Omalalakano kage shi oondjodhi dhomutenya nenge omayambandjodhi. Opo wu adhe omalalakano goye owu na okuninga oompangela, okukala ho tifuka noho longo nuudhiginini.

Oto vulu okwiitulila po omalalakano ngoka to vulu okwaadha muule wethimbo efupi, tashi vulika muule womasiku gontumba nenge wiiwike yontumba. Oto vulu wo okwiitulila po ngoka to vulu okwaadha muule wethimbo ele tashi vulika muule woomwedhi dhontumba nosho wo muule womumvo nenge womimvo nokuli. Opo wu adhe omalalakano ngoka haga pula ethimbo ele, owa pumbwa tango okwiitulila po omalalakano ngoka haga pula ethimbo efupi.

Okugwanitha po omalalakano goye, ohaku ku kwathele wu kale wu na omukumo, wu koleke ekwatathano lyoye nayalwe nohashi ku nyanyudha.

Omukumo: Uuna wi itulile po omalalakano ngoka omashona e to ga gwanitha, ohashi ku tsu omukumo wu itulile po ishewe ngoka omanene. Oho kala wo wu na omukumo gwokupalamena omashongo gakehe siku, mwa kwatelwa omathiminiko goomakula.

Uukuume: Aantu oye hole okupanga uukuume naantu mboka hayi itulile po omalalakano, ano ye shi shoka ya hala okuninga monkalamwenyo noyi ilongekidha okulonga nuudhiginini ye ga adhe. Natango, omukalo dhingi moka aantu taya vulu okukoleka uukuume, omokulongela kumwe ya adhe elalakano limwe.

Enyanyu: Uuna wi itulile po omalalakano e to ga adha, oho kala wu uvite wa tompola sha.

Omumati gwedhina Christopher okwa ti: “Ondi hole okwiitulila po omalalakano. Ohashi kwathele ndje ndi kale ndi ipyakidhila nondi kale aluhe tandi lalakanene sha. Ngele nda gwanitha po elalakano lyandje, ohandi kala ndi uvite nawa nohandi ti: ‘Taa! Onda gwanitha shoka nda li nda hala okuninga.’”

SHOKA OMBIIMBELI TAYI TI: “Oongoka ha tala ombepo, ita kunu; naangoka ha tala iikogo, ita teya.” — Omuuvithi 11:4.

Landula omikalo ndhoka hadhi ku kwathele wu itulile po omalalakano nowu ga adhe.

Tula po elalakano. Nyola omalalakano goye, e to longo nuudhiginini wu ga adhe. Hogolola kutya olini wa hala okwaadha tango, etiyali, etitatu nosho tuu.

Ninga oompangela. Opo wu adhe elalakano kehe, ninga iinima tayi landula:

• Tula po esiku lyokondandalunde moka to li mana.

• Nyola oonkatu ndhoka wa pumbwa okukatuka.

• Dhiladhila komashongo ngoka to ki iyadha mugo nankene to ke ga kandula po.

Katuka onkatu. Ino tegelela wu kale wu shi uuyelele awuhe, opo wu tameke. Ipula to ti: ‘Oshike ndi na okuninga tango, opo ndi adhe elalakano lyandje?’ Opo ihe to shi ningi. Tala kutya owa huma komeho shi thike peni, opo wu adhe elalakano lyoye.

SHOKA OMBIIMBELI TAYI TI: “Oompangela dhomunandjungu otadhi mu etele eliko.” — Omayeletumbulo 21:5.