1. Omolwashike ethimbo ndika lya yooloka ko komathimbo ga zi ko?

OTU LI methimbo ndyoka inaali kala ko nale mondjokonona yaantu. Ngaashi Ombiimbeli ya hunganeka, Jehova ota gongele “engathithi lyaantu . . . yomomihoko adhihe, momaludhi agehe, miigwana ayihe nomomalaka agehe.” Engathithi ndyoka oli li “oshigwana oshinankondo” shaantu ya nyanyukwa, ye vulithe pomamiliyona gahetatu mboka “taye mu yakula uusiku nomutenya.” (Eh. 7:9, 15; Jes. 60:22) Inaku monika nando onale aantu oyendji ye hole Kalunga nosho wo ooitaali ooyakwawo, ngaashi pethimbo ndika.

2. Ohole yoludhi luni hayi ulikwa kwaamboka kaaye hole Kalunga? (Tala kethano lyopetameko.)

² Ombiimbeli oya hunganeka wo kutya pethimbo lyetu, aantu mboka kaaye hole Kalunga otaya ka kala yi ihole yo yene. Omuyapostoli Paulus okwa nyola a ti: ‘Momasiku gahugunina, aantu otaya ka kala nokwiihola, ye hole eliko noye hole omainyanyudho peha lyokuhola Kalunga.’ (2 Tim. 3:1-4) Ohole yoludhi ndwoka otayi kondjithathana nohole yopaKriste. Okulalakanena uuwanawa wetu yene, ihaku etele aantu enyanyu ndyoka haya kala ya hala. Pehala lyaashono, ohayi ningitha aantu ya kale yi ihole yo yene ‘momathimbo omadhigu’ ngaka tu li mugo.

3. Moshitopolwa shika otatu ka kundathana shike, nomolwashike?

 ³ Paulus okwa li a mono kutya ohole yokwiihola otayi ki indjipala, notayi ka kala ya nika oshiponga kAakriste. Onkene okwe tu londodha tu ‘yande’ mboka hayu ulike ohole ndjoka. (2 Tim. 3:5) Nonando ongawo, itatu vulu okuyanda aantu ya tya ngaaka thiluthilu. Ihe mbela ongiini tatu vulu okuyanda iikala iiwinayi yaantu mbono yetu kundukidha, e tatu kambadhala okunyanyudha Jehova, ngoka e li Kalunga kohole? Natu ka taleni keyooloko pokati kohole yaKalunga nohole ndjoka ya popiwa muTimoteus omutiyali 3:2-4. Uuna tatu shi ningi, otashi ke tu kwathela tu mone kutya ohole yini tu na okuulika, ndjoka tayi tu etele ombili nenyanyu lyashili.

4. Omolwashike inaashi puka okukala tu na ohole yokwiihola yi li pandjele?

⁴ Omuyapostoli Paulus okwa nyola oohapu dha nwethwa mo a ti: “Aantu otaa ka kala nokwiihola.” Mbela osha puka okukala twi ihole tse yene? Hasho nando, molwaashono oshi li paunshitwe nosha pumbiwa. Jehova osho e tu shita ngawo. Jesus okwa ti: “Hola mukweni, ngaashi ngoye wi ihole mwene.” (Mark. 12:31) Ngele katu ihole tse yene, itatu vulu okukala tu hole aantu ooyakwetu. Ombiimbeli oya popya wo kutya “aalumentu oye na okuhola aakiintu yawo, naanaa ngashika ye hole omalutu gawo yene. Oshoka kaku na nando omuntu e tonde olutu lwe mwene, ihe kehe gumwe ohe lu palutha nohe lu sile oshimpwiyu.” (Ef. 5:28, 29) Onkee ano, ohole yokwiihola yi li pandjele, oya pumbiwa.

5. Ongiini to vulu okuyelitha omuntu ngoka i ihole unene?

⁵ Ohole ndjoka ya popiwa muTimoteus omutiyali 3:2, kayi li paunshitwe nokayi li nawa. Ohole ndjoka oyo ohole yokwiihola mwene. Aantu mboka yi ihole unene, ohayi idhiladhilile pehala mpoka inaaya adha. (Lesha Aaroma 12:3.) Ohaya gandja unene eitulomo kuyo yene, noihaya kala ye na ko nasha lela nayalwe. Uuna iinima ye ende nayi, ohaya gandja uusama kuyalwe pehala lyokuzimina omapuko gawo. Omutseyi gwOmbiimbeli gumwe okwa yelekanitha aantu mboka yi ihole yo yene ‘nanikitha ngoka ha holeke omutse gwe, e taka kala a fa okatanga. Ohashi kala oshidhigu oku mu kwata, molwaashoka uukegwa we otawu ku tsu.’ Aantu ya tya ngawo inaya nyanyukwa shili monkalamwenyo.

6. Ohole yaKalunga ohayi tu etele iizemo iiwanawa yini?

⁶ Aatseyinawa yOmbiimbeli oya ti kutya ohole yokwiihola mwene, oyo ya popiwa tango komuyapostoli Paulus momusholondondo gomaukwatya omawinayi, ngoka taga dhana onkandangala momasiku ngaka gahugunina, molwaashoka oyo ye etitha omaukwatya galwe omawinayi. Mepingathano naashono, aantu mboka ye hole Kalunga ohaya kokeke omaukwatya ga yooloka ko thiluthilu kwaangoka. Ombiimbeli oya popya kutya ohole yaKalunga ohayi endele pamwe nenyanyu, ombili, eidhidhimiko, uukuume, uuwanawa, eitaalo, eifupipiko neikwatonawa. (Gal. 5:22, 23) Omupisalomi okwa nyola a ti: ‘Oshigwana shi na Omuwa gwasho Jehova, oshi na elago!’ (Eps. 144:15) Jehova, oKalunga omunyanyukwi noshigwana she osha nyanyukwa wo. Shimwe ishewe, mepingathano naantu mboka yi ihole yo yene noye hole owala okupewa, aapiya yaJehova ohaya mono enyanyu mokukwathela yalwe. — Iil. 20:35.

7. Omapulo geni taga vulu oku tu kwathela tu mone kutya otu hole Kalunga?

⁷ Ongiini tatu vulu okumona ngele ohole yetu yokwiihola oyi vule ndjoka yokuhola Kalunga? Dhiladhila kelondodho ndyoka li li mAafilippi 2:3, 4 tali ti: “Inamu longa nando osha mombepo yokwiihola nenge yokukonga esimano lyowala, ihe ifupipikeni kiipala yayakweni, ne mwaa dhiladhile kutya one aawanawa mu ya vule. Lalakaneneni uuwanawa wooyakweni wo, haamboka ashike weni yene.” Otashi vulika tu ipule tatu ti: ‘Mbela eyele ndika ohandi li tula ngaa miilonga monkalamwenyo yandje? Mbela ohandi kambadhala  ngaa ngaashi tandi vulu ndi longe ehalo lyaKalunga? Mbela ohandi kambadhala ngaa ndi kwathele yalwe megongalo nomuukalele?’ Okwiiyambela yalwe kashi shi oshinima oshipu, oshoka ohashi pula oonkambadhala neiyambo. Ihe mbela oshike tashi vulu oku tu etela enyanyu lela, kaashi shi owala okutseya kutya otwa hokiwa kOmupangeli gweshito alihe?

8. Ohole yokuhola Kalunga oyi inyengitha yamwe ya ninge shike?

⁸ Ohole yokuhola Kalunga, oyi inyengitha yamwe ye ethe po omaithano gawo ngoka ga li taga vulu oku ya ninga aayamba, nelalakano lyokulongela Jehova nuudhiginini. Pashiholelwa, omumwameme Ericka, gwokoAmerika, ondohotola. Ihe pehala lyokulalakanena ondondo yopombanda muunamiti, okwa ningi omukokolindjila gwondjigilile, nokwa kala ta longele miilongo ya yoolokathana pamwe nomusamane gwe. Okudhiladhila kethimbo ndyoka, okwa ti: “Iimoniwa oyindji mbyoka twa mona sho tatu kwathele miitopolwa moka mu na aantu haya popi omalaka omakwiilongo nosho wo uukuume mboka twa li twa panga nayo, oye tu etela enyanyu shili monkalamwenyo yetu. Ohandi longo natango muunamiti, ihe okulongitha ethimbo lyandje olindji noonkondo dhandje mokukwathela aantu pambepo nokukwathela aamwatate naamwameme megongalo, ohashi etele ndje enyanyu nombili yokomwenyo.”

9. Omolwashike okuhola iimaliwa ihaaku etele omuntu enyanyu?

⁹ Paulus okwa nyola kutya aantu otaya ka kala “ye hole eliko.” Omimvo dhontumba dha ka pita, omukokolindjila gumwe moIrlanda, okwa li u uvithile omulumentu gumwe kombinga yaKalunga. Omulumentu okwa kutha mo okandjato ke kiimaliwa, e ta kutha mo iimaliwa yomafo, e ta popi nuuntsa ta ti: “Kalunga kandje oye ngu!” Nonando haantu ayehe haya popi ngawo, uuyuni owu udha aantu ye hole iimaliwa nomaliko galwe. Ihe Ombiimbeli otayi tu londodha tayi ti: “Nakuhola iimaliwa ihe yi kuta, nanakuhola uuyamba iha gwana.” (Omuuv. 5:10) Aantu ya tya ngawo otaya ka kala aluhe ya hala iimaliwa, noonkambadhala ndhoka taya ningi, opo ye yi mone, otadhi ya etele ‘iimpwiyu oyindji.’ — 1 Tim. 6:9, 10.

10. Ombiimbeli oya ti shike kombinga yuuyamba noluhepo?

¹⁰ Odhoshili kutya atuheni otwa pumbwa iimaliwa, oshoka ohayi tu gamene poompito dhimwe. (Omuuv. 7:12) Ihe mbela omuntu ota kala ngaa shili a nyanyukwa, ngele oku na owala iimaliwa mbyoka ya gwana oompumbwe dhe? Eeno. (Lesha Omuuvithi 5:12.) Agur, omwanamati gwaJake, okwa nyola a ti: “Uuyamba nenge oluhepo ino lu pa ndje; palutha ndje noshikwiila shoka sha yeleka ndje.” Otatu vulu oku shi uva ko kutya omolwashike omulumentu nguka kaa li a hala okukala a hepa unene. Okwa li a ti kutya ina hala a ka yake, molwaashoka okuyaka itaku simanekitha Kalunga. Ihe omolwashike a galikana kutya ina hala okuninga omuyamba? Okwa nyola a ti: “Ngele nda kuta unene, otashi vulika tandi ku idhimbike tandi ti: ‘Jehova oye lye?’” (Omayel. 30:8, 9) Otashi vulika wu shi aantu mboka yi inekela momaliko peha lyokwiinekela muKalunga.

11. Jesus okwa gandja omayele geni ge na ko nasha niimaliwa?

¹¹ Mboka ye hole iimaliwa, itaya vulu okwoopalela Kalunga. Jesus okwa ti: “Kaku na ngoka ta vulu okulongela aawa yaali; oshoka ota tondo gumwe, ye e ta kala e hole mukwawo, nenge ta simaneke nguka, ye ta dhini ngwiyaka. Kamu vulu okulongela Kalunga pamwe nemona.” Okwa ti wo kutya: “Inamu ilikolela omaliko kombanda yevi, moka haga yonwa po koothithi nokoshushi noku na aafuthi yokuteya po nokuyaka po. Ihe ilikoleleni omaliko megulu, moka kaamu na oothithi noshushi yokuyona po, nokaamu na aafuthi yokuteya po nokuyaka po.” — Mat. 6:19, 20, 24.

12. Ongiini okukala nonkalamwenyo inaayi kitakana tashi vulika ku shi ningithe oshipu okulongela Kalunga? Gandja oshiholelwa.

 ¹² Oyendji oya mona kutya okukala nonkalamwenyo inaayi kitakana, ihashi ya kaleke owala ya nyanyukwa, ihe ohashi ya pe wo ethimbo lya gwana lyokulongela Jehova. Omumwatate Jack, gwokoAmerika, okwa landitha po egumbo lye enene nongeshefa ye, molwaashono okwa li e shi kutya okuninga ngawo, otashi ke mu kwathela a kokole ondjila pamwe nomukulukadhi gwe. Okwa ti: “Kasha li oshipu okulanditha po egumbo lyetu nongeshefa yetu. Uule womimvo, onda kala handi ya kegumbo nda lulilwa, omolwuupyakadhi kiilonga. Omukulukadhi gwandje ngoka e li omukokolindjila, okwa li ha kala aluhe a nyanyukwa. Okwa li ha ti: ‘Ondi na omuhona omwaanawa kaaku na we!’ Ngashingeyi atuhe otatu kokola ondjila, nohatu longele Omuntu gumwe, Jehova.”

13. Oshike tashi vulu oku tu kwathela tu mone kutya otwa tala ko ngiini iimaliwa?

¹³ Opo tu mone kutya otwa tala ko ngiini iimaliwa, otashi vulika twa pumbwa okutala lela nkene tatu vulu okuyamukula omapulo ngaka: ‘Mbela ondi itaala nondi li metsokumwe naashoka Ombiimbeli tayi ti shi na ko nasha niimaliwa? Mbela okuninga oshimaliwa okwo nda pititha komeho monkalamwenyo yandje? Mbela onda lenga iinima yopamaliko shi vulithe ekwatathano lyandje naJehova nonaantu? Mbela ondi inekela ngaa kutya Jehova ota vulu okusila ndje oshimpwiyu?’ Otatu vulu okukala nuushili kutya Jehova ke na esiku a yemateke mboka ye mu inekela. — Mat. 6:33.

14. Omainyanyudho ngoka ge li pandjele otu na oku ga tala ko ngiini?

¹⁴ Ngaashi sha hunganekwa, aantu oyendji kunena oye “hole omainyanyudho” (NW). Ngaashi owala kaapu na uupyakadhi wokukala tu na ondjele yokwiihola mwene noyokuhola iimaliwa, nomainyanyudho ngoka ge li pandjele kage na epuko lya sha. Jehova ina hala tu yande omainyanyudho ngoka tatu vulu okunyanyukilwa. Ombiimbeli oya ladhipika aapiya aadhiginini ya ti: “Inda ano, lya oshikwiila shoye nenyanyu nou nwe omaviinu goye nomutima gwa tundulukwa.” — Omuuv. 9:7.

15. Omainyanyudho geni taga popiwa muTimoteus omutiyali 3:4?

¹⁵ Timoteus omutiyali 3:4 otayi popi mboka ya  thiga po Kalunga, omolwomainyanyudho ngoka ye hole. Ndhindhilika kutya ovelise inayi popya kutya aantu otaya ka kala ye hole omainyanyudho shi vulithe Kalunga, shoka tashi gandja edhiladhilo kutya otaya ka kala ngaa ye mu hole kashona. Ihe oya ti kutya otaya ka kala ye hole omainyanyudho “peha lyokuhola Kalunga.” Omulongwantu gumwe gwOmbiimbeli okwa nyola a ti: “Ovelise ndjika itayi ti nando kutya oye hole ngaa Kalunga. Otayi ti kutya kaye hole Kalunga nandonando.” Ndika elondodho lya kwata miiti kwaamboka ye hole omainyanyudho. Uutumbulilo ‘okuhola omainyanyudho’ otawu popi mboka ‘ya kwatwa ko kuuhalu wopauyuni.’ — Luk. 8:14.

16, 17. Jesus okwe tu tulila po oshiholelwa shini, shi na ko nasha nomainyanyudho?

¹⁶ Jesus okwa li e na etaloko li li pandjele li na ko nasha nomainyanyudho. Okwa li a yi “kohango” nosho wo ‘koshituthi oshinene.’ (Joh. 2:1-10; Luk. 5:29) Kohango hoka a li, okwa li a longo oshikumithalonga, sho a shitukitha omeya omaviinu, molwaashoka oga li ga pwa po. Pompito yimwe, Jesus okwa li a tindi etaloko lyaamboka yi ishi uuyuuki, mboka ya li taye mu simonona sho ta li nokunwa. — Luk. 7:33-36.

¹⁷ Jesus ka li a pititha komeho omainyanyudho monkalamwenyo ye. Okwa li a pititha Jehova komeho, nokwa li a ningi ngaashi ta vulu a kwathele yalwe. Jesus okwa li i idhidhimikile eso li ehameka komuti gwomahepeko, opo oyendji ya wape okumona omwenyo gwaaluhe. Okwa lombwele mboka ya li taya ka landula oshiholelwa she a ti: “One aanelago, aantu ngele taye mu sheke, taye mu tidhagana, taye mu popile muuwinayi auhe nokufundja omolwandje. Nyanyukweni, ligoleni pombanda, oshoka ondjambi yeni onene yi li megulu. Oshoka osho ngeyi wo ya tidhaganene aahunganeki ye mu tetekela.” — Mat. 5:11, 12.

18. Omapulo geni tage ke tu kwathela tu mone kutya otu hole omainyanyudho shi thike peni?

¹⁸ Ongiini tatu vulu okumona kutya otu hole omainyanyudho shi thike peni? Ongele tatu ipula ngeyi: ‘Mbela omainyanyudho ogo nda pititha komeho shi vulithe okugongala nokuya muukalele? Mbela ondi na ehalo lyokweetha po iinima mbyoka handi nyanyukilwa, opo ndi longele Kalunga? Sho tandi hogolola omainyanyudho, mbela ohandi dhiladhila ngaa nkene Jehova e ga tala ko?’ Ngele otu hole shili Kalunga, itatu ka yanda owala iinima mbyoka tu shi kutya otayi ke mu yemateka, ihe naambyoka wo tu wete kutya otashi vulika yi mu yemateke. — Lesha Mateus 22:37, 38.

19. Aantu yeni itaaya vulu okukala ya nyanyukwa shili?

¹⁹ Konima yomimvo 6 000 lwaampono ndhoka aantu ya kala nokumona iihuna, uuyuni waSatana otawu ende wu uka pehulilo. Muuyuni omu udha aantu ye na iikala yokwiihola mwene, ye hole eliko noye hole omainyanyudho. Aantu ya tya ngawo ohaya dhiladhila kwaashoka ya hala noya pititha komeho omahalo gawo monkalamwenyo yawo. Aantu mboka kaye na siku ya kale ya nyanyukwa shili. Omupisalomi okwa nyola a ti: “Omunelago oye ngoka ekwatho lye tali zi kuKalunga kaJakob, oye ngoka i inekela Omuwa, Kalunga ke.” — Eps. 146:5.

20. Ohole yokuhola Kalunga oye ku etela enyanyu ngiini?

²⁰ Oshigwana shaJehova oshi mu hole noonkondo, noyendji otaye ende taye mu tseya nokukala ye mu hole. Shino otashi gandja uunzapo kutya Uukwaniilwa waKalunga otawu pangele, na masiku otawu ke etela aantu omayambeko itaaga vulu okuyelekwa nasha. Enyanyu lyashili notali kalelele, ohali zi mokulonga ehalo lyaKalunga nomokutseya kutya otatu longo shoka sha hokiwa kOmukombandambanda. Mboka ye hole Jehova, otaya ka nyanyukwa sigo aluhe. Moshitopolwa tashi landula, otatu ka konakona omaukwatya gamwe ngoka hage etithwa kombepo yokwiihola mwene nokutala nkene taga kondjithathana nomaukwatya ngoka ge niwe kaapiya yaJehova.