Mona uuwanawa pakuudha mokulesha Ombiimbeli
“Onda hokwa ompango yaKalunga.”—ROM. 7:22.
1-3. Omauwanawa geni haga zi mokulesha Ombiimbeli nomokutula miilonga shoka tayi ti?
“ONGULONENE kehe ohandi pandula Jehova sho a kwathela ndje ndi uve ko Ombiimbeli.” Omumwameme omukokele ngoka a popya oohapu ndhoka okwa lesha Ombiimbeli ayihe lwiikando yi vulithe po 40, nota tsikile oku shi ninga. Omumwameme gumwe omugundjuka okwa nyola kutya okulesha Ombiimbeli okwe mu kwathela a kale a tala ko Jehova e li omuntu gwolela. Shoka oshe mu ningitha a hedhe popepyeelela naTate gwe gwomegulu. Okwa ti: “Inandi kala nando onale nda nyanyukwa shi vulithe ngashingeyi!”
2 Omuyapostoli Petrus okwa ladhipike kehe gumwe ‘a kale a sa enota aluhe lyomahinihini gomoohapu.’ (1 Pet. 2:2, yelekanitha OB-1954.) Mboka hayi ikutha enota ndyoka okupitila mokukonakona Ombiimbeli nohaya tula miilonga shoka tayi ilongo mo, oye na eiyuvo lya yela nosho wo elalakano monkalamwenyo. Ohaya panga uukuume uuwanawa naamboka ye hole wo Kalunga kashili nohaye mu longele. Omatompelo agehe ngoka omawanawa otaga ningitha omuntu a kale a “hokwa ompango yaKalunga.” (Rom. 7:22) Ihe opu na nokuli omauwanawa galwe ogendji. Mbela gamwe gomugo ogeni?
3 Shi thike ngaa pokwiilonga kombinga yaJehova nosho wo yOmwana, opo ngaa tapu ka kala pu thike okukoka kwohole yoku ya hola nosho wo yokuhola aantu ooyakweni. Okukala wu na Ontseyo yashili yOmanyolo otaku ku kwathele wu mone nkene Kalunga ta ka hupitha masiku aantu aavuliki ya ze mo monkalelo ndjika tayi hulu po. Owu na onkundana ombwanawa ndjoka wu na okulombwela aantu muukalele. Jehova ote ke ku laleka nuuyamba sho to longo aantu kombinga yaashoka wi ilonga mOohapu dhe.
KALA HO LESHA OMBIIMBELI NOKUTEDHATEDHA KWAASHOKA WA LESHA
4. Okulesha Ombiimbeli “newi lyopevi” okwa hala okutya shike?
4 Jehova ina hala aapiya ye ya kale haya lesha Oohapu dhe taya tondoka. Okwa li a lombwele Josua a ti: “[Ompangoraamata] ndjika u na oku yi kala u yi na mokana koye noku yi dhimbulukwa [okulesha newi lyopevi, NW] omutenya nuusiku.” (Jos.1:8, OB-1954; Eps. 1:2) Mbela elombwelo ndyoka otali ulike kutya owu na okulesha lelalela newi lyopevi iitya ayihe mbyoka to lesha okuza kuGenesis sigo okEhololo? Aawe. Olya hala okutya owu na okulesha pondapo ndjoka tayi ku pe ompito wu tedhatedhe. Uuna to lesha Ombiimbeli “newi lyopevi,” otashi ku kwathele wu kale to gandja eitulomo koohapu ndhoka wa pumbwa unene notadhi ku tsu omukumo pethimbo mpoka. Uuna wa mono iintokotumbulo mbyoka, oovelise ndhoka nenge omahokololo ngoka, lesha po to ende kashona, tashi vulika wu tumbule iitya to inyengitha elaka nomilungu. Ashihe shoka to lesha mOmanyolo otashi vulu oku ku guma lela paumwene. Omolwashike shika sha simana? Omolwaashoka okuuva ko omayele gaKalunga otaku ke ku tsa omukumo wu ga tule miilonga.
5-7. Gandja ethaneko lyankene okulesha Oohapu dhaKalunga newi lyopevi taku vulu oku ku kwathela wu kale (a) wa yogoka pamikalo; (b) ho ungaunga nayalwe nombili nosho wo nolukeno; (c) wi inekela muJehova nokuli nuuna wu li momathimbo omadhigu.
5 Okulesha “newi lyopevi” ohaku kwathele omuntu uuna ta lesha Omambo gOmbiimbeli ngoka kee shi nawa. Natu shi thaneke noonkalo ndatu tadhi landula. Onkalo yotango, dhiladhila komumwatate omugundjuka ngoka ta lesha ehunganeko lyaHosea melesho lye lyOmbiimbeli lyopaumwene. Montopolwa 4 konima sho a lesha ovelise 11 sigo 13 newi lyopevi okwa mwena po. (Lesha Hosea 4:11-13.) Omolwashike mbela? Oovelise ndhoka odha li dhe mu gumu molwaashoka oha kala ta kondjo opo kaaye momamakelo kosikola gokukala neihumbato lya nyata. Oha dhiladhila oohapu ndhoka e ti ilombwele ta ti: ‘Jehova oha mono iinima iiwinayi mbyoka aantu haya ningi nokuli nomeholamo. Inandi hala oku mu yemateka.’ Omumwatate okwa tokola a kale a yogoka pamikalo koshipala shaKalunga.
6 Onkalo ontiyali, dhiladhila komumwameme ta lesha ehunganeko lyaJoel e te ya pontopolwa 2, ovelise 13. (Lesha Joel 2:13.) Sho ta lesha ovelise ndjoka newi lyopevi, ota dhiladhila kunkene e na okuholela Jehova ngoka e li ‘omunambili, omunesilohenda nomunalukeno.’ Okwa tokola a kambadhale okweetha po iikala yokushadha aantu nosho wo iitya iiwinayi mbyoka ha longitha omathimbo gamwe uuna ta popi nomusamane gwe nosho wo nayalwe.
7 Onkalo ontitatu, dhiladhila komumwatate omuvali ngoka a kanitha iilonga ye noti ipula nonkalonawa yomukulukadhi gwe nosho wo yaanona. PuNahum 1:7 okwa lesha po newi lyopevi kutya Jehova “ota sile oshimpwiyu ayehe mboka ye mu inekela” nota “gamene aantu ye methimbo lyuudhigu.” Oohapu ndhoka odhe mu hekeleke. Okwa mono kutya Jehova oha sile oshimpwiyu aantu nokwe etha po okukala ti ipula unene. Opo nduno okwa lesha ovelise 15 newi lyopevi. (Lesha Nahum 1:15.) Omumwatate okwa dhimbulula kutya ngele tu uvitha onkundana ombwanawa momathimbo omadhigu, otu ulike kutya Jehova oye omugameni gwe. Manga omumwatate ta tsikile nokukonga iilonga, okwi inyengithwa wo ngashingeyi a kale ha ambidhidha iilonga yomomapya mokati koshiwike.
8. Lombwela yalwe paufupi kombinga yokawe hoka wa mona melesho lyoye lyOmbiimbeli.
8 Iitsa mbyoka ya kwathela aantu mboka twa zi nokukundathana oya za momambo gOmbiimbeli ngoka ga talika ko kuyamwe kutya omadhigu okuuviwa ko. Sho to konakona embo lyaHosea, lyaJoel nolyaNahum wu na ehalo lyokwiilonga, oto ka kala wa hala okulesha oovelise dhilwe momambo ngoka newi lyopevi. Dhiladhila owala kuunongo nokehekeleko ndyoka to ka mona momambo gaapolofeti mboka! Mbela ongiini shi na ko nasha nOmbiimbeli ayihe? Oohapu dhaKalunga odha fa omina moka mu na okawe okendji. Longa nawa omina ndjoka! Eeno, lesha Ombiimbeli ayihe nelalakano lyokumona okawe, nenge tu tye ewiliko nosho wo eladhipiko ndyoka tali adhika mo.
LONGA NUUDHIGININI WU UVE KO SHOKA WA LESHA
9. Ongiini tatu vulu okuhwepopaleka euvoko lyetu lyOohapu dhaKalunga?
9 Nonando osha simana okulesha Ombiimbeli esiku kehe, owa pumbwa wo okumona ontseyo neuvoko. Onkee ano, longitha nawa iileshomwa yehangano lyaJehova wu ninge omapekapeko ge na ko nasha naantu, nomahala nosho wo niiningwanima mbyoka ho lesha. Nongele oho kala to ipula shi na ko nasha nankene elongo lyontumba lyOmbiimbeli tali vulu okuguma onkalamwenyo yoye, oto vulu okupula omukuluntugongalo nenge Omukriste gulwe ngoka a pyokoka pambepo e ku kwathele. Opo tu gandje ethaneko lyankene sha simana tu hwepopaleke euvoko lyetu, natu ka kundathane oshiholelwa shOmukriste gwomethelemumvo lyotango ngoka a li a longo nuudhiginini a ninge ngaaka. Omukriste ngoka oApollos.
10, 11. (a) Apollos okwa li a kwathelwa ngiini a hwepopale e li omuuvithi gwonkundana ombwanawa? (b) Oshike tatu vulu okwiilonga mehokololo lyaApollos? (Tala oshimpungu “Mbela shoka ho longo aantu oshi li ngaa pethimbo?”)
10 Apollos okwa li Omukriste Omujuda ngoka ‘a tseya nawa Omanyolo’ nokwa li ‘a hwama mombepo.’ Embo lyIilonga olya popi kombinga ye lya ti: ‘Okwa longo aantu elongo lyu uka kombinga yaJesus. Ihe okwa li a tseya owala [eninginitho, NW] ndyoka Johannes e li ningi.’ Mokwaahashisha, Apollos okwa li e na euvoko ekulu kombinga yeninginitho nokwa li ta longo aantu shi ikolelela keuvoko ndyoka. Sho ye mu uvu ta longo aantu muEfeso, aaihokani Aakriste Priskila naAkula oye mu yelithile “nawalela ondjila yaKalunga.” (Iil. 18:24-26) Ongiini shika sha li she etele Apollos uuwanawa?
11 Konima yokuuvitha muEfeso, Apollos okwa yi kuGreka. “Sho a thiki ko, okwa kwatha lela mbeyaka ya ningi ooitaali kesilohenda lyaKalunga. Oshoka oye okwa tompo Aajuda nomatompelo ga kola montaneho yaantu ayehe, nomokulongitha Omanyolo okwe ya ulukile kutya Jesus oye Kristus.” (Iil. 18:27, 28) Pethimbo ndyoka, Apollos okwa li ta vulu okuyelitha mondjila eityo lyeninginitho lyopaKriste. Neuvoko lye ndyoka lya hwepopala “okwa kwatha lela” mboka aape opo ya ninge ehumokomeho melongelokalunga lyashili. Oshike tatu ilongo mehokololo ndika? Ngaashi Apollos, otu na okulonga nuudhiginini tu uve ko shoka hatu lesha mOmbiimbeli. Onkee ano, ngele ooitaali ooyakwetu taye tu pe omaetopo gankene tu na okulonga aantu momukalo ngoka tagu pondola, otu na okutaamba ko ekwatho ndyoka neifupipiko nonolupandu. Ngele otwa ningi ngaaka, ongushu yiilonga yetu iiyapuki otayi ka hwepopala.
LONGITHA SHOKA WI ILONGA WU KWATHELE YALWE
12, 13. Gandja ethaneko lyankene okulongitha nawa Omanyolo taku vulu okukwathela omukonakonimbiimbeli a ninge ehumokomeho.
12 Ngaashi Priskila, Akula naApollos, otatu vulu wo okukala elalekonuuyamba kuyalwe. Uuna wa tsu omukumo omuntu ngoka e na ohokwe mokukonakona Ombiimbeli a taaguluke endangalati ndyoka lya li tali mu kata kaahume komeho pambepo, oho kala wu uvite ngiini? Nenge ngele owu li omukuluntugongalo, oho kala wu uvite ngiini uuna omwiitaali omukweni e ku pandula omolwomayele gopamanyolo ngoka ga li ge mu kwathele a pite monkalo ondhigu? Nopwaahe na omalimbililo, okulongitha Oohapu dhaKalunga tu kwathele yalwe ya hwepopaleke oonkalamwenyo dhawo, ohaku tu ningitha tu kale twa gwanenwa notwa nyanyukwa. * Tala kunkene to vulu okwaadha elalakano ndyoka.
13 Pethimbo lyaElia, Aaisraeli oyendji kaya li ye shi kutya naya hogolole po shike pokati kelongelokalunga lyashili naandyoka lyiifundja. Omayele ngoka Elia a li a pe aantu mboka otaga vulu okukwathela omukonakonimbiimbeli ngoka e na omitima mbali ngoka itaa humu komeho pambepo. (Lesha 1 Aakwaniilwa 18:21.) Natu taleni ishewe konkalo yilwe: Ngele omuntu ngoka e na ohokwe okwa tila kutya ookuume ke nenge aanegumbo yaandjawo otaye ke mu tila ngiini, oto vulu oku mu kwathela a tokole okulongela Jehova to longitha Jesaja 51:12, 13.—Lesha.
14. Oshike tashi ke ku kwathela wu dhimbulukwe oovelise dhOmbiimbeli uuna we dhi pumbwa wu kwathele yalwe?
14 MOmbiimbeli omu na oohapu odhindji ndhoka tadhi vulu okuladhipika, okupukulula, nenge okunkondopaleka aaleshi yayo. Ihe otashi vulika wu ipule to ti: ‘Oshike tashi vulu okukwathela ndje ndi kale ndi shi omanyolo ngoka taga ka kwathela ndje uuna nde ga pumbwa?’ Kala ho lesha Ombiimbeli esiku kehe nokutedhatedha kwaashoka Kalunga ta ti. Ngele owa ningi ngaaka, kashona nakashona oto ka tseya shoka Ombiimbeli tayi ti, naJehova ota vulu okulongitha ombepo ye ondjapuki e ku kwathele wu dhimbulukwe shoka wi ilonga mo.—Mark. 13:11; lesha Johannes 14:26. *
15. Oshike tashi ke ku kwathela wu uve ko nawa Oohapu dhaKalunga?
15 Ngaashi omukwaniilwa Salomo, galikana kuJehova e ku pe uunongo mokugwanitha po iinakugwanithwa yuukalele mbyoka wi inekelelwa. (2 Ondjal. 1:7-10) Ngaashi naanaa aapolofeti yonale ya li ya ningi, kala ho ‘konakona neitulomo’ Oohapu dhaKalunga opo wu mone ontseyo yashili yokutseya Jehova nosho wo ehalo lye. (1 Pet. 1:10-12) Omuyapostoli Paulus okwa li a ladhipike Timoteus i ipaluthe ‘noohapu dheitaalo nodhelongo lyu uka.’ (1 Tim. 4:6, yelekanitha OB-1954) Mokuninga ngaaka, oto ka kala wu li pondondo ya dhenga mbanda yokukwathela yalwe pambepo. Nopethimbo opo tuu mpoka, oto ka koleka eitaalo lyoye.
OKULESHA OOHAPU DHAKALUNGA OHAKU TU GAMENE
16. (a) ‘Okukonakona Omanyolo esiku kehe’ okwa li kwe etele ngiini Aaberea uuwanawa? (b) Omolwashike okulesha Ombiimbeli esiku kehe kwa simanenena kutse kunena?
16 Aajuda muMakedonia oshilando shaBerea oya li ye na omukalondjigilile ‘gwokukonakona Omanyolo esiku kehe.’ Sho Paulus a li u uvithile Aajuda mboka onkundana ombwanawa, oya li ya yelekanitha oohapu dhe nontseyo yawo yOmanyolo. Oshizemo osha li shini? Oyendji oya li ya tompwa yi itaale kutya shoka Paulus a li ta longo oshoshili, ‘noya li ya ningi ooitaali.’ (Iil. 17:10-12) Shika otashi ulike kutya okulesha Ombiimbeli esiku kehe ohaku ningitha omuntu a kale e na eitaalo lya kola muJehova. Eitaalo lya tya ngaaka, ndyoka li li “einekelo lya kola miinima mbyoka twe yi tegamena” olya simana opo tu vule oku ka hupa tu ye muuyuni uupe waKalunga.—Heb. 11:1.
17, 18. (a) Eitaalo lya kola nosho wo ohole ohayi gamene ngiini omutima gwopathaneko gwOmukriste? (b) Ongiini etegameno hali tu gamene kiiponga?
17 Netompelo ewanawa, Paulus okwa nyola a ti: “Otse aantu yomuuyelele, onkee otu na okukala tu na eidhiliko. Tu zaleni eitaalo nohole ongehuuyanza, netegameno lyehupitho lyetu ongegala lyosheela.” (1 Tes. 5:8) Omutima gwomukwiita ohagu kala gwa pumbwa okugamenwa opo kaagu monithwe oshiponga komutondi. Sha faathana, omutima gwopathaneko gwOmukriste ogwa pumbwa wo okugamenwa opo kaagu kwatwe kuulunde. Oshike hashi ningwa po ngele omupiya gwaJehova okwa kala e na eitaalo lya kola momauvaneko gaKalunga noku na ohole yoku mu hola nosho wo yokuhola aantu ooyakwawo? Omupiya ngoka ohi izaleke ehuuyanza lyopambepo ndyoka lya kola kaaku na we. Kungawo, ita ka longa sha shoka tashi mu ningitha a kale inaa hokiwa kuKalunga.
18 Paulus okwa tumbula wo egala lyosheela, ndyoka li li ‘etegameno lyehupitho.’ Pethimbo lyOmbiimbeli ngele omukwiita ina gamena omutse gwe otashi vulika a sile miita nuupu. Ihe ngele okwa zala egala lyoosheela, otashi vulika a gamene omutse gwe e ta kala inaa mona oshiponga unene. Ngele tatu konakona Oohapu dhaKalunga ohatu koleke etegameno lyetu muye. Etegameno lya kola ohali tu kwathele tu vule okuhenuka aashunimonima nosho wo ‘omapopyo gawo ga nyata noguugoya.’ (2 Tim. 2:16-19) Etegameno lyetu otali ke tu kwathela wo tu kale twa tokola toko tu kale kokule naamboka taya vulu oku tu ningitha tu ihumbate momukalo ngoka inaagu hokiwa kuJehova.
OKULESHA OMBIIMBELI OTAKU TU KWATHELE TU VULE OKU KA HUPA
19, 20. Omolwashike twa lenga noonkondo Oohapu dhaKalunga, nohatu ulike ngiini kutya otu na olupandu lwadho? (Tala oshimpungu “Jehova oha pe ndje naanaa shoka nda pumbwa.”)
19 Sho tatu ende tu ka popepyeelela nehulilo lyonkalelo ndjika, otwa pumbwa okukala twi inekela mOohapu dhaJehova shi vulithe nale. Omayele ngoka hatu mono mudho ohage tu kwathele tu lundulule omikalondjigilile dhetu omiwinayi notu kale hatu pangele egamo lyetu lyokulonga uulunde. Eladhipiko nehekeleko ndyoka hatu mono mo, ohali tu kwathele tu vule okusinda omamakelo ngoka haga zi kuSatana nokuuyuni we. Omolwewiliko ndyoka Jehova he tu pe okupitila mOohapu dhe, otatu ka kala mondjila ndjoka tayi fala komwenyo.
20 Dhimbulukwa kutya Kalunga okwa hala “aantu ayehe ya hupithwe.” Aapiya yaJehova oya kwatelwa ‘maantu ayehe’ mboka. Omwa kwatelwa wo mboka tashi vulika tu kwathele okupitila miilonga yetu yokuuvitha noyokulonga aantu. Ihe ayehe mboka ya hala oku ka hupithwa oye na okumona ‘ontseyo yoshili.’ (1 Tim. 2:4) Kungawo, opo tu ka hupe pomasiku gahugunina otu na okukala hatu lesha Ombiimbeli nokutula miilonga omayele gayo ga nwethwa mo. Eeno, ngele ohatu lesha Ombiimbeli esiku kehe otatu ulike kutya otwa lenga noonkondo Oohapu dhoshili dhaJehova dhi na ondilo.—Joh. 17:17.
^ okat. 12 Eeno, katu na nando okulongitha omayele gOmbiimbeli tu thindile yalwe kongudhi nenge tu ya pangule. Otu na okukala tu na eidhidhimiko nohenda nomukonakonimbiimbeli ngaashi Jehova he tu idhidhimikile.—Eps. 103:8.
^ okat. 14 Ongiini ngele oto dhimbulukwa owala oshitya shontumba ihe ito dhimbulukwa kutya oshi li membo lini, montopolwa yini nenge movelise yini? Ngele owa kongo oshitya shoka mo-index ndjoka yi li mOmbiimbeli yOshiingilisa, mo-Watchtower Library nenge membo lyo-concordance lyOmbiimbeli yo-New World Translation, oto ka mona enyolo ndyoka.
