ONDA putukila moshilando Graz, moAustria. Sho ndi na omimvo heyali, onda tuminwa kosikola yedheulo lyopalongelokalunga. Kosikola hoka onda mono ko aasita noosesitela taya hondele, nonda li nda kumwa. Onkee ano, momumvo omo tuu moka, meme okwa pitike ndje ndi ze ko.

Konima yethimbo, onda yi kosikola yomuhandjo. Ongulohi yimwe, Tate okwa li i ile ndje ko, molwaashoka moGraz omwa li tamu mbomwa iihuna yowala. Otwa yi kondoolopa yaSchladming tu ka konge egameno. Konima owala sho twa thiki mo, ontopa ndjoka opo twa adhika twa taaguluka, oya mbomwa po. Oshikando shimwe, manga tu li molugumbo lwaandjetu nakuku ngoka a vala meme, ondhila ndjoka ya li tayi tuka pevi noonkondo, oyu umbu popepi natse. Sho iita ya ka hula, oshu ulike kutya epangelo nongeleka oya ndopa oku tu kwathela.

Mo 1950, gumwe gwomOonzapo dhaJehova okwa tameke okukonakona Ombiimbeli nameme. Onda li handi pulakene koonkundathana dhawo, nonda li nokuli handi yi nameme komakugongala gamwe. Sho meme a mono kutya Oonzapo dhaJehova otadhi longo oshili, okwa ninginithwa mo 1952.

Pethimbo mpoka, egongalo ndyoka lyomoshitopolwa shetu, onda li ndi wete lya fa owala ehala lyaakokele. Konima yethimbo, otwa li twa talele po egongalo moka mu na aagundjuka oyendji, ihe haakokele owala. Sho twa galukile koGraz, onda tameke okuya aluhe kokugongala, nonda li nda mono mbala kutya shoka tandi ilongo oshili. Onda mono wo kutya Jehova oku li Kalunga ngoka ha ambidhidha aapiya ye. Ohe shi ningi nokuli nuuna tu uvite kutya otwa taalelwa koonkalo oondhigu. — Eps. 3:5, 6.

Onda li nda hala okuuvithila yalwe oshili. Aamwayina yandje oyo ndu uvithile tango. Aamwamemekadhona yane mboka aakuluntu kungame, oya adhika ya za mo nale megumbo, ya ka longa osikola. Ihe ayehe onda li nde ya talele po komikunda dhawo, nonde ya ladhipike ya konakone  Ombiimbeli. Omathimbo hamale, aamwayina yandje ayehe oya tameke okukonakona, e taya ningi Oonzapo dhaJehova.

Oshiwike shandje oshitiyali tatu uvitha egumbo negumbo, onda li ndu uvithile omukiintu gwomimvo 30 nasha, ngoka nda tameke okukonakona naye Ombiimbeli. Okwa ningi ehumokomeho sigo a ninginithwa, nokonima omusamane gwe noyanamati yaali oya ningi sha faathana. Ekonakono ndyoka olya li lya koleke eitaalo lyandje. Omolwashike? Omolwaashoka kapwa li lela ngoka a konakona Ombiimbeli nangame. Onda li ndi na okwiilongekidha nawa shoka tatu ka konakona. Momukalo moka, onda li handi ilongo mwene tango, opo nawa ndi ka longe aakonakonimbiimbeli yandje. Shoka osha li sha kwathele ndje ndi uve ko nawa oshili. MuApilili 1954, ondi iyapulile Jehova e te ninginithwa.

Mo 1955, onda yi koshigongi shopaigwana shoka sha li moNdowishi, moFulaanisa nomoIngilanda. Manga ndi li moLondona, onda tsakanene mo nomumwatate Albert Schroeder. Okwa li omulongi kOsikola yOmbiimbeli yaGilead, nokonima okwa ka langekwa po e li oshilyo shOlutuwiliki. Pethimbo tatu ulukilwa momusiuma yaBritania, omumwatate ngoka okwa li e tu ulukile omanyolo gOmbiimbeli gopetameko. Oga li ge na edhina lyaKalunga lya nyolwa moondanda dhOshihebeli, nokwa li e tu yelithile nkene ga simana. Shoka osha ningitha ndje ndi kale ndi hole Jehova shi vulithe nale, noshi inyengitha ndje ndi kale nda hala okuhumitha komeho oshili yOohapu dhaKalunga.

Mu 1 Januali 1956, onda ningi omukokolindjila gwondjigilile. Konima yoomwedhi ne, onda hiywa ndi ka longe ndi li omukokolindjila i ikalekelwa moAustria. Pethimbo mpoka, mondoolopa Mistelbach moka nda li handi uvithile, kamwa li nando Onzapo yimwe. Ihe onda li nda taalelwa keshongo limwe. Ngame nakuume kandje ngoka twa li tatu kokola ondjila naye, otwa li twa yoolokathana. Ngame onda li ndi na omimvo 19 lwaampono nonda li nda za kondoolopa, omanga ye a li e na omimvo 25 nokwa za komikunda. Kanda li handi penduka nziya ethimbo lyongula, ihe ye okwa li e hole okupenduka ongula onene. Ngele tashi ya kongulohi, kanda li handi kotha mbala, ihe ye okwa li ha kotha kuyele. Nonando ongawo, okutula miilonga omayele gOmbiimbeli, okwe tu kwathele tu idhidhimikilathane notu nyanyukilwe iilonga yetu tu li aakokolindjila.

Odhoshili kutya otwa li twa taalelwa komashongo galwe omanene. Otwa li nokuli twa hepekwa, ihe “Kalunga ine tu ekelahi.” (2 Kor. 4:7-9) Oshikando shimwe manga twa li tatu uvitha momukunda gumwe, aantu oya li ya mangulula oombwa dhawo. Ngame nakuume kandje, otwa li twa totelwa koombwa oonene tadhi gwedha nodha kenyata komayego. Otwi ikwata miikaha e tandi galikana te ti: “Jehova, alikana ngele odhe tu kwata, tu kwatha tu se mbala!” Sho oombwa ando dhi tu nukile, odha mwena e tadhi tekateka omishila nodha shuna. Otwa li tu uvite Jehova e tu gamena. Konima yaashono, otu uvitha momukunda aguhe ngoka, notwa li twa nyanyukwa, oshoka aantu oya li taya pulakene lela. Otashi vulika ya li ya kumwa nokuli sho oombwa inaadhi tu monitha oshiponga nenge sho twa tsikile owala niilonga yetu, nonando otwa li twa totelwa koombwa. Yamwe yomuyo mokweendela ko kwethimbo, oya ningi Oonzapo.

Otwa li ishewe twi iyadha meshongo limwe. Esiku limwe mwene gwegumbo moka hatu zi, okwe ya kegumbo a kolwa, nokwa li ta popi kutya ote tu dhipaga, molwaashoka otatu piyaganeke aashiinda. Omukulukadhi gwe okwa kambadhala e  mu ngungumaneke, ihe ine shi pondola. Otwa li tu uvu ayihe mbyoka, sho tu li mondunda yetu yopombanda. Mbalambala otwa tula iipundi pomweelo gwondunda yetu, e tatu tameke okupakela ookofa dhetu. Sho twe egulula omweelo, mwene gwegumbo okwa li a thikama pootalapa pombanda, e na omwele omunene. Onkee ano, otwa pitile komweelo gwokonima e tatu endele moshikunino tu na iinima yetu ayihe, noinatu galuka we.

Otwa yi kohotela e tatu pula ondunda yokulala. Otwe ki iyadha owala omumvo tagu hala okwiidhenga po tu li natango mohotela moka, naashoka osha li she tu kwathele tu tyapule uukalele wetu. Ngiini mbela? Ohotela ndjoka oya li pondingandinga yondoolopa, naakonakonimbiimbeli yetu yamwe oya li ya hala okukonakonena mohotela moka. Otwa tameke nziya ekonakono lyembo lyegongalo nolyOshungolangelo lyokoshiwike mondunda yetu yomohotela, nopwa li hapu kala aantu tayi ihilile po 15.

MoMistelbach otwa kala mo uule womvula nasha. Nokonima, onda tuminwa koFeldbach, kuumbugantuzilo waGraz. Onda pewa kuume omupe ngoka twa ka kokola naye ondjila kehala hoka, ihe kakwa li natango egongalo. Otwa li hatu kala mondunda onshona lela pontala ontiyali yegumbo moka hatu zi. Ombepo oya li hayi piti pokati kiipilangi, onkee otwa kambadhala tu thitike po niifokundaneki. Otwa li wo hatu ka teka omeya kokakweyo. Ihe otwa li hatu shi tyapula. Meni lyoomwedhi oonshona, ongundu oya li ya totwa po. Mokweendela ko kwethimbo, aantu 30 yomuukwanegumbo mboka twa konakona nawo, oye ya moshili.

Moonkalo ndhoka nda pita, odha kwathele ndje ndi kale nda pandula shili Jehova, sho ha ambidhidha mboka ya pititha komeho Uukwaniilwa. Nonando otu kale monkalo moka aantu itaaya vulu oku tu kwathela, Jehova aluhe opo e li. — Eps. 121:1-3.

Mo 1958, oshigongi shopaigwana osha li sha ningilwa moNew York City, poYankee Stadium nopoPolo Grounds. Onda li ndu udhitha ofooloma ndi ye ko, noshitayimbelewa shaAustria osha li sha pula ndje ngele otandi vulu ndi ka hite ongundu onti-32 kOsikola yaGilead. Kanda li nda tindi uuthembahenda mboka. Onda yamukula nziya nda ti: “Eewa!”

KOsikola yaGilead, onda li handi kuutumba pamwe nomumwatate Martin Poetzinger. Okwa li i idhidhimikile oonkalo oondhigu mookamba dhaNazi. Konima naye okwa ka ninga oshilyo  shOlutuwiliki. Pethimbo lyoontundi, omathimbo gamwe okwa li ha nongonone ndje ta ti: “Erika, shoka otashi ti ngiini mOshindowishi?”

Sho osikola yi li metifa, omumwatate Nathan Knorr okwa tseyitha kutya otatu ka longela peni. Ngame onda li nda tumwa ndi ku uvithile koParagwai. Molwaashoka onda li lela omugundjuka, onda li nda pumbwa epitikilo lyatate lyokuya koshilongo hoka. Sho nde li mono, onda thiki moParagwai muMaalitsa 1959. Onda li nda tuminwa ndi ka kale megumbo lyaatumwa nakuume kandje omupe ngoka nda pewa.

Inapu pita ethimbo, onda tsakanene nomumwatate Walter Bright, ngoka a li omutumwa nokwa pita ongundu onti-30 mOsikola yaGilead. Mokweendela ko kwethimbo, otwa hokana notwa li twi idhidhimikile omashongo pamwe. Uuna twi iyadha muupyakadhi, otwa li hatu lesha euvaneko lyaJehova ndyoka li li muJesaja 41:10 tali ti: “Ino tila — ongame ndi li pungoye! Ongame Kalunga koye — ino limbililwa! Otandi ku kankameke.” Shika osha li she tu shilipaleke kutya ngele otwa tsikile okukala aadhiginini kuKalunga nokupititha komeho Uukwaniilwa we, ite ke tu etha nando.

Mokweendela ko kwethimbo, otwa li twa tuminwa koshitopolwa shi li popepi noongamba dhaBrazilia. Aasita yomoshitopolwa moka, oya li ya lombwele aagundjuka yu umbe egumbo lyetu lyaatumwa nomamanya, ndyoka lya adhika nale li li monkalo ombwinayi. Opo ihe, Walter okwa tameke okukonakona Ombiimbeli nomukuluntu gwaapolisi. Omukuluntu ngono okwa li a shilipaleke pu kale aapolisi ya thikama popepi negumbo lyetu uule woshiwike, naapataneki yetu kaya li we ye tu piyaganeke. Konima yethimbo efupi, otwa tembukile kehala li li hwepo ndyoka lya li handiyaka yoongamba dhaBrazilia. Shika osha li oshiwanawa lela, oshoka otwa li hatu vulu oku ka gongala moParagwai nomoBrazilia. Manga inaatu za mo miilonga mbyoka, moshitopolwa moka otwa thigi mo omagongalo gaali omashona.

Ndohotola gwandje okwa li a lombwele ndje kutya itandi vulu okumona aanona. Ihe mo 1962, otwa li twa kumwa sho tu uvu kutya ondi na etegelelo. Onkee ano, hugunina otwa ka kala mondoolopa Hollywood, moFlorida, popepi naakwanezimo yaWalter. Omimvo odhindji, ngame naWalter katwa li we tatu vulu okukokola ondjila. Otwa li tu na okusila oshimpwiyu aanona yetu. Nonando ongawo, otwa tsikile okupititha komeho Uukwaniilwa. — Mat. 6:33.

MuNovomba 1962, sho twa thiki moFlorida, otwa li twa kumwa okumona kutya aantu yomoshitopolwa kaya li ye hole okumona aamwatate naamwameme aaluudhe taya gongalele pamwe naamwatate nonaamwameme aatiligane, nenge yu uvithile moshitopolwa shimwe. Ihe Jehova iha tongola aantu pamihoko. Inapu pita ethimbo ele, omagongalo oga tameke okukala ga hangana. Odhoshili kutya Jehova okwa li a kwathele melongekidho ndika, nomoshitopolwa shoka ngashingeyi omu na omagongalo ogendji noonkondo.

Shinikitha oluhodhi, mo 2015, Walter okwa si kokankela yomuuluyi. Omimvo 55 ndhoka twa kala mondjokana, okwa kala omusamane omwaanawa itoo mu pewa komuntu, e hole Jehova nokwa kwathela aamwatate oyendji. Onda tegelela oku ke mu mona natango, sho ta ka yumudhwa muuyuni uupe e na uukolele. — Iil. 24:15.

Onda pandula sho nda kala miilonga yethimbo lyu udha uule womimvo dhi vulithe po 40, tandi nyanyukilwa iinima oyindji nomalaleko nuuyamba ogendji. Pashiholelwa, ngame naWalter otwa li twa vulu okukala po pomaninginitho gaakonakonimbiimbeli yetu ye li 136. Odhoshili kutya otwa li hatu taalelwa komashongo, ihe kaga li ge tu ethitha po okulongela Kalunga nuudhiginini. Pehala lyaashono, otwa hedha popepi naye, notwa kala twe mu inekela u ukithe iinima momukalo gwe nopethimbo lye lyo opala. Shoka osho a ningi! — 2 Tim. 4:16, 17.

Ohandi kala nda yuulukwa Walter noonkondo, ihe uukokolindjila ohawu kwathele ndje ndi idhidhimikile onkalo yandje. Ohandi mono oshiwanawa okulonga yalwe, nokukundathana nayo kombinga yetegameno lyeyumuko. Odhoshili kutya Jehova okwa kala nokukwathela ndje momikalo odhindji. Shoka u uvaneka oshoshili, molwaashoka okwa kwatha ndje, okwa kankameke ndje nokwa kwata ndje ‘nolulyo luuyuuki we.’ — Jes. 41:10, yelekanitha OB-1954.