MBELA owu shi omumwatate nenge omumwameme a tembukila koshilongo shilwe hoka ku na ompumbwe onene yaauvithi yUukwaniilwa? Mbela owi ipulile nale omapulo ngaashi: ‘Oshike she yi inyengitha ya ka kwathele kiilongo yilwe? Mbela oye shi ilongekidhile ngiini? Mbela nangame otandi vulu ngaa oku shi ninga?’ Opo wu mone omayamukulo gomapulo ngono, osha yela kutya owu na okupopya naamwatate naamwameme mboka. Natu shi ningeni.

Oshike she ku ningitha wu dhiladhile oku ku uvitha kiilongo hoka ku na ompumbwe onene? Amy, e na omimvo 30 nasha, a za koAmerica, okwa ti: “Onda kala oomvula odhindji handi dhiladhila oku ku uvitha kiilongo yilwe, ihe onda kala ndi wete kutya kandi na siku ndi shi ninge.” Oshike sha lundulula etaleko lye? Okwa ti: “Mo 2004 aaihokani mboka haya kwathele koBelize, oya pula ndje ndi ke ya talele po nondi kokole ondjila pamwe nayo uule womwedhi. Osho nda ningi nonda li nde shi nyanyukilwa shili. Konima yomvula onda tembukile koGhana ndi ka kokole ondjila.”

Konima yomimvo dhontumba dha ka pita, Stephanie gwokoAmerica, e na omimvo 20 nasha, okwa tala nawa onkalo ye, e ta ti: ‘Ondi na uukolele nokandi na uukwanegumbo. Onkee ano, otandi vulu okuningila Jehova oshindji shi vulithe pwaashoka handi ningi ngashingeyi.’ Sho i ikonakona nawa, oshe mu inyengitha a tembukile koGhana a ka tamunune mo uukalele we. Filip naIda, aakokolindjila aaihokani yokoDenmark, ye li pokati komimvo 50 nasha. Oya kala aluhe ya hala okutembukila kiitopolwa hoka ku na ompumbwe onene. Oya tala kutya otaye shi ende ngiini, opo ye shi ninge. Filip okwa ti: “Sho ompito ya holoka po, Jehova okwa li a fa oye a ti: ‘Indeni!’.” Mo 2008 oya tembukile koGhana hoka ya kala taya kokola ondjila uule womimvo dhi vulithe pundatu.

Hans naBrook, aakokolindjila aaihokani, ye na omimvo 30 nasha, ohaya kwathele moAmerica. Mo 2005,  konima yoshikungulu shombepo hashi ithanwa Katrina, oya li ya kwathele mboka ya gumwa kusho. Konima yaashono oya ningi eindilo lyokukwathela miilonga yokutunga muuyuni awuhe, ihe inaya taambwa. Hans okwa ti: “Otwa li tu uvu oshipopiwa poshigongi shoshitopolwa shoka sha li tashi popi kombinga yomukwaniilwa David sho inaa pitikwa okutunga otempeli. Pehala lyokutula omutse kepepe, okwe shi taamba ko e ta kutha ombinga miilonga yilwe. Oshitsa shoka oshe tu kwathele tu mone kutya inashi puka okwiitulila po omalalakano galwe gopambepo.” (1 Ondjalulo 17:1-4, 11, 12; 22:5-11) Brook okwa gwedhako a ti: “Jehova okwa li a hala tu konge oompito dhilwe.”

Konima sho Hans naBrook yu uvu iimoniwa tayi hokitha kookuume kawo mboka taya kwathele kiilongo yilwe, osha li she yi inyengitha ya ka kokole ondjila kiilongo yilwe. Mo 2012 oya ka kwathela koGhana uule woomwedhi ne, megongalo lyelaka lyokuudhika. Nonando oya li ye na okushuna koAmerica, okukwathela kwawo moGhana okwa kokeke ehalo lyawo lyokukala ya pititha komeho iinima yUukwaniilwa. Konima yaashono, oya ka kwathela okutunga oshitayimbelewa koMicronesia.

Owi ilongekidha ngiini wu ku uvithe hoka ku na ompumbwe onene? Stephanie okwa ti: “Onda kongo uuyelele miitopolwa mbyoka hayi kala mOshungolangelo tayi popi kombinga yoku ka kwathela hoka ku na ompumbwe onene. * Onda popi wo naakuluntugongalo nosho wo nomutonatelishikandjo nomukulukadhi gwe kombinga yoku ku uvitha koshilongo shilwe. Kakele kaashono, olundji ohandi popi omalalakano gandje uuna tandi galikana kuJehova.” Stephanie ka li ha longitha iimaliwa oyindji, naashono oshe mu kwathele a gongele oshimaliwa sha gwana shoku kii kwathela nasho, sho ta kwathele koshilongo shilwe.

Hans ota ti: “Otwa galikana Jehova e tu wilike, molwaashoka otwa li twa hala okuya hoka a hala tu ye. Otwa popi wo megalikano esiku lyokondandalunde moka twa hala tu ye.” Aaihokani mbaka  oya nyolele oontumwafo kiitayimbelewa ine. Sho ya mono eyamukulo okuza koshitayimbelewa shaGhana, oya yi ko nelalakano lyoku ka talela po owala uule woomwedhi mbali. Hans ota ti: “Otwa li twa nyanyukilwa lela okulonga pamwe negongalo. Onkee ano, otwa tokola tu kale hoka.”

George naAdria, aaihokani aakokolindjila yomimvo 30 nasha yokoCanada, oya li ye shi kutya Jehova oha yambeke omatokolo omawanawa, ihe iha yambeke owala omainyengotompelo omawanawa. Onkee ano, oya katuka oonkatu ya adhe elalakano lyawo. Oya kwatathana nomumwameme ngoka a li ta kwathele koGhana hoka ku na ompumbwe onene noye mu pula omapulo ogendji. Oya li wo ya nyolele koshitayimbelewa shaCanada noshaGhana. Adria ota ti: “Otwa ningi natango oonkambadhala twi imangulule kiimpwiyu oyindji shi vulithe shito.” Omatokolo ngoka oge ya kwathele ya tembukile koGhana mo 2004.

Omashongo geni wa mona sho wa tembukile koshilongo shilwe, nowu ungaunga nago ngiini? Eshongo lyotango kuAmy, okwa li a yuulukwa kegumbo. Ota ti: “Iinima ayihe oya li ya yooloka ko kwaambyoka nda li ndi igilila.” Oshike sha li she mu kwathele? Okwa ti: “Yaandjetu oya li haya dhengele ndje taya pandula ndje, omolwetokolo ndyoka nda ningi, naashoka osha kwathele ndje ndi tsikile niilonga yandje. Otwa kala hatu dhengelathana momukalo moka tatu vulu okumonathana mongodhi, nokanda li nda fa ndi li kokule nayo.” Amy okwa li a panga uukuume nomumwameme gwomoshitopolwa ngoka a li e mu kwathele iilonge iinima oyindji. Okwa ti: “Kuume kandje okwa kala ha kwathela ndje nonda li  handi ka pula ekwatho kuye uuna kaandi uvite ko kutya omolwashike aantu tayi inyenge momukulo gwontumba. Kekwatho lye, ondi ilongo iinima oyindji mbyoka ndi na okuninga naambyoka ndi na okuyanda. Shoka osha li sha kwathele ndje ndi nyanyukilwe uukalele wandje.”

George naAdria otaya hokolola kutya sho ya tembukile koGhana, petameko oya li ye wete ya fa ya shuna konkulu yonale. Adria okwa ti: “Pehala lyokulongitha eshina lyokuyoga, ohatu longitha iiyaha. Okulongekidha omwiha okwa li kwa fa haku kwata ethimbo olindji shi vulithe pwaandyoka twa li twi igilila. Ihe konima yethimbo, oonkalo ndhoka tadhi monika dha fa oondhigu, odha ka kala dha fa iinima iipe mbyoka twi ilongo okuninga.” Brook ota ti: “Nonando ohatu taalele omashongo ogendji tu li aakokolindjila, ohatu kala tu uvite twa mbilipalelwa. Iimoniwa ayihe mbyoka tu na, ohayi tu dhimbulukitha iinima oyindji iiwanawa mbyoka twa lenga.”

Omolwashike wa hala aantu yalwe ya kuthe ombinga miilonga mbika yUukwaniilwa? Stephanie ota ti: “Okuuvithila moshitopolwa moka mu na aantu ye na ehalo lyokwiilonga oshili noya hala okukonakona Ombiimbeli nangoye esiku kehe, ohashi eta enyanyu olindji. Onda ninga etokolo ewanawa shili, sho nda tokola ndi ka longe hoka ku na ompumbwe onene.” Mo 2014 Stephanie okwa hokanwa kuAaron. Ngashingeyi otaya longo koshitayimbelewa shaGhana.

Christine omukokolindjila a za koGermany e na omimvo 30 nasha, okwa li ha kwathele koBolivia manga inaa tembukila koGhana. Ota ti: “Oshinima oshiwanawa shili okutembukila hoka ku na ompumbwe.” Okwa gwedha ko wo a ti: “Onda kala aluhe handi galikana kuJehova a kwathele ndje, oshoka ondi li kokule noyaandjetu. Jehova okwa ningi gwoshili kungame shi vulithe nale. Onda mona wo uukumwe wa dhenga mbanda mboka wu li mokati kaapiya yaJehova. Iilonga mbika oye etela ndje omalaleko nuuyamba ogendji.” Christine opo a hokanwa kuGideon notaya tsikile okulonga moGhana.

Filip naIda oya popi shoka ya ningi, opo ya kwathele aakonakonimbiimbeli yawo ya ninge omahumokomeho. Oya ti: “Otwa li tu na aakonakonimbiimbeli 15 nenge ye vulithe po, ihe otwe ya shonopeke ya kale owala 10, opo tu ya longe nuukeka.” Mbela aakonakonimbiimbeli oya mona mo uuwanawa washa? Filip ota hokolola ta ti: “Onda li handi konakona nomulumentu gumwe omugundjuka gwedhina Michael. Okwa li ha vulu okukonakona esiku kehe nokwa li hi ilongekidha nawa. Onkee ano, otwa li twa mana ko embo Omalongo gOmbiimbeli muule womwedhi. Konima Michael okwa ningi omuuvithi inaa ninginithwa. Esiku lyotango a ya muukalele, okwa pula ndje a ti: ‘Oto vulu okukwathela ndje naakonakonimbiimbeli yandje?’ Onde mu tala nda kumwa. Michael okwa lombwele ndje kutya okwa tameka omakonakonombiimbeli naantu yatatu nokwa pumbwa omuntu e mu kwathele ya ka ninge ko.” Osha yela kutya opu na ompumbwe onene yaauvithi, oshoka naamboka taya konakona Ombiimbeli otaya longo aantu Ombiimbeli.

Amy ota hokolola nkene a mono kutya moGhana omu na ompumbwe onene shili ta ti: “Konima yethimbo sho nda thiki moGhana, otwa li twe ku uvitha momukunda omushona moka twa li owala twa kongo oombolo. Momukunda moka inatu adha mo owala ombolo yimwe, ihe otwa adha mo dhi li hetatu.” Konima yethimbo, Amy okwa hokanwa kuEric notaya longo ye li aakokolindjila yi ikalekelwa. Ohaya kwathele megongalo moka hamu longithwa elaka lyokuudhika, taya kwathele aauvithi yoombolo ye vulithe 300 nosho wo yalwe mboka ye na ohokwe moshilongo ashihe. Okukwathela moGhana okwa kwathela George naAdria ya tseye kutya okukala omutumwa osha kwatela mo shike. Oya li ya nyanyukwa sho ya hiywa ya ka hite ongundu onti-126 yosikola yaGilead. Ngashingeyi otaya longo ye li aatumwa moMosambike.

Ohashi uvitha nawa omutima okutala aantu oyendji ya za kiilongo yilwe taya longo nuudhiginini naamwatate naamwameme yomoshitopolwa miilonga yeteyo. (Johannes 4:35) Oshiwike kehe, moGhana ohamu ninginithwa konyala aantu 120. Ngaashi naanaa aantu 17 mboka ya tembukila koGhana, molwaashoka ku na ompumbwe onene, aauvithi oyendji kunena muuyuni awuhe oyi inyengithwa kohole yokuhola Jehova, ya ka ‘kwathele’ hoka ku na ompumbwe onene yaauvithi. Ohaya nyanyudha lela omutima gwaJehova sho tayi iyamba ngawo.—Episalomi 110:3; Omayeletumbulo 27:11.