UUNA wa hala okutseya ethimbo, oho ningi ngiini? Otashi vulika wu tale kowili kehe. Ngele kuume koye okwe ku pula kutya ongapi, oto ke mu yamukula ngiini? Opu na omikalo dhi ili nodhi ili dhokutumbula ethimbo. Odhini mbela?

Natu tye nee owili oyimwe yomutenya ya pititha ominute 30. Otashi vulika wu yamukule to ti kutya 1:30. Shi ikolelela mpoka ho zi naashoka wi igilila, otashi vulika wu yamukule kutya 13:30. Omukalo ngoka gwokutumbula ethimbo, ogwi ikolelela koludhi lwowili ndjoka wu na. Opu na wo omikalo dhilwe moka to vulu oku yi popya, ngaashi “etata lyombali,” sha hala okutya, ku na ominute 30 ombali yi dhenge.

Molwaashoka oho lesha Ombiimbeli, otashi vulika wu ipule kutya aantu yopethimbo lyOmbiimbeli oya li haya tumbula ethimbo ngiini. Kaya li owala haye li tumbula momukalo gumwe. MOmanyolo gOshihebeli omwa popiwa omathimbo ngaashi “ongula onene,” “omutenya,” “moshanga shomutenya” nosho wo “ongulohi.” (Gen. 8:11; 19:27; 43:16; Deut. 28:29; 1 Aak. 18:26) Nonando ongawo, poompito dhimwe, ethimbo olya popiwa kondandalunde.

Pethimbo lyOmbiimbeli, osha li omukalondjigilile okulongitha aalangeli. Oya li haya longithwa unene tuu uusiku. Omathelemimvo manga Jesus inaa valwa, Aaisraeli oya li ya topola uusiku momathimbo gatatu, haga ithanwa iikako. (Eps. 63:6) MAatokolihapu 7:19, omwa popiwa uutumbulilo “mokati kuusiku.” Pethimbo lyaJesus, Aajuda oya li haya longitha omathimbo gane guusiku gaGreka naRoma.

MOmavaangeli namo omwa popiwa omathimbo ngaka poompito dhimwe. Pashiholelwa, osha li “pethimbo lyokoongulasha,” sho Jesus a li a ende kombanda yomeya, a uka kowato ndjoka mwa li aalongwa ye. (Mat. 14:25) Jesus okwa popi meyele a ti: “Mwene gwegumbo ngele oku na owino kutya opethimbo lini omufuthi te ya, nena ota tonatele egumbo lye, opo lyaa gwayelwe.” — Mat. 24:43.

Jesus okwa li a ukitha komathimbo agehe gane, sho a lombwele aalongwa ye a ti: “Onkee ano tonateni, oshoka inamu tseya, uuna mwene gwegumbo te ya, ngele ongulohi nenge opokati kuusiku opokwiiga kwekondombolo nenge okoongulasha.” (Mark. 13:35) Ethimbo lyotango lya popiwa mo, “ongulohi,” ano okuza sho etango tali ningine sigo opomugoyi gwokongulohi lwaampono. Ethimbo etiyali, “opokati kuusiku,” okuza lwopomugoyi gwokongulohi sigo omokati kuusiku. Ethimbo etitatu, “opokwiiga kwekondombolo,” okuza pokati kuusiku sigo opondatu yokoongulasha lwaampono. Otashi vulika pethimbo ndyoka opo ekondombolo lya li lyi igi, uusiku mboka Jesus a li a kwatwa po. (Mark. 14:72) Ethimbo etine lyuusiku, “okoongulasha,” okuza lwopondatu yokoongulasha lwaampono sigo etango lya piti.

Onkee ano, nonando aantu kunena ohaya tala ethimbo koowili, ndhoka kaadha li ko pethimbo lyOmbiimbeli, aantu yopethimbo ndyoka oya li ye na omukalo gwoku ya kwathela ya mone kutya ethimbo lyomutenya nenge olyuusiku.