1-3. (a) Omathaneko geni tage tu kwathele tu uve ko omayele gaali gaJesus? (b) Omapulo geni twa pumbwa okuyamukula?

NATU tye ando owa pulwa komunambelewa a simana wu mu fale kehala hoka e na oshilage sha simana potundi yontumba. Sho ku na owala ominute omishona wu ke mu fale, owa mono kutya moshihauto kamu na omahooli ga gwana. Opo nduno owa yi nziya wu ke shi nwethe. Omanga wa ka nwetha, ye omunambelewa okwe ya mu ye. Okwa lengalenga, ihe ine ku mona. Molwaashoka ka li ta vulu oku ku tegelela, okwa pula omuntu gulwe e mu fale. Sho wa galuka owala konima yokathimbo, owa adha a ya nale. Mbela oto ka kala wu uvite ngiini?

² Ngashingeyi natu tye ando ngoye omunambelewa, nowa hogolola aalumentu yatatu mboka wi inekela ya longe iilonga yontumba ya simana. Owe ya yelithile shoka ye na okuninga, naayehe oya zimine nehalo ewanawa okulonga iilonga mbyoka we ya pa. Ihe sho wa galuka, yaali oyo owala wa adha ya longa shoka we ya lombwela. Ihe ngoka inaa ninga po sha okwa li owala ta ningi omaipopilo gaaha fele. Ka li nokuli a ningi oonkambadhala dhasha. Oto ka kala wu mu uvitile ngiini?

³ Jesus okwa li a longitha omayele gaali, gu ukila komathaneko ngoka twa zi nokukundathana, limwe olyaakadhona omulongo nosho wo lyiitalenti, opo a yelithe kutya omolwashike pethimbo lyehulilo yamwe yomAakriste aagwayekwa taya ka kala aadhiginini naanandunge, omanga yamwe kaaye shi aanandunge. * (Mat. 25:1-30) Jesus okwa tsu omuthindo iiyilongomwa yomayele ngoka, sho a ti: “Kaleni ano mwa tonata, oshoka inamu tseya esiku notundi.” Okwa li ta yelitha kutya aalongwa ye kaya li taya ka tseya ethimbo ndyoka te ya okuhulitha po uuyuni waSatana. (Mat. 25:13) Natse kunena otatu vulu okutula omayele ngoka miilonga. Uuwanawa wuni tatu ka mona ngele otwa kala twa tonata ngaashi Jesus e tu ladhipike tu ninge? Oolye yu ulika kutya oyi ilongekidha ya ka hupe? Oshike tu  na okuninga ngashingeyi, opo tu kale twa tonata?

4. Omolwashike inaatu pumbwa okutseya kutya ehulilo otali ya uunake, opo ando tu kale ‘twa tonata’?

⁴ Omathimbo gamwe ohashi vulika wu kale wa pumbwa owili, opo wu thike pethimbo kiilonga, nenge wu thike pethimbo uuna to yi kundohotola nosho wo uuna to yi niiyenditho mbyoka yi na ethimbo ndyoka hayi thikama. Ihe otashi vulika shi ku piyaganeke nenge shi kale sha nika oshiponga nokuli ngele oto longo to tala kowili mbalilwaali uuna wu li miilonga yokudhima omulilo, nenge yokuhupitha aantu mboka ye li moshiponga oshinene. Moonkalo ndhoka, osha simana wu kale wi ipyakidhila niilonga, pehala lyokukala to tala kowili. Sho ehulilo lyonkalelo ndjika tali hedha popepi, iilonga yokuuvitha mbyoka tayi kwathele aantu ya tseye shoka Jehova a ninga po, opo ya ka hupithwe oyi na okulongwa neendelelo, shi vulithe nale nokuli. Opo tu kale twa tonata nokulonga shoka Jehova a tegelela kutse, inatu pumbwa okutseya kondandalunde kutya ehulilo otali ya uunake. Okukala kaatu shi esiku notundi uuna ehulilo tali ya, otashi ke tu etela uuwanawa momikalo dhi li ntano lwaampo.

5. Okukala kaatu shi esiku notundi otashi ke tu kwathela ngiini tu ulike kutya momitima dhetu omu na shike?

⁵ Shotango, okukala kaatu shi kutya ehulilo otali ya uunake otashi ku ulika kutya momitima dhetu omu na shike. Sho Jehova inee tu lombwela kutya ehulilo otali ya uunake, otashi ulike kutya okwe tu simaneka nokwe tu pa ompito tu ulike ngele otatu kala ngaa aadhiginini kuye. Nonando otwa tegelela nondjuulukwe tu ka hupe sho onkalelo ndjika tayi hulu po, ohatu longele Jehova molwaashoka tu mu hole, ihe hamolwaashoka owala twa hala oku ka mona omwenyo. (Lesha Episalomi 37:4.) Otu na okukala hatu nyanyukilwa okulonga ehalo lye nokukala tu shi kutya Kalunga ote tu longo shoka she tu opalela. (Jes. 48:17) Katu na okukala tu wete iipango ye iidhigu. — 1 Joh. 5:3.

6. Uuna tatu longele Kalunga omolwohole yetu yoku mu hola, oha kala u uvite ngiini, nomolwashike?

⁶ Oshitiyali, okukala kaatu shi esiku notundi otashi tu pe ompito yokunyanyudha omutima gwaJehova. Uuna tatu longele Jehova molwaashoka tu mu hole, ihe hamolwaashoka tu shi esiku nenge molwaashoka te ke tu pa ondjambi, otatu ulike kutya otatu mu ambidhidha a yamukule omasheko gomutondi gwe, Satana. (Job 2:4, 5; lesha Omayeletumbulo 27:11.) Mokukala tu shi kutya Ondiaboli oye etitha okumona iihuna nosho wo oluhodhi ndoka tu wete kunena, ohashi tu ningitha tu ambidhidhe lela uunamapangelo waJehova nokweekelahi epangelo lyaSatana.

7. Omolwashike okuninga omaiyambo monkalamwenyo ku li nawa?

⁷ Oshititatu, uuna tatu longele Jehova kaatu na esiku lyontumba momadhiladhilo, otashi ke tu ladhipika tu kale hatu ningi omaiyambo monkalamwenyo. Aantu yamwe mboka kaaye shi Kalunga nokuli nayo oyi itaala wo kutya uuyuni mbuka owa ala, noka wu na siku inaawu hula po. Molwaashoka oya tila iiponga yontumba mbyoka tayi vulu okuyona po evi, oye na iikala yokutya “tu lyeni tse tu nweni, oshoka ngula otatu si.” (1 Kor. 15:32) Ihe tse katu na uumbanda wa tya ngaaka. Katu na okukala aakunyuni, sha hala okutya, katu na okwiitongola ko kuyalwe, omolwomahalo getu yene. (Omayel. 18:1) Pehala lyaashono, otu na okwiidhimbwa tse yene nokulongitha ethimbo lyetu, oonkondo dhetu nosho wo iiniwe yetu tashi zi komutima mokulombwela yalwe onkundana ombwanawa yUukwaniilwa waKalunga. (Lesha Mateus 16:24.) Ohatu longele Kalunga nenyanyu, unene tuu mokukwathela yalwe ye mu tseye.

8. Oshiholelwa shopaMbiimbeli shini tashi ulike kutya otwa pumbwa okukala twi inekela thiluthilu muJehova nomOohapu dhe?

⁸ Oshitine, okukala kaatu shi esiku notundi, otashi ke tu kwathela tu kale twi inekela thiluthilu muJehova, nokukala hatu tula miilonga Oohapu dhe ngaashi tatu vulu. Egamo limwe lya puka ndyoka aantu inaatu gwanenena tu na, olyo okukala twi inekela mutse yene. Paulus  okwa ladhipika Aakriste ayehe a ti: “Ngoka ta dhiladhila kutya okwa thikama, na kotoke, kaa gwile po.” Pethimbo lyaJosua, Aaisraeli 23 000 oya li ya dhipagwa, sho owala ye li kolungenge lwEvi lyEuvaneko. Paulus okwa ti: ‘Iinima ayihe mbika oya nyolwa, yi tu londodhe. Oshoka otu li methimbo, uuna ehulilo li li popepi.’ — 1 Kor. 10:8, 11, 12.

9. Omaudhigu otaga vulu ngiini okukoleka eitaalo lyetu noku tu kwathela tu hedhe popepi naKalunga?

⁹ Oshititano, okukala kaatu shi esiku notundi otashi ke tu kwathela tu idhidhimikile omaudhigu notu koleke eitaalo lyetu ngashingeyi. (Lesha Episalomi 119:71.) Omasiku gahugunina gonkalelo ndjino, oge li shili ‘omathimbo omadhigu’ okukaliwa mugo. (2 Tim. 3:1-5) Aantu oyendji muuyuni waSatana oye tu tonde, onkee ano, otashi vulika ye tu hepeke omolweitaalo lyetu. (Joh. 15:19; 16:2) Ngele otwi ifupipike nokukonga ewiliko lyaKalunga uuna tu li momaudhigu, otashi ka koleka eitaalo lyetu, li kale lya fa oshitenda sha pita momulilo. Katu na okusholola. Pehala lyaashono, natu hedhe popepyeelela naJehova, shi vulithe nale. — Jak. 1:2-4; 4:8.

10. Oshike hashi endeleleke ethimbo?

¹⁰ Omathimbo gamwe ohashi vulika wu mone ethimbo tali ende kashona nenge tali endelele. Uuna twi ipyakidhila nasha, ethimbo ohali matuka. Sha faathana, ngele ohatu kala aluhe twi ipyakidhila niilonga mbyoka Jehova e tu pa, ehulilo otali ke ya nziya. Aagwayekwa oyendji oye tu tulila po oshiholelwa oshiwanawa shokukala yi ipyakidhila niilonga yaJehova. Natu tale paufupi shoka sha li sha ningwa po mo 1914 sho Jesus a langekwa po e li Omukwaniilwa, nokutala nkene yalwe ya li yu ulike kutya oyi ilongekidha, omanga yalwe inaayi ilongekidha.

11. Konima yomumvo 1914, omolwashike aagwayekwa yamwe ya li ye wete Omuwa gwawo a kala ko?

¹¹ Dhimbulukwa eyele lyaJesus lyaakadhona omulongo nosho wo lyiitalenti. Ando aakadhona nenge aapiya mboka oya li ye shi kutya ombushiki nenge mwene gwawo ota thiki ethimbo lini, andola kaya li ya pumbwa okukala ya tonata. Ihe kaya li ye shi shi, onkee ano oya li ye na okukala yi ilongekidha. Nonando aagwayekwa oya li ye shi kutya omumvo 1914, ogu li omumvo gwi ikalekelwa, kaya li naanaa yu uvite ko thiluthilu shoka tashi ka ningwa mo. Sho iinima mbyoka ya li ya tegelela inaayi ningwa, oya li ye wete ombushiki ya fa ya kala ko. Omumwatate gumwe okwe shi popi konima yethimbo a ti: “Yamwe yomutse otwa li tatu dhiladhila lela kutya otatu yi megulu moshiwike shotango shaKotoba [momumvo 1914].”

12. Aagwayekwa oya li yu ulike ngiini kutya yo aadhiginini naanandunge?

¹² Kasha li tuu tashi teya omukumo ngele omuntu owa li wa tegelela ehulilo li ye, ihe shi kale po inali ya we! Oshikwawo, aamwatate oya li taya hepekwa pethimbo lyIita yoTango yUuyuni. Iilonga yokuuvitha oya li ya mwena po thiluthilu, naagwayekwa oya li ya fa ya kotha. Ihe mo 1919, oya li ya pendulwa. Jesus okwa li e ya kotempeli yaKalunga yopambepo, shoka sha li ethimbo lyoku ya konakona. Yamwe oya adhika ya kotha, noya li ya kanitha uuthembahenda wawo wokuyakula Omuwa gwawo, Jesus. (Mat. 25:16) Kaya li ya tonata, oya li ya fa aakadhona aagoya mboka ya li kaaye na omahooli moolamba dhawo. Kaya li ya hala okuninga omaiyambo omolwiinima yUukwaniilwa, oya li ya fa naanaa omupiya ngwiyaka omunanyalo. Ihe aagwayekwa oyendji, oya li ye na eitaalo itaali tengauka noya li ya halelela okulonga iilonga yOmuwa gwawo, nokuli naasho ye li pethimbo edhigu lyiita.

13. Ongundu yomupiya oya li yi na iikala ya tya ngiini mo 1914, noyi na iikala ya tya ngiini kunena?

¹³ Konima yo 1914, Oshungolangelo yimwe oya popi oshinima oshindhindhilikwedhi ya ti: “Aamwatate, tse mboka tu na etaloko ewanawa kombinga yaKalunga ihatu kala twa yemata shi na ko nasha nomalongekidho ge. Katwa li twa hala ehalo lyetu olyo li gwanithwe, nonando shoka twa li twa dhiladhila shi ningwe muKotoba 1914 kasha li mondjila, otwa pandula sho  Omuwa gwetu inaa lundulula ompangela ye e tu opalele. Katwa li twa hala e shi ninge nokuli. Ihe shoka twa hala okukala tu uvite ko nawa oompangela dhe nomalalakano ge.” Sigo okunena, aagwayekwa oye li aaifupipiki notaya longele Omuwa gwawo nuudhiginini. Pehala lyokukala tayi itadha kutya otaya wilikwa kombepo yaKalunga, oya tokola toko okulonga iilonga yOmuwa gwawo kombanda yevi. Ngashingeyi “ongundu onene” nosho wo ‘oonzi dhilwe,’ sha hala okutya, Aakriste mboka ye na etegameno lyoku ka kala nomwenyo kombanda yevi oye li ya tonata naalaadhi ya fa aagwayekwa. — Eh. 7:9, NW; Joh. 10:16.

14. Ngele otwa kala hatu li iikulya yopambepo mbyoka tayi zi kongundu yomupiya, otashi ke tu gamena ngiini?

¹⁴ Ngaashi owala Aakriste aagwayekwa, iilyo yongundu onene mbyoka ya tonata ohayi li iikulya yopambepo mbyoka tayi gandjwa kongundu yomupiya ngoka Jehova a langeka po. Oshizemo, iilyo yongundu onene nayo otayi tula oolamba dhawo omahooli gopambepo pathaneko, tayi ga kutha mOohapu dhaKalunga nomombepo ye. (Lesha Episalomi 119:130; Johannes 16:13.) Shoka ohashi koleke eitaalo lyawo, nohaya kala ya tonata nokuli nuuna taya makelwa sha kwata miiti, kungawo otayu ulike kutya oyi ilongekidha sho Kristus ta ka galuka. Pashiholelwa, petameko aamwatate mboka ya li mokamba yimwe yoonkwatwa yaNazi, oya li owala ye na Ombiimbeli yimwe ti. Ihe oya kala nokugalikana ya mone natango iikulya yilwe yopambepo. Konima owala yaashono, omumwatate gumwe ngoka opo e ya mokamba okwe ya mo niifo iipe yOshungalangelo e yi hitika mokugulu kwe kwoshiti. Omumwatate omugwayekwa, Ernst Wauer, gumwe gwomooluhupe mokamba moka, konima okwa nyola a ti: “Jehova okwe tu kwathela momukalo omukumithi tu kale hatu dhimbulukwa momutse omadhiladhilo ngoka ge li miitopolwa [yOshungolangelo].” Okwa gwedha ko a ti: “Kunena oshipu okumona iikulya yopambepo, ihe mbela ohatu kala ngaa tu na olupandu lwayo? Ondi shi shi kutya Jehova okwa pungulila ayehe mboka ye mu inekela, yo aadhiginini kuye nohayi ipalutha niikulya okuza koshitaafula she, omalaleko nuuyamba kaage shi okuyelekwa.”

15, 16. Aaihokani yamwe oya li ya mono ondjambi yashike omolwuulaadhi wawo muukalele, noshike to ilongo miimoniwa yawo?

¹⁵ Oonzi dhilwe ohadhi kala wo dhi ipyakidhila niilonga yOmuwa, mokwaambidhidha lela aamwahe yaKristus. (Mat. 25:40) Dho inadhi fa omupiya ngoka omwiinayi nomunanyalo ngoka a popiwa meyele lyaJesus. Odhi na ehalo lyokwiiyamba nohadhi ningi oonkambadhala dhi pitithe komeho iinima yUukwaniilwa. Pashiholelwa, sho Jon nomukadhi Masako ya li  ya pulwa ya ka kwathele egongalo lyaapopi yOshichina koKenya, petameko oya li inaaya hala nawa okuya ko. Ihe konima sho ya konakona nawa oonkalo dhawo nokugalikana kombinga yoshinima shoka, oya tokola ya tembukile hoka.

¹⁶ Oya li ya mono ondjambi omolwoonkambadhala dhawo. Oya ti: “Huka otatu tyapula uukalele.” Oya li ya tameke omakonakonombiimbeli gaheyali. Oya li wo ya mono iimoniwa yilwe iiwanawa. Oya gwedha ko ya ti: “Ohatu pandula Jehova esiku kehe sho e tu pitike tu kale huka.” Osha yela kutya opu na aamwatate naamwameme oyendji mboka ye shi ulika kutya oya tokola okukala yi ipyakidhila lela miilonga yaJehova sigo oompoka ngaa ehulilo tali ya. Dhiladhila kaatumwa omayuvi mboka ya pita kOsikola yaGilead, noye li miilonga yuutumwa nosho wo yalwe mboka yi igandja nehalo ewanawa ya ka longe kiilongo kaayi shi yawo. Ngele owa hala okumona uuyelele kashona nkene wu na oku shi enda opo wu ye kiilongo mbyoka yi na ompumbwe onene, lesha oshitopolwa shi na oshipalanyolo: “Oyi igandja nehalo ewanawa ya ka longe kuEcuador” mOshungolangelo yo 15 Juli 2012. Sho to lesha shoka sha popiwa kaamwatate naamwameme mboka taya kwathele miilongo mbyoka kaayi shi yawo, dhiladhila wo nkene to vulu okuninga oshindji miilonga yokutanga Kalunga mbyoka hayi eta enyanyu.

17. Okukala kaatu shi esiku notundi oku li ngiini elaleko nuuyamba kutse?

¹⁷ Osha yela kutya okukala kaatu shi esiku notundi uuna onkalelo ndjika tayi ka hulithwa po, oshi li elaleko nuuyamba kutse. Pehala lyokukala twa lulilwa nenge tu uvite nayi, ohashi tu ningitha tu hedhe popepyeelela naJehova, Kalunga ketu omunahole, sho tatu longo nuudhiginini ehalo lye. Okukala twa kwata nomaako agehe gaali koshipululo shetu shopathaneko, nokwiikeelela kaatu piyaganekwe kusha, otashi ke tu etela enyanyu sho tatu longo iilonga yOmuwa gwetu. — Luk. 9:62.

18. Omolwashike tu na okukakatela uudhiginini wetu?

¹⁸ Esiku lyaKalunga sho ta ka pangula uuyuni oli li lela popepi. Kapu na nando ogumwe gwomutse a hala okuuvitha nayi Jehova nenge Jesus. Oye tu inekelela uuthembahenda wa dhenga mbanda momasiku ngaka gahugunina. Inatu nyanyukwa tuu sho ye tu inekela! — Lesha 1 Timoteus 1:12.

19. Ongiini tatu vulu okuulika kutya otwi ilongekidha?

¹⁹ Kutya nduno otu na etegameno lyoku ka kala nomwenyo megulu nenge okombanda yevi mOparadisa, natu kale twa tokola toko tu kale tatu longo nuudhiginini miilonga yokuuvitha noyokuninga aantu aalongwa mbyoka twa pewa kuKalunga. Sigo opo mpaka katu shi esiku notundi sho Jehova te ya a hanagule po onkalelo ndjika. Ihe mbela otwa pumbwa ngaa shili okutseya kutya ote ke shi ninga uunake? Otatu vulu okukala twi ilongekidha, naashoka osho tu na okuninga. (Mat. 24:36, 44) Otu na uushili kutya ngele otwa kala twi inekela thiluthilu muJehova nokupitha komeho Uukwaniilwa we, itatu ka sithwa ohoni nenge tu uvithwe nayi. — Rom. 10:11.