Aantu mboka haya longo nuudhiginini ihayi ikwata ngele tashi ya piilonga. Pehala lyaashono, ohaya longo nuudhiginini, opo yi isile oshimpwiyu noya kwathele yalwe, nonando iilonga yawo itayi ya simanekitha.

Uushili owo kutya onkalamwenyo oyu udha iinakugwanithwa oyindji. Aantu muuyuni kaye hole okulonga nuudhiginini, ihe oku shi ninga otaku vulu oku ku etela omauwanawa ogendji. — Omuuvithi 3:13.

Omumati gwedhina Reyon okwa ti: “Onda mona kutya okulonga nuudhiginini ohaku etele omuntu a kale u uvite uuntsa nuunambano nosho wo enyanyu. Enyanyu ndyoka handi kala ndu uvite olyo lya ningitha ndje ndi kale ndi hole iilonga. Okulonga nuudhiginini ohaku ku kwathele wu kale wu na edhina ewanawa.”

SHOKA OMBIIMBELI TAYI TI: “Uupyakadhi kehe ohau tompola sha, ihe omapopyagano gowala ohage etitha oluhepo.” — Omayeletumbulo 14:23.

Kala wu na etaloko ewanawa li na ko nasha niilonga mokuninga iinima tayi landula.

Kehe shimwe to ningi shi longa nawa. Uuna to longo sha, kutya nduno omegumbo, okiilonga nenge iithigilwalonga yokosikola, kala ho shi ningi nomutima aguhe. Uuna wi ilongo oshilonga shontumba, hwepopala wu kale ho shi longo nziya nenge momukalo omwanawa shi vulithe shito. Ngele owa kala onkulungu miilonga yoye, oto ke yi tyapula.

SHOKA OMBIIMBELI TAYI TI: “Ngele to mono omuntu onkulungu miilonga ye, ota vulu okuthikama kiipala yaakwaniilwa; ita pumbwa okuthikama koshipala shaathigona.” — Omayeletumbulo 22:29.

Shaalula oshi na ondjambi. Olundji ngele oho longo nawa, ohashi etele yalwe uuwanawa. Ngele owa kala ho longo nuudhiginini megumbo, otashi ka kala ekwatho enene kaantu yaandjeni.

SHOKA OMBIIMBELI TAYI TI: “Okugandja oku na elago ku vule okutaamba.” — Iilonga 20:35.

Ninga oshindji shi vulithe pwaashoka wa pulwa. Pehala lyokuninga owala oshinima shoka wa pulwa, longa oshindji shi vulithe po. Kungawo, ito ka kala owala ho ningi iinima uuna to thiminikwa, ihe oto ke yi ninga nomwenyo aguhe. — Mateus 5:41.

SHOKA OMBIIMBELI TAYI TI: “Inandi hala, u kwathe ndje molwokuthiminika kwandje, ndele onda hala, u shi ninge kehalo lyoye mwene.” — Filemon 14.

Kala wu na ondjele. Aantu mboka haya longo nuudhiginini ihaya li onyalo, yo ihaya kala owala taya longo ethimbo alihe. Oye na ondjele. Oye hole iilonga shili, ihe ohaya fudha po wo.

SHOKA OMBIIMBELI TAYI TI: “Ekaminina lyevululuko oli vule eshambekela lyu udha uupyakadhi nokutidha ombepo.” — Omuuvithi 4:6.