1. Aakriste yomethelemimvo lyotango, oya li ya taalela oonkalo dhini?

ETHIMBO lyontumba pokati komumvo 62 nomumvo 64 E.N., omuyapostoli Petrus okwa li a nyolele “aahogololwa yaKalunga, aapongekwa mboka yi ihanena iitopolwa yomuPontus, Galatia, Kappadokia, Asia naBitinia.” (1 Pet. 1:1) Aamwatate naamwameme momagongalo ogendji muAsia Eshona, oya li ya pumbwa etsomukumo newiliko. Oya li taya hepekwa nokushekwa. Oya li pethimbo edhigu noya li ya taalela “emakelo elulu.” Petrus okwa nyola a ti: “Ehulilo lyiinima ayihe oli li popepi.” Eeno, onkalelo yiinima yOshijuda oya li pokuhula po meni lyomimvo omulongo. Oshike sha li tashi ka kwathela Aakriste kehe mpoka ye li, ya pite mo momathimbo ngoka omadhigu? — 1 Pet. 4:4, 7, 12.

2, 3. Omolwashike Petrus a li a ladhipike ooitaali ooyakwawo ya kale haya yakula aayenda momagumbo gawo? (Tala kethano lyopetameko.)

² Petrus okwa li a ladhipike aamwahe a ti: “Yakuleni aayenda momagumbo geni.” (1 Pet. 4:9) Oshitya “yakula” mOshigreka otashi ti lelalela “okuhola nenge okukenukila mboka kuu shi.” Ndhindhilika kutya Petrus okwa li a ladhipike ooitaali ooyakwawo ya kale haya yakula ‘aayenda momagumbo gawo,’ ano mboka ye shi nale nohaya endathana nayo. Ongiini shoka sha li tashi ke ya kwathela?

 ³ Shoka osha li tashi ke ya kwathela ya kale ya hangana. Dhiladhila koshimoniwa shoye mwene. Mbela opu na oshikando wa li wa hiywa kugumwe? Mbela ino za po wa nyanyukwa esiku ndyono? Sho wa li wa hiya yamwe yomegongalo lyeni, mbela kasha li sha koleke ekwatathano lyeni? Uuna tatu yakula aamwatate naamwameme momagumbo getu, ohashi tu kwathele tu ya tseye nawa lela paumwene. Aakriste yopethimbo lyaPetrus, oya li ya pumbwa okukala ya hangana, sho oonkalo tadhi ende tadhi nayipala. Shoka osha faathana wo nAakriste ‘yomomasiku ngaka gahugunina.’ — 2 Tim. 3:1.

4. Omapulo geni tatu ka kundathana moshitopolwa shika?

⁴ Oompito dhini tu na dhokuyakula ‘aayenda momagumbo getu’? Ongiini tatu vulu okusinda shoka tashi tu imbi tu yakule aayenda? Oshike tashi vulu oku tu kwathela tu kale aayenda ye li nawa?

5. Ongiini tatu vulu okuyakula aayenda pokugongala kwetu kwopaKriste?

⁵ Kokugongala: Ayehe mboka haye ya kokugongala kwopaKriste, ohatu ya taamba ko ye li aayenda ooyakwetu, opo tu lye pamwe nayo iikulya yopambepo. Jehova nehangano lye, oyo aayakuli yetu. (Rom. 15:7) Uuna mboka aape taye ya kokugongala kwetu, otse hatu ya yakula. Omolwashike itoo kambadhala okuyakula mboka aape kutya nduno oya zala noyi iyopaleka ngiini? (Jak. 2:1-4) Ngele ngoka omupe ina mona ngoka te mu yakula, mbela ito vulu oku mu pula mu kuutumbe pamwe? Otashi vulika ta ka kala a pandula, sho we mu kwathele e endele pamwe nokugongala naasho we mu ulukile omanyolo ngoka taga leshwa. Shoka otashi ka kala omukalo omwaanawa ‘gwokuyakula oondjendi momagumbo getu.’ — Rom. 12:13.

6. Oolye ye na okukala aayenda ya simana momagumbo getu?

⁶ Uuna wa hiya gumwe mu ka lye pamwe: Pethimbo lyOmbiimbeli, okuyakula aayenda okwa li kwa kwatela mo okuhiya omuntu kegumbo lyoye, mu ka lye pamwe naye. (Gen. 18:1-8; Aatok. 13:15; Luk. 24:28-30) Okuhiya gumwe mu ka lye pamwe, okwa li haku ulike kutya owa hala okupanga uukuume nokukala nombili. Oolye ye na okukala aayenda yetu ya simana? Aamwatate naamwameme yomegongalo lyetu. Sho oonkalo tadhi ende tadhi nayipala, mbela itatu ka kala twa pumbwathana? Otwa pumbwa okukoleka uukuume wetu nokukala tu na ombili naayehe. Oshungolangelo yokukonakonwa muukwanegumbo waBetel moAmerika, oya kala hayi konakonwa okuza 6:45 yokomatango. Ihe mo 2011, Olutuwiliki olwa lundulula ethimbo ndyoka, opo yi kale hayi ningwa po 6:15 yokomatango. Omolwashike sha ningilwa? Metseyitho omwa popiwa kutya uuna ekonakono lyOshungolangelo lya pu kuyele, otashi ka kala oshipu kAabetel ya yakulathane. Iitayimbelewa yimwe nayo oya tameke okuninga sha faathana. Elongekidho ndika olya kwathela uukwanegumbo waBetel wu kale wa hangana shi vulithe nale.

7, 8. Ongiini tatu vulu okuyakula aapopi aatalelipo yehangano lyaJehova?

⁷ Uuna aamwatate yokomagongalo galwe ye ya oku tu pa oshipopiwa, nuuna aatonatelishikandjo nomathimbo gamwe aakalelipo ya za koshitayimbelewa shoka tashi tu tonatele ye ya oku tu talela po, ohashi tu egululile oompito tu yakula aayenda. (Lesha 3 Johannes 5-8.) Oku ya hiya tu lye pamwe nayo, ogwo omukalo gumwe omwaanawa gwoku shi ninga. Mbela ito vulu oku shi ninga?

⁸ Omumwameme gumwe moAmerika ota ti: “Uule womimvo, ngame nomusamane gwandje otwa kala hatu yakula aapopi aatalelipo oyendji pamwe naakulukadhi yawo megumbo lyetu. Iimoniwa yawo ayihe oya li ye tu yolitha noya li ye tu kwathele tu koke pambepo. Katwa li nando twi ipe uusama.”

9, 10. (a) Oolye tashi vulika ya kale ya pumbwa ehala lyokukala ethimbo ele? (b) Mbela mboka ye na omahala omashona nayo otaya vulu okukwathela? Gandja oshiholelwa.

⁹ Aayenda mboka haya kala po ethimbo ele: Pethimbo lyonale, okuyakula aayenda olundji okwa li kwa kwatela mo okupa aayenda ehala lyokukala. (Job 31:32; Filem. 22) Pethimbo  lyetu, ompito ya tya ngawo ohayi holoka po wo. Olundji omagongalo ngoka aatonatelishikandjo taya talele po, ogo haga kala ge na oshinakugwanithwa shoku ya pa ehala lyokukala. Aaiyambi yokutunga nosho wo aauvithi mboka ye li koosikola dhelongo lyopakalunga, nayo otashi vulika ya kale ya pumbwa omahala gokukala. Iiponga yopaunshitwe otashi vulika yi hanagule po omagumbo gaanegumbo yamwe, notashi vulika ya kale ya pumbwa omahala pakathimbo sigo ya mono omahala mpoka taya kala. Inatu dhiladhila kutya mboka ye na omagumbo omawanawa oyo owala taya vulu okukwathela, oshoka otashi vulika ye shi ninga nale lwiikando. Mbela ito vulu okukwathela yalwe ehala lyokukala, nonando egumbo lyoye eshona?

¹⁰ Omumwatate gumwe moSouth Korea, ota dhimbulukwa sho a li a kwathele aauvithi mboka ya li ya hiti oosikola dhelongo lyopakalunga ehala lyokukala. Okwa nyola a ti: “Petameko onda li tandi kakadhala, molwaashoka opo owala twa adhika twa hokana notwa li megumbo eshona lela. Ihe sho twa kala nayo, osha li shinyanyudha noonkondo. Tu li aaihokani aape, otwa li twa vulu okumona nkene aaihokani taya vulu okukala ya nyanyukwa, uuna taya longele Jehova notaya lalakanene iinima yopambepo pamwe.”

11. Omolwashike mboka aape megongalo lyeni tashi vulika ya kale ya pumbwa okukwathelwa?

¹¹ Mboka aape megongalo: Moshitopolwa sheni otashi vulika mu tembukile uukwanegumbo nosho wo aantu yontumba. Yamwe otashi vulika ye ya, omolwompumbwe onene yaauvithi. Aakokolindjila yamwe otashi vulika ya tuminwe kegongalo lyeni ye ye ya kwathele. Odhoshili kutya ayehe mboka oye na okuninga omalunduluko, ngaashi okwiigilila oshitopolwa, egongalo, eputuko nelaka ndyoka hali popiwa mo. Oku ya hiya mu lye pamwe nayo nenge mu ke ende mo, otashi ke ya kwathela ya mone ookuume aape noyi igilile omalunduluko ngoka.

12. Oshimoniwa shini tashi ulike kutya uuna to yakula aayenda, ino pumbwa okulongekidha iinima oyindji?

¹² Uuna to yakula aayenda, ino pumbwa okulongekidha iinima oyindji. (Lesha Lukas 10:41, 42.) Omumwatate gumwe ota dhimbulukwa pethimbo ya yi miilonga yuutumwa a ti: “Otwa li aagundjuka, katwa li tu shi oshindji notwa kala twa yuulukwa yaandjetu. Ongulohi yimwe omukulukadhi gwandje okwa li a yuulukwa kegumbo, nokwa li nda kambadhala oku mu kwathela, ihe inashi kwatha sha. Opo tu li po, lwopo 7:30 komatango, pomweelo gwetu opwa konkolwa. Tu ka tye ngeyi, omukonakonimbiimbeli e tu etela omalemune gatatu. Okwa li e ya oku tu popitha. Otwa ti ne ye mo, e tatu mu pe omeya. Opo nduno, otwa ningi otee no-hot chocolate. Katwa li tu shi elaka lyOshiswahili, ye naye ka li e shi Oshiingilisa. Oshimoniwa shoka osha li she tu kwathele lela tu pange uukuume naamwatate yomoshitopolwa.”

13. Uuwanawa wuni hawu zi mokuyakula aayenda?

¹³ Mbela opu na oshikando shimwe wa li wu uvite itoo vulu okuyakula aayenda? Ngele osho, owa pitililwa po koompito dhokunyanyukilwa pamwe nokupanga uukuume tawu kalelele. Okuyakula aayenda, ogwo omukalo gumwe tagu vulu oku tu kwathela kaatu kale tu uvite uuwike. Ihe otashi vulika wi ipule to ti: ‘Omolwashike omuntu ha kala u uvite itaa vulu okuyakula aayenda?’ Opu na okukala omatompelo ogendji ngoka tage mu imbi e shi ninge.

14. Oshike tatu vulu okuninga po, ngele katu na ethimbo lya gwana lyokutaamba ko ehiyo nenge lyokuyakula aayenda?

¹⁴ Ethimbo lyetu noonkondo dhetu: Aapiya yaJehova oyi ipyakidhila unene noye na iinakugwanithwa oyindji. Yamwe otashi vulika ya kale yu uvite kutya kaye na ethimbo noonkondo dhokuyakula aayenda. Ngele nangoye osho ho kala wu uvite ngawo, otashi vulika wa pumbwa okutala nawa elandulathano lyomaipyakidhilo goye. Mbela ito vulu okuninga omalunduluko, opo wu kale wu na ethimbo noonkondo wu taambe ko ehiyo nenge wu yakula aayenda? Omanyolo otaga ladhipike Aakriste ya kale haya yakula aayenda. (Heb. 13:2) Onkee ano, inashi  puka okukonga ethimbo wu ninge ngaaka. Odhoshili kutya otashi vulika wu kale wa pumbwa okushonopeka omaipyakidhilo goye gamwe.

15. Yamwe otashi vulika hayi ipula unene nashike kombinga yokuyakula aayenda?

¹⁵ Nkene wi iyuvitile: Mbela opu na ethimbo wa li wa hala okuyakula aayenda, ihe owa li wu uvite itoo vulu oku shi ninga? Yamwe ohaya kala ya sa ohoni nenge ya tila okuya moonkundathana nenge ya dhiladhile kutya aayenda otaya ka kala yu uvite ezaza. Yalwe oye na iiyemo iishona nohaya kala yu uvite kutya itaya vulu okuyakula aayenda, ngaashi iilyo yilwe yegongalo hayi shi ningi. Dhimbulukwa kutya ngele egumbo lyoye olyu unganekwa nawa, lya yela noli li ehala lyombili, shoka osho sha simanenena, ihe haamolwashoka lyondilo.

16, 17. Oshike tashi vulu oku ku kwathela waa kale to ipula unene kombinga yokuyakula aayenda?

¹⁶ Ngele oho kala to ipula unene kombinga yokuyakula aayenda, hangoye awike. Omukuluntugongalo gumwe moBritania okwa ti: “Omuntu oho kala wu na uumbanda, uuna to ilongekidhile aayenda. Ihe kehe shimwe sha kwatelwa mokulongela Jehova, ohashi tu etele uuwanawa wu vule kehe oshimpwiyu shoka hatu ipula nasho. Onda li nda nyanyukilwa okukala pamwe naayenda tatu nu okoothiwa notatu popi.” Dhimbulukwa kutya okuulika kutya owu na ko nasha naayenda, oshinima oshiwanawa aluhe. (Fil. 2:4) Aantu oyendji ohaya nyanyukilwa okulombwela yalwe iimoniwa yawo. Puututhi wokunyanyukilwa pamwe, otashi vulika yalwe opo owala haya mono ompito yokuuva iimoniwa yayalwe. Omukuluntugongalo gulwe okwa nyola a ti: “Okuhiya ookuume yomegongalo kegumbo lyandje, ohaku kwathele ndje ndi kale ndu uvite ko onkalo yawo noku ya tseya nawa, unene tu okuuva nkene ye ya moshili.” Onkee ano, ngele owu ulike kutya owu na ko nasha naayenda yoye, nena otamu ka nyanyukilwa pamwe.

¹⁷ Omumwameme gumwe omukokolindjila okwa kala te edhilile aauvithi megumbo lye, mboka ye ya koosikola dhelongo lyopakalunga dhi ili nodhi ili. Okwa ti: “Petameko onda li tandi ipula unene, molwaashoka ehala lyandje olya li eshona noli na iikwapundi mbyoka ya longa nale. Omukulukadhi gumwe gwomumwatate gwomwaamboka ya li taya kwatele komeho oosikola ndhoka, okwa kwathele ndje ndi kale netaloko li li nawa. Okwa lombwele ndje kutya sho ye nomusamane gwe ya ningi aatonateli aayendi, shoka sha li hashi ya nyanyudha, okukala naamboka ye na uupambepo uuwanawa, mboka kaaye na iinima yopamaliko oyindji noye na elalakano lya fa lyawo lyokulongela Jehova nokukala nonkalamwenyo inaayi kitakana. Shino osha dhimbulukitha ndje shoka meme a li he tu lombwele sho twa li aanona, ta ti: ‘Okulya ekaka lyomboga ko ku na ohole oku li hwepo.’” (Omayel. 15:17) Ohole nayi ku inyengithe wu kale ho yakula aayenda nopwaahe na okwiipula unene.

18, 19. Ongiini okuyakula aayenda taku vulu oku tu kwathela twaa kale tu uvitile yalwe nayi?

¹⁸ Nkene wu uvitile yalwe: Mbela opu na gumwe megongalo lyeni he ku ningile nayi? Omuntu ngoka otashi vulika wu tameke okukala wu mu uvitile nayi notashi vulika shi kale ngawo uule wethimbo, ngele ito ningi po sha wu hwepopaleke onkalo. Omuntu gumwe otashi vulika kuu mu hiye, molwaashoka e na omaukwatya ngoka kuu hole. Nenge tashi vulika gumwe e ku ninga nayi monakuziwa, ihe owu wete oshidhigu oku shi dhimbwa.

¹⁹ Opo tu hwepopaleke ekwatathano lyetu nayalwe, nokuli nonaamboka ye li aatondi yetu, Ombiimbeli otayi tu ladhipike tu kale hatu yakula aayenda. (Lesha Omayeletumbulo 25:21, 22.) Okuhiya omuntu kegumbo lyoye, otaku vulu okuhwepopaleka onkalo pokati keni nokukala kuu mu uvitile we nayi. Shoka otashi vulu oku ku kwathela wu mone muye omaukwatya omawanawa ngoka Jehova a mona muye, sho e mu nanene moshili. (Joh. 6:44) Ngele ohole oye ku inyengitha wu hiye omuntu ngoka kaa li e shi tegelela, shoka otashi vulu okukala etameko lyokupanga uukuume naye. Ongiini to vulu okumona kutya ohole oyo ye ku inyengitha? Omukalo gumwe, okulandula eladhipiko  ndyoka li li mAafilippi 2:3 tali ti: “Ifupipikeni kiipala yayakweni, ne mwaa dhiladhile kutya one aawanawa mu ya vule.” Otatu vulu okudhiladhila kiinima mbyoka aamwatate naamwameme ye shi ye tu vule. Otashi vulika tu ilonge sha keitaalo lyawo, keidhidhimiko lyawo nenge komaukwatya gawo gopaKriste gi ili nogi ili. Okuninga ngawo, otaku ka koleka ohole yoku ya hola notashi ke tu ningila oshipu tu kale hatu yakula aayenda.

20. Omolwashike nongiini tatu vulu okukala twa simaneka ehiyo ndyoka twa taamba ko?

²⁰ Omupisalomi David okwa li a pula a ti: “Omuwa, olye ta pitikilwa okuya motempeli yoye?” (Eps. 15:1) Konima sho a pula epulo ndyono, okwa popi kombinga yomaukwatya ngoka Kalunga a hala aayenda ye ya kale ye na. Uukwatya wumwe owo okukala twa dhiginina shoka twa popya. Ombiimbeli otayi ti: “Oha gwanitha shoka e shi uvaneka nonando oshi mu fale muudhigu.” (Eps. 15:4) Ngele otwa hiywa kugumwe, inatu kala inaatu ya ko molwiinima yanathangwa. Ngoka e tu hiya otashi vulika a kale e tu longekidhila sha, noonkambadhala dhe otadhi ka kala osima yowala, ngele otwa kala inaatu ya ko. (Mat. 5:37) Yamwe otashi vulika omathimbo gamwe ya li ya hiywa e taya kala inaaya ya ko, molwaashoka ya hiywa hoka ye wete ku li hwepo. Mbela shoka otashi ku ulika ngaa ohole nesimaneko? Pehala lyaashono, natu taambe ko ehiyo nomutima aguhe, kashi na nduno mbudhi kutya ngoka e tu hiya okwe tu longekidhila shike. (Luk. 10:7) Nongele opu na onkalo yontumba tayi tu imbi kaatu ye ko, otashi ka kala pahole, ngele otwa tseyithile ngoka e tu hiya nziya ngaashi tashi vulika.

21. Ngele otwa simaneka omikalondjigilile dhomomudhingoloko, otashi ke tu kwathela ngiini tu kale aayenda aawanawa?

²¹ Osha simana wo okusimaneka omikalondjigilile dhomomudhingoloko. Momaputuko gamwe, aayenda mboka inaaya hiywa, ohaya taambiwa ko owala, omanga mugalwe wu na okuninga omalongekidho komeho yethimbo. Komahala gamwe, aayenda ohaya longekidhilwa iikulya yawo yi ikalekelwa kaayi shi mbyoka tayi liwa kaanegumbo ayehe, omanga kugalwe ayehe haya ungaungiwa nayo shi thike pamwe. Miitopolwa yimwe, aayenda ohaya faalele sha, omanga muyilwe inaya tegelelwa ya faalele sha. Momaputuko gamwe, aayenda oya tegelelwa ya tinde ehiyo lyotango nenge etiyali, omanga mugalwe hashi ulike kutya ku na olupandu. Onkee ano, natu ningeni ngaashi tatu vulu tu nyanyudhe mboka ye tu hiya.

22. Omolwashike sha simanenena ‘okuyakula aayenda momagumbo getu’?

²² Ombiimbeli otayi ti: “Ehulilo lyiinima ayihe oli li popepi.” (1 Pet. 4:7) Otwa taalela uudhigu uunenenene mboka inaawu monika mo nale muuyuni mbuka. Sho oonkalo tadhi ende tadhi nayipala, otatu ka kala twa pumbwa okukoleka ohole yetu pokati ketu naamwatate naamwameme. Omayele gaPetrus ngoka taga ti “yakuleni aayenda momagumbo geni,” otaga longo kAakriste shi vulithe nale, noge li oshinima shinyanyudha nosha pumbiwa nokashi na siku shi hule po. — 1 Pet. 4:9.