1-2. (a) Masiku iigwana otayi ka igidha shike? (b) Omapulo geni ga pumbwa okuyamukulwa?

DHILADHILA andola iigwana ya igidha ‘ombili negameno,’ eigidho ndyoka lya kala lya hunganekwa. Otashi vulika yi itange kutya uuyuni ngashingeyi owu na ombili lela. Iigwana otayi ka kala ya hala twi itaale kutya otayi vulu okukandula po omaupyakadhi gaantu. Ihe itayi ka vula okukeelela shoka tashi ka landula ko. Omolwashike? Omolwaashoka Ombiimbeli oya hunganeka kutya ‘ehanagulo otali ya adha ohaluka noitaya ka vula okuya ontuku.’ — 1 Tes. 5:3.

² Opu na omapulo ga simana ngoka ga pumbwa omayamukulo, ngaashi: Oshike tashi ka ningwa po ‘puudhigu uunene’? Pethimbo ndyoka, Jehova ota ka kala a tegelela tu ninge shike? Nongiini tatu vulu okwiilongekidha ngashingeyi, opo tu ka kale aadhiginini puudhigu uunene? — Mat. 24:21.

3. Shi ikolelela kEhololo 17:5, 15-18, Kalunga ota ka hanagula po ngiini “Babilon oshinene”?

³ Lesha Ehololo 17:5, 15-18. “Babilon oshinene” otashi ka hanagulwa po. Ngaashi sha popiwa metetekelo, iigwana itayi ka vula okukeelela shoka tashi ka ningwa pethimbo ndyoka. Omolwashike? “Oshoka Kalunga [ota ka] pendutha moomwenyo dhawo ehalo lye.” Ehalo ndyoka olini? Olyo okuhanagula po omalongelokalunga giifundja agehe, mwa kwatelwa omalongelokalunga  gUukwakriste. * Kalunga ota ka pendutha ehalo lye moomwenyo ‘dhooniga omulongo’ ‘dhoshilikama oshitiligane.’ Ooniga omulongo otadhi thaneke omapangelo omanankondo agehe ngoka haga ambidhidha “oshilikama,” ano Iigwana ya Hangana. (Eh. 17:3, 11-13; 18:8) Uuna omapangelo ngoka ga pilukile omalongelokalunga giifundja, shoka osho tashi ka kala endhindhiliko kutya uudhigu uunene owa tameka. Otashi ka kala oshiningwanima oshitilithi lela shili.

4. (a) Omatompelo geni iigwana tashi vulika yi ka longithe, yi ponokele omalongelokalunga giifundja? (b) Mboka ya li iilyo yago, otashi vulika ya ka ninge shike?

⁴ Katu shi kutya iigwana otayi ka longitha omatompelo geni, opo yi ponokele Babiloni Oshinene. Otashi vulika yi ka tye kutya omalongelokalunga otaga imbi pu kale ombili nohagi idhopo miinima yopapolitika. Nenge tashi vulika yi ka tye kutya omalongelokalunga ngoka ogi indumbila unene eliko olindji nosho wo iiniwe. (Eh. 18:3, 7) Osha fa shi li ngeyi kutya hailyo ayihe yomalongelokalunga ngoka tayi ka hanagulwa po. Pehala lyaashono, osha fa shi li ngeyi kutya iigwana otayi ka hulitha po omahangano gopalongelokalunga. Uuna ga hulithwa po, mboka ya li iilyo yago, otaya ka dhimbulula kutya oya ningililwa mo kugo notaye ki ikaleka kokule nago.

5. Jehova okwa uvaneka shike kombinga yuudhigu uunene, nomolwashike?

⁵ Ombiimbeli inayi popya kutya ehanagulo lyaBabiloni Oshinene otali ka kwata uule wethimbo li thike peni, ihe otu shi kutya itali ka kwata ethimbo ele. (Eh. 18:10, 21) Jehova okwa uvaneka kutya ota ka “fupipika omasiku ngoka,” opo a hupithe ‘aahogololwa’ ye nosho wo elongelokalunga lyashili. (Mark. 13:19, 20) Ihe Jehova ota ka tegelela tu ninge shike pokati kuudhigu uunene niita yaArmagedon?

6. Omolwashike okwiiteta ko komalongelokalunga giifundja inaaku gwana?

⁶ Ngaashi sha kundathanwa moshitopolwa sha zi ko, Jehova okwa tegelela aalongeli ye yi ikaleke kokule naBabiloni Oshinene. Nonando  ongawo, shoka osha kwatela mo oshindji kaashi shi owala okwiiteta ko komalongelokalunga giifundja. Otu na okukala twa tokola toko tu kakatele kelongelokalunga lyashili, ano elongelokalunga lyaJehova lya yogoka. Natu ka tale komikalo mbali moka tatu vulu oku shi ninga.

7. (a) Ongiini tatu vulu okutsikila okukala hatu vulika komithikampango dhaJehova dhopamikalo dhi li pauyuuki? (b) Aahebeli 10:24, 25, otaya tsu ngiini omuthindo esimano lyokugongala pamwe, unene tuu ngashingeyi?

⁷ Gwotango, otu na okutsikila okukala aadhiginini komithikampango dhaJehova dhopamikalo dhi li pauyuuki. Katu na okutaamba ko eihumbato ewinayi lyuuyuni. Pashiholelwa, katu na okukutha ombinga moluhondelo lwoludhi kehe, mwa kwatelwa okuya mondjokana naantu yuukashikekookantu wa faathana nowetu nosho wo uushenge woludhi lulwe. (Mat. 19:4, 5; Rom. 1:26, 27) Omutiyali, otu na okutsikila okulongela Kalunga pamwe nAakriste ooyakwetu. Shika otu na oku shi ninga kehe mpoka tu li, kutya nduno omIinyanga yUukwaniilwa, omomagumbo uuna sha pumbiwa nenge nokuli meholamo. Kutya nduno otwi iyadhe moonkalo dha fa peni, katu na okweetha po okugongala pamwe, tu longele Jehova. Otwa pumbwa okugongala pamwe, “unene sho tu wete esiku lyOmuwa tali hedha popepi.” — Lesha Aahebeli 10:24, 25.

8. Etumwalaka lyetu otashi vulika li ka lunduluke ngiini monakuyiwa?

⁸ Puudhigu uunene, etumwalaka ndyoka hatu uvitha, otashi vulika li ka lunduluke. Ngashingeyi, ohatu uvitha onkundana ombwanawa yUukwaniilwa nohatu kambadhala okuninga aantu aalongwa. Ihe pethimbo ndyono, etumwalaka ndyoka tatu ka gandja otashi vulika li ka lulumike ngaashi oompawe. (Eh. 16:21) Otashi vulika tu ka uvithe kutya uuyuni waSatana owu li pokuhanagulwa po thiluthilu. Mokweendela ko kwethimbo, otatu ka mona kutya etumwalaka ndyoka otali ka kala lya tya ngiini nongiini tatu ke li gandja. Mbela otatu ka longitha omikalo ndhoka twa kala hatu longitha omimvo omathele dha ka pita, tu gwanithe po uukalele wetu? Nenge otatu ka longitha omikalo dhilwe? Katu shi wo. Kutya nduno otatu ke shi ninga momukalo guni, osha fa shi li ngeyi kutya otatu ka uvitha nuulaadhi etumwalaka lyaJehova lyepangulo. — Hes. 2:3-5.

9. Otashi vulika iigwana yi ki inyenge ngiini ketumwalaka lyetu, ihe otatu vulu okukala nuushili wuni?

⁹ Etumwalaka lyetu otashi vulika li ka ningithe iigwana yi kambadhale oku tu keelela kaatu uvithe we. Ngaashi owala twi inekela Jehova e tu ambidhidhe miilonga yokuuvitha ngashingeyi, nopethimbo ndyoka otatu ka kala twa pumbwa eyambidhidho lye. Otatu vulu okukala nuushili kutya Kalunga ote ke tu udhitha ombepo ye, tu longe ehalo lye. — Mika 3:8.

10. Ngaashi sha hunganekwa muLukas 21:25-28, aantu oyendji otaye ki inyenga ngiini kwaashoka tashi ka ningwa puudhigu uunene?

¹⁰ Lesha Lukas 21:25-28. Pethimbo lyuudhigu uunene, aantu otaya ka kumwa sho ye wete iinima ayihe mbyoka ya li taya dhiladhila kutya otayi ka kala po sigo aluhe, itaayi ende we nawa. Otaya ka kala ‘muudhigu,’ ya tila omolwoomwenyo dhawo, sho ye li methimbo edhigu inaali monika nando onale mondjokonona. (Sef. 1:14, 15) Pethimbo ndyoka, onkalamwenyo otashi vulika yi ka kale ondhigu noonkondo nokuli nokoshigwana shaJehova. Molwaashoka otatu ka tsikila okukala kaatu shi oshitopolwa shuuyuni, otashi vulika tu ki iyadhe momaupyakadhi gontumba. Otashi vulika tu ka kale kaatu na iinima yontumba mbyoka twa pumbwa.

11. (a) Omolwashike Oonzapo dhaJehova tadhi ka kala odho dha odhekwa? (b) Omolwashike kaatu na okukala twa tila uudhigu uunene?

¹¹ Otashi vulika aantu mboka omalongelokalunga gawo ga hanagulwa po, ya kale ya geela Oonzapo dhaJehova, sho elongelokalunga lyadho  inaali hanagulwa po. Dhiladhila owala kwaashoka taya ka ninga, ya tseyithile aantu nkene ye uvite, ngaashi okupitila kointaneta. Iigwana nomupangeli gwayo, Satana, otaye ke tu tonda, molwaashoka elongelokalunga lyetu olyo owala lya hupa po. Itaya ka vula okutsakanitha elalakano lyawo lyokuhulitha po omalongelokalunga agehe kombanda yevi. Onkee ano, otatu ka kala oshoodhekwa shawo. Pompito ndjono, iigwana otayi ka ninga Gog yaMagog. * Otayi ki imanga kumwe yi ponokele nonyanya oshigwana shaJehova. (Hes. 38:2, 14-16) Otashi vulika tu tameke okwiipula kutya oshike tashi ka ningwa puudhigu uunene, molwaashoka katu shi naanaa kutya oshike sha kwatelwa mo. Nonando ongawo, otatu vulu okukala nuushili kutya inatu pumbwa okutila uudhigu uunene. Jehova ote ke tu pa omalombwelo ngoka tu na okulandula, opo tu hupithwe. (Eps. 34:19) Otatu ka vula ‘okuyelutha omitse dhetu, tu ukilila,’ molwaashoka otu shi kutya ‘ehupitho lyetu lya thiki popepi.’ *

12. ‘Omupiya omudhiginini nomunandunge’ okwa kala ngiini noku tu kwathela tu ilongekidhile shoka tashi ka ningwa monakuyiwa?

¹² ‘Omupiya omudhiginini nomunandunge’ okwa kala noku tu longekidha, opo tu ka kale aadhiginini nopuudhigu uunene. (Mat. 24:45, yelekanitha NW.) Shika osha kala nokuningwa momikalo odhindji. Natu taleni oshiholelwa shimwe: iipopiwa yiigongi yetu yoshitopolwa yomomumvo 2016-2018. Otwa kala nokuladhipikwa okupitila muyo tu kokeke omaukwatya ngoka twa pumbwa, sho esiku lyaJehova tali hedha popepi. Natu taleni ishewe paufupi omaukwatya ngoka.

13. Ongiini tatu vulu okukala aadhiginini kuJehova shi vulithe nale, nomolwashike twa pumbwa oku shi ninga ngashingeyi?

¹³ Uudhiginini: Oshipalanyolo shoshigongi shoshitopolwa shomo 2016, osha li “Kala omudhiginini kuJehova!” Poshigongi shoka otwa li twa longwa kutya ngele otwa kala tu na ekwatathano lya kola naJehova, otatu ka kala aadhiginini kuye. Otwa li twa dhimbulukithwa kutya otatu vulu okuhedha popepi naJehova okupitila megalikano tali zi komutima nomokukonakona nuukeka Oohapu dhe. Ngele otwe shi ningi, otashi tu koleke tu vule okupita nokuli nomomashongo omanene. Sho uuyuni waSatana wu li pokuhula po, otwa tegelela uudhiginini wetu kuJehova nokUukwaniilwa we, wu ka makelwe shi vulithe nale. Aantu otashi vulika ya ka tsikile oku tu sheka. (2 Pet. 3:3, 4) Shika otashi vulika shi ka ningwe, unene tuu sho ihaatu kutha ombinga miinima yomuuyuni waSatana. Otu na okukoleka uudhiginini wetu ngashingeyi, opo tu ka kale aadhiginini puudhigu uunene.

14. (a) Elunduluko lini tali ka ningwa po shi na ko nasha naamwatate mboka haya kwatele komeho kombanda yevi? (b) Omolwashike tatu ka pumbwa okukala aadhiginini pethimbo ndyoka?

¹⁴ Puudhigu uunene, otapu ka ningwa omalunduluko ge na ko nasha naamboka haya kwatele komeho kombanda yevi. Otapu ke ya ethimbo, uuna aagwayekwa ayehe mboka ye li kombanda yevi, taya ka gongelwa ya ye megulu, opo ya ka kuthe ombinga miita yaArmagedon. (Mat. 24:31; Eh. 2:26, 27) Shika otashi ti kutya kombanda yevi itaku ka kala we Olutuwiliki. Nonando ongawo, ongundu onene otayi ka tsikila okukala ya unganekwa. Aamwatate ya  pyokoka yomoonzi dhilwe otaya ka kwatela komeho. Otatu ka pumbwa okuulika uudhiginini wetu, mokwaambidhidha aamwatate mboka nomokulandula ewiliko lyaKalunga ndyoka taye tu pe. Okuhupithwa kwetu otaku ki ikolelela kwaashoka.

15. Ongiini tatu vulu okukoleka uudhiginini wetu, nomolwashike oku shi ninga ngashingeyi kwa simana?

¹⁵ Eidhidhimiko: Oshipalanyolo shoshigongi shoshitopolwa shomo 2017 osha li, “Ino teka omukumo!” Oshigongi shoka osha li she tu kwathele tu tsikile okwiidhidhimikila omamakelo. Otwa li twi ilongo po kutya okwiidhidhimika kwetu inaku ikolelela koonkalo oombwanawa. Otatu vulu okukoleka eidhidhimiko lyetu, mokukala twi inekela muJehova. (Rom. 12:12) Inatu dhimbwa nando shoka Jesus e tu uvanekela, sho a ti: “Ngoka ti idhidhimike sigo ehulilo, ota hupithwa.” (Mat. 24:13) Euvaneko ndika otali ti kutya natu tsikile okukala aadhiginini, nonando otwi iyadhe momashongo ga fa peni. Ngele otwa kala hatu idhidhimikile eshongo kehe ngashingeyi, otashi vulu oku tu kwathela tu kale tu na eitaalo lya kola, manga uudhigu uunene inaawu ya.

16. Oshike tashi vulu oku tu kwathela tu kale aalaadhi, nongiini tatu vulu okukala aalaadhi ngashingeyi shi vulitha nale?

¹⁶ Uulaadhi: Oshipalanyolo shoshigongi shoshitopolwa shomo 2018, osha li: “Kala omulaadhi!” Oshigongi shika osha li she tu kwathele tu dhimbulukwe kutya itatu vulu okukala aalaadhi kutse yene. Ngaashi naanaa hatu vulu okwiidhidhimika kekwatho lyaJehova, nuulaadhi washili otatu vulu owala okukala tu wu na, uuna twe mu inekela. Ongiini tatu vulu okukala twe mu inekela shi vulithe nale? Omokukala hatu lesha Oohapu dhe esiku kehe nomokutedhatedha kunkene a li a hupitha oshigwana she monakuziwa. (Eps. 68:20; 2 Pet. 2:9) Sho iigwana tayi ke tu ponokela pethimbo lyuudhigu uunene, otatu ka pumbwa okukala aalaadhi notwi inekela muJehova shi vulithe nale. (Eps. 112:7, 8; Heb. 13:6) Ngele otwa kala twi inekela muJehova ngashingeyi, otatu ka kala tu na uulaadhi mboka twa pumbwa, sho Gog te ke tu ponokela. *

17. Omolwashike kaatu na okutila Armagedon? (Tala ethano lyokombanda.)

¹⁷ Ngaashi sha popiwa moshitopolwa sha tetekele,  oyendji yomutse otwa valwa momasiku gahugunina. Ihe otu na wo etegameno lyoku ka hupa puudhigu uunene. Piita yaArmagedon, uuyuni waSatana otawu ka hulithwa po thiluthilu. Nonando ongawo, inatu pumbwa okukala twa tila. Omolwashike? Omolwaashoka Jehova oye ta ka kondja, ihe hatse. (Omayel. 1:33; Hes. 38:18-20; Sak. 14:3) Uuna Jehova a gandja elombwelo, Jesus Kristus ota ka kwatela komeho etangakwiita Lye, opo ya ye molugodhi. Ote ke shi ninga pamwe naagwayekwa nosho wo naayengeli omayovi omilongo. Otaya ka kondjitha Satana, oompwidhuli dhe nosho wo etangakwiita lyawo lyokombanda yevi. — Dan. 12:1; Eh. 6:2; 17:14.

18. (a) Jehova okwa uvaneka shike? (b) Ehololo 7:9, 13-17, otali tu kwathele ngiini tu kale tu na einekelo kombinga yonakuyiwa?

¹⁸ Jehova okwa uvaneka a ti: “Oshikondjitho kehe tashi hambulwa shi ku kondjithe, itashi tompola sha.” (Jes. 54:17) “Engathithi” lyaapiya yaJehova aadhiginini, otali ka ‘pita mo momahepeko ngoka omanene’ nenge tu tye muudhigu uunene! Aapiya ye otaya ka tsikila oku mu longela. (Lesha Ehololo 7:9, 13-17.) Ombiimbeli itayi tu pe tuu omatompelo ogendji gokukala neinekelo kutya otatu ka hupithwa monakuyiwa! Otu shi kutya ‘Jehova oha gamene aayinekeli ye.’ (Eps. 31:23) Ayehe mboka ye hole Jehova nohaye mu tanga, otaye ke shi nyanyukilwa oku mu mona ta yukipalitha edhina lye eyapuki. — Hes. 38:23.

19. Etegameno ewanawa lini tu na, li na ko nasha nonakuyiwa yetu yi li popepi?

¹⁹ Dhiladhila ando kunkene Timoteus omutiyali 3:2-5 tadhi lesha, andola odha li tadhi popi iikala yaantu muuyuni uupe, mboka inaaya nwethwa mo kuSatana. (Tala oshimpungu “ Iikala yaantu monakuyiwa.”) Omumwatate George Gangas, * ngoka a li oshilyo shOlutuwiliki, okwa tile: “Uuyuni itawu ka kala tuu ehala ewanawa, ando aantu ayehe oya li taya ningi aamwatate naamwameme! Masiku oto ka kala wu na uuthembahenda wokukala muuyuni uupe. Oto ka kala nomwenyo ngaashi Jehova. Otatu ka kala nomwenyo sigo aluhe.” Ndyoka kali shi tuu etegameno ewanawa!