1. Olundji eputudho olya popiwa ngiini mOmbiimbeli?

UUNA wu uvu oshitya “eputudho,” oshike hashi ya momadhiladhilo goye? Otashi vulika egeelo olyo hali ya tango momadhiladhilo goye, ihe osha kwatela mo oshindji. Olundji Ombiimbeli oya popya kutya eputudho oshinima oshiwanawa kutse, nopoompito dhimwe olya popilwa pamwe nontseyo, uunongo, ohole nosho wo okukala nomwenyo. (Omayel. 1:2-7; 4:11-13) Uuna Kalunga te tu pe egeeloputudho, shoka otashi ulike kutya oku tu hole nokwa hala tu ka mone omwenyo gwaaluhe. (Heb. 12:6) Nonando eputudho lye otashi vulika li kale lya kwatela mo okugeela, ohali kala aluhe pahole. Osha yela kutya oshitya “eputudho” osha kwatela mo okulonga, ngaashi okuputudha okanona.

2, 3. Egeeloputudho olya kwatela mo ngiini okulonga nokugeela? (Tala kethano lyopetameko.)

² Natu taleni koshiholelwa shika: Okamatyona kedhina Johnny oka li taka dhana etanga megumbo. Yina okwe ka lombwele ta ti: “Johnny, owu shi kutya ku na okudhana etanga megumbo! Otashi vulika wu tatule sha.” Ihe molwaashono Johnny okwi ipwililike omalombwelo gayina, okwa tsikile okudhana etanga megumbo, e ta tatula epoto lyoongala. Mbela yina okwa li te ke mu pukulula ngiini? Shoka a li ta ka ninga otashi vulika sha kwatela mo oku mu longa noku mu geela. Sho te mu longo, otashi vulika e mu dhimbulukithe  kutya omolwashike eihumbato lye lya puka. Shono ote shi ningi, molwaashono okwa hala e mu ulukile kutya osha simana a vulike kaavali ye, noku mu yelithila kutya oompango dhawo odha pumbiwa nodhi shi okuuviwa ko. Opo i ilonge oshilongwa, yina otashi vulika e mu pe egeelo tali opalele. Pashiholelwa, otashi vulika a kuthe Johnny etanga uule wethimbo lyontumba. Shono otashi vulika shi mu kwathele a mone kutya okwaavulika oku na iilanduliko.

³ Tu li iilyo yegongalo lyopaKriste, otu li oshitopolwa shuukwanegumbo waKalunga. (1 Tim. 3:15) Onkee ano, ohatu simaneke uuthemba waJehova woku tu pa omithikampango negeeloputudho lyopahole, uuna twe dhi taaguluka. Shimwe ishewe, ngele oonkatu dhetu odhe tu etele iilanduliko iiwinayi, egeeloputudho lye otali ke tu dhimbulukitha nkene sha simana okupulakena kuTate gwetu gwomegulu. (Gal. 6:7) Kalunga oku na ko nasha natse noonkondo nokwa hala tu kale twa nyanyukwa. — 1 Pet. 5:6, 7.

4. (a) Edheulo lini Jehova ha yambeke? (b) Oshike tatu ka kundathana moshitopolwa shika?

⁴ Okugandja egeeloputudho lyopamanyolo, otaku vulu okukwathela okanona nenge omukonakonimbiimbeli a adhe elalakano lye lyokuninga omulanduli gwaKristus. Oohapu dhaKalunga ndhoka dhi li oshilongitho sha simanenena shokudheula, ohadhi tu kwathele tu ‘ulukile omuntu ondjila yu uka.’ Kungeyi, okanona nenge omukonakonimbiimbeli ota vulu okuuva ko ‘nokudhiginina ayihe mbyoka Jesus e tu lombwela.’ (2 Tim. 3:16; Mat. 28:19, 20) Jehova oha yambeke edheulo lya tya ngawo, ndyoka hali kwathele aakonakoni ya kwathele wo yalwe ya ninge aalanduli yaKristus. (Lesha Titus 2:11-14.) Natu ka kundathaneni ngashingeyi omayamukulo gomapulo gatatu ga simanenena: (1) Ongiini egeeloputudho lyaJehova tali ulike kutya oku tu hole? (2) Otatu ilongo ko shike kwaamboka ya li ya pewa egeeloputudho kuKalunga monakuziwa? (3) Ongiini tatu vulu okuholela Jehova nOmwana, uuna tatu gandja egeeloputudho?

5. Omomikalo dhini egeeloputudho lyaJehova hali ulike kutya oku tu hole?

⁵ Jehova ohi inyengithwa kohole a pukulule, a longe noku tu dheule, opo tu tsikile okukala mohole ye nomondjila ndjoka tayi fala komwenyo. (1 Joh. 4:16) Jehova ke na siku e tu tukile nenge e tu ningithe tu kale tu uvite twaa na oshilonga. (Omayel. 12:18) Pehala lyaashono, okwe tu simaneka, oha tala komaukwatya omawanawa mutse nokwa simaneka emanguluko lyetu lyokuninga omatokolo. Mbela nangoye osho ho tala ko egeeloputudho ngawo kutya nduno otali gandjwa okupitila mOmbiimbeli, miileshomwa ya kankamena kOmbiimbeli, kaavali Aakriste nenge kaakuluntugongalo? Uuna twa “gwile meyono,” nokuli nopompito mpoka inaatu shi ndhindhilika, aakuluntugongalo ohaya kambadhala oku tu pukulula nombili nomomukalo gwopahole. Odhoshili kutya ohaye tu ulukile ohole yaJehova. — Gal. 6:1.

6. Uuna egeeloputudho lya kwatela mo omangambeko, shika ohashi ulike ngiini ohole yaKalunga?

⁶ Omathimbo gamwe, egeeloputudho olya kwatela mo oshindji kaashi shi owala okupewa omayele nenge okupukululwa. Ngele eyono olya kwata miiti, otashi vulika li kale lya kwatela mo okukanitha iinakugwanithwa megongalo. Nonando osho shi li ngawo, egeeloputudho ndyoka otali ulike kutya Kalunga oku tu hole. Pashiholelwa, okukanitha iinakugwanithwa, otaku vulu okukwathela omuntu a mone nkene sha simana a gandje eitulomo lela kekonakonombiimbeli lyopaumwene, kokutedhatedha nokokugalikana. Shoka otashi vulu oku mu kwathela a kale a kola pambepo. (Eps. 19:7) Mokweendela ko kwethimbo, otashi vulika a shunithilwe iinakugwanithwa mbyoka. Okukondwa nako ohaku ulike ohole yaJehova, oshoka ohaku kwathele egongalo kaali nwethwe mo nayi. (1 Kor. 5:6, 7, 11) Molwaashono Kalunga oha gandja egeeloputudho tali opalele, okukondwa otaku vulu okukwathela omuyoni  a mone nkene eyono lye lya kwata miiti noshi mu inyengithe i iyele ombedhi. — Iil. 3:19.

7. Shebna okwa li lye, nokwa li a kokeke iikala yini iiwinayi?

⁷ Opo tu tse omuthindo nkene egeeloputudho lya simana, natu tale kaantu yaali mboka Jehova a li a pukulula. Aantu mboka ongaashi Shebna, ngoka a li ko pethimbo lyomukwaniilwa Hiskia nosho wo omumwatate Graham gwopethimbo lyetu. Shebna okwa li “omusilishimpwiyu guuwa,” tashi vulika gwomukwaniilwa Hiskia nokwa li e na oonkondopangelo odhindji. (Jes. 22:15) Shiyemateka, okwa kwatwa kuuntsa e ta kongo esimano lye mwene. Okwa li nokuli i ihokithile ombila yondilo e ti ikongele “omatembakwiita.” — Jes. 22:16-18.

8. Jehova okwa li a pukulula ngiini Shebna, noshizemo osha li shini?

⁸ Molwaashono Shebna okwa li a kongo esimano lye mwene, Kalunga ‘okwe mu kutha uulenga’ e te mu pingene po naEliakim. (Jes. 22:19-21) Shino osha ningwa, pethimbo omukwaniilwa gwAayassur, Sennakerib, a li a hala okuponokela Jerusalem. Konima yethimbo, omukwaniilwa ngoka okwa tumu omalenga ge kuJerusalem pamwe netangakwiita enene, opo ya tilithe Aajuda noya shololithe Hiskia. (2 Aak. 18:17-25) Eliakim oye a li a tumwa a ka popye nomalenga ngoka, ihe ina ya oye awike. Okwa yi pamwe naalumentu yaali, gumwe gwomuyo okwa li Shebna ngoka a li ngashingeyi amushanga. Mbela shoka itashi tu ulukile kutya Shebna ka li a geye nokukwata onkone, ihe okwi ifupipike e ta taamba ko oshinakugwanithwa she oshipe? Ngele osho, oshike tatu ilongo mehokololo ndino? Natu taleni kiinima itatu.

9-11. (a) Iiyilongomwa yini ya simana tatu vulu okwiilonga koshimoniwa shaShebna? (b) Omukalo moka Jehova u ungaunga naShebna, ogwe ku tsa ngiini omukumo?

⁹ Tango, Shebna okwa kanitha ondondo ye. Oshimoniwa she, oshi li elondodho kutya “uuntsa tau tetekele ehanagulo, einenepeko otali tetekele epunduko.” (Omayel. 16:18) Ngele owu na iinakugwanithwa megongalo notashi vulika yalwe ye ku simaneka, mbela oto ka kala ngaa wu na eifupipiko? Mbela oto ka pandula ngaa Jehova, omolwomagano kehe ngoka wu na nenge shoka wa pondola po? (1 Kor. 4:7) Omuyapostoli Paulus okwa nyola a ti: “Onda hala oku mu lombwela one amuhe: Inamu idhiladhilila pehala mpoka inaamu adha, ihe dhiladhileni pandjele.” — Rom. 12:3.

¹⁰ Oshitiyali, nonando Jehova okwa li a geele Shebna, ka li nando e mu tala ko itaa vulu okulundulula. (Omayel. 3:11, 12) Kashi shi tuu oshiilongomwa oshiwanawa kwaamboka ya kuthwa iinakugwanithwa yawo megongalo kunena! Pehala lyokukala ya geya nenge ya  kwata onkone, oshi li nawa ya tsikile okulongela Jehova ngaashi taya vulu, noya tale ko egeeloputudho li li euliko lyohole yaJehova. Dhimbulukwa kutya Tate gwetu, ote ke tu pa ondjambi, ngele otwa kala aaifupipiki. (Lesha 1 Petrus 5:6, 7.) Omukalo moka Kalunga he tu zula, omoku tu pa egeeloputudho lyopahole. Onkee ano, natu tsikile okukala aaifupipiki.

¹¹ Oshititatu, mboka ye na oshinakugwanithwa shokugandja egeeloputudho, ngaashi aavali naakuluntugongalo, otaya vulu okwiilonga mo sha sha simana momukalo moka Jehova u ungaunga naShebna. Oshike taya vulu okwiilonga ko? Molwaashono egeeloputudho lyaJehova otali ulike kutya ke hole aantu taya yono, otali ulike wo kutya oku na ko nasha nomuntu ngoka a yona. Wu li omuvali nenge omukuluntugongalo, uuna to gandja egeeloputudho mbela oto ka holela ngaa Jehova, mokutala kuukwatya uuwanawa womumwoye nenge womwiitaali omukweni? — Jud. 22, 23.

12-14. (a) Yamwe ohayi inyenge momikalo dhini, uuna taya pewa egeeloputudho kuJehova? (b) Oohapu dhaKalunga odha kwathele ngiini omumwatate gumwe a lundulule iikala ye, noshizemo oshini?

¹² Shinikitha oluhodhi, yamwe konima ngele ya pewa egeeloputudho, ohaya kala yu uvite nayi nohaya tokola okukala kokule naKalunga nonoshigwana she. (Heb. 3:12, 13) Ihe mbela shoka otashi ti kutya aantu ya tya ngawo itaya vulu okukwathelwa? Natu tale koshiholelwa shomumwatate Graham, ngoka a li a kondwa e ta galulilwa megongalo, nokonima okwa ka kala ini ipyakidhila we niinima yopambepo. Konima yomimvo dhontumba, okwa pula omukuluntugongalo gumwe ngoka a li kuume ke, a konakone naye Ombiimbeli.

¹³ Omukuluntugongalo ngoka okwa ti: “Graham okwa li omwiinenepeki. Okwa li a pe uusama aakuluntugongalo mboka ye mu kwathele manga inaa kondwa. Onkee ano, sho twa konakona naye, otwa kundathana omanyolo ngoka taga popi kombinga yuuntsa niizemo yawo. Oohapu dhaKalunga odha li dha kwathele Graham a mone kutya uukwatya mboka e na kawu shi uuwanawa. Shoka oshe mu etele iizemo iiwanawa. Konima sho a zimine kutya okwa kala shili e na ‘endangalati’ lyokukala omwiinenepeki nonokutya iikala yokugandja uusama oyo ya li uupyakadhi kuye, okwa tameke okuninga omalunduluko nziya. Okwa tameke okuya kokugongala pandjigilile, okukonakona nuudhiginini Oohapu dhaKalunga nokukala ta galikana aluhe. Okwa taamba ko wo oshinakugwanithwa she shokusila oshimpwiyu uukwanegumbo we, ano omukulukadhi gwe noyana, e li omutse gwegumbo.” — Luk. 6:41, 42; Jak. 1:23-25.

¹⁴ Omukuluntugongalo okwa tsikile ko a ti: “Esiku limwe, Graham okwa lombwele ndje oshinima shoka sha guma omutima gwandje. Okwa ti: ‘Oshili onda kala ndi yi shi uule womimvo, nonda kala nokuli omukokolindjila. Ihe ngashingeyi opo owala tandi vulu okutya ondi hole Jehova.’ Konima yethimbo, okwa li a pulwa a kale ha gandja omambako mOshinyanga shUukwaniilwa, oshinakugwanithwa shoka a li e hole noonkondo. Oshiholelwa she osha longa ndje kutya ngele omuntu okwi ifupipike koshipala shaJehova mokutaamba ko egeeloputudho, omayambeko apehe mpo!”

15. Ngele otwa hala okwaadha omitima dhayalwe uuna tatu ya pukulula, oshike tu na okuninga?

¹⁵ Opo tu kale aalongi aawanawa, tango otu na okukala aalongwa aawanawa. (1 Tim. 4:15, 16) Sha faathana, mboka taya longithwa kuJehova ya pukulule yalwe, nayo oye na okutsikila okukala taya vulika nehalo ewanawa kewiliko lyaJehova. Ngele oya kala haya vulika neifupipiko, otashi ka ningitha yalwe ye ya simaneke, notaya ka popya nayo ya manguluka, uuna taye ya dheula nenge taye ya pukulula. Natu taleni koshiholelwa shaJesus.

16. Oshike tatu vulu okwiilonga kunkene Jesus a li a pondola mokulonga aantu noku ya pukulula?

¹⁶ Jesus okwa li ha pulakene noha vulika  kuHe, nonando oku shi ninga osha li oshidhigu noonkondo. (Mat. 26:39) Okwa li a lombwele aapulakeni ye kutya elongo lye nuunongo we, owa za kuJehova. (Joh. 5:19, 30) Molwaashono okwa li omwiifupipiki noha vulika, okwa ningitha aanamitima omiwanawa ya hedhe popi naye, noshe mu ningitha a kale omunalukeno nomulongi omwaanawa. (Lesha Lukas 4:22.) Oohapu dhe dhopahole odha li dha gumu omitima dhaamboka pathaneko ya fa oshihenguti sha tanduka nenge ya fa onyeka tayi tsina. (Mat. 12:20) Nokuli naasho eidhidhimiko lye lya makelwa, Jesus okwa kala omunambili nomunahole. Shika osha li shi iwetikile, sho a li a pukulula aayapostoli ye, mboka ya li yu ulike ombepo yokwiihola mwene noyokulalakanena esimano. — Mark. 9:33-37; Luk. 22:24-27.

17. Omaukwatya geni omawanawa taga ka kwathela aakuluntugongalo ya lithe nawa oshigunda shaKalunga?

¹⁷ Ayehe mboka ye na oshinakugwanithwa shokugandja egeeloputudho lyopamanyolo, oya pumbwa okuholela oshiholelwa shaKristus. Odhoshili kutya uuna taye shi ningi, otayu ulike kutya oye na ehalo lyokuzulwa kuKalunga nOmwana. Omuyapostoli Petrus okwa nyola a ti: “Kaleni aasita yoshigunda shoka mwe shi pewa kuKalunga, mu shi tonatele nehalo ewanawa, hakethiminiko. Inamu longa nelalakano tali sitha ohoni lyokukonga eliko, ihe onehalo tali zi momwenyo. Inamu pangela mboka ya tulwa metonatelo lyeni, ihe kaleni mu shi kuholelwa kegongalo.” (1 Pet. 5:2-4) Uushili owo kutya aakuluntugongalo mboka haya vulika nehalo ewanawa kuKalunga naKristus, ngoka e li omutse gwegongalo, ohaya mono mo uuwanawa paumwene nosho wo mboka taya sile oshimpwiyu megongalo. — Jes. 32:1, 2, 17, 18.

18. (a) Jehova okwa tegelela aavali ya ninge shike? (b) Kalunga oha kwathele ngiini aavali ya gwanithe po iinakugwanithwa yawo?

¹⁸ Ekotampango lya faathana otali longo nomuukwanegumbo. Mboka ye li omitse dhuukwanegumbo, oya lombwelwa taku ti: “Inamu hinda aana yeni noku ya geyitha, ihe ya putudheni ne mu ya kumagidhe paukriste.” (Ef. 6:4) Mbela shoka osha kwata miiti shi thike peni? Omayeletumbulo 19:18 otayi ulike kutya okuputudha aanona otaku ti omwenyo nenge eso. Eeno, Jehova okwa tegelela aavali Aakriste ye ki ihokolole kuye, ngele oya ndopa okuputudha oyana. (1 Sam. 3:12-14) Nonando ongawo, Jehova oha pe aavali uunongo noonkondo ndhoka ya pumbwa, uuna taye dhi mu pula megalikano nongele taye etha ya wilikwe kOohapu dhe nokombepo ye ondjapuki. — Lesha Jakob 1:5.

19, 20. (a) Omayambeko geni haga zi mokutaamba ko egeeloputudho lyaKalunga? (b) Oshike tatu ka kundathana moshitopolwa tashi landula?

¹⁹ Ngele otwa kala hatu taamba ko eputudho lyaJehova nokuholela Jehova naJesus, uuna tatu pukulula yalwe, otatu ka mona omayambeko ogendji ngoka itaaga vulu okuyalulwa. Shoka otashi ka kwathela aanegumbo negongalo li kale li na ombili. Aantu paumwene nayo otaya ka kala yu uvite shili ye holike, ye na oshilonga noya gamenwa, omayambeko ngoka tatu ka mona monakuyiwa. (Eps. 72:7) Kapu na omalimbililo kutya eputudho lyaJehova otali tu longo nkene tatu vulu okukala sigo aluhe tu na ombili nokulongela kumwe tu li uukwanegumbo kohi yewiliko lye. (Lesha Jesaja 11:9.) Ngele otwa kaleke shoka momadhiladhilo, otatu ka mona kutya eputudho lyaKalunga, oli li euliko lyohole ye yoku tu hola.

²⁰ Moshitopolwa tashi landula, otatu ka popya muule kombinga yegeeloputudho muukwanegumbo nosho wo megongalo. Otatu ka tala wo nkene tatu vulu okukala tu na eipangelo nosho wo koshinima oshiwinayi noonkondo shoka shi vulithe uuwehame wopakathimbo, mboka omuntu ha kala u uvite, pethimbo a pewa egeeloputudho.