1, 2. Omathiminiko geni aagundjuka kunena ya taalela, noonkatu dhini taya vulu okukatuka yu ungaunge nago?

OMUNASIKOLA gumwe ngoka ha sikola pamwe nomumwameme omugundjuka gwokoBritania, okwa ti: “Oto monika wu na oondunge lela noino pumbwa okwiitaala muKalunga.” Omumwatate gumwe gwokoNdowishi, okwa nyola a ti: “Aalongisikola yetu oya tala ko ehokololo lyOmbiimbeli kombinga yeshito li li ongano. Oye wete kutya oshi li owala mondjila ya kale yi itaala melongo lyoevolusi.” Omumwameme gumwe omugundjuka gwokoFulaanisa, okwa ti: “Aalongisikola yetu oya li ya kumwa lela okumona kutya opu na natango aalongwa yamwe mboka yi itaala mOmbiimbeli.”

² Mbela wu li omupiya gwaJehova omugundjuka nenge opo to ilongo kombinga Ye, oho kala wu uvite to thiminikwa wu itaale shoka shi itaalwa apuhe, ngaashi elongo lyoevolusi, pehala lyokwiitaala kutya oku na Omushiti? Ngele osho, opu na shoka tashi vulu oku ku kwathela wu nkondopaleke eitaalo lyoye noku li kaleka lya kola. Onkatu yotango, longitha oondunge ndhoka Kalunga e ku pa, ano ‘owino ndjoka tayi ke ku tonatela.’ Otayi ke ku gamena komalongo gopantu gomuuyuni mbuka, ngoka taga vulu okuyonagulula po eitaalo lyoye. — Lesha Omayeletumbulo 2:10-12.

3. Oshike tatu ka kundathana moshitopolwa shika?

 ³ Eitaalo lyashili olya kankamena kontseyo yashili kombinga yaKalunga. (1 Tim. 2:4) Sho to lesha Oohapu dhaKalunga niileshomwa yetu yopaKriste, ino lesha mo owala to tondoka. Longitha oondunge nomadhiladhilo goye, opo wu ‘uve ko’ shoka to lesha. (Mat. 13:23) Natu tale nkene okuninga ngaaka taku vulu oku ku kwathela wu koleke eitaalo lyoye mOmbiimbeli nomuKalunga, ngoka e li Omushiti. Opu na uuyelele owundji mboka tawu ku kwathele wu kale wu na “einekelo lya kola.” — Heb. 11:1.

4. Omolwashike okwiitaala kombinga yaKalunga nosho wo kombinga yaampoka pwa za omwenyo kwa kwatela mo eitaalo, noshike tu na okuninga, opo tu thike pehulithodhiladhilo lyomondjila?

⁴ Owu uvile nale omuntu ta ti: “Ondi itaala moevolusi, oshoka aanongononi oya ti kutya oshinima shoshili. Omolwashike ndi na okwiitaala muKalunga, ngele kapu na ngoka e mu mona?” Aantu oyendji oye na eitaalo ndyoka. Ihe osha simana tu kaleke oshinima shika momadhiladhilo: Kutya nduno aantu oyi itaala muKalunga nenge omoevolusi, ayehe oye na eitaalo. Ngiini mbela? Kapu na nando ogumwe gwomutse a mona Kalunga nenge a li po sho iinima ya shitwa. (Joh. 1:18) Kapu na omuntu kutya nduno aanongononi ya mona nkene omwenyo tagu holoka po okuza moshinima shilwe. Pashiholelwa, kapu na ngoka a mona eyoka nenge oshiyengele tashi lundulukile monkoshi nenge mondjamba. (Job 38:1, 4) Onkee ano, atuheni otu na okukonakona uushili mboka wu li po nokulongitha oondunge dhetu nomadhiladhilo getu, opo tu thike pehulithodhiladhilo lyomondjila. Omuyapostoli Paulus okwa nyola kombinga yeshito a ti: “Okuza Kalunga sho a shiti uuyuni, nando oye iha monika, okwa holola puuyelele oonkondo dhe dhaaluhe nuukalunga we. Aantu otaa vulu okukoneka Kalunga miinima mbyoka e yi shiti. Onkee itaa vulu okwiipopila.” — Rom. 1:20.

5. Tu li aapiya yaJehova, otwa dheulwa ngiini tu longithe oondunge dhetu dhokuyoolola?

⁵ ‘Okuuva ko’ oshinima osha hala okutya okumona oshinima shoka ihaashi monika aluhe nziya nuupu. (Heb. 11:3) Onkee ano, aantu mboka ye na oondunge ohaya longitha omadhiladhilo gawo, pehala lyokulongitha owala omeho nomakutsi gawo. Ehangano lyaJehova olye tu pa iilongitho oyindji mbyoka yi na uuyelele wa pekwapekwa nawa, yi tu kwathele. Otayi vulu oku tu kwathela tu ‘mone’ Omushiti gwetu nomeho getu geitaalo. (Heb. 11:27) Iilongitho mbyoka ongaashi: okavidio The Wonders of Creation Reveal God’s Glory, okambo Was Life Created?, okambo The Origin of Life—Five  Questions Worth Asking nosho wo embo Is There a Creator Who Cares About You? Ohatu mono wo uuyelele uuwanawa miifo yetu. Oshifo sho-Awake! aluhe ohashi kala shi na omapulapulo ngoka ga ningwa naanongononi nosho wo nayalwe mboka ya hokolola kutya omolwashike ngashingeyi yi itaala muKalunga. Iitopolwa mbyoka hayi ithanwa “Mbela oshinima shika osha shitwa?” (hayi kala moshiingilisa) oya kala nokugandja iiholelwa yiinima iikumithi mbyoka hatu mono meshito. Aanongononi ohaya kambadhala olundji okuholela iinima mbyoka yi li meshito.

6. Uuwanawa wuni hawu zi mokulongitha iilongitho mbyoka tu na, nowa mona mo uuwanawa wuni paumwene?

⁶ Omumwatate gwomimvo 19 gwokoAmerika, okwa popi kombinga yuumbo uyali mboka wa tumbulwa metetekelo a ti: “Uumbo mbuka owa kwathela ndje noonkondo. Onde wu konakona iikando oyindji.” Omumwameme gumwe gwokoFulaanisa, okwa nyola a ti: “Iitopolwa yedhina “Mbela oshinima shika osha shitwa?” (hayi kala moshiingilisa) ohayi kumitha ndje noonkondo. Ohayi ulukile ndje kutya nonando aantu mboka ye na uunongo oya kambadhale okuholela eshito, kapu na siku ya holele thiluthilu iinima yomeshito mbyoka ya kitakana.” Aavali yomugundjuka gwomimvo 15 yomoSouth Africa, oya ti: “Oshinima shotango shoka omwanakadhona gwetu ha lesha aluhe mo-Awake! oshitopolwa shomapulapulo.” Ongiini kombinga yoye? Mbela oho longitha ngaa omasiloshimpwiyu ngaka pakuudha? Otaga vulu okukwathela eitaalo lyoye li kale lya fa omuti gu na omidhi dha ya muule. Kungawo, eitaalo lyoye otali ke ku kwathela wu kale wa kolelela kuu falwafalwe komalongo giifundja ngoka ga fa ombepo onene. — Jer. 17:5-8.

7. Omolwashike Kalunga a hala wu ilonge nowu igilile okuyoolola shoka shu uka nenge sha puka?

⁷ Mbela osha puka okupula omapulo ga simana kombinga yOmbiimbeli? Aawe. Jehova okwa hala wu ‘ilonge nowu igilile okuyoolola shoka shu uka nenge sha puka,’ opo wu shilipaleke kutya shoka wi itaala oshoshili. Ina hala wu itaale oshinima, molwaashoka owala yalwe ye shi itaala. Onkee ano, longitha oondunge nomadhiladhilo goye, opo wu mone ontseyo yashili. Ontseyo ndjoka otayi vulu okukala ekankameno lya kola lyeitaalo lyashili. (Lesha Aahebeli 5:14; 1 Timoteus 2:4.) Omukalo gumwe moka to vulu okumona ontseyo ndjoka, omokukala wi itulila po iinima mbyoka to vulu okukonakona.

8, 9. (a) Iinima yimwe yini tashi vulika yamwe ya nyanyukilwe okukonakona? (b) Yamwe oya mona uuwanawa wuni sho ya dhiladhila muule kwaashoka ya konakona?

⁸ Yamwe ohaya hogolola okukonakona iinima yontumba ya tale ngele oyi li paushili ngaashi omahunganeko gOmbiimbeli, ondjokonona, omalafululo niinima yopaunongononi. Ehunganeko limwe ekumithi ndyoka to vulu okukonakona ongaashi ndyoka li li muGenesis 3:15. Ovelise ndjoka otayi popi kombinga yenenedhiladhilo lyOmbiimbeli. Enenedhiladhilo ndyoka olyo okuyukipalithwa kuunamapangelo waKalunga nokuyapulithwa kwedhina lye okupitila mUukwaniilwa. Ovelise ndjoka oya longitha oohapu dhopathaneko, opo yi holole nkene Jehova ta ka hulitha po okumona iihuna akuhe hoka aantu ya kala nokumona okuza poshikunino shaEden. Ongiini to vulu okukonakona Genesis 3:15? Omukalo gumwe gwoku shi ninga ogwo okuthaneka oshuuliki shethimbo lyiiningwanima. Oto vulu okunyola omusholondondo gwomanyolo ngoka tagu ulike nkene Jehova kashona nakashona a holola kutya aantu mboka taya popiwa mo oolye nankene elandulathano lyiiningwanima lya li. Oto vulu wo okunyola po omanyolo ngoka taga ulike nkene ehunganeko ndyoka tali ka gwanithwa. Sho to mono nkene omanyolo ngoka taga tsu kumwe, oto ka thika pehulithodhiladhilo kutya aahunganeki naanyoli yOmbiimbeli oya li ‘ya wilikwa kombepo ondjapuki.’ — 2 Pet. 1:21.

⁹ Omumwatate gumwe gwokoNdowishi okwa li a dhiladhila kunkene omambo agehe mOmbiimbeli ge na uuyelele kombinga yUukwaniilwa. Okwa ti: “Nonando Ombiimbeli oya nyolwa owala kaalumentu 40, oyendji yomuyo oya li ko pomathimbo ga yoolokathana nokaya li ya tseyathana.” Omumwameme gumwe gwokoAustralia, okwa li a gumwa koshitopolwa shokukonakonwa mOshungolangelo yo 15 Desemba 2013, shoka sha li tashi popi  kombinga yeityo lyOpaasa. Oshiningwanima shika shi ikalekelwa osha li shi na ekwatathano naGenesis 3:15 nosho wo nokuya kwaMesiasa. Omumwameme ngoka okwa nyola a ti: “Oshitopolwa shoka osha kwathele ndje ndi mone kutya Jehova omwaanawa shili. Sho a dhiladhila okuninga po elongekidho ndyoka molwAaisraeli nosho wo sho lya gwanithwa po okupitila meso lyaJesus, osha kumitha ndje noonkondo. Onda li nda mwena po e tandi dhiladhila muule kunkene Opaasa ndjoka yopathaneko ya li oshituthi oshiwanawa shili.” Omolwashike omumwameme nguka a li u uvite ngawo? Okwa li a dhiladhila muule kombinga yaashoka a lesha e te shi “uvu” ko. Shoka oshe mu kwathele a koleke eitaalo lye nokuhedhe popepyeelela naJehova. — Mat. 13:23.

10. Uushili waanyoli yOmbiimbeli ohawu koleke ngiini eitaalo lyetu mwaashoka ya nyola?

¹⁰ Oshinima shimwe shoka tashi koleke eitaalo lyetu osho okutala kuulaadhi nuushili waalumentu mboka ya nyola Ombiimbeli. Aanyoli oyendji yonale oya li haya mbembeleke aawiliki yawo nohaya tanga omapangelo gawo. Ihe aahunganeki yaJehova oya kala aluhe haya popi oshili. Oya li ya nyola kombinga yomapuko gaantu yawo nogaakwaniilwa yawo. (2 Ondjal. 16:9, 10; 24:18-22) Oya li wo ya nyola sha yela kombinga yomapuko gawo yene nosho wo gayalwe mboka haya longele Jehova. (2 Sam. 12:1-14; Mark. 14:50) Omumwatate gumwe omugundjuka gwokoBritania, okwa ti: “Okupopya oshili kwa tya ngawo okwa pumba noonkondo. Uushili waanyoli yOmbiimbeli otawu tu kwathele tu kale twi itaala kutya Ombiimbeli oya za shili kuJehova.”

11. Aagundjuka otaya vulu ngiini okukala ye na olupandu omolwomakotampango gOmbiimbeli?

¹¹ Aantu oyendji oya tompwa kutya Ombiimbeli oya nwethwa mo kuKalunga, oshoka oyi na omakotampango ngoka hage tu wilike. (Lesha Episalomi 19:7-11.) Omumwameme gumwe omugundjuka gwokoJapani, okwa nyola a ti: “Sho yaandjetu ya tula miilonga shoka Ombiimbeli tayi longo, oshe tu etele enyanyu. Otwa kala tu na ombili, uukumwe nohole.” Omakotampango gOmbiimbeli ohage tu gamene kaatu kuthe ombinga momalongelokalunga giifundja nohage tu gamene kiidhila mbyoka ya pika oyendji. (Eps. 115:3-8) Mbela omalongo ngoka haga ti kutya Kalunga ke ko ohaga gumu ngaa aantu? Omalongo ngaashi elongo lyoevolusi ohali ningitha eshito li kale lya fa kalunga nohali ningitha eshito li kale lya fa li na oonkondo ndhoka dhi niwe owala kuJehova. Mboka haya ti kutya Kalunga ke ko ohaya ti kutya onakuyiwa yetu oyi li miikaha yetu yene. Kungawo, itaya pe aantu etegameno lya sha lyonakuyiwa. — Eps. 146:3, 4.

12, 13. Omukalo guni omwaanawa gwokukundathana kombinga yeshito nenge yOmbiimbeli naanasikola ooyakweni, naalongi yoye nenge nayalwe?

¹² Ongiini to vulu okupondola mokutompathana nayalwe kombinga yeshito noyOmbiimbeli? Tango, ino endelela okuthika pehulithodhiladhilo kutya owu shi shoka yalwe yi itaala. Aantu yamwe otashi vulika ya tye kutya oyi itaala moevolusi, ihe oyu uvite kutya Kalunga oko e li. Ohaya dhiladhila kutya Kalunga okwa longitha oevolusi a shite iinima. Yalwe ohaya ti kutya oyi itaala moevolusi, molwaashoka oyu uvite kutya ando oya li kaayi shi oshinima shoshili, ando inaye yi longwa mosikola. Omanga yamwe inaaya itaala we muKalunga, oshoka oyu uvithwa nayi komalongelokalunga. Onkee ano, uuna to kundathana nomuntu kutya omwenyo ogwa zi peni, otashi ka kala pandunge wu mu pule tango omapulo. Uva kutya omuntu ngoka okwi itaala shike. Ngele owu na ondjele nowu na ehalo lyokupulakena, naye ota ka kala a hala oku ku pulakena. — Tit. 3:2.

¹³ Ngele omuntu ote ku pataneke molwaashoka wi itaala kutya iinima oya shitwa, oto vulu oku mu pula nuukeka a popye kutya ye okwi itaala shike. Oto vulu oku mu pula kutya mbela onkalamwenyo oya tameke ngiini ngele kapu na Omushiti? Opo oshinima shotango shoka sha shitwa shi tsikile okukala nomwenyo, osha li shi na okukala tashi vulu okuvala. Omuprofesoli gwuudhindoli gumwe okwa ti kutya iinima yimwe mbyoka sha pumbwa ongaashi (1) oshipa shoku shi gamena, (2) oshi na okukala tashi vulu okumona oonkondo noku dhi longitha, (3) uuyelele mboka tawu vulu okutholoma  po eholokopo lyasho noku shi kwathela shi koke (4) okukala tashi vulu okuningulula uuyelele mboka. Okwa gwedha ko wo a ti: “Omuntu oho kala wa kumwa kunkene niinima mbyoka yanathangwa meshito, ya kitakana.”

14. Oshike to vulu okuninga ngele owu uvite kutya ino ilongekidha nawa okukundathana kombinga yoevolusi nenge yeshito?

¹⁴ Ngele owu uvite kutya ino ilongekidha nawa okukundathana kombinga yoevolusi nenge yeshito, kambadhala okulongitha omukalo gwanathangwa gwokutompathana, ngoka Paulus a longitha. Okwa nyola a ti: “Egumbo kehe oli na omutungi gwalyo, ihe ngoka a tungu ayihe, oKalunga.” (Heb. 3:4) Oshiholelwa shika oshi shi okuuviwa ko notashi longo. Otashi ulike kutya iinima mbyoka ya kitakana meshito oya shitwa komuntu e na oondunge dha shiga ko. Oto vulu wo okulongitha oshileshomwa tashi opalele. Omumwameme gumwe okwa li a longitha uumbo mboka wa popiwa metetekelo, a tompathane nomulumentu omugundjuka ngoka a ti kutya ini itaala kutya Kalunga oko e li nokwa taamba ko elongo lyoevolusi. Konima yoshiwike lwaampono, omulumentu ngoka okwa zimine a ti: “Ngashingeyi ondi itaala muKalunga.” Shika osha fala sigo omekonakonombiimbeli nomulumentu ngoka okwa ningi Onzapo yaJehova.

15, 16. Ongiini to vulu okuhwepopaleka omukalo moka ho kundathana nayalwe kombinga yOmbiimbeli, nowu na okukala nelalakano lini?

¹⁵ Oto vulu okulongitha omakotampango ga faathana, uuna to popi nagumwe ngoka e na omalimbililo kombinga yOmbiimbeli. Mona kutya okwi itaala shike nosho wo kutya iikundathanwa yini tashi vulika a kale e na ohokwe muyo. (Omayel. 18:13) Ngele oku na ohokwe miinima yopaunongononi, otashi vulika a ka pulakene ngele owe mu ulukile kutya shoka Ombiimbeli ya popya kombinga yuunongononi oshoshili. Aantu yalwe otashi vulika ye ki inyengithwe kiiholelwa mbyoka tayi ulike kutya Ombiimbeli oyi na omahunganeko nondjokonona ndjoka yi li paushili. Nenge tashi vulika wu ulukile omuntu omakotampango gopaMbiimbeli ngoka taga vulu oku tu wilika, ngaashi ngoka taga adhika mEuvitho lyokOndundu.

¹⁶ Dhimbulukwa kutya elalakano lyoye okwaadha omitima dhaantu, ihe haku tamanana nayo. Onkee ano, kala ho pulakene nawa. Pula omapulo omawanawa e to popi neifupipiko nonesimaneko, unene tuu ngele oto popi naakuluntu. Shoka otashi ke ya ningitha ya kale ya simaneka shoka to popi. Otaya ka mona wo kutya owa dhiladhila muule kombinga yaashoka wi itaala. Oshinima shoka aagundjuka oyendji inaye shi ninga. Ihe osha simana okukaleka momadhiladhilo kutya ino pumbwa okuyamukula mboka taye ku tamaneke nenge mboka taya sheke shoka wi itaala. — Omayel. 26:4.

17, 18. (a) Oshike tashi vulu oku ku kwathela wu ninge oshili yoye mwene? (b) Epulo lini tatu ka kundathana moshitopolwa tashi landula?

¹⁷ Okukala neitaalo lya kola inaku ikolelela owala kokukala wu shi oshili yopetameko yOmbiimbeli. Onkee ano, konakona muule Oohapu dhaKalunga, wa fa to kongo eliko lya holekwa. (Omayel. 2:3-6) Longitha nawa iilongitho mbyoka wu na melaka lyoye, ngaashi o-Watchtower Library ndjoka yi li moka-CD-ROM, ONGULUMAMBO MOINTANETA yiileshomwa yopaMbiimbeli nosho wo Watch Tower Publications Index nenge Embo lyokukonga uuyelele lyOonzapo dhaJehova. Oto vulu wo okwiitulila po elalakano lyokulesha Ombiimbeli ayihe. Otashi vulika wu kambadhale oku shi ninga muule womvula. Iinima ngaashi okulesha Oohapu dhaKalunga, otayi vulu okukoleka eitaalo lyoye. Omutonatelishikandjo gumwe ota dhimbulukwa nkene okulesha Ombiimbeli kwa li kwe mu kwathele sho a li omugundjuka. Okwa ti: “Oshinima shimwe shoka sha li sha kwathele ndje ndi pandule Ombiimbeli yi li Oohapu dhaKalunga, osho oku yi lesha ayihe. Omahokololo gOmbiimbeli ngoka ndi ilongo okuza kuunona, onda kala ndi gu uvite ko nawa. Shika osha kwathele ndje ndi koke pambepo.”

¹⁸ Aavali, otamu dhana onkandangala onene mokukwathela aanona yeni ya koke pambepo. Ongiini tamu vulu oku ya kwathela ya kale ye na eitaalo lya kola? Oshitopolwa tashi landula otashi ka kundathana kombinga yankene tamu vulu oku shi ninga.