1, 2. (a) Mepingathano naantu mboka aanankondo, Jehova oha ungaunga ngiini naantu? (b) Oshike tatu ka kundathana moshitopolwa shika?

OLUNDJI aantu mboka aanankondo nosho wo aanenentu “ohaa lele” yakwawo nonyanya noku ya thindila kongudhi. (Mat. 20:25; Omuuv. 8:9) Shoka osha yooloka ko kwaashoka Jehova ha ningi. Nonando ye Omunankondoadhihe, oha yaalele aantu mboka inaaya gwanenena. Ye omunambili noku na ko nasha nayalwe. Oha ulike kutya oku na ko nasha nankene tu uvite nohe tu kwathele moompumbwe dhetu. Molwaashono “oku shi shi kutya otse ontsi yevi,” ihe tu pula shi vulithe pwaashoka itaatu vulu okuninga. — Eps. 103:13, 14.

² MOmbiimbeli omu na iiholelwa oyindji kombinga yankene Jehova ha ungaunga naapiya ye nondjaalela. Natu taleni itatu yomuyo. Shotango, omukalo omwaanawa moka Kalunga a kwathele omugundjuka Samuel a gandje etumwalaka lyepangulo kOmuyambimukuluntu, Eli. Oshitiyali, omukalo moka Jehova i idhidhimikile Moses, sho a li ta tindi okukwatela komeho oshigwana shaIsraeli. Oshititatu, onkene Kalunga a li a yaalele Aaisraeli, sho te ya tembudha muEgipiti. Sho tatu kundathana oshiholelwa kehe, natu tale shoka tashi  tu longo kombinga yaJehova nosho wo shoka tatu vulu okutula miilonga.

3. Uusiku wumwe Samuel okwa li a uvu shike, shoka inaa uva nale, naashika osha pendutha epulo lini? (Tala kethano lyopetameko.)

³ Samuel okwa tameke ta “longele Omuwa” ketsalihangano, sho omushona lela. (1 Sam. 3:1) Uusiku wumwe manga Samuel a li a kotha, oku uvu oshinima shoka inaa uva nale. * (Lesha 1 Samuel 3:2-10.) Oku uvu ewi tali ithana edhina lye. Molwaashono okwa li ta dhiladhila kutya Omuyambimukuluntu, Eli, oye te mu ithana, Samuel okwa matukile kuye, e ta ti: “Ongame nguka wi ithana.” Eli okwe mu lombwele kutya ine mu ithana. Sho Samuel a uvu ishewe ewi tali mu ithana iikando iyali, Eli okwa dhimbulula kutya Kalunga oye ti ithana Samuel. Onkene okwa lombwele Samuel nkene e na okuyamukula, na Samuel okwe shi ningi. Omolwashike Jehova inaa lombwela Samuel kutya oye te mu ithana, oshikando shotango e mu ihololele okupitila momuyengeli? Ombiimbeli inayi shi popya, ihe omukalo moka iiningwanima ya hololwa, otagu ulike kutya osha li sha simana Jehova a yaalele omugundjuka Samuel. Ngiini mbela?

4, 5. (a) Samuel okwa li i inyenge ngiini koshinakugwanithwa shoka Kalunga e mu pe, noshike sha ningwa po ongula ya ka landula? (b) Ehokololo ndika otali tu longo shike kombinga yaJehova?

⁴ Lesha 1 Samuel 3:11-18. Ompango yaJehova otayi lombwele aanona ya simaneke aakuluntu, unene tuu omuleli gwoshilongo. (Eks. 22:28; Lev. 19:32) Mbela oto dhiladhila kutya Samuel ka li a tila sho a yi kuEli ongula onene, e te mu lombwele nuulaadhi etumwalaka lyaKalunga lyepangulo? Hasho nando! Ehokololo otali tu lombwele kutya Samuel “okwa li a tila okuhokololela Eli emoniko ndyoka.” Nonando ongawo, oku ulukile Eli sha yela kutya oye a li ti ithana Samuel. Onkee ano, Eli okwa pula Samuel e mu hokololele emoniko ndyoka. Eli okwa ti: “Hokololele ndje adhihe ndhoka a ti.” Opo nduno, Samuel “okwe mu lombwele adhihe.”

⁵ Etumwalaka ndyoka kalya li naanaa lya kumitha Eli. Omolwashike mbela? Omolwaashono olya li metsokumwe naandyoka ‘lyomuhunganeki’ ngoka a li a popi naye tango, inaa tumbulwa kedhina. (1 Sam. 2:27-36) Ehokololo ndika kombinga yaSamuel naEli, otali tu ulukile kutya Jehova omunandunge noku na ondjaalela.

6. Oshike tatu ilongo momukalo moka Kalunga a li a kwathele omugundjuka Samuel?

⁶ Mbela ngoye omugundjuka? Ngele osho, ehokololo kombinga yaSamuel otali ulike kutya Jehova oha kala u uvite ko omashongo ngoka wa taalela nankene wu uvite. Otashi vulika wu na oohoni noshidhigu kungoye okuuvithila aakokele etumwalaka lyUukwaniilwa nenge okwiiyoolola ko koomakula. Shilipalekwa kutya Jehova okwa hala oku ku kwathela. Onkee ano, mu mbumbulila omutima gwoye megalikano. (Eps. 62:8) Tedhatedha kiiholelwa yomOmbiimbeli kombinga yaagundjuka ngaashi Samuel. Popya wo nAakriste ooyakweni kutya nduno aagundjuka nenge aakokele, mboka tashi vulika ya pita momashongo ngoka wa taalela. Eeno, otashi vulika ye ku lombwele kombinga yomathimbo ngoka Jehova a li e ya kwathele, tashi vulika momikalo ndhoka ya li inaaya tegelela.

7, 8. Jehova okwa li a ulike ngiini kutya okwa yaalela Moses noonkondo?

⁷ Sho Moses e na omimvo 80, Jehova okwa li e mu pe oshinakugwanithwa oshinene. Moses okwa li e na okutembudha Aaisraeli muupika waEgipiti. (Eks. 3:10) Okwa li lela a kumwa, sho a pewa oshinakugwanithwa shoka, molwaashoka okwa kala owala omusita gwoonzi  uule womimvo adhihe 40 moshilongo shaMidian. Moses okwa ti: “Ongame lye? Ote vulu ngiini okuya komukwaniilwa nokutembudha mo Aaisraeli muEgipiti?” Kalunga okwe mu shilipaleke a ti: “Ondi li pamwe nangoye.” (Eks. 3:11, 12) Oku uvaneke wo a ti: Aakuluntu yAaisraeli “otaa ka pulakena shoka to ya lombwele.” Nonando ongawo, Moses okwa yamukula a ti: ‘Pamwe itaya ka pulakena?’ (Eks. 3:18; 4:1) Moses okwa li a pataneke Jehova, ihe Jehova okwe mu idhidhimikile. Nonando ongawo, Jehova okwa tsikile noku mu kwathela. Okwe mu pe oonkondo dhokulonga iikumithalonga, noye omuntu gwotango e mu pe oonkondo ndhoka. — Eks. 4:2-9, 21.

⁸ Moses okwa tsikile okuninga omaipopilo, ta ti kutya ye ke shi okupopya. Kalunga okwe mu yamukula a ti: “Otandi ke ku popitha notandi ku lombwele shoka to ka tya.” Mbela shoka osha li sha tompo Moses? Aawe. Okwa pula Kalunga neifupipiko e mu tumine omuntu gulwe. Okuza mpoka, Jehova okwa geye. Ihe okwa tifuka. Oku ulike kutya oku na ko nasha nomaiyuvo gaMoses, nokwa hogolola Aaron a ninge omupopikalelipo gwaMoses. — Eks. 4:10-16.

9. Ongiini eidhidhimiko lyaJehova nokunakonasha kwe, ya kwathele Moses moshinakugwanithwa she?

⁹ Ehokololo ndika otali tu longo shike kombinga yaJehova? E li Kalunga Omunankondoadhihe, okwa li ta vulu oku mu tilitha a vulike kuye. Ihe pehala lyaashono, Jehova okwi idhidhimike nokwa kala omunambili, e ta kambadhala okushilipaleka omupiya gwe ngoka omwiifupipiki kutya oku li pamwe naye. Mbela shoka osha kwatha ngaa? Eeno! Moses okwa ningi omukwatelikomeho omwaanawa nokwa li a kambadhala okuungaunga nayalwe momukalo gwombili nogwokunakonasha, gwa faathana naangoka Jehova a ungaunga naye. — Num. 12:3.

10. Ongiini tatu vulu okumona mo uuwanawa, mokuholela omukalo moka Jehova ha yaalele yalwe?

¹⁰ Iiyilongomwa yini tatu vulu okutula miilonga? Mbela ngoye omusamane, omuvali nenge omukuluntugongalo? Ngele osho, owu na oshinakugwanithwa. Onkee ano, osha simana wu holele Jehova, mokukala ho yaalele yalwe,  omunambili nomwiidhidhimiki, uuna to ungaunga naamboka to sile oshimpwiyu. (Kol. 3:19-21; 1 Pet. 5:1-3) Ngele owa kambadhala okuholela Jehova nosho wo Moses Omunene, ngoka e li Jesus Kristus, oto ka kala omupu okupopiwa nangoye nowu li epepelelo kuyalwe. (Mat. 11:28, 29) Oto ka kala wo oshiholelwa oshiwanawa, shoka sha gwana okuholelwa. — Heb. 13:7.

11, 12. Sho Jehova a tembudha Aaisraeli muEgipiti, ongiini e ya kwathele ya kale yu uvite kutya oku li eshigo negameno lyawo?

¹¹ Sho Aaisraeli ya zi muEgipiti mo 1513 K.E.N., otashi vulika ya li ye vulithe poomiliyona ndatu. Mokati kawo otashi vulika mwa li mwa kwatelwa aantu yomapipi gatatu nenge gane. Omwa li aanona, aakokele, iilema naamboka taye ehama. Okukwatela komeho ongundu onene yi thike mpono, otaku pula lela Omukwatelikomeho u uvite ko noha yaalele yalwe. Jehova okwe shi ulike kutya osho e li ngawo, okupitila muMoses. Oshizemo? Aaisraeli oya li yu uvite ya gamenwa, sho ya zi muEgipiti moka ya kala uule womimvo odhindji. — Eps. 78:52, 53.

¹² Jehova oku ulike ngiini kutya oku li eshigo negameno koshigwana she? Oshinima shotango, okwe shi tembudha muEgipiti shu unganekwa nawa sha fa etangakwiita lya “homata.” (Eks. 13:18) Molwaashono Aaisraeli oya li ya hangana, shoka oshe ya kwathele ya mone kutya Kalunga oye te ya wilike. Natango, Jehova okwa li e ya ulukile kutya oku li pamwe nayo, sho ‘omutenya e ya wilike noshikogo shomuzile, nuusiku okwe ya minikile nonyeka yuuyelele.’ (Eps. 78:14) Niitya yimwe, Jehova okwa li ta ti: “Inamu tila. Ondi li pamwe nane, otandi ke mu wilika noku mu gamena.” Odhoshili kutya eshilipaleko ndyoka, oya li ye li pumbwa nziya.

13, 14. (a) Iinima yini Jehova a ningile Aaisraeli pEfuta Etiligane, mbyoka tayi ulike kutya okwa li e na ko nasha nayo? (b) Omomukalo guni Jehova a ulukile Aaegipiti kutya oku na oonkondo?

¹³ Lesha Eksodus 14:19-22. Kala ando wa fa wu iwete wu li pokati ketangakwiita lyaFarao nEfuta Etiligane. Opo nduno Kalunga okwa katuka onkatu. Oshikogo shomuzile osha lundulukile komeho yAaegipiti, e taya kala momilema, ihe osha minikile Aaisraeli. Opo ihe owa mono Moses a yeluthile okwooko kwe kefuta, nombepo ondhigu yokuuzilo oya topola omeya pokati. Ngoye, aanegumbo lyoye nosho wo iimuna yoye, omwa taaguluka mefuta puukukutu pamwe naantu yalwe mu li melandulathano. Mbalambala, owa mono oshinima shoka inoo mona nale. Mpoka omeya ga topoka, sho mwe ende po inapu yula, ihe opwa kukuta nawa nopuupu okweenda. Shoka osha ningitha nokuli oshipu kwaamboka haya ende kashona ya taagulukile handiya yefuta ya manguluka.

¹⁴ Lesha Eksodus 14:23, 26-30. Pethimbo opo tuu mpoka, Farao ngoka e na uuntsa nokwa nika uusama, okwe endelele a uka pokati komakuma gaali gomeya, ta tidha Aaisraeli. Natango, Moses okwa ganeke oshikaha she kombanda yefuta. Oshikando shika, omeya oga shuna kumwe noga li ga fa iikungulu iyali yomakuthikuthi. Farao pamwe nomatangakwiita ge ayehe, omo ya sile. — Eks. 15:8-10.

15. Ehokololo ndika otali ku longo shike kombinga yaJehova?

¹⁵ Ehokololo ndika otali tu kwathele tu mone kutya Jehova oku li Kalunga kelandulathano, uukwatya mboka tawu tu kwathele tu kale tu uvite twa shigwa notwa gamenwa. (1 Kor. 14:33) Jehova oha ulike wo kutya ye omusita omunahole, ngoka ha sile oshimpwiyu aantu ye momikalo dhi ili nodhi ili. Ohe ya shigi nohe ya gamene kaatondi yawo. Ashihe shika otashi tu shilipaleke kutya Jehova ota vulu oku tu kwathela, sho twa taalela ehulilo lyuuyuni mbuka. — Omayel. 1:33.

16. Ongiini tatu vulu okumona mo uuwanawa mokutala komukalo moka Jehova a hupitha Aaisraeli?

 ¹⁶ Jehova nokunena oha sile oshimpwiyu aantu ye pambepo nopalutu, ye li oshigwana. Ota ka tsikila wo oku shi ninga pethimbo lyuudhigu uunene, mboka wu li pokuya. (Eh. 7:9, 10) Onkee ano, kutya nduno ngoye omugundjuka nenge omukokele, oshilema nenge kuu shi oshilema, oshigwana shaKalunga itashi ka kala sha tila pethimbo lyuudhigu uunene. * Pehala lyaashono, otashi ka kala shi na omukumo. Otashi ka kaleka momadhiladhilo oohapu dhaJesus ndhika tadhi ti: “Yelutheni omitse dheni, mu ukilila nokutegelela, oshoka ehupitho lyeni lya thiki popepi.” (Luk. 21:28) Otashi ka kala shi na omukumo nokuli naasho tashi ka ponokelwa kuGog, ano etanga enene lyaakwiita aanankondo ye vule yaFarao, ya za miigwana. (Hes. 38:2, 14-16) Omolwashike oshigwana shaKalunga tashi ka kala shi na omukumo? Omolwaashono oshi shi kutya Jehova iha lunduluka. Ote ke shi ulukila natango kutya oku li Omuhupithi ngoka e na ko nasha nasho noku na ondjaalela. — Jes. 26:3, 20.

17. (a) Ongiini tatu vulu okumona mo uuwanawa miiholelwa yomOmbiimbeli, kombinga yomukalo moka Jehova ha sile oshimpwiyu oshigwana she? (b) Oshike tatu ka kundathana moshitopolwa tashi landula?

¹⁷ Iiholelwa moshitopolwa shika oyi li owala yimwe yomwaambyoka tayi tu ulukile kutya Jehova omunambili, oku na ko nasha naantu ye, ohe ya wilike nohe ya hupitha. Sho to tedhatedha kuyo, ndhindhilika omaukwatya gaKalunga ngoka wa li kuu shi. Oku shi ninga, otashi ke ku kwathela wu kale wu hole noonkondo omaukwatya ge, shoka tashi ka koleka ohole yoku mu hola nosho wo eitaalo muye. Moshitopolwa tashi landula, otatu ka kundathana omikalo moka tatu vulu okuholela Jehova, mokuyaalela yalwe megumbo, megongalo nomuukalele.