1. Elunduluko lini lya ningwa momahala gamwe omimvo opo dha zi ko?

MUULE womimvo omayovi, aantu oyendji muuyuni, oya kala ye li momalongelokalunga. Ihe momimvo opo dha zi ko, opwa ningwa elunduluko enene. Aantu oyendji ngashingeyi kaye li we momalongelokalunga. Uushili owo kutya, miilongo yimwe aakalimo oyendji ohayi iti kutya kaye li melongelokalunga lyontumba. * — Mat. 24:12.

2. Omolwashike aantu oyendji kaaye li nando omelongelokalunga lyontumba?

² Omolwashike aantu oyendjiyendji hayi iti kutya kaye li melongelokalunga lyontumba? * Yamwe yomuyo oya gandja owala eitulomo kokwiikongela omaliko nenge komaupyakadhi gawo. (Luk. 8:14) Yamwe ngashingeyi inayi itaala we muKalunga. Yalwe oyi itaala muKalunga, ihe ohaya dhiladhila kutya elongelokalunga oshinima sha kwisha, inashi simana sho kashi li metsokumwe nuunongononi nosho wo nomadhiladhilo gopandunge. Otashi vulika haya uvu kookuume kawo, kaalongi nenge kaakundaneki kutya omwenyo ogwe ya po omolwoevolusi, ihe ihaya uvu naanaa omatompelo omawanawa gokwiitaala muKalunga. Yalwe oya lulilwa kaasita mboka ye na olwiho lwiimaliwa noonkondopangelo. Momahala gamwe, omapangelo oga ngambeka iilonga yomalongelokalunga.

3. Elalakano lyoshitopolwa shika olini?

³ Jesus okwe tu lombwela a ti: “Ka ningeni aantu ayehe aalongwa.” (Mat. 28:19) Ongiini tatu vulu okukwathela aantu mboka kaaye li melongelokalunga lyontumba, yi ilonge okukala ye hole Kalunga nokuninga aalongwa yaKristus? Natu kale tu shi kutya omukalo moka  omuntu ti inyenge ketumwalaka lyetu, otashi vulika gwi ikolelela mpono a putukila. Pashiholelwa, aantu mboka ya za kuEuropa, otashi vulika yi inyenge momukalo gwa yooloka ko kugwaamboka ya za kuAsia. Omolwashike? MuEuropa, aantu oyendji oye shi sha kombinga yOmbiimbeli noye shi kutya Kalunga oye a shita iinima ayihe. Ihe muAsia, aantu oyendji oye shi owala kashona nenge kaaye shi sha nandonando kombinga yOmbiimbeli, notashi vulika inaayi itaala mOmushiti. Elalakano lyoshitopolwa shika, oku tu kwathela tu adhe omitima dhaayehe mboka tatu tsakaneke muukalele, kashi na nduno mbudhi kutya oya za meputuko lini.

4. Omolwashike tatu vulu okukala tu na etaloko ewanawa?

⁴ Kala ho tala ko aantu nawa. Omumvo kehe, aantu yamwe mboka kaaya li melongelokalunga lyontumba, oya ningi Oonzapo dhaJehova. Oyendji yomuyo oya li ye na omikalo omiwanawa noya li ye li ompinge nuufudhime womalongelokalunga. Yalwe kaya li naanaa ye na omikalo omiwanawa, omanga oyendji ya li haya longo iilonga iiwinayi noya li ya pumbwa oku yi etha po. Kekwatho lyaJehova, otatu vulu okukala tu na uushili kutya otatu ka mona mboka “ya halelela oku ka mona omwenyo gwaaluhe.” — Iil. 13:48, NW; 1 Tim. 2:3, 4.

5. Olundji oshike hashi ningitha aantu yi inyenge nawa ketumwalaka lyetu?

⁵ Kala omunambili noho yaalele aantu. Olundji, aantu ohayi inyenge nawa ketumwalaka lyetu, omolwomukalo moka hatu ya uvithile, ihe hamolwa ando shoka tatu ya lombwele. Ohaya kala ya pandula, uuna tatu popi nayo nombili, tatu popi iitya ya hogololekeka notatu ulike kutya otu na ko nasha nayo. Ihatu ya thiminike ya pulakene kwaashoka tatu ya lombwele. Pehala lyaashono, ohatu kambadhala okuuva ko etaloko lyawo kombinga yomalongelokalunga. Pashiholelwa, otwi ilonga kutya yamwe kaye hole okupopya kombinga yomalongelokalunga nomuntu kaaye mu shi. Yalwe oye uvite kutya kashi shi omikalo ngele to pula omuntu kombinga yaKalunga. Omanga yalwe ohaya kala ya sa ohoni okumonika taya lesha Ombiimbeli, unene tuu nOonzapo dhaJehova. Kutya nduno ongiini, ohatu kambadhala oku ya yaalela. — 2 Tim. 2:24.

6. Omomukalo guni omuyapostoli Paulus a li a lundulula omukalo gwe gwokuuvitha, nongiini tatu vulu oku mu holela?

⁶ Oshike tatu vulu okuninga, ngele omuntu gwontumba iha kala a manguluka, uuna tatu longitha iitya ngaashi “Ombiimbeli,” “eshito,” “Kalunga” nenge “elongelokalunga”? Otatu vulu okuholela omuyapostoli Paulus, e tatu lundulula omukalo moka tatu ya uvithile. Paulus okwa li ha longitha Omanyolo, uuna ta tompathana nAajuda. Nonando ongawo, sho a li ta popi naafilosofi Aagreka, ka li a totha sha mOmbiimbeli. (Iil. 17:2, 3, 22-31) Ongiini tatu vulu okulandula oshiholelwa shaPaulus? Ngele owa tsakaneke omuntu ngoka inaa itaala mOmbiimbeli, onawa kuu tothe mo sha, uuna to tompathana naye. Ngele owa ndhindhilike kutya omuntu otashi vulika a kale inaa manguluka okumonika kuyalwe ta lesha Ombiimbeli nangoye, kambadhala oku mu ulukila omanyolo momukalo moka tashi vulika kaagu dhimbululwe, ngaashi moshikwaelektronika.

7. Oshike tatu vulu okuninga, opo tu landule oshiholelwa shaPaulus ngaashi sha popiwa mAakorinto yotango 9:20-23?

⁷ Kala ho uvu ko onkalo yaantu noku ya pulakena. Natu kale hatu kambadhala okuuva ko iinima mbyoka ya nwetha mo aantu mboka tatu tsakaneke. (Omayel. 20:5) Natu taleni ishewe koshiholelwa shaPaulus. Okwa putukila mokati kAajuda. Okwa li e na okulundulula omukalo gwe gwokuuvitha, uuna ta uvithile aantu mboka kaaye shi Aajuda, mboka ya li ye shi owala kashona nenge nokuli kaaye shi sha kombinga yaJehova nOmanyolo. Otashi vulika tu na okuninga omapekapeko gontumba nenge tu konge ekwatho kugumwe megongalo ngoka a pyokoka, opo tu vule okuuva ko nawa aantu moshitopolwa shetu. — Lesha 1 Aakorinto 9:20-23.

8. Omomukalo gumwe guni tatu vulu okutameka oonkundathana naantu kombinga yOmbiimbeli?

 ⁸ Elalakano lyetu okukonga mboka ye “shi kwiinekelwa.” (Mat. 10:11) Opo tu pondole miilonga yokuuvitha, natu kale hatu pula aantu ye tu lombwele omataloko gawo noku ya pulakena neitulomo. Omumwatate gumwe gwokoIngilanda, oha pula aantu etaloko lyawo kombinga yankene omuntu ta vulu okukala e na ondjokana tayi ende nawa, nkene ta vulu okuputudha aanona nenge nkene ta vulu okwiidhidhimikila okwaanuuyuuki. Konima ngele ya gandja omayamukulo gawo, oha ti: “Oto dhiladhila ngiini kombinga yomayele ngano ga nyolwa pwa pita ngashingeyi omimvo 2 000 lwaampono?” Opo ihe, ohe ya ulukile omanyolo ngono taga opalele, ta longitha ongodhi ye nopwaa na okupopya oshitya “Ombiimbeli.”

9. Ongiini tatu vulu okukwathela aantu mboka kaaye hole okupopya kombinga yaKalunga?

⁹ Otatu vulu okwaadha omitima dhaamboka haya yanda okupopya kombinga yaKalunga, mokukundathana nayo oshinima shoka she ya guma. Pashiholelwa, aantu oyendji ohaya kala ya kuminwa eshito. Onkee ano, otashi vulika wu popye to ti: “Otashi vulika wu shi kutya iinima oyindji oya ndulukwa po konima sho aanongononi ya tapa kiinima mbyoka nale yi li meshito. Pashiholelwa, mboka ya nduluka po omambako ohaya konakona omakutsi, omanga mboka haya longo omathano gokuthaneka haya konakona omeho. Mbela sho to dhiladhila, eshito oshike? Mbela oho ti oonkondo oonkumwithi, omuntu nenge oshinima shilwe?” Konima ngele wa pulakene nawa kwaashoka a ti, oto vulu okugwedha ko to ti: “Sho ooyindjiniya hayi ilongo komutungilo gwomakutsi nogwomeho, otashi vulika tu ipule kutya okulye tayi ilongo. Onda li nda kuminwa shoka sha nyolwa komutoti gwuuteyo gwonale, ngoka a ti: ‘Kalunga ngoka e tu pa omakutsi, ota kala tuu ihu uvu ko? Kalunga ngoka e tu pa omeho, ota kala tuu ihaa mono ko? . . . Omunongeki gwaantu ayehe ita tseya sha?’ Aanongononi yamwe oya thiki pehulithodhiladhilo lya faathana noohapu ndhoka.” (Eps. 94:9, 10) Otatu vulu wo oku ya ulukila okavidio kepandja lyetu lyokointaneta, jw.org, kohi yoshipalanyolo “Interviews and Experiences” moshitopolwa “Viewpoints on the Origin of Life.” (Tala mpoka pwa nyolwa PUBLICATIONS > VIDEOS.)

10. Ongiini tatu vulu okutameka oonkundathana nomuntu ngoka kee hole okupopya kombinga yaKalunga?

¹⁰ Aantu oyendji oya halelela onakuyiwa ombwanawa. Ihe nonando ongawo, oyendji oya tila kutya evi otali ka hanagulwa po nenge kutya itaku ka vulwa we okukaliwa. Omutonateli omweendi gwokoNorway, ota ti kutya aantu mboka kaaye hole okupopya kombinga yaKalunga, olundji ohaya kala ya hala okupopya kombinga yaashoka tashi inyenge muuyuni. Konima ngele a  popitha omuntu, ohe mu pula ta ti: “Mbela onkalamwenyo onayi ka lundulukile ngaa kuuwanawa? Mbela etegameno ndyoka oli ikolelela kaanapolitika, kaanongononi nenge okomuntu gulwe?” Konima ngele a pulakene komayamukulo gawo, oha lesha nenge a tothe enyolo lyontumba ndyoka tali popi kombinga yonakuyiwa ombwanawa. Aantu yamwe ohaya kala ya kuminwa euvaneko lyOmbiimbeli kutya evi otali kala po sigo aluhe nosho wo kutya aatilikalunga otaya ka kala nomwenyo sigo aluhe kombanda yevi. — Eps. 37:29; Omuuv. 1:4.

11. Omolwashike tu na okulongitha omikalo dha yoolokathana dhokutameka oonkundathana naantu, nongiini tatu vulu okulandula oshiholelwa shaPaulus, ngaashi sha popiwa mAaroma 1:14-16?

¹¹ Otu na okulongitha omikalo dha yoolokathana dhokutameka oonkundathana naantu. Omolwashike? Omolwaashoka kehe omuntu okwi ili. Shoka sha hokiwa kugumwe otashi vulika kaashi hokiwe kumukwawo. Aantu yamwe kaye na uupyakadhi wokukundathana kombinga yaKalunga nenge Ombiimbeli, omanga yalwe ye hole okupopya iinima yakwalukehe. Kutya onkalo oyini, otu na okulongitha ompito kehe tu uvithile aantu ayehe. (Lesha Aaroma 1:14-16.) Odhoshili kutya natu dhimbulukwe kutya Jehova oye ha ningitha oshili yi koke mwaamboka ye hole shoka sha uka. — 1 Kor. 3:6, 7.

12. Oshike tatu vulu okuninga tu adhe omitima dhaantu mboka ya za koAsia, mboka inaaya dhiladhila nando onale kombinga yOmushiti?

¹² Muuyuni auhe, aauvithi oyendji ohaya tsakanene naantu mboka ya za koAsia, mwa kwatelwa naamboka ya za kiilongo hoka omapangelo ga indika omalongelokalunga. Miilongo yimwe moAsia, aantu oyendji inaya dhiladhila nando onale muule ngele oku na Omushiti. Yamwe ohaya ulike ohokwe nohaya zimine ya konakone Ombiimbeli, ihe yalwe ohaya kakadhala oku shi ninga. Oshike tatu vulu okuninga tu adhe omitima dhawo? Aauvithi yamwe ya pyokoka, oye shi pondola mokutameka oonkundathana kombinga yiinima yakwalukehe nokuulika kutya oye na ko nasha nayo. Shimwe ishewe, oku ya kuthila ko kashona ngele otashi wapa, nkene onkalamwenyo yoye ya hwepopala sho wa tameke okutula miilonga ekotampango lyOmbiimbeli lyontumba.

13. Oshike tashi vulu okukwathela aantu ya ulike ohokwe mOmbiimbeli? (Tala ethano lyokombanda.)

¹³ Petameko, aantu oyendji ohaya ulike ohokwe muunongo mboka tawu adhika mOmbiimbeli. (Omuuv. 7:12) Omumwameme gumwe gwokoNew York, ngoka ha talele po aapopi yOshichina Oshimandarin, ota ti: “Ohandi kambadhala okuulika ohokwe maantu noku ya pulakena. Ngele onda mono kutya omuntu ngoka ontauki ompe, ohashi vulika ndi mu pule tandi ti: ‘Onkalo oyi li ngiini? Owa mona po tuu uulonga? Aantu yomoshitopolwa otaya ungaunga ngaa nawa nangoye?’” Omathimbo gamwe, okupula omapulo ngoka ohaku shi ningitha oshipu wu kundathane nomuntu kombinga yOmbiimbeli. Ngele otashi vulika, omumwameme ota vulu okupula ta ti: “Oshike tashi vulu oku tu kwathela tu kale naantu nombili? Nandi ku ulukile eyeletumbulo limwe mOmbiimbeli? Otali ti: ‘Okutameka ondokosho okwa fa okupanuna omeya; onkee ano loteka oontamanana, manga inaadhi tukuka.’ Mbela omayele ngaka otaga vulu ngaa oku tu kwathela tu kale tu na ekwatathano ewanawa nayalwe?” (Omayel. 17:14) Oonkundathana dha tya ngawo, otadhi vulu oku tu kwathela tu mone kutya aantu yeni ye na ohokwe, opo tu ninge omaishunoko.

14. Omumwatate gumwe gwokUuzilo woKokule oha kwathele ngiini aantu mboka haya ti kutya inaya itaala muKalunga?

¹⁴ Ongiini kombinga yaantu mboka haya ti kutya inaya itaala muKalunga? Omumwatate gumwe ngoka a pyokoka mokuuvithila aantu yokUuzilo woKokule, mboka kaaye li melongelokalunga lyontumba, ota ti: “Shampa omuntu a ti kutya ‘inandi itaala muKalunga,’ paulelalela okwa hala okutya, ye ina itaala miikalunga mbyoka aantu momudhingoloko gwawo haya longele. Onkene ohandi tsu kumwe nayo kutya iikalunga oyindji oya ningwa kaantu nokayi shi yoshili. Olundji ohandi ya  leshele Jeremia 16:20 ndjoka tayi ti: ‘Omuntu ota vulu tuu okwiihambulila ookalunga? Aawe, ngele ote shi ningi, kaye shi ookalunga.’ Opo ihe, ohandi ya pula tandi ti: ‘Ongiini tatu vulu okuyoolola pokati kaKalunga kashili niikalunga?’ Ohandi ya pulakene nuukeka, e tandi ya leshele Jesaja 41:23, ndjoka tayi ti: ‘Tu lombweleni, onakuyiwa shoka tayi tu etele, opo tu ka tseye kutya one ookalunga!’ Opo nduno, ohandi ya ulukile oshiholelwa shankene Jehova a hunganeka kombinga yonakuyiwa.”

15. Oshike tatu vulu okwiilonga komumwatate gumwe gwokoAsia lyokUuzilo?

¹⁵ Omumwatate gumwe muAsia lyokUuzilo, uuna ta ningi omaishunoko, oha longitha efalomo tali landula. Ota ti: “Ohandi ya ulukile iiholelwa yuunongo wOmbiimbeli, omahunganeko gOmbiimbeli ngoka ga gwanithwa nosho wo oompango ndhoka hadhi pangele eshito. Opo nduno, ohandi ya ulukile nkene iinima ayihe mbika tayi ulike kutya oku na Omushiti omunandunge. Uuna omuntu a zimine kutya Kalunga oko e li shili, ohandi mu ulukile shoka Ombiimbeli tayi ti kombinga yaJehova.”

16. Okutala kAahebeli 11:6, omolwashike aakonakonimbiimbeli ya pumbwa okukala ye na eitaalo muKalunga nomOmbiimbeli, nongiini tatu vulu oku ya kwathela ye shi ninge?

¹⁶ Uuna tatu konakona Ombiimbeli naantu mboka kaaye li melongelokalunga lyontumba, otwa pumbwa okutsikila oku ya kwathela ya kale yi itaala kutya Kalunga oko e li. (Lesha Aahebeli 11:6.) Otwa pumbwa wo oku ya kwathela ya kale ye na eitaalo lya kola mOmbiimbeli. Shika otashi vulika shi tu pule tu kale hatu endulula iitsa yontumba iikando niikando. Pekonakono kehe, otashi vulika twa pumbwa okukundathana uumbangi mboka tawu ulike kutya Ombiimbeli Oohapu dhaKalunga. Shika otashi vulika shi kwatele mo oonkundathana paufupi kombinga yomahunganeko gOmbiimbeli ngoka ga gwanithwa, nkene Ombiimbeli tayi tsu kumwe nuunongononi nondjokonona nosho wo nkene hayi tu kwathele monkalamwenyo yetu yakehe esiku.

17. Okuulukila aantu ohole, ohashi ya gumu ngiini?

¹⁷ Ohatu kwathele aantu ya ninge aalongwa yaKristus, moku ya ulukila kutya otu ya hole, kashi na nduno mbudhi kutya oye li melongelokalunga lyontumba nenge hasho. (1 Kor. 13:1) Uuna tatu ya longo, elalakano lyetu olyo oku ya ulukila kutya Kalunga oku tu hole nokwa hala tu kale tu mu hole. Omumvo kehe, aantu omayovi mboka ya li nale kaaye na naanaa ohokwe nenge kaaye na nando ohokwe momalongelokalunga, ohaya ninginithwa, molwaashono oyi ilongo okukala ye hole Kalunga. Onkee ano, kala wu na etaloko ewanawa nokuulika kutya owu na ko nasha naantu ayehe. Ya pulakena nokukambadhala oku ya uva ko. Ya longa ya vule okukala aalongwa yaKristus, okupitila moshiholelwa shoye.