita ka pitika tu gwililwe po komaupyakadhi ngoka ga fa “omilonga dhomeya” nenge ‘omulilo’ pathaneko. Okwe  tu shilipaleka kutya ota ka kala pamwe natse noku tu kwathela tu ‘pite’ mo momaupyakadhi. Mbela oshike ta ka ninga po? Ote ke tu kwathela tu kale twa ngungumana, opo tu kale aadhiginini kuye, nonando otashi pula eso. (Jes. 41:13) Shoka osha ningilwa omumwameme Yoshiko ngoka a popiwa metetekelo. Omwanakadhona okwa ti: “Otwa li twe shi kuminwa, sho meme a kala a ngungumana. Otwa li twe shi mono kutya Jehova okwe mu kwathela a kale e na ombili yokomwenyo. Meme okwa kala nokuuvithila aapangi naapangwa kombinga yaJehova nomauvaneko ge, sigo a hulitha.” Oshike tatu ilongo koshiholelwa shomumwameme Yoshiko? Ngele otwa kala twi inekela meuvaneko lyaKalunga ndyoka tali ti kutya “ondi li pungoye,” natse wo otatu ka kala tu na omukumo notwa nkondopala, sho tu li momaupyakadhi.

7-8. (a) Eshilipaleko etiyali lini tatu ka kundathana, notali ti shike? (b) Omolwashike Jehova a lombwele Aajuda mboka ya li muupongekwa a ti: “Ino limbililwa”? (c) Oohapu dhini dhi li muJesaja 46:3, 4, dha li dha kwathele aapiya yaKalunga ya kale ya ngungumana?

⁷ Natu taleni keshilipaleko etiyali ndyoka lya nyolwa kuJesaja, tali ti: “Ongame Kalunga koye — ino limbililwa!” Oohapu ndhika tadhi popi kombinga yokulimbililwa otadhi ti shike? Movelise ndjika, oshitya “limbililwa,” melaka lyopetameko otashi gandja edhiladhilo lyokukala “wa tala konima, molwaashono wa tila kutya opu na sha tashi vulu oku ku monitha oshiponga.” Nenge, “okukala to pipima wa fa omuntu ngoka e li monkalo ya nika oshiponga.”

⁸ Omolwashike Jehova a lombwele Aajuda mboka ya li taya ka kala muupongekwa waBabilonia, kaaya kale ya “limbililwa”? Omolwaashoka okwa li e shi kutya aakalimo yomoshilongo shoka, oya li taya ka kala ya tila. Oshike sha li tashi ke ya ningitha ya kale ya tila? Okuuka pehulilo lyomimvo 70 ndhoka Aajuda ya kala muupongekwa, Babilonia osha li tashi ka ponokelwa ketangakwiita enankondo lyaMedia naPersia. Jehova okwa li ta ka longitha etangakwiita ndyoka, opo a mangulule mo oshigwana she muupika waBabilonia. (Jes. 41:2-4) Sho Aababilonia naantu yomiigwana yilwe mboka ya li ko pethimbo ndyoka ya tseya kutya aatondi yawo oye li poku ya ponokela, oya kambadhala okukala ye na omukumo, ‘mokutsaathana omukumo.’ Oyi ihongele wo iimenka, taya dhiladhila kutya oyo tayi ke ya gamena. (Jes. 41:5-7) Pethimbo ndyoka, Jehova okwa kwathele Aajuda mboka ya li muupongekwa ya kale ya ngungumana, sho e ya lombwele a ti: “Omuntu gwandje Israel, [ngoye ngoka inoo fa aashiinda yoye] . . . Ongame Kalunga koye — ino limbililwa!” (Jes. 41:8-10) Ndhindhilika kutya Jehova okwa ti: “Ongame Kalunga koye.” Oohapu ndhoka otadhi ulike kutya Jehova okwa li a shilipaleke aapiya ye aadhiginini kutya ine ya dhimbwa. Okwa li natango e li Kalunga kawo, noya li wo natango aapiya ye. Okwe ya lombwele a ti: “Otandi mu gamene . . . notandi mu hupitha.” Oohapu ndhoka dheshilipaleko, odhi na okukala dha li dha tsu omukumo Aajuda mboka. — Lesha Jesaja 46:3, 4.

9-10. Omolwashike inaatu pumbwa okukala twa tila? Shi thaneka.

⁹ Aantu oyendji kunena oya limbililwa shimwe to nyengwa, omolwoonkalo ndhoka tadhi ende tadhi nayipala. Odhoshili kutya natse otwa gumwa wo koonkalo ndhoka. Nonando ongawo, inatu pumbwa okukala twa tila. Jehova ote tu lombwele ta ti: “Ongame Kalunga koye.” Omolwashike oohapu ndhoka dhi li etompelo lya simana lyoku tu kwathela tu kale twa ngungumana?

¹⁰ Natu shi thaneke ngeyi: Natu tye nduno aafaalelwa yaali, Jim naBen, oye li mondhila ndjoka tayi ndjungwandjungwa kombepo ondhigu. Sho ondhila ya ningi ya yi pevi ya yi pombanda, ye naku yi hinga oti igidha ta ti: “Imangeleni momapaya. Otatu ka piteni miikogo poompito dhimwe.”  Jim okwa tameke okukala ti ipula unene. Omuhingindhila e ta gwedha ko ta ti: “Inamu limbililwa. Ongame omuhingindhila gweni tandi popi.” Opo nduno, Jim okwi ipukapuka komutse, e ta ti: “Eshilipaleko lyashike lya tya ngawo?” Opo ihe, okwa ndhindhilike kutya Ben ina limbililwa nando. Ye ta pula Ben ta ti: “Omolwashike wa ngungumana?” Ben okwi imemeha e ta ti: “Oshoka omuhingindhila nguka ondi mu shi nawa. Otate!” Opo nduno, Ben okwa ti: “Andiya ndi ku kuthile ko kashona kombinga ye. Ondi na uushili kutya ngele owe mu tseya nokukala wu shi kutya okapyoko mokuhinga ondhila, nangoye oto ka kala wa gundjila.”

11. Oshike tatu vulu okwiilonga kethaneko lyaafaalelwa yaali?

¹¹ Oshike tatu vulu okwiilonga kethaneko ndyoka? Ngaashi Ben, natse otwa ngungumana, oshoka Tate yetu gwomegulu, Jehova, otu mu shi nawa. Otu shi kutya ote ke tu kwathela tu idhidhimikile omaudhigu ga kwata miiti moka tatu iyadha, momasiku ngaka gahugunina. (Jes. 35:4) Otwi inekela muJehova. Onkee ano, otatu vulu okukala twa ngungumana, omanga uuyuni wu li moshipyu noonkondo, omolwuutile. (Jes. 30:15) Natse ohatu ningi ngaashi Ben, sho hatu lombwele yalwe kutya omolwashike twi inekela muKalunga. Shoka ohashi ya kwathele wo ya kale neinekelo kutya Jehova ote ke ya ambidhidha, nonando oya kale moonkalo dha fa peni.

12. (a) Eshilipaleko etitatu lini tatu ka kundathana? (b) Uutumbulilo “omunankondoawike” otawu tu dhimbulukitha shike?

¹² Natu taleni keshilipaleko etitatu ndyoka lya nyolwa kuJesaja, tali ti: “Otandi ku kankameke e tandi ku kwatha.” Jesaja okwa kala nale a popya nkene Jehova ta ka kankameka aapiya ye, sho a ti: “Omuwa Omupangeliawike ote ya okulela, oye omunankondoawike.” (Jes. 40:10) Oohapu ndhoka otadhi tu dhimbulukitha kutya Jehova oku li Omukwaniilwa omunankondo. Jehova okwa li a longitha oonkondo  dhe oonene, opo a kwathele nokupopila aapiya ye yopethimbo lyonale. Ota tsikile wo okunkondopaleka nokugamena mboka ye mu inekela kunena. — Deut. 1:30, 31; Jes. 43:10.

13. (a) Opethimbo lini unene Jehova ha gwanitha po euvaneko lye lyoku tu kankameka? (b) Eshilipaleko lini hali tu nkondopaleke noku tu tsa omukumo?

¹³ Jehova oha gwanitha po aluhe euvaneko lye ndika tali ti: “Otandi ku kankameke.” Ohe shi ningi, unene tuu ngele tatu patanekwa. Miitopolwa yimwe muuyuni, aatondi yetu ohaya kambadhala lela ya mana mo yi indike iilonga yetu yokuuvitha nenge yilwe yehangano lyetu. Nonando ongawo, ihatu ipula unene nomaponokelo ngoka. Jehova okwe tu pa eshilipaleko ndyoka hali tu nkondopaleke nohali tu tsu omukumo. Okwe tu uvanekela a ti: “Oshikondjitho kehe tashi hambulwa shi ku kondjithe, itashi tompola sha.” (Jes. 54:17) Oohapu ndhoka otadhi tu dhimbulukitha iinima itatu ya simana.

14. Omolwashike itaashi tu kumitha, sho aatondi yaKalunga haye tu ponokele?

¹⁴ Shotango, tu li aalanduli yaJesus, otwa tegelela tu kale tu tondike. (Mat. 10:22) Jesus okwa li a hunganeke kutya aalongwa ye, otaya ka hepekwa noonkondo momasiku gahugunina. (Mat. 24:9; Joh. 15:20) Oshitiyali, ehunganeko lyaJesaja olye tu londodha wo kutya aatondi yetu, otaye ke tu ningila oshindji shi vulithe owala poku tu tonda. Otaya ka longitha iikondjitho yi ili noyi ili, ye tu kondjithe. Iikondjitho mbyoka oya kwatela mo iifundja nosho wo omahepeko ga kwata miiti. (Mat. 5:11) Jehova ita ka keelela aatondi yetu ya longithe iikondjitho mbyoka ye tu kondjithe. (Ef. 6:12; Eh. 12:17) Ihe inatu pumbwa okukala twa tila. Omolwashike mbela?

15-16. (a) Oshinima oshititatu shini tu na okudhimbulukwa, notashi ambidhidhwa ngiini kuJesaja 25:4, 5? (b) Oshizemo shaantu mboka haye tu kondjitha, osha yelithwa ngiini muJesaja 41:11, 12?

¹⁵ Natu taleni koshinima oshititatu, shoka twa pumbwa okudhimbulukwa. Jehova okwa ti kutya “oshikondjitho kehe” tashi hambulwa shi tu kondjithe, “itashi tompola sha.” Ngaashi owala ekuma hali tu gamene kiikungulu, Jehova naye  ohe tu gamene ‘kaadhudhu mboka haya ponoka ko ya fa oshikungulu.’ (Lesha Jesaja 25:4, 5.) Aatondi itaye ke shi pondola nando moku tu ehameka sigo aluhe. — Jes. 65:17.

¹⁶ Oshinima shimwe, Jehova ohe tu kwathele tu kale tu na einekelo lya kola muye, moku tu yelithila kutya mboka “taa tsu ondumbo” natse, otaya ka mona iizemo yini. (Lesha Jesaja 41:11, 12.) Kutya nduno oye tu kondjithe shi thike peni nenge kutya iita oyi lule shi thike peni, otaya ka mona owala oshizemo sha faathana. Oshini? Aatondi ayehe yoshigwana shaKalunga “otaa ka sa po.”

17-18. (a) Okulesha Ombiimbeli, otaku vulu ngiini okukoleka einekelo lyoye muKalunga? Gandja oshiholelwa. (b) Ongiini okutedhatedha kenyolo lyomumvo 2019 taku tu kwathele?

¹⁷ Ohatu kokeke einekelo lyetu muJehova, moku mu tseya nawa. Omukalo owala moka tatu vulu oku mu tseya, omokulesha Ombiimbeli nuukeka nokutedhatedha kwaashoka twa lesha. MOmbiimbeli omu na uuyelele wu shi okwiinekelwa, kombinga yankene Jehova a li a gamene aapiya ye pethimbo lyonale. Uuyelele mboka, otawu tu kwathele tu kale tu na einekelo kutya ota vulu oku tu sila oshimpwiyu ngashingeyi.

¹⁸ Natu taleni koshiholelwa oshiwanawa, shoka Jesaja a longitha, a ulike nkene Jehova he tu gamene. Okwa yelekanitha Jehova nomusita, naapiya ye onoonzigona. Jesaja okwa popi kombinga yaJehova a ti: “Oonzigona ote dhi gongele pamwe noku dhi humbata momaako ge.” (Jes. 40:11) Uuna tu uvite Jehova e tu papatela nomaako ge, ohatu kala tu uvite twa gamenwa notwa ngungumana. Opo Jehova e tu kwathele tu kale twa ngungumana, nonando otu li momaupyakadhi, omupiya omudhiginini nomunandunge okwa hogolola Jesaja 41:10, olyo li kale enyolo lyomumvo 2019, ndyoka tali ti: “Ongame Kalunga koye — ino limbililwa!” Tedhatedha koohapu ndhoka dheshilipaleko. Otadhi ke ku nkondopaleka, uuna wi iyadha muupyakadhi.