SHOKA TASHI KWATHELE AAIHOKANI
3: Okusimanekathana
OKUSIMANEKATHANA OSHIKE?
Aaihokani mboka ya simanekathana, ohaya ulukilathana ohole nuuna itaa ya tsu kumwe. Embo lyedhina Ten Lessons to Transform Your Marriage olya ti: “Aaihokani ya tya ngaaka ohaya kambadhala okuninga omaiyambo ya kandule po uupyakadhi. Ohaya kundathana kombinga yuupyakadhi kehe mboka tawu holoka po. Ohaya pulakene nesimaneko komaetopo nokomayele ngoka mukwawo te eta po, opo ya kandule po uupyakadhi momukalo ngoka gwo opalela kehe gumwe.”
SHOKA OMBIIMBELI TAYI TI: “Ohole . . . ihayi kongo shayo yene.” — 1 Aakorinto 13:4, 5.
Tate Micah okwa ti: “Opo ndi ulike kutya onda simaneka omukulukadhi gwandje, ondi na okukala nde mu lenga noinandi hala okuninga nando osha shoka tashi vulu oku mu uvitha nayi, nenge okuteya po ondjokana yetu.”
OMOLWASHIKE AAIHOKANI YE NA OKUSIMANEKATHANA?
Ngele aaihokani inaya simanekathana, ohaya popi taya shekathana, taya paathana uusama nosho wo nondhino. Omaukwatya ngono, olundji ogo haga teya po oondjokana.
Tate Brian okwa ti: “Okukala ho sheke omukulukadhi gwoye, ho mu sitha ohoni nenge ho ningi omashendjo omawinayi kombinga ye, otaku vulu oku mu ningitha a kale u uvite kee na oshilonga notashi vulu okuteya po ondjokana yeni.”
SHOKA TO VULU OKUNINGA
IPULA MWENE
Konakona oohapu dhoye neihumbato lyoye uule woshiwike, e to ipula to ti:
-
‘Onda sheka kuume kandje kopandjokana lungapi nonde mu pandula lungapi?’
-
‘Omomikalo dhini handi ulike kutya onde mu simaneka?’
AAIHOKANI KUNDATHANENI OMAPULO NGAKA
-
Oshike mu na okuninga noohapu dhini mu na okulongitha, opo mu ulike kutya omwa simanekathana?
-
Iinima yini hamu ningi nohamu popi, mbyoka hayi ningitha kehe gumwe a kale e wete inaa simanekwa?
SHOKA TO VULU OKUNINGA
-
Nyola iinima itatu mbyoka wa hala kuume koye kopandjokana a ninge, opo u ulike kutya okwe ku simaneka. Mu lombwela a ninge sha faathana. Kehe gumwe na pe mukwawo okambapila hoka a nyola, e tamu kambadhala okuninga iinima mbyoka mwa nyola mu ulukilathane esimaneko.
-
Nyola omaukwatya ngoka wu hole ge niwe kukuume koye kopandjokana. Mu lombwela kutya owu mu hole omolwomaukwatya ngoka.
Meme Megan okwa ti: “Opo ndi ulike kutya onda simaneka omusamane gwandje, ondi na okuninga iinima mbyoka tayi ulike kutya onde mu lenga nonokutya onda hala a kale a nyanyukwa. Ohandi ulike kutya onde mu simaneka muunima uushona mboka handi ningi nohandi popi.”
Okukala wu uvite kutya owa simaneka kuume koye kopandjokana hako ku na oshilonga, ihe naye mwene na kale u uvite shili kutya owe mu simaneka.
SHOKA OMBIIMBELI TAYI TI: “Kaleni mu na olukeno, ohenda, eifupipiko, ombili neidhidhimiko.” — Aakolossa 3:12.
