OSHIKANDO shimwe Jesus okwa popile a ti: “Okugandja oku na elago ku vule okutaamba.” (Iil. 20:35) Oshili ndjoka otayi tu kwathele tu kale tu na ekwatathano naJehova. Omolwashike mbela? Jehova okwe tu pa omagano ogendji ngoka hage tu nyanyudha, ihe otatu vulu okumona enyanyu enene moku mu pa wo omagano. Omagano geni tatu vulu okupa Jehova? Omayeletumbulo 3:9 otayi ti: “Simanekitha Omuwa miinima yoye.” ‘Iinima’ yetu oya kwatela mo ethimbo lyetu, iipewa yetu, oonkondo dhetu niiniwe yetu. Uuna tatu longitha iinima mbyoka tu humithe komeho elongelokalunga lyashili, otatu pe Jehova omagano, nokuninga ngaaka ohaku tu etele enyanyu enene.

Ngele tashi ya piiniwe yetu, oshike tashi vulu oku tu kwathela tu pe Jehova omagano? Omuyapostoli Paulus okwa li a lombwele Aakorinto ya “yoolole iimaliwa yasha” yomayambidhidho. (1 Kor. 16:2) Oshike to vulu okuninga, ngele owa hala okumona uuyelele wa gwedhwa po kombinga yankene to vulu okugandja omayambidhidho moshitopolwa sheni? Tala oshimpungu tashi landula.

Okugandja omayambidhidho okupitila mointaneta, ihaku longo miilongo ayihe. Nonando ongawo, kepandja lyetu lyokointaneta oku na uuyelele kombinga yomikalo dhilwe dhokugandja omayambidhidho. Iilongo yimwe oyi na ko omayamukulo gomapulo ngoka haga pulwa olundji, kombinga yokugandja omayambidhidho.