Paul okwa ti: “Sho omumwamemegona a tameke okukondja nangame, onde mu kwata pothingo, e tandi mu pondo. Onda li nda hala oku mu dhipaga.”

Marco okwa ti: “Onda li handi geye nokuli nomuunima uushona. Onda li wo handi teyagula iinima megumbo.”

Oyendji yomutse otashi vulika haasho tu li ngawo. Ihe omathimbo gamwe ohashi kala oshidhigu okwiipangela. Shika osho shi li ngawo, molwaashoka otwa thigulula okwaagwanenena komuntu gwotango, Adam. (Rom. 5:12) Yamwe ohaya mono oshidhigu okupangela ondjahi yawo, ngaashi Paul naMarco. Yamwe otashi vulika haya mono oshidhigu okupangela omadhiladhilo gawo. Pashiholelwa, ohaya kala taya dhiladhila kombinga yiinima mbyoka tayi ya tilitha nenge tayi ya teya omukumo. Shimwe ishewe, yalwe otashi vulika ye shi mone oshidhigu okukondjitha ehalo lyokuya momilalo dha nyata, lyokunwa sha pitilila nosho wo lyokulongitha iingangamithi.

Mboka ihaaya pangele okudhiladhila kwawo, omahalo gawo noonkatu dhawo, ohaya yono po onkalamwenyo yawo. Ihe shoka otatu vulu oku shi yanda. Ngiini mbela? Omokukala hatu ipangele. Opo tu vule oku shi ninga, natu ka kundathaneni omapulo gatatu: (1) Eipangelo oshike? (2) Omolwashike lya simanenena? (3) Ongiini tatu vulu okukokeka uukwatya mboka wu li shimwe ‘shomiiyimati yombepo’? (Gal. 5:22, 23) Opo nduno, otatu ka kundathana shoka tatu vulu okuninga pauhandimwe, ngele omathimbo gamwe ihatu vulu okwiipangela.

Omuntu ngoka e na eipangelo, iha ningi kehe shimwe shoka tashi ya momadhiladhilo ge. Pehala lyaashono, oha yanda okupopya nenge okuninga iinima mbyoka Kalunga kee hole.

Jesus okwe tu ulukila kutya eipangelo olya kwatela mo shike. Ombiimbeli otayi ti: “Ina tuka mboka ye mu tuku; naasho a hepekwa, ina sa ondjahi, ihe okwi inekele Kalunga, omupanguli omuyuuki.” (1 Pet. 2:23) Sho Jesus a li e endjelela komuti gwomahepeko okwa li u ulike eipangelo, sho ta shekwa kaapataneki ye. (Mat. 27:39-44) Okwa li wo u ulike eipangelo, sho aawiliki yomalongelokalunga ya li taya kambadhala oku mu yula noohapu. (Mat. 22:15-22) Ka li tuu a tula po oshiholelwa oshiwanawa, sho Aajuda yamwe ya li ya kutha omamanya ye mu dhenge! Pehala lyoku ya shunithila uuwinayi, “Jesus okwa holama nokwa zi mo motempeli.” — Joh. 8:57-59.

Mbela otatu vulu ngaa okulandula oshiholelwa shaJesus? Eeno otatu vulu. Omuyapostoli Petrus okwa nyola a ti: “Kristus wo okwa hepekwa omolweni nokwe mu thigila oshiholelwa, opo mu landule ondjila ndjoka a li e yi ende.” (1 Pet. 2:21) Nonando inatu gwanenena, otatu vulu okulandula oshiholelwa shaJesus shokukala neipangelo. Omolwashike sha simanenena tu shi ninge?

Otwa pumbwa okukala tu na eipangelo, opo tu kale twa hokiwa kuJehova. Nokuli nando otwa longela Jehova nuudhiginini uule wethimbo, uukuume wetu naye otawu vulu okuteka po, ngele ihatu pangele okupopya kwetu noonkatu dhetu.

Natu taleni koshiholelwa shaMoses, ngoka a li “omulumentu omwiifupipiki e vule aantu ayehe kombanda yevi,” pethimbo lye. (Num. 12:3) Konima yomimvo odhindji, sho Moses a kala ti idhidhimikile omanyenyeto gAaisraeli, okwa nyengwa okwiipangela. Okwa geye sho ya li taya nyenyeta ishewe, omolwomeya ngoka ga li kaage po. Okwa li e yu ula a ti: “Pulakeneni, ne aatangalali! Natu mu kuthile omeya memanya ndika?” — Num. 20:2-11.

Moses okwa li a nyengwa okwiipangela. Ka li a gandja esimano kuJehova, ngoka oye a gandja omeya pashikumithalonga. (Eps. 106:32, 33) Oshilanduliko, Jehova ine mu pitika a ye mEvi lyEuvaneko. (Num. 20:12) Otashi vulika sigo okeso lye a kala ti ipe uusama, sho ini ipangela. — Deut. 3:23-27.

Oshiilongomwa osho kutya nokuli nonando otwa kala moshili uule wethimbo, katu na nando okukala hatu popi nondhino naamboka taye tu ningile nayi nenge mboka taye tu pukulula. (Ef. 4:32; Kol. 3:12) Odhoshili kutya sho tatu ende tatu koko, otashi vulika tu kale ihaatu vulu naanaa okwiidhidhimika. Ihe natu dhimbulukwe oshiholelwa shaMoses. Inatu hala nando okuyona po ekwatathano lyetu ewanawa naJehova, omolwokwaaipangela. Oshike tatu vulu okuninga, opo tu kale tu na uukwatya mbuka wa simanenena?

Galikana wu pewe ombepo ondjapuki. Omolwashike mbela? Omolwaashoka eipangelo oli li shimwe shomiiyimati yombepo yaKalunga, niishewe, Jehova oha gandja ombepo ye kwaamboka taye mu pula. (Luk. 11:13) Jehova ota vulu oku tu pa oonkondo ndhoka twa pumbwa okupitila mombepo ye ondjapuki. (Fil. 4:13) Ota vulu wo oku tu kwathela tu kokeke iiyimati yilwe yombepo, ngaashi ohole, ndjoka tayi ke tu kwathela tu kale tu na eipangelo. — 1 Kor. 13:5.

Yanda shaa shoka tashi vulu oku shi ningitha oshidhigu wu kale wu na eipangelo. Pashiholelwa, kala kokule nomapandja gokointaneta nenge omainyanyudho ngoka taga humitha komeho eihumbato lya nyata. (Ef. 5:3, 4) Uushili owo kutya otu na okuyanda kehe shoka tashi vulu oku tu yonitha. (Omayel. 22:3; 1 Kor. 6:12) Pashiholelwa, omuntu ngoka e shi kutya oha vulu okumakelwa nuupu a ye momilalo dha nyata, otashi  vulika a pumbwa okukala kokule thiluthilu nomambo ngoka ga nika iihole nosho wo oomuvi.

Otashi vulika tu mone oshidhigu okutula miilonga omayele ngoka. Ihe ngele otwa ningi ngaashi tatu vulu, Jehova ote ke tu pa oonkondo tu vule okwiipangela. (2 Pet. 1:5-8) Ote ke tu kwathela tu vule okupangela omadhiladhilo getu, okupopya noonkatu dhetu. Paul naMarco mboka ya popiwa metetekelo, nayo oya li ya kwathelwa, molwaashoka ayehe oya ka vula okukala haya pangele ongeyo yawo. Natu taleni wo koshiholelwa shomumwatate gumwe ngoka a li ha kala a geela aahingi ooyakwawo, nokwa li nokuli ha tamanana nayo. Okwa ningi po shike? Okwa ti: “Onda kala handi galikana nuudhiginini esiku kehe. Onda kala wo handi konakona iitopolwa tayi popi kombinga yeipangelo nondi ilongo momutse oovelise dhomOmbiimbeli ndhoka tadhi vulu okukwathela ndje. Nonando uunkundi mbuka onda kala tandi kondjo nawo uule womimvo, ongula kehe ohandi itulile po elalakano lyokukala nda ngungumana. Uuna ndi na omazepo, ohandi meneka, opo kaandi kale ndi wete tandi dhikwa kuyalwe mondjila.”

Omathimbo gamwe otatu ka nyengwa okuulika eipangelo. Uuna shoka sha ningwa, otashi vulika tu kale twa sa ohoni okugalikana Jehova. Ihe ndika olyo ethimbo twa pumbwa okukala tatu galikana twa mana mo. Onkee ano, galikana kuJehova meendelelo. Mu pula e ku dhimine po, konga ekwatho lye, e to kala wa tokola kuu endulule epuko ndyoka. (Eps. 51:9-11) Ino dhiladhila kutya Jehova ita ka pulakena kungoye. (Eps. 102:17) Omuyapostoli Johannes okwe tu dhimbulukitha kutya ombinzi yOmwana gwaKalunga, “otayi tu yogo oondjo dhetu adhihe.” (1 Joh. 1:7; 2:1; Eps. 86:5) Dhimbulukwa kutya Jehova okwa lombwela aapiya ye ya kale haya dhiminathana po. Onkene otatu vulu okukala neinekelo kutya naye osho te ke tu ningila. — Mat. 18:21, 22; Kol. 3:13.

Jehova ka li e shi nyanyukilwa, sho Moses pompito yimwe mombuga a li inaa ulika eipangelo. Nonando ongawo, Jehova okwe mu dhimine po. Oohapu dhaKalunga otadhi popi Moses kutya oku li oshiholelwa sha dhenga mbanda sheitaalo. (Deut. 34:10; Heb. 11:24-28) Jehova ka li a pitike Moses a ye mEvi lyEuvaneko, ihe ote ke mu yumudha mOparadisa noku mu pa etegameno lyomwenyo gwaaluhe. Natse otatu vulu okukala tu na etegameno ndyoka, ngele otwa longo nuudhiginini tu kokeke uukwatya mboka wa simanenena, weipangelo. — 1 Kor. 9:25.