Molwaashono ohatu gandja iileshomwa yetu yopaMbiimbeli itaatu pula ofuto yasha, yamwe oyu uvite kutya oku yi tapa noku yi tula komapandja galwe nenge komakwatathano gopaintaneta, oshi li nawa. Nonando oyu uvite ngawo, oku shi ninga otaku yono Omalombwelo ngoka wu na okwiiyutha kugo * komapandja getu gokointaneta, notashi vulu okweeta uupyakadhi lela. Ngaashi sha yelithwa nawa mOmalombwelo ngoka, kapu na ngoka a pitikwa a tule kepandja lye nenge kugalwe iinima yetu ngaashi: “Iithanekwa, iinyanyangidhwa yopaelektronika, omandhindhilikokoneko, omusika, omathano, uuvidio nenge iinyolwa mbyoka yi li kepandja ndika lyokointaneta nokomapandja galwe gokointaneta (epandja lyetu kehe lyokointaneta, kutya nduno oli nasha nepeko, nuuvidio nenge nomakwatathano gomombepo).” Omolwashike mbela?

Iinima ayihe mbyoka yi li kepandja lyetu kehe, oya gamenwa. Aashunimonima naapataneki yetu, ohaya kambadhala okulongitha iileshomwa yetu komapandja gawo, opo ya pukithe nenge ya yule Oonzapo dhaJehova nayalwe. Ohaya tula iinima yetu komapandja gawo, nelalakano lyokuningitha aaleshi ya kale ya limbililwa shoka taya lesha. (Eps. 26:4; Omayel. 22:5) Yalwe ohaya longitha iinima mbyoka yi li miileshomwa yetu nenge kepandja lyetu lyokointaneta, jw. org, ya ninge omatseyitho giipindi, ya tule kiinima mbyoka taya landitha nosho wo moopolohalama dhomiikwaelektronika. Uuthembanyanyangidho nosho wo omandhindhilikokoneko oyi li po pampango nohayi kwathele iinima yetu kaayi longithwe nayi. (Omayel. 27:12) Ngele otwe etha aantu kutya nduno aamwatate,  ya tule uuyelele wetu mboka komapandja galwe nenge ya longithe omandhindhilikokoneko go-jw.org, opo ya landithe iilandithomwa yawo, ompangu itayi ke tu popila moonkambadhala dhetu dhokukandeka aapataneki yetu naalandithi.

Okutapa iileshomwa yetu kepandja kaali shi jw.org, osha nika lela oshiponga. Jehova oshinakugwanithwa shokugandja iikulya yopambepo okwe shi inekelela owala “omupiya omudhiginini nomunandunge.” (Mat. 24:45, NW) “Omupiya” oha longitha owala omapandja getu gopambelewa taga landula, a gandje iikulya yopambepo: www.dan124.com, tv.dan124.com nosho wo wol.dan124.com. Shimwe ishewe, otu na owala oopolohalama ndatu dhopambelelwa dhiikwaektronika yopeke: JW Language^®, JW Library^® nosho wo JW Library Sign Language^®. Inatu hala nando iilongitho yetu mbyoka yi longithwe miipindi yontumba nenge yi nyatekwe kuuyuni waSatana. Ngele iikulya yopambepo oya ziilile komapandja galwe, otashi vulika mu kale mwa tulwa iinima haayo nenge mu ningwe omalunduko. — Eps. 18:26; 19:8.

Oshikwawo, okutula iileshomwa yetu komapandja galwe, otashi pe ompito aapataneki naatondi yetu ya ningithe aantu kaayi inekele ehangano lyaJehova. Aamwatate yamwe oyi iyadha taya tompathana naantu komapandja hoka, sigo omoonkundathana tadhi nyatekitha edhina lyaJehova. Okukundathana naantu okupitila momakwatathano ngoka, hagwo omukalo tagu opalele ‘gwokupukulula aatamaneki yetu nombili.’ (2 Tim. 2:23-25; 1 Tim. 6:3-5) Opwa dhimbululwa wo kutya opwa totwa omakwatathano galwe nomapandja galwe gopaintaneta giifundja, medhina lyehangano lyetu, lyOlutuwiliki nolyiilyo yOlutuwiki paumwene. Ihe kapu na oshilyo shOlutuwiliki shi na epandja lyasho paumwene nenge hashi kutha ombinga komapandja galwe.

Iilongitho mbyoka twa pewa tu longithe muukalele, otayi tsikile okuhwepopalekwa. Otwa hala kehe gumwe a mone mo uuwanawa muyo. Onkee ano, ngaashi Omalombwelo ngoka wu na okwiiyutha kugo ge shi ulika, oto vulu okutumina gumwe oshileshomwa paelektronika nenge wu mu tumine olinka ndjoka tayi mu kwathele a mone iinima kepandja lyetu jw.org. Uuna tatu ulukile aantu mboka ye na ohokwe omapandja getu gopambelewa, otatu ya kwatakanitha kumwe nonzo yashili, ndjoka hayi gandja iikulya yopambepo, ano “omupiya omudhiginini nomunandunge.”