1. Jehova okwa ningi po shike nziya konima sho Adam naEva ya yono? (Genesis 3:15)

 NZIYA konima sho Adam naEva ya yono, Jehova okwa pe oluvalo lwawo etegameno okupitila mehunganeko lya simana. Shoka a popi mehunganeko ndyoka otashi adhika muGenesis 3:15. — Lesha.

2. Omolwashike ehunganeko ndika lya simana?

² Ehunganeko ndyoka otali adhika muGenesis. Ihe omambo galwe gOmbiimbeli oga popya wo sha momikalo dhilwe kombinga yalyo. Ngaashi owala ongodhi hayi mangele kumwe iikuni, Genesis 3:15 okwa kwatakanitha oohapu dhomambo agehe gOmbiimbeli kumwe, ano kutya Kalunga ota ka tuma Omuhupithi, ngoka te ya a hanagule po Ondiyapoli naalanduli ye ayehe. * Shoka otashi ka kala lela eyambeko enene kwaamboka ye hole Jehova.

3. Oshike tatu ka kundathana moshitopolwa shika?

³ Moshitopolwa shika, otatu ka yamukula omapulo taga landula kombinga yehunganeko ndyoka li li muGenesis 3:15: Oolye ya popiwa mehunganeko ndyoka? Ehunganeko ndyoka olya gwanithwa po ngiini? Notali vulu ngiini oku tu etela uuwanawa?

4. Olye “eyoka,” notu shi shi ngiini?

⁴ MuGenesis 3:14, 15 omwa popiwa “eyoka,” “oluvalo” lweyoka, ‘omukiintu’ nosho wo “oluvalo” lwomukiintu. Ombiimbeli  otayi tu kwathele tu tseye kutya oolye naanaa taya popiwa. * Natu tamekeni ‘neyoka.’ Eyoka lyolela kalya li tali vulu okuuva ko shoka Jehova a popi moshikunino shaEden. Onkee ano, eyoka ndyoka lya li lya pewa egeelo kuJehova oli na okukala oshishitwa oshinandunge. Jehova okwa li lela ta popi nalye? Ehololo 12:9 olya yelitha kutya eyoka olye. Menyolo ndyoka, “eyoka” olya popiwa kutya olyo Satana Omuhindadhi. Ihe olye oluvalo lweyoka?

5. Oolye oluvalo lweyoka?

⁵ Uuna Ombiimbeli tayi popi oluvalo lwopathaneko, olundji otayi popi mboka haya dhiladhila nohayi ihumbata ngaashi omuntu ngoka ya tala ko kutya oye he yawo. Onkee ano, oluvalo lweyoka, aayengeli mboka kaaye shi aadhiginini naantu mboka ngaashi Satana, ye li ompinge naJehova Kalunga naalongeli Ye. Shoka osha kwatela mo wo aayengeli mboka ya li ye ya kombanda yevi pethimbo lyaNoa nosho wo aantu mboka haya ihumbata ngaashi he yawo Omuhindadhi. — Gen. 6:1, 2; Joh. 8:44; 1 Joh. 5:19; Jud. 6.

6. Omolwashike Eva haaye ‘omukiintu’ ngoka a popiwa muGenesis 3:15?

⁶ Ngashingeyi natu ka taleni kutya ‘omukiintu’ olye. Itashi vulika a kale Eva. Omolwashike mbela? Natu tale ketompelo limwe. Ehunganeko olya ti kutya oluvalo lwomukiintu otalu ka “nyanyagula” omutse gweyoka. Ngaashi twa zi nokukundathana, eyoka olyo oshishitwa shopambepo, Satana, nokapu na omuntu inaa gwanenena ta vulu oku mu nyanyagula. Satana ota ka hanagulwa po nduno ngiini?

7. Ngaashi sha popiwa mEhololo 12:1, 2, 5 no 10, olye omukiintu ngoka a popiwa muGenesis 3:15?

⁷ Embo lyEhololo olye tu hololela kutya omukiintu ngoka a popiwa muGenesis 3:15 olye. (Lesha Ehololo 12:1, 2, 5, 10.) Omukiintu ngoka ke li kombanda yevi! Ombiimbeli  otayi ti kutya omwedhi ogu li kohi yoompadhi dhe noku na oshishani shoonyothi omulongo nambali komutse gwe. Okwa vala okanona hoka inaaka fa uunona uukwawo, ano Uukwaniilwa waKalunga. Uukwaniilwa mboka owomegulu, onkee omukiintu ngoka naye oku na okukala gwomegulu. Oku lile po oshitopolwa shehangano lyaJehova shomegulu shoka sha thikama po maayengeli ye aadhiginini. — Gal. 4:26.

8. Olye oluvalo lwa simanenena lwomukiintu, nokwa ningi oluvalo uunake? (Genesis 22:15-18)

⁸ Oohapu dhaKalunga otadhi tu kwathele wo tu tseye kutya olye oluvalo lwomukiintu. Oluvalo ndwoka olwa li talu ka za mezimo lyaAbraham. (Lesha Genesis 22:15-18.) Ngaashi sha hunganekwa, Jesus okwa ka za mezimo lyaAbraham, omulumentu ngoka omudhiginini. (Luk. 3:23, 34) Ihe oluvalo ndoka lwa popiwa mehunganeko olwa li lu na okukala olunankondo lela, oshoka olwa li talu ka nyanyagula po Satana Omuhindadhi. Sho Jesus a li e na omimvo 30 lwaampono, okwa gwayekwa nombepo ondjapuki. Sho Jesus a gwayekwa, okwa ningi oluvalo lwa simanenena lwomukiintu. (Gal. 3:16) Konima sho Jesus a si e ta yumudhwa, Kalunga okwe mu “pe eadhimo ngaashi omukwaniilwa.” Okwe mu pe wo “epangelo alihe megulu nokombanda yevi” mwa kwatelwa uuthemba “a hanagule po iilonga yOmuhindadhi.” — Heb. 2:7; Mat. 28:18; 1 Joh. 3:8.

9-10. (a) Oolye wo ye li yamwe yomoluvalo lwomukiintu, nuunake haya tameke okukala yamwe yomoluvalo ndwoka? (b) Oshike tatu ka kundathana ngashingeyi?

⁹ Ihe kakele kuJesus, yalwe wo oya li taya ka kala oshitopolwa sholuvalo lwomukiintu. Omuyapostoli Paulus okwa li a popi kombinga yoshitopolwa shoka sholuvalo ndwoka sho a lombwele Aajuda nosho wo aagwayekwa mboka kaaye shi Aajuda a ti: “One ngele oyaKristus, nena one aana yaAbraham notamu ka pewa shoka Kalunga e shi uvaneka.” (Gal. 3:28, 29) Uuna Jehova a gwayeke Omukriste nombepo ondjapuki, omuntu ngoka oha ningi gumwe gwomoluvalo lwomukiintu. Onkee ano, oluvalo lwomukiintu oJesus naapangeli pamwe naye 144 000. (Eh. 14:1) Ayehe ohaya kambadhala okuholela He yawo, Jehova Kalunga.

¹⁰ Ngashingeyi otwa mona kutya oolye lela ya popiwa muGenesis 3:15. Natu ka kundathaneni nduno nkene Jehova a ende ta gwanitha po ehunganeko ndyoka kashona nakashona, nankene tatu mono mo uuwanawa.

11. Omeityo lini oluvalo lwomukiintu lwa li talu ka tsuwa “moshithi”?

¹¹ Shi ikolelela kehunganeko lyaGenesis 3:15, eyoka olya li tali ka tsa oluvalo lwomukiintu “moshithi.” Shoka osha gwanithwa sho Satana a longitha Aajuda nAaroma ya dhipage Omwana gwaKalunga. (Luk. 23:13, 20-24) Ngaashi owala omuntu ihaa vulu okweenda nawa uule wokathimbo ngele e na oshilalo koshithi, eso lyaJesus nalyo olya li lye mu ningitha kaa vule okuninga sha uule wokathimbo sho a li mombila omasiku gatatu. — Mat. 16:21.

12. Ongiini nuunake omutse gweyoka tagu ka nyanyagulwa?

¹² Ehunganeko lyaGenesis 3:15 otali ulike kutya Jesus ka li ta ka kala mombila sigo aluhe. Omolwashike mbela? Omolwaashoka ehunganeko ndyoka olya ti kutya oluvalo lwomukiintu otalu ka nyanyagula omutse gweyoka. Shoka otashi ulike kutya Jesus okwa li e na okuyumudhwa kuusi. Naashoka osho a li a ningilwa! Konima yomasiku gatatu sho a si, Jesus okwa yumudhwa e li oshishitwa shopambepo ihaashi si. Peuthwathimbo lyaKalunga, Jesus ota ka nyanyagula po Satana sigo aluhe. (Heb. 2:14) Mboka taya ka pangela pamwe naKristus otaye  ke mu wayimina mokuhanagula po aatondi ayehe yaKalunga mboka ye li oluvalo lweyoka. — Eh. 17:14; 20:4, 10. *

13. Sho Jesus a tsuwa moshithi, ohatu mono ngiini uuwanawa megwanitho lyehunganeko ndyoka?

¹³ Ngele owu li omupiya gwaJehova, nena oto mono nale uuwanawa mehunganeko ndyoka. Jesus okwa li e ya kombanda yevi e li omuntu. Okwa li a holele thiluthilu omaukwatya gaHe. (Joh. 14:9) Onkee ano, okwiilonga kombinga yaJesus otaku vulu oku tu kwathela tu tseye notu kale tu hole Jehova Kalunga. Otwa mona wo uuwanawa momalongo gaJesus nomewiliko lye lyegongalo lyopaKriste kunena. Okwe tu longa nkene tu na okukala nonkalamwenyo ndjoka tayi tu kwathele tu kale twa hokiwa kuJehova. Atuhe otatu vulu okumona uuwanawa, sho a tsuwa moshithi nenge tu tye sho a si. Ngiini mbela? Sho Jesus a yumudhwa kuJehova, okwa gandja ombinzi ye yi li eyambo ndjoka ‘tayi tu yogo oondjo dhetu adhihe.’ — 1 Joh. 1:7.

14. Otu shi shi ngiini kutya ehunganeko ndyoka Jehova a li a gandja moshikunino shaEden kalya li tali ka gwanithwa po nziya pethimbo ndyoka? Shi yelitha.

¹⁴ Oohapu ndhoka Jehova a li a popi muEden otadhi ulike kutya opwa li tapu ka pita ethimbo, opo ehunganeko ndyoka li gwanithwe po thiluthilu. Opwa li tapu ka pita ethimbo, opo omukiintu a mone oluvalo, Ondiyapoli yi gongele aalanduli yayo, nopokati koongundu ndhoka mbali pu holoke uutondwe. Ngele otu uvite ko nawa ehunganeko ndyoka ohashi tu kwathele, molwaashoka otali tu londodha kutya uuyuni mbuka tawu pangelwa kuSatana, otawu ka kala wu tonde aalongeli yaJehova. Jesus naye lwanima okwa pe aalongwa ye elondodho lya faathana. (Mark. 13:13; Joh. 17:14) Kapu na omalimbililo kutya otwa kala tu wete nkene ehunganeko ndyoka lya kala tali gwanithwa, unene tuu momukokomoko gwomimvo 100 dha ka pita. Ngiini mbela?

15. Omolwashike uuyuni wu tu tonde shi vulithe nale, nomolwashike kaatu na okukala twa tila Satana?

¹⁵ Nziya konima sho Jesus a langekwa po e li Omukwaniilwa gwopaMesiasa mo 1914, Satana oku umbwa mo megulu. Ngashingeyi ina pitikwa we okuya megulu nokwa ngambekelwa kombanda yevi, hoka a tegelela a ka hanagulwe po. (Eh. 12:9, 12) Ihe kombanda yevi ke li ko itaa ningi sha. Satana oku udha ondjahi nota ponokele aalongeli yaJehova. (Eh. 12:13, 17) Nomolwaashono uuyuni waSatana wu tu tonde shi vulithe nale. Ihe katu na okukala twa tila Satana naalanduli ye. Pehala lyaashono, otatu vulu okukala twa tompwa ngaashi omuyapostoli Paulus ngoka a li a nyola a ti: “Kalunga ngele oku li kombinga yetu, olye ta tsu ondumbo natse?” (Rom. 8:31) Otatu vulu okukala twi inekela Jehova thiluthilu, molwaashoka ngaashi twe shi mona, konyala ehunganeko alihe ndyoka lyaGenesis 3:15 olya gwanithwa nale.

16-18. Curtis, Ursula naJessica oya mono ngiini uuwanawa sho ya uva ko nawa Genesis 3:15?

¹⁶ Euvaneko lyaJehova ndyoka tali adhika muGenesis 3:15 otali vulu oku tu kwathela tu idhidhimikile eshongo kehe ndyoka tashi vulika li tu adhe monkalamwenyo. Omumwatate Curtis, ngoka e li omutumwa moGuam, okwa ti: “Omathimbo nomathimbo, onda kala nokupita moonkalo ndhoka dha li dha yeleke uudhiginini wandje muJehova. Ihe sho nda tedhatedha kehunganeko lyaGenesis 3:15, osha kwathela ndje ndi kale ndi inekela Tate gwomegulu.” Omumwatate Curtis okwa tegelela nondjuulukwe esiku ndyoka Jehova ta ka hulitha po omaudhigu getu agehe.

 ¹⁷ Omumwameme gwokoBavaria gwedhina Ursula okwa ti kutya sho a uvu ko nawa Genesis 3:15, oshe mu kwathela lela a kale a tompwa kutya Ombiimbeli oya nwethwa mo shili kuKalunga. Okwa mona nkene omahunganeko galwe ga kwatathana nehunganeko ndyoka, naashoka oshe mu kumitha lela. Okwa popi wo a ti: “Ondi ilongo kutya Jehova okwa li a katuka onkatu meendelelo, opo tu kale tu na etegameno, shoka sha ningitha ndje ndi kale ndi mu hole unene.”

¹⁸ Omumwameme Jessica gwokoMicronesia, okwa ti: “Natango otandi dhimbulukwa nkene nda li ndi uvite sho nda mono kutya onda mona oshili! Ehunganeko ndyoka tali adhika muGenesis 3:15 olya li tali gwanithwa. Shoka osha kwathela ndje ndi mone kutya kali shi ehalo lyaJehova sho hatu mono iihuna kunena. Ehunganeko ndyoka olya kwathela ndje wo ndi kale nda tompwa thiluthilu kutya ngele otandi longele Jehova, otandi kala ndi na onkalamwenyo ombwanawa ngashingeyi, nomonakuyiwa onkalamwenyo yandje otayi ka kala lela ya dhenga mbanda.”

19. Omolwashike tatu vulu okukala nuushili kutya oshitopolwa sha hugunina shehunganeko lyaGenesis 3:15 otashi ka gwanithwa?

¹⁹ Ngaashi twe shi mona, Genesis 3:15 ngashingeyi ota gwanithwa. Otwa mona kutya oluvalo lwomukiintu noluvalo lweyoka oolye. Jesus, ngoka e li oluvalo lwa simanenena lwomukiintu, okwa aluka sho a li a tsuwa moshithi, nongashingeyi oku li Omukwaniilwa omunankondo ngoka kee na siku a se. Masiku Jehova oku li pokumana okuhogolola ayehe mboka taya ka pangela pamwe naJesus megulu. Molwaashoka oshitopolwa shotango shehunganeko ndyoka osha gwanithwa, otatu vulu okukala nuushili kutya oshitopolwa shalyo sha hugunina, ano okunyanyagulwa kwomutse gweyoka masiku otaku ka gwanithwa. Otashi ka kala lela epepelelo kwaamboka aadhiginini kuKalunga uuna Satana a hanagulwa po. Manga esiku ndyoka tali ya, natu tsikile okwiidhidhimika. Kalunga ketu omwiinekelwa. Okupitila moluvalo lwomukiintu, ota ka laleka nuuyamba “aantu yomiigwana ayihe.” — Gen. 22:18.