Salomo, he yaRehoboam, okwa pangele omimvo 40 muIsraeli. (1 Aak. 11:42) Salomo okwa si mo 997 K.E.N. Okuza mpono, Rehoboam okwa zi kuJerusalem u uka kuShekem, a ka kwaniilekwe. (2 Ondjal. 10:1) Mbela okwa li ngaa ti ipula kombinga yokulandula oshinkoti shahe, Salomo, ngoka a li e na oondunge dha shiga ko? Rehoboam okwa li ta ka ninga po shike, uuna pwa holoka onkalo ya kitakana ndjoka tayi pula a longithe omutse?

Sho Rehoboam a kwaniilekwa, onkalo muIsraeli oya li ya kindja lela. Puye opwe ya aakuluntu yamwe, mboka ye mu kuthile ko shoka oshigwana tashi ipula unene nasho. Oya ti: “Ho okwe tu tsike omitenge omidhigu. Ngele oto pupaleke omitenge ndhika e to tu vululukitha, otatu ningi aapiya yoye.” — 2 Ondjal. 10:3, 4.

Rehoboam otashi vulika a li kee shi shoka e na okuninga. Ngele okwa ningi shoka oshigwana tashi pula, otashi vulika ye, aanegumbo ye nosho wo aambala itaaya ka lya we nawa, noita ka pangela oshigwana ngaashi a hala. Ye ngele okwa tindi, otashi vulika oshigwana shi mu pilukile po. Okwa li ta ka ninga po shike? Tango, Rehoboam okwa ka pula omayele kaasamane aakulupe mboka ya li haya pe he, Salomo omayele. Okuza mpono okwa ka pula ishewe kaagundjuka yepipi lye. Rehoboam okwa landula omayele goomakula, nokwa tokola a ungaunge naantu nonyanya. Okwa ti: “Tate okwe mu tsike omitenge omidhigu; ngame otandi ka gwedha ko, dhi dhigupale. Okwe mu dhenge nongola; ngame otandi ke mu kwinunitha ekoosa!” — 2 Ondjal. 10:6-14.

Oshike tatu ilongo mehokololo ndino? Olundji oshi li nawa okupulakena komayele gaakuluntu mboka ya koka pambepo. Omolwontseyo yawo, otaye ke tu kwathela tu ninge omatokolo ge li pandunge okupitila momayele gawo omawanawa. — Job 12:12.

Omolwetopoko ndyono, Rehoboam oku unganeke etangakwiita lye. Ihe Jehova okwa yi olunyala  moshinima shoka okupitila momuhunganeki Shemaja, a ti: “Inamu matukila aamwanyoko [Aaisraeli]. Shuneni komagumbo, ne amuhe. Shika sha ningwa, ongame nde shi hala.” — 1 Aak. 12:21-24. *

Kaya li ya pumbwa oku ya kondjitha. Oshinima shoka otashi vulika sha li sha piyaganeke Rehoboam. Oshigwana osha li tashi ka tala ko ngiini omukwaniilwa ngoka a li te ke shi “kwinunitha ekoosa,” omanga a tila aantu mboka ye mu tukulila oshipotha? (Yelekanitha 2 Ondjalulo 13:7.) Omukwaniilwa naakwiita ye “oya vulika keutho lyOmuwa e taa shuna kaandjawo.”

Oshike tatu ilongo moshinima shino? Onawa tu vulike kuKalunga, nonando aantu otashi vulika ye tu sheke. Okuvulika kuKalunga ohaku eta omayambeko noha kala e tu hokwa. — Deut. 28:2.

Rehoboam okwa ningi po shike? Okwa vulika noina ka kondjitha we omazimo ngoka ga tsa ondumbo naye. Okwa tungu iilando ya gwedhwa po moshitopolwa shaJuda noshaBenjamin, omazimo ngoka a li ta pangele. Iilando mbyono okwe yi “umbu ya kolelela,” (OB-1954). (2 Ondjal. 11:5-12) Okuza mpono, Rehoboam okwa kala ta vulika kiipango yaKalunga uule womimvo ndatu. Uukwaniilwa waIsraeli womazimo omulongo gokuumbangalantu owa tameke okulongela iikalunga. Ihe oyendji muukwaniilwa mboka “oya popile Rehoboam” mokuya kuJerusalem ye ku ulike kutya oya gama kombinga yelongelokalunga lyashili. (2 Ondjal. 11:16, 17) Omolwokuvulika kwe, uukwaniilwa we owa kolo.

Sho uukwaniilwa waRehoboam wa li wa kola, okwa ningi oshinima inaashi tegelelwa. Okwa pilamene Jehova, e ta tameke okulongela iikalunga yaapagani. Okwe shi ningile shike? Mbela okwa nwethwa mo kuyina ngoka a li Omuammoni? (1 Aak. 14:21) Kutya nduno etompelo olini, oshigwana ashihe oshe mu landula. Okuza mpono, Jehova okwe etha omukwaniilwa Shishak gwaEgipiti a kwate ko iilando oyindji yaJuda, nonando oya li ya tungwa ya kola kuRehoboam. — 1 Aak. 14:22-24; 2 Ondjal. 12:1-4.

Onkalo oya pindjala sho Shishak a thiki muJerusalem, moka mwa li uuwa waRehoboam. Pompito ndjika, omuhunganeki Shemaja okwa li a tumwa a fale etumwalaka lyaKalunga kuRehoboam nokomalenga ge omakuluntu, tali ti: “Ne omwe ekelehi ndje, onkee ngashingeyi nde mu ethele miikaha yaShishak.” Mbela Rehoboam okwa li inyenge ngiini ketumwalaka ndyoka lyeputudho? Ombiimbeli otayi ti: “Omukwaniilwa naakuluntu oya zimine kutya oya yona noya ti: ‘Shoka Omuwa ta longo, osho shu uka.’” Onkee ano, Jehova okwa hupitha Rehoboam noshilando shaJerusalem. — 2 Ondjal. 12:5-7, 12.

Rehoboam okwa tsikile okulela uukwaniilwa wokuumbugantu. Manga inaa sa, okwa li a gandja omagano omawanawa koyanamati mboka ya li oyendji. Okwe shi ningi, opo kaaya tsile ondumbo omumwayina, Abia, ngoka a li te ke mu landula muukwaniilwa. (2 Ondjal. 11:21-23) Kungeyi, Rehoboam okwa li lela a katuka pandunge shi vulithe nale.

Nonando Rehoboam okwa li a kambadhala okuninga shoka oshiwanawa opo a hokiwe kuKalunga, Ombiimbeli otayi ti: “Okwa longo uuwinayi.” Omolwashike mbela? “Oshoka inu ukitha omwenyo gwe a konge Omuwa.” — 2 Ondjal. 12:14.

Oshike tatu ilongo kuRehoboam? Okwa li ha vulika owala kuJehova omathimbo gamwe. Okwa li wo a ningile oshigwana shaJehova uuwanawa wontumba. Nonando ongawo, okwa ndopa okukala nekwatathano lyopothingo naJehova nenge tu tye, ka li a halelela oku mu longela. Shoka oshe mu ningitha a longe uuwinayi nokutameka okulongela iikalunga. Otashi vulika wu ipule ngeyi: ‘Poompito ndhoka Rehoboam a vulika kuKalunga, mbela opu na yalwe ye mu kumagidha e shi ninge nenge okwa li i itedhulula tashi zi komutima, shaashi a hala okulongela Kalunga? (2 Ondjal. 11:3, 4; 12:6) Konima yethimbo, Rehoboam okwa longo shoka oshiwinayi momeho gaJehova. Ina landula oshinkoti shahekulu, David. Odhoshili kutya David naye okwa li ha ningi omapuko, ihe ye okwa li e hole Jehova. Okwa li omudhiginini kelongelokalunga lyashili nokwi iyele ombedhi  tashi zi komutima. — 1 Aak. 14:8; Eps. 51:1, 17; 63:1.

Mehokololo lyaRehoboam otatu vulu okwiilonga mo sha. Eeno, oshi shi okupandulwa uuna aantu taya kwathele aanegumbo lyawo nokukambadhala ya longele Jehova. Ihe opo a kale e tu hokwa, tango otu na aluhe okwaambidhidha elongelokalunga lyashili nokukanyatela kulyo.

Shoka otatu ke shi ninga owala ngele otwa kambadhala okukokeka ohole yetu yokuhola Jehova. Ngaashi owala hatu tula iikuni pomulilo opo gwaa dhime, natse wo otu na okukaleka ohole yetu ya hwama, mokukala hatu konakona Ombiimbeli. Otu na wo okutedhatedha shoka twa lesha nokugalikana aluhe. (Eps. 1:2; Rom. 12:12) Kungeyi, ohole yetu yokuhola Jehova, otayi ke tu inyengitha tu longe ehalo lye mukehe shoka tatu ningi. Otayi ke tu inyengitha wo tu iyele ombedhi tashi zi komutima, ngele otwa yono. Uuna tatu shi ningi, otatu ka kala aadhiginini kelongelokalunga lyashili, ihe itatu ka fa Rehoboam. — Jud. 20, 21.