MOMUMVO 1930 nasha, aavali yandje James naJessie Sinclair, oya tembukile koBronx, okandoolopa ke li moshilando New York City. Oya li ya tsakanene ko naWillie Sneddon, ngoka naye a za koshilongo shawo, koSkotolanda. Shika osho oshikando shotango taya tsakanene, ihe muule wokathimbo, oya tameke okupopya kombinga yaakwanezimo yawo. Shoka osha ningwa, manga inaandi valwa.

Meme okwa lombwele Willie kutya he nomumwayinamati gwawo gwosheeli, oya sile mefuta, sho ombautu yawo yoohi yi idhenge metenda lyongonga, mEfuta lyokUumbangalantu. Shoka osha ningwa, manga Iita yoTango yUuyuni inaayi tameka. Willie okwe mu yamukula a ti: “Tate gwoye oku li moheli!” Willie okwa li Onzapo yaJehova, naashoka a popi kombinga yOmbiimbeli osha li sha kumitha meme.

Oshinima shoka osha li sha geyitha meme, molwaashoka oku shi kutya he okwa li e na omwenyo omwaanawa. Willie okwa gwedha ko a ti: “Otashi ka kala ngaa shi li nawa ngele onde ku lombwele kutya Jesus okwa ya moheli?” Meme okwa dhimbulukwa egalikano ndyoka i ilonga kongeleka, tali ti kutya Jesus okwa yi moheli e ta yumuka konima yomasiku gatatu. Ihe okwa li a kumwa kutya ‘ngele oheli eziko lyomulilo moka mu na aakolokoshi, omolwashike Jesus a yi mo?’ Okuza mpono, meme okwa tameke okukala e na ohokwe mOmbiimbeli. Okwa tameke okugongala megongalo lyaBronx nokwa ninginithwa mo 1940.

Pethimbo ndyoka aavali Aakriste kaya li haya ladhipikwa ya konakone Ombiimbeli naanona yawo. Sho nda li okanona, tate okwa li ha kala nangame megumbo, manga meme ta yi kokugongala nomuukalele momahuliloshiwike. Konima yomimvo omishona, ngame natate otwa tameke okuya kokugongala pamwe naye. Meme okwa li omulaadhi miilonga yokuuvitha onkundana ombwanawa, nokwa li e na aakonakonimbiimbeli ye na ohokwe. Oshikando shimwe, okwa konakona nayamwe poshikando, molwashono oya li ye lyaathane popepi. Mefudho onda li handi yi naye muukalele. Kungawo, ondi ilongo oshindji kombinga yOmbiimbeli nankene tandi vulu okulonga yalwe shoka tayi ti.

Odhoshili kutya sho nda li omunona, kanda li lela ndi na ohokwe moshili, nonda li nde yi  tala ko ya fa uudhano. Ihe sho ndi na omimvo 12, onda ningi omuuvithi gwUukwaniilwa, nokuza mpono onda kala handi kutha ombinga muukalele pandjigilile. Sho ndi na omimvo 16, ondi iyapulile Jehova nonda ninginithwa mo 24 Juli 1954, poshigongi shoshikandjo moToronto moKanada.

Aamwatate yamwe megongalo lyetu oya li Aabetel, noya li oshiholelwa oshiwanawa kungame. Uunkulungu wawo wokupopya nomukalo moka ya li haya yelitha oshili yOmbiimbeli, ogwa li gwa fuula ndje. Nonando aalongi kosikola oya li ya hala ndi ye koUniveesiti, elalakano lyandje olya li lyokuya koBetel. Onkee ano, poshigongi shoshikandjo moToronto, onda ningi eindilo lyokuya koBetel. Onda tula mo limwe natango momumvo 1955, poshigongi shoshikandjo, shoka sha ningilwe mokapale kaYankee, moNew York City. Mo 19 Septemba 1955, sho ndi na omimvo 17, onda hiwa ndi ka longe koBetel yaBrooklyn. Esiku lyandje etiyali moBetel, onda longo moshikondo shokutula omambo kumwe, shoka sha li mepandaanda lyedhina 117 Adams. Konima yethimbo onda ka longa neshina lyokugongela oombapila, ndyoka hali tula kumwe omapandja 32 giitopolwa yomambo, opo ga ka hondjwe ga ninge embo limwe.

Moshikondo moka onda longo mo uule womwedhi, nokonima onda tuminwa kOshikondo shIileshomwa, oshoka onda li ndi shi okutopatopa. Pethimbo ndyoka aamwatate naamwameme oya li haya topatopa oondjukithi dhaamboka haya tuminwa Oshungolangelo no-Awake! Konima yoomwedhi oonshona, onda ka longa kOshikondo shokutuma Iileshomwa. Omumwatate Klaus Jensen, ngoka a li omutonateli gwoshikondo shoka, okwa pula ndje ngele ote vulu okulonga pamwe nomuhingi ngoka ha fala iipakete yiileshomwa nololi komatulilosikepa, opo yi tuminwe kiilongo ayihe. Opwa li wo oompunda dhiileshomwa hadhi tumwa nopoosa, komagongalo agehe gomoAmerika.  Omumwatate Jensen, okwa li e shi iilonga mbyoka tayi pula oonkondo, otayi ka ningitha ndje ndi kale ndi na olutu. Onda li handi vihi owala ookilograma 57, nonda li omushona molutu noonkondo. Omalweendo ngoka gokuya komatulilosikepa nokopoosa, oga nkondopaleka ndje palutu. Omumwatate Jensen, okwa li e shi lela shoka oshiwanawa kungame.

Oshikondo shiileshomwa osha li wo hashi yakula omagongalo ngoka ga pumbwa iileshomwa. Kungeyi onda tseya omalaka moka iileshomwa yetu hayi pilintwa moBrooklyn, nokutuminwa kiitopolwa yilwe muuyuni. Ngame inandi uva nando onale omalaka ogendji ge thike mpoka, ihe onda li nda nyanyukwa okutseya kutya iileshomwa omayovi ohayi tuminwa komahala gokokule. Nonando komahala hoka kanda li ndi shi ko pethimbo mpono, onda ka mona uuthembahenda wokutalela po ogendji gomugo.

Mo 1961, onda pulwa ndi ka longe mombelewa yokutonatela iimaliwa, kohi yewiliko lyomumwatate Grant Suiter. Konima yomimvo dhontumba, onda pulwa ndi ye kombelewa yomumwatate Nathan Knorr, ngoka a li ta tonatele iilonga yetu yomuuyuni awuhe. Okwa lombwele ndje kutya omumwatate ngoka ha longo mombelewa ye, ota ka ya kOsikola yUukalele wUukwaniilwa uule womwedhi. Okwa ti wo kutya ngele a galuka ota ka longela kOshikondo shIilonga. Onda li nda pulwa ndi longe pehala lye pamwe nomumwatate Don Adams. Konima yethimbo onda ka tseya kutya omumwatate Don, oye a li a taamba eindilo lyandje lyokoBetel poshigongi shoshikandjo mo 1955. Aamwatate yamwe yaali mboka ya li haya longo mombelewa moka, omumwatate Robert Wallen naCharles Molohan. Atuhe yane, otwa kala tatu longo pamwe uule womimvo 50. Osha li enyanyu enene kungame okulonga pamwe naalumentu aadhiginini. — Eps. 133:1.

Okuza 1970, onda li nda pulwa ndi kale  handi ka talela po iitayimbelewa yo-Watch Tower Society omumvo kehe. Shino osha li sha kwatela mo okutalela po Aabetel naatumwa muuyuni awuhe, okuladhipika yalwe pambepo nokutala nkene iitayimbelewa tayi shi enditha. Osha li enyanyu enene okutsakanena nayamwe mboka opo ya piti kosikola yaGilead, noya li taya longo natango nuudhiginini kiilongo yilwe. Osha li uuthembahenda noshinyanyudha okutalela po iilongo 90, sho tandi longo iilonga mbyoka.

Aabetel ayehe moBrooklyn, oya li momagongalo ngoka ge li moNew York City. Ngame onda li megongalo li li moBronx. Moshitopolwa moka egongalo olya koko e ta li topolwa. Megongalo moka nda li, olya li hali ithanwa Upper Bronx.

Momumvo 1960 nasha, uukwanegumbo wokoLatvian mboka wa monena oshili kuumbugantu waBronx, owa tembukile moshitopolwa moka mu na egongalo. Livija osheeli shomuukwanegumbo moka, okwa ningi omukokolindjila gwondjigilile, konima owala sho a mana osikola. Konima yoomwedhi oonshona, okwa tembukile koMassachusetts, hoka kwa li ku na ompumbwe onene yaauvithi yUukwaniilwa. Onda tameke oku mu nyolela kombinga yankene egongalo tali humu komeho, nokwa li ha galula ta lombwele ndje nkene iilonga yuukalele tayi ende moshitopolwa shaBoston.

Konima yomimvo omishona, Livija okwa langekwa po e li omukokolindjila i ikalekelwa. Okwa li a halelela okuninga ngaashi ta vulu miilonga yaJehova. Okwa ningi eindilo koBetel nokwa li a taambwa mo 1971. Otashi monika sha fa Jehova oye a ningi elongekidho ndika. Otwa hokana mo 27 Kotoba 1973, nomumwatate Knorr oye a li a gandja oshipopiwa shohango yetu. Omayeletumbulo 18:22 otayi ti: “Nakumona omukulukadhi oku na elago, a likola ohokwe yOmuwa.” Ngame naLivija otwa kala tatu longo pamwe uule womimvo 40 moBetel. Otwa tsikile wo okuyambidhidha egongalo ekwawo ndyoka li li moshitopolwa shaBronx.

Osha li oshiwanawa lela okulonga pamwe nomumwatate Knorr. Okwa li ha longo nuudhiginini miilonga ye nokwa li ha pandula aatumwa mboka taya longo nuudhiginini muuyuni awuhe. Oyendji yomuyo oya li Oonzapo dhotango miilongo moka ya tuminwa. Mo 1976, osha li shiyemateka kungame okumona omumwatate Knorr ta hepekwa kuuvu wokankela. Pethimbo sho a li mombete te ehama, okwa pula ndje ndi mu leshele yimwe yomiileshomwa yetu mbyoka opo ya pilintwa. Okwa pula ndje ndi ithane omumwatate Frederick Franz, opo naye a pulakene shoka tandi lesha. Konima yethimbo, onda mono kutya omumwatate Franz oku na uunkundi womeho, nomumwatate Knorr okwa kala ha ningi oonkambadhala e mu leshele iileshomwa mbyoka.

Omumwatate Knorr okwa si mo 1977, ihe mboka ya li ye mu shi noye mu hole oya li ya hekelekwa, molwaashono okwa si omudhiginini. (Eh. 2:10) Okuza mpono, omumwatate Franz oye a kala ta kwatele komeho iilonga.

 Pethimbo ndyono onda li nda ningi amushanga gwomumwatate Milton Henschel, ngoka a kala ta longo pamwe nomumwatate Knorr uule womimvo odhindji. Omumwatate Henschel, okwa lombwele ndje kutya oshinakugwanithwa shandje moBetel, otashi ka kala unene shokukwathela omumwatate Frans, mukehe shimwe a pumbwa ekwatho. Onda kala handi mu leshele aluhe iileshomwa, manga inaayi pilintwa. Omumwatate Franz okwa li ha dhimbulukwa nawa iinima, nokwa li ha gandja eitulomo lela kwaashoka tashi leshwa. Osha li enyanyu enene kungame oku mu kwathela, sigo a mana oondjenda muDesemba 1992.

Omimvo 61 ndhoka nda kala moBetel, odha piti po owala sha fa uudhano. Aavali yandje oya si aadhiginini kuJehova, nonda tegelela oku ke ya mona muuyuni uupe, sho taya ka yumudhwa. (Joh. 5:28, 29) Kapu na sha muuyuni waSatana, tashi vulu okuyelekwa nuuthembahenda wokulonga pamwe naalumentu naakiintu aadhiginini, miilonga yokukwathela oshigwana shaKalunga muuyuni awuhe. Odhoshili kutya momukokomoko gwomimvo ndhoka, ngame naLivija twa kala miilonga yethimbo lyu udha, ‘enyanyu lyOmuwa olya kala noku tu kumika.’ — Neh. 8:10.

Iilonga yokuuvitha oshili yUukwaniilwa otayi tsikile muuyuni awuhe, noinayi ikolelela komuntu gwontumba mehangano lyaJehova. Osha kala enyanyu nuuthembahenda kungame, okulonga pamwe noyendji ye shi okwiinekelwa nosho wo naamwatate naamwameme aadhiginini uule womimvo. Oyendji yomaagwayekwa mboka nda longa nayo kaye ko we kombanda yevi. Ihe onda nyanyukwa sho nda kala nokulonga pamwe naapiya aadhiginini miilonga yaJehova.