1. Omaupyakadhi gamwe geni tu na okwiidhidhimikila, ihe Jehova oku na etompelo lini lyokukala a nyanyukilwa aapiya ye aadhiginini? (Tala omathano gopetameko.)

NGAASHI tu shi shi, onkalamwenyo momasiku ngaka gahugunina oyu udha omaupyakadhi ogendji. Aamwatate naamwameme oyendji otaya ungaunga nomauvu ga kwata miiti. Yalwe nonando nayo aakuluntu, otaya sile oshimpwiyu aakwanezimo yawo aakokele. Natango yalwe otaya kambadhala okugwanitha po oompumbwe dhaanegumbo yawo. Otu shi wo kutya oyendji otaya ungaunga nomaupyakadhi ogendji pethimbo limwe. Shika ohashi pula ethimbo, oonkondo niimaliwa. Nonando ongawo, uushili owo kutya owu na einekelo momauvaneko gaKalunga nowi itaala lela kutya onakuyiwa otayi ka kala ombwanawa. Shono itashi nyanyudha tuu Jehova!

2. Etsomukumo lini tatu vulu okumona muJesaja 40:29, ihe epuko lini tashi vulika tu ninge?

² Mbela omathimbo gamwe oho kala wu uvite kutya omaupyakadhi ngoka wu na ito vulu oku gi idhidhimikila? Ngele osho, hangoye awike. Ombiimbeli oyu ulika kutya aapiya aadhiginini yonale, nayo osho ya li haya kala yu uvite. (1 Aak. 19:4; Job 7:7) Ihe pehala lyokuteka omukumo, oya li haya kongo ekwatho kuJehova. Oya li ya mono ekwatho kuKalunga ngoka ha “tsu omukumo oonakuvulwa  naamboka yaa na oonkondo.” (Isa. 40:29) Shiyemateka, aapiya yaKalunga yamwe kunena, ohaya thiki pehulithodhiladhilo kutya omukalo omwaanawa gwokuungaunga nomaupyakadhi gonkalamwenyo ‘okuza mo moshili uule wokathimbo.’ Kungawo oya fa taya ti kutya omaipyakidhilo gopaKriste oge li omutengi kuyo, ihe kage shi omayambeko. Onkee ano, ohaya etha po okulesha Ombiimbeli, okuya kokugongala nokukutha ombinga muukalele, ngaashi owala satana ha kala a hala ya ninge.

3. (a) Ongiini tatu vulu okuyanda okunkundipalekwa kuSatana? (b) Otatu ka kundathana shike moshitopolwa shika?

³ Satana oku shi shi nawa kutya uuna tatu kutha lela ombinga momaipyakidhilo gopaKriste otaku vulu oku tu koleka, noina hala tu kale twa kola. Uuna wu uvite wa loloka palutu nopamadhiladhilo, ino ikaleka kokule naJehova. Pehala lyaashono, hedha kuye shi vulithe nale, oshoka ‘ote ku pe oonkondo note ku koleke.’ (1 Pet. 5:10; Jak. 4:8) Moshitopolwa muka, otatu ka kundathana oonkalo mbali ndhoka tadhi vulu oku tu ningitha kaatu longele Kalunga nuudhiginini. Otatu ka kundathana wo nkene okutula miilonga omakotampango gOmbiimbeli taku vulu oku tu kwathela tu idhidhimike. Ihe tango natu taleni nkene Jehova ta vulu oku tu nkondopaleka, ngaashi sha popiwa muJesaja 40:26-31.

4. Otatu ilongo mo shike muJesaja 40:26?

⁴ Lesha Jesaja 40:26. Kapu na nando ogumwe ta vulu okuyalula oonyothi adhihe ndhoka dhi li kegulu. Aanongononi oyi itaala kutya omulalawili ngoka hagu ithanwa Ekaladhidhi (Milky Way), otashi vulika mu na oonyothi oobiliyona 400. Ihe kehe onyothi Jehova okwe yi pa edhina. Otashi tu longo shike? Ngele Jehova oku na ko nasha niinima yomeshito mbyoka kaayi na omwenyo, mbela ongiini kungoye ngoka ho mu longele, molwaashono wu mu hole, ihe hamolwaashono owala wu na oku shi ninga? (Eps. 19:1, 3, 14) Tate gwetu omunahole oku ku shi nawa. Nokuli ‘nomafufu goye agehe gokomutse okwe ga yalula.’ (Mat. 10:30) Omupisalomi okwe tu shilipaleke ta ti: “Omuwa ota sile oshimpwiyu mbo haa vulika kuye.” (Eps. 37:18) Odhoshili kutya Jehova oku wete omaudhigu ngoka wu na, note ke ku pa oonkondo wu gi idhidhimikile.

5. Ongiini tatu vulu okukala nuushili kutya Jehova ota vulu oku tu nkondopaleka?

⁵ Lesha Jesaja 40:28. Jehova oye Onzo yoonkondo oonenenene. Pashiholelwa, tala owala koonkondo ndhoka ha gandja ketango. Omunongononi David Bodanis okwa ti: “Mosekonde kehe, etango ohali gandja oonkondo dhi thike pomutopelo gwoomboma dhopalute omabiliyona.” Omukonakoni gulwe okwa yalula kutya etango “ohali gandja . . . oonkondo dha gwana kaantu mosekonde yimwe, ndhoka ya pumbwa uule womimvo 200 000.” Mbela gumwe ota vulu okukala a limbililwa kutya Ngoka ha gandja oonkondo ketango, ota vulu ngaa oku tu pa oonkondo ndhoka twa pumbwa tu ungaunge nuupyakadhi kehe?

6. Mbela omomukalo guni ondjoko yaJesus ombwanawa, notashi vulu oku tu guma ngiini?

⁶ Lesha Jesaja 40:29. Okulongela Jehova ohaku etele omuntu enyanyu olindji. Jesus okwa li a lombwele aalongwa ye a ti: “Itsikeni ondjoko yandje.” Okwa gwedha ko a ti: ‘Otamu imonene evululuko, oshoka ondjoko yandje ombwanawa nomutenge gwandje omupu.’ (Mat. 11:28-30) Oohapu ndhoka kadhi shi tuu dhoshili! Omathimbo gamwe, uuna tatu yi kokugongala nenge tatu uvitha, otashi vulika tu kale tu uvite twa vulwa. Ihe ohatu kala tu uvite ngiini ngele twa galukile megumbo? Ohatu kala twa pepelelwa notwi ilongekidha okuungaunga nomaupyakadhi getu. Ondjoko yaJesus ombwanawa shili!

7. Hokolola oshimoniwa shoka tashi ulike uushili woohapu ndhoka dhi li muMateus 11:28-30.

⁷ Omumwameme gwedhina Kayla okwa li e na uupyakadhi wokukala owala u uvite a vulwa ethimbo  kehe, a polimana noku uvite omutse gwoshipwatagula. Omolwuupyakadhi mbono, omathimbo gamwe ohashi kala oshidhigu kuye okuya kokugongala. Ihe sho a ningi oonkambadhala a kale pokugongala kumwe kwomontaneho, okwa nyola a ti: “Oshipopiwa esiku ndyono osha li tashi popi kombinga yetekomukumo. Osha li sha gandjwa momukalo omwaanawa nogwokunakonasha, shoka sha ningitha ndje ndi lile. Oshipopiwa osha dhimbulukitha ndje ndi mone kutya onda pumbwa okukala pokugongala.” Omumwameme Kayla okwa li a nyanyukwa noonkondo, sho a ningi oonkambadhala a ye kokugongala.

8, 9. Omuyapostoli Paulus okwa li a hala okutya shike sho a nyola a ti: “Uuna ndoka ndi na uunkundi, opo mpoka ndi na oonkondo”?

⁸ Lesha Jesaja 40:30. Kutya nee otu kale tu na uunongo wu thike peni, oonkondo dhetu dhokuninga iinima odha ngambekwa. Atuheni natu kaleni tu shi oshinima shoka. Omuyapostoli Paulus okwa li omulumentu ha vulu iilonga, ihe opwa li iinima yimwe mbyoka tayi mu imbi a gwanithe po iilonga ye ayihe. Sho a lombwele Kalunga nkene u uvite, okwa lombwelwa taku ti: “Oonkondo dhandje odho oonenenene kwaamboka aankundi.” Paulus okwa li u uvite ko kutya oohapu ndhoka odha hala okutya ngiini. Okwa thiki pehulithodhiladhilo a ti: “Uuna ndoka ndi na uunkundi, opo mpoka ndi na oonkondo.” (2 Kor. 12:7-10) Okwa li a hala okutya shike?

⁹ Paulus okwa li e shi mono kutya ita vulu okuninga oshindji, nopwaahe na ekwatho ndyoka tali mu ziilile pombanda. Ombepo ondjapuki yaKalunga, oya li tayi vulu okupa Paulus oonkondo ndhoka kee na. Kakele kaashono, ombepo yaKalunga oya li ya nkondopaleke Paulus a longe iilonga mbyoka itaa vulu okulonga koonkondo dhe mwene. Ombepo ondjapuki otayi vulu oku tu nkondopaleke wo. Odhoshili kutya otatu ka kala twa kola, ngele Jehova okwe tu nkondopaleke.

10. Jehova okwa li a kwathele David nashike i idhidhimikile omashongo ngoka a li a taalela?

¹⁰ Omupisalomi David okwa li a mono olundji nkene ombepo yaKalunga ye mu kwathele. Okwi imbi a ti: “Oto tsu ndje omukumo okuhomona aatondi yandje, noonkondo okusinda omaigameno gawo.” (Eps. 18:29) Opu na omaupyakadhi gamwe ngoka itaatu vulu “okusinda” koonkondo dhetu yene, ihe otwa pumbwa Jehova e tu nkondopaleke, opo tu ga sinde.

11. Hokolola onkandangala ndjoka ombepo ondjapuki hayi dhana, moku tu kwathela tu idhidhimikile omaupyakadhi ngoka tu na.

¹¹ Lesha Jesaja 40:31. Ontsa ihayi yelutha omawawa nokutengela koonkondo dhawo yene. Opu na ombepo ompyu ndjoka hayi yi kwathele yi yeluke po yi ye muule, noku yi kaleka yi na oonkondo. Uuna wu li muudhigu wontumba, dhimbulukwa ontsa. Pula Jehova e ku yelule po okupitila ‘momupopili, ombepo ondjapuki.’ (Joh. 14:26) Ihe shinyanyudha osho kutya ombepo ondjapuki otatu vulu oku yi pewa ethimbo kehe twe yi pumbwa, uusiku nomutenya. Otashi vulika nokuli tu kale tu uvite lela twa pumbwa okupula Kalunga e tu kwathele, uuna pwa holoka okwaauvathana pokati ketu nagumwe megongalo. Omolwashike hapu vulu okuholoka okwaauvathana?

12, 13. (a) Omolwashike pokati kAakriste hapu holoka okwaauvathana? (b) Ehokololo lyaJosef otali tu longo shike kombinga yaJehova?

¹² Okwaauvathana pokati kaantu ohaku holoka po, molwaashoka atuheni inatu gwanenena. Odhoshili kutya omathimbo gamwe otatu vulu okuningilwa nayi koohapu nenge kiilonga yooitaali ooyakwetu nenge otse tu yu uvithe nayi. Shino ohashi vulu okukala eshongo lya kwata miiti. Ngaashi owala hashi kala nomashongo galwe, Jehova ohe tu etha tu ulike uudhiginini wetu mokwiilonga okulongela kumwe naamwatate naamwameme. Omolwashike he shi ningile? Jehova oku ya hole, nonando inaya gwanenena.

¹³ Ehokololo lyaJosef, ndyoka li li mOmbiimbeli otali ulike kutya Jehova ohe etha aapiya ye ya makelwe. Aamwahe yaJosef mboka ya li ye mu  sila efupa, oye mu landitha po muupika sho a li omugundjuka, e ta falwa kuEgipiti. (Gen. 37:28) Ashihe shoka sha li tashi ningwa, Jehova okwa li e shi wete. Okwa li a yemata lela sho a tala nkene kuume ke, Josef, ngoka omuyuuki ta ningilwa okwaahe na uuyuuki. Ihe Jehova ka li a yi mo olunyala. Lwanima Josef okwa tulwa mondholongo sho a lundilwa kutya okwa li a hala okukwata omukulukadhi gwaPotifar onkonga. Ihe natango Jehova ka li a ningi po sha. Mbela Jehova okwa li a thigi po Josef? Hasho nando. Ombiimbeli otayi ti: ‘Jehova okwe mu pe elago ewanawa mwaayihe e yi longo.’ — Gen. 39:21-23.

14. Uuwanawa wopambepo nowopalutu wuni tatu ka mona, ngele ‘itatu iyethele’ mokugeya?

¹⁴ Opu na ishewe oshiholelwa shaDavid. Aantu oyendji inaya pita naanaa moonkalo moka a li. Nonando ongawo, David, kuume kaKalunga, ka li a kwatele nando omuntu onkone. Pehala lyaashono, okwa nyola a ti: “Ino iyethela moshimpwiyu nenge muugeyi; mbika ayihe otayi fala muupyakadhi.” (Eps. 37:8) Onkee ano, “ino iyethela” mokugeya nando. Omolwashike sha simana? Omolwaashoka uuna to shi ningi, oto holele Jehova ngoka ‘ihee tu ningile paondjo dhetu.’ (Eps. 103:10, OB-1954) Opu na wo uuwanawa wulwe mboka tatu ka mona, ngele ‘itatu iyethele’ mokugeya. Omuntu ngele omugeyentu ota vulu okukwatwa nuupu kelondo lyombinzi nokukala itaa fudha nawa. Shoka otashi vulu okuguma ehuli nelambalamba lye, notashi vulika a kale ta thetukununwa mepunda. Uuna twa geya, omadhiladhilo getu ihaga longo nawa. Omolwongeyo, omathimbo gamwe ohashi vulika tu kwatwe kepolimano ethimbo ele. Mepingathano naashono, Ombiimbeli otayi ti kutya “omutima gwa gundjila ogwo omwenyo gwolutu.” (Omayel. 14:30) Oshike tashi ke tu kwathela tu pange ombili nomumwatate ngoka e tu uvitha nayi? Ongele owala tatu tula miilonga omayele gOmbiimbeli.

15, 16. Oshike tu na okuninga, uuna gumwe e tu uvitha nayi?

¹⁵ Lesha Aaefeso 4:26. Olundji ihashi tu kumitha, uuna tatu ungaungiwa natse nayi kaantu mboka ihaaya longele Jehova. Ihe ngele omwiitaali omukwetu nenge omuntu gwaandjetu okwa popi nenge a ningi oshinima she tu uvitha nayi noonkondo, otashi vulika shi tu teye po. Otashi vulika shi kale oshidhigu kutse oku shi dhimbwa. Mbela otatu ka kala twa kwatela onkone omwiitaali ngoka uule womimvo? Nenge otatu ka landula omayele gOmbiimbeli tu kandule po uupyakadhi nziya? Ngele otwe etha pu pite ethimbo ele inaatu popya nomwiitaali ngoka, nena otashi ka kala oshidhigu okupanga ombili naye.

¹⁶ Natu tye nee owa yematekwa komwiitaali omukweni, noshinima shoka e ku ninga ito vulu oku shi dhimbwa. Mbela oonkatu dhini oombwanawa  to vulu okukatuka wu pange ombili naye? Shotango, galikana kuJehova. Pula Jehova e ku kwathele wu popye nomumwaho nombili. Dhimbulukwa kutya naye oku li kuume kaJehova. (Eps. 25:14) Jehova oku mu hole wo. Jehova ohu ungaunga nookuume ke nombili nokwa tegelela tu ninge sha faathana. (Omayel. 15:23; Mat. 7:12; Kol. 4:6) Oshikwawo, dhiladhila tango kwaashoka to ka popya komumwaho. Ino dhiladhila kutya okwe ku uvitha nayi owina, ihe shoka a ningi epuko owala. Kala wu shi kutya otashi vulika nangoye wu na mo ombinga mosheetithi shuupyakadhi mboka. Oto vulu okutameka oonkundathana naye ngeyi: “Otashi vulika handi geye mbala, ihe ohela sho wa popi nangaye, onda li ndu uvite . . . ” Ngele oonkundathana dheni inadhi enda nawa ngaashi wa li wa tegelela, konga ishewe ompito yimwe wu pange ombili naye. Mu kwatela momagalikano goye, ngoye to pula wo Jehova e mu yambeke. Pula Jehova Kalunga e ku kwathele wu gandje eitulomo komaukwatya omawanawa gomumwaho. Kutya nduno oshizemo oshini, kala nuushili kutya Jehova ota ka pandula oonkambadhala dhoye dhokulikola omumwaho, ngoka naye e li kuume ke.

17. Omikalo dhini Jehova ha longitha e tu kwathele tu kale natango tu na ekwatathano naye, uuna twa yono, nomolwashike tu na oku dhi landula?

¹⁷ Aantu yamwe ohaya kala yu uvite kutya inaya gwana okulongela Jehova, molwaashono oya yona omayono ga kwata miiti. Okukala wu uvite ondjo, otaku vulu oku ku ningitha wu kale inoo nyanyukwa monkalamwenyo. Omukwaniilwa David ngoka naye a li u uvite ngawo, okwa ti: “Sho nda li inee hempulula oondjo dhandje, onda li nda pwa po kokulila esiku kehe. Uusiku nomutenya wa li wa geela ndje.” Shinyanyudha, David okwa li u ungaunga nuupyakadhi mboka momukalo ngoka tagu ulike kutya ye omulumentu a koka pambepo. Okwa nyola a ti: ‘Onde ku hempululile oondjo dhandje, nowa dhimi po oondjo dhandje adhihe.’ (Eps. 32:3-5) Ngele owa yona sha kwata miiti, kala wu na uushili kutya Jehova okwi ilongekidha oku ku dhimina po. Ihe owu na okutaamba ko ekwatho ndyoka te ku pe okupitila megongalo. (Omayel. 24:16; Jak. 5:13-15) Ino shelelelwa oku li taamba ko, opo wu ki imonene onakuyiwa ombwanawa. Otashi vulika wu kale wa dhiminwa po omolweyono lyoye lyonale, ihe ongiini ngele eiyuvo lyoye otali ku nyenyetele natango?

18. Ongiini oshiholelwa shaPaulus tashi vulu okukwathela mboka yu uvite inaaya gwana okulongela Jehova?

¹⁸ Omuyapostoli Paulus omathimbo gamwe naye okwa li ha kala ti ipula nomapuko ngoka a ninga monakuziwa. Okwe shi zimine sho a ti: “Ngame ondi vulike kaayapostoli ayehe noinandi gwana, ndi ithanwe omuyapostoli, oshoka onda tidhaganene egongalo lyaKalunga.” Okwa gwedha ko a ti: “Ihe omolwesilohenda lyaKalunga ngame ondi li ngaashi ndi li.” (1 Kor. 15:9, 10) Jehova okwa li a taamba ko Paulus ngaashi e li, nokwa li a tegelela Paulus a kale e shi shi. Ngele owi iyela ombedhi omolwomayono goye ngoka wa ninga monakuziwa nowe ga hempulula lela, nena oto vulu okukala nuushili kutya Jehova ote ke ku sila ohenda. Onkee ano, kala wi itaala kutya Jehova okwe ku dhimina po, e to shi taamba ko. — Jes. 55:6, 7.

19. Enyolo lyomumvo 2018 olini, nomolwashike tali opalele?

¹⁹ Sho ehulilo lyuuyuni mbuka tali hedha popepi, otwa tegelela oonkalo dhi nayipale. Ihe kala wu na uushili kutya Ngoka ‘ta tsu omukumo oonakuvulwa naamboka yaa na oonkondo, noku dhi indjipaleke,’ ota vulu oku ku pa kehe shimwe wa pumbwa wu hume komeho. (Jes. 40:29; Eps. 55:22; 68:19) Momukokomoko gwo 2018, otatu ka dhimbulukithwa oshili ndjika ya simana ethimbo kehe tatu gongala pOshinyanga shUukwaniilwa. Otatu ka mona ko enyolo lyomumvo, ndyoka tali ti: ‘Mboka taya inekele Jehova, ohaya mono oonkondo oompe.’ — Jes. 40:31.