SHOKA TASHI KWATHELE AAVALI
5: Oonkundathana
OONKUNDATHANA OSHIKE?
Oonkundathana ohadhi kala pokati kaantu yaali nenge ye vulithe po, pashiholelwa omuvali nomwana otaya vulu okulombwelathana shoka taya dhiladhila nankene yu uvite.
OMOLWASHIKE OONKUNDATHANA DHA SIMANA?
Olundji ohashi kala eshongo okukundathana naanona yomimvo omulongo nasha. Embo Breaking the Code olya ti kutya “uuna aanona aashona, ohaya lombwele aavali kehe shimwe. Ihe shampa ya koko, ihaya popiwe sha, onkee ohashi kala oshidhigu kaavali ya mone kutya oyana otaya dhiladhila shike noyu uvite ngiini.” Nonando aanona oya kale inaaya hala okupopya, ngashingeyi olyo ethimbo wa pumbwa okukundathana nayo shi vulithe nale.
SHOKA TO VULU OKUNINGA
Kundathana naamwoye pethimbo ya hala okupopya. Shi ninga, nonando okukale kwa toka.
Meme Lisa okwa ti: “Otashi vulika wu kale wa hala oku ya pula to ti: ‘Ngashingeyi opo wa hala tu popye? Ngaye ondi shi otu uhala pamwe nangweye esiku alihe?’ Mbela otu na ngaa okungongota uuna aanona yetu ya hala okupopya natse? Omuvali kehe oha kala a halelela ando oyana otaya popi naye!”
Tate Herbert okwa ti: “Nonando ohandi kala nda hala okukotha kuyele, onde shi mona kutya oonkundathana ndhoka nda ninga mokati kuusiku naamwandje yomimvo omulongo nasha, odhe enda nawa lela.”
SHOKA OMBIIMBELI TAYI TI: “Inaku kala nando omuntu ta longo owala shoka she mu opalela, ihe na tale wo shoka tashi opalele mukwawo.” — 1 Aakorinto 10:24.
Ino etha wu piyagenekwe kusha. Omusamane gumwe okwa ti: “Omathimbo gamwe ohandi iyadha tandi dhiladhila iinima yilwe yi ili uuna aamwandje taya popi nangaye. Nayo yene ohaya kala ye shi wete.”
Ngele nangoye osho ho ningi ngawo, kala ho dhimi otiivii, ongodhi nenge okompiuta yoye. Pulakena komumwoye wi itula mo, e to mu ningitha a kale u uvite kutya shoka te ku lombwele osha simana, nonando ngoye owu wete inaashi simana.
Meme Maranda okwa ti: “Otwa pumbwa oku ulukila aanona yetu kutya shoka taya popi osha simana kutse. Ngele itatu shi ningi, itaye ke tu lombwela sha we notaya ka konga ekwatho kugulwe i ili.”
Tate Anthony okwa ti: “Ino geya ngele shoka aamwoye taya dhiladhila kashi li mondjila.”
SHOKA OMBIIMBELI TAYI TI: “Kotokeni, mu tale nkene, hamu pulakene.” — Lukas 8:18.
Ompito kehe to mono yi longitha wu popye naamwoye. Omathimbo gamwe aanona ohaya popi ya manguluka uuna itaaya popi oshipala noshipala naavali yawo.
Meme Nicole okwa ti: “Ohatu popi uuna tu uka pehala lyontumba tu li mohauto. Ohatu popi nawa uuna twa kuutumba twa tegama, pehala lyokukala twa talathana oshipala noshipala.”
Ethimbo lyokulya nalyo ohali kala ethimbo ewanawa nokupopya.
Tate Robin okwa ti: “Uuna tatu li uulalelo, kehe gumwe oha hokolola sha oshiwinayi shoka she mu ningilwa momukokomoko gwesiku naashoka oshiwanawa. Ohashi tu hanganitha nohashi tu kwathele tu kale tu shi kutya opu na gumwe ngoka ta vulu oku tu kwathela nomaupyakadhi getu.”
SHOKA OMBIIMBELI TAYI TI: “Kehe gumwe na kale ha pulakene mbala, ihe ohi ikwata mokupopya.” — Jakob 1:19.
Opu na ishewe uuyelele mbuka
OSHUNGOLANGELO
Kala ho popi nomumwoye gwoomvula omulongo nasha itoo nyenyeta
Omumwoye oti ilongo okukala e shi kutya ye omuntu a tya ngiini nokwa pumbwa ompito yokuulika kutya okwa thikama peni. Ongiini to vulu oku mu kwathela?
OMALONGO GOMBIIMBELI
Ekwatho kaagundjuka
Tala nkene Ombiimbeli tayi vulu okukwathela aagundjuka ya pite momaudhigu ngoka olundji hayi iyadha mugo.
