1, 2. Yelitha kutya Jesus okwa li a ningile shike aayapostoli ye aadhiginini konima sho ya dhana Opaasa mo 33 E.N.

ONGULOHI ye 14 Nisan momumvo 33 E.N. Jesus pamwe nookuume ke oya li ya nyanyukilwa okudhana Opaasa, ndjoka ya li hayi ya dhimbulukitha nkene Kalunga a li a hupitha oohekulululwa muupika muEgipiti. Ihe aalongwa ye aadhiginini otaya ka mona “ehupitho lyaaluhe,” (NW) li vule ndyoka kokule. Mesiku lya landula ko, Omuwiliki gwawo kee na oondjo ota ka dhipagwa kaatondi ye. Ihe oshiningwanima shika otashi eta elaleko nuuyamba. Ombinzi yaJesus ndjoka ya tika otayi ka ninga ekankameno lyehupitho lyaantu muulunde neso. — Heb. 9:12-14.

² Opo kaatu dhimbwe elongekidho ndyoka lyopahole, Jesus okwa li a dhike po edhano epe lyokomumvo ndyoka lya pingene po Opaasa. Okwa li e shi ningi sho a pambula oshikwiila kaashi na efulika, e te shi topolele aayapostoli ye aadhiginini 11, e ta ti: “Shika osho olutu lwandje ndoka talu mú gandjelwa. Shi ningeni nokudhimbulukwa ndje.” Osho wo a li a ningi ngaaka noshitenga shomaviinu omatiligane, e te ya lombwele ta ti: “Oshitenga shika osho ehangano epe lyomombinzi yandje ndjoka tayi tilwahi molweni.” — Luk. 22:19, 20.

3. (a) Elunduluko lini enene lye ya po konima yeso lyaJesus? (b) Omapulo geni tu na okwiipula kombinga yegalikano lyaJesus ndyoka li li muJohannes ontopolwa 17?

³ Ehangano ekulu lyOmpango ndjoka Kalunga a li a hangana nAaisraeli yopanyama olya li pokuhula po. Olya li tali ka pingenwa po nehangano epe ndyoka Jehova a hangana naalanduli yaJesus aagwayekwa. Jesus okwa li e na ko nasha unene nonkalonawa yoshigwana shika oshipe shopambepo. Aaisraeli yopamanya oya li ya topoka palongelokalunga nosho wo pankalathano, naashika osha li tashi nyateke edhina lyaKalunga eyapuki. (Joh. 7:45-49; Iil. 23:6-9) Mepingathano naashoka, Jesus okwa li a halelela  aalanduli ye ya kale ya hangana, opo ya vule okulonga muukumwe ya simanekithe edhina lyaKalunga. Jesus okwa li a ningi po shike nduno? Okwa li a galikana egalikano ewanawa kaaku na we ndyoka tali ka tunga shili kehe gumwe ngoka te ke li lesha. (Joh. 17:1-26; tala kethano ndyoka li li petameko.) Tse otu li ponkatu yokukonakona egalikano ndyoka nokwiipula tatu ti: “Mbela Kalunga okwa li ngaa a yamukula egalikano lyaJesus?” Otu na wo okwiikonakona nokwiipula tatu ti: “Mbela ohandi katuka ngaa metsokumwe nalyo?”

4, 5. (a) Otatu ilongo shike mwaashoka Jesus a tumbula petameko lyegalikano lye? (b) Jehova okwa li a yamukula ngiini eindilo lyaJesus lyopaumwene li na ko nasha nonakuyiwa ye?

⁴ Uusiku awuhe Jesus ota popi naalongwa ye te ya lombwele kombinga yontseyo yaKalunga yi na ondilo. Opo nduno okwa tala kegulu e ta galikana ta ti: “Tate, ethimbo olye ya. Adhimitha omumwoye, omumwoye opo e ku adhimithe wo. Oshoka ongoye we mu pa oonkondo okupangela aantu ayehe, opo a gandje omwenyo gwaaluhe kwaayehe mboka we ye mu pa. . . . Ngame onde ku adhimitha kombanda yevi, onda tsakanitha oshilonga shoka we shi pe ndje, ndi shi longe. Tate, adhimitha ndje montaneho yoye ngashingeyi neadhimo olyo tuu ndyoka nda li ndi na pungoye, uuyuni manga inaau shitwa.” — Joh. 17:1-5.

⁵ Ndhindhilika iinima mbyoka ya simanenena kuJesus mbyoka a tumbula petameko lyegalikano lye. Shoka a li e na ko nasha nasho unene okwaadhimithwa kwaHe gwomegulu naashoka oshi li metsokumwe neindilo lyotango lyomoshiholelwa shegalikano lye: “Tate, edhina lyoye nali yapulwe.” (Luk. 11:2) Oshinima oshikwawo shoka Jesus a li e na ko nasha nasho osho ompumbwe yaalongwa ye, i indile ‘ya pewe omwenyo gwaaluhe.’ Konima yaashoka, Jesus okwa pula shoka a li a hala a ningilwe paumwene, a ti: “Tate, adhimitha ndje montaneho yoye ngashingeyi neadhimo olyo tuu ndyoka nda li ndi na pungoye, uuyuni manga inaau shitwa.” Jehova okwa pe Omwana omudhiginini, Jesus, ondjambi yi vulithe pwaashoka a pula sho e mu pe “edhina li vule” lyaayengeli ayehe. — Heb. 1:4.

6. Opo aayapostoli ya mone omwenyo gwaaluhe, oya li ye na okuninga shike notu shi shi ngiini kutya oya li ya pondola?

⁶ Jesus okwa galikana wo kombinga yaashoka tse tu li aalunde tu na okuninga, opo tu vule okumona omagano gomwenyo gwaaluhe. (Lesha Johannes 17:3.) Okwa ti kutya otu na okutsikila ‘okumona ontseyo’ kombinga yaKalunga naKristus. Omukalo gumwe moka tatu vulu oku shi ninga ogwo okwiilonga oshindji kombinga yaJehova nOmwana. Omukalo omukwawo gwa simana moka tatu vulu okutseya Kalunga oosho tatu mono enyanyu ndyoka hali zi mokutula miilonga shoka tatu ilongo kombinga ye. Aayapostoli osho ya li ya ningi ngawo mokulandula omukalo nguka tagu gandja omwenyo, molwaashoka Jesus okwa li a tsikile ko ta galikana ta ti: “Ngame onde ya pe oohapu ndhoka we dhi pe ndje, oyo noye dhi taamba.” (Joh. 17:8) Ihe oya li ya pumbwa okukala taya tedhatedha kOohapu dhaKalunga noku dhi tula miilonga moonkalamwenyo dhawo esiku kehe, opo ya mone omwenyo gwaaluhe. Mbela aayapostoli mboka aadhiginini oya li ya pondola mwaashika sigo opehulilo lyonkalamwenyo yawo kombanda yevi? Eeno lela. Shika otu shi shi molwaashoka kehe edhina lyomuyapostoli olya nyolelwa komamanya 12 hoka kwa tungilwa Jerusalem Oshipe shomegulu. — Eh. 21:14.

7. ‘Okutseya’ Kalunga okwa kwatela mo shike, nomolwashike shoka sha simanenena?

⁷ Ngele otwa hala okumona omwenyo gwaaluhe, otu na okutsikila ‘okutseya’ Kalunga. Shika osha hala okutya shike? Otashi ti kutya otatu ka tsikila okwiilonga oshindji kombinga ye. Ihe shika osha kwatela mo oshindji shi vulithe  owala okukala tu shi omaukwatya ge nosho wo omalalakano ge. Okutseya Jehova okwa kwatela mo okukala tu mu hole noonkondo nosho wo ooitaali ooyakwetu. Ombiimbeli oya yelitha ya ti: “Oongoka kee na ohole, oye ina tseya Kalunga.” (1 Joh. 4:8) Ano okukala tu shi Kalunga okwa kwatela mo okukala tatu vulika kuye. (Lesha 1 Johannes 2:3-5.) Kashi shi tuu uuthembahenda okukala gumwe gwomwaamboka ye shi Jehova! Ihe ngaashi owala Judas Iskariot, otatu vulu okukanitha ekwatathano ndyoka li na ondilo. Ano natu longe nuudhiginini, opo kaatu li kanithe. Opo nduno pehulilo otatu ka kala twa gwana okumona omagano gomwenyo gwaaluhe. — Mat. 24:13.

8, 9. Oshike Jesus a li a pititha komeho muukalele we, nomuthigululwakalo guni gwopalongelokalunga a li inaa taamba ko?

⁸ Konima yokulesha egalikano lyaJesus ndyoka li li muJohannes ontopolwa onti-17, olye mbela kee wete kutya Jesus okwa li e hole aayapostoli ye noonkondo mboka ya li po pethimbo ndyoka nosho wo mboka ya li taya ka ninga aalongwa ye monakuyiwa? (Joh. 17:20) Nonando ongawo, otu na okuuva ko kutya Jesus ka li a pititha komeho ehupitho lyetu. Elalakano lye lyotango okuza petameko sigo opehulilo lyuukalele we olya li okuyapulitha nokusimanekitha edhina lyaHe. Pashiholelwa, sho e ya mosinagoga muNasareti, Jesus okwa lesha mongonga yembo lyaJesaya a ti: “Ombepo yOmuwa [“yaJehova,” NW] oya lambele ndje. Osho ngeyi Omuwa okwa gwayeke ndje, ndi uvithile oohepele elaka etoye.” Nokaapu na omalimbililo, Jesus oku na okukala a li a tumbula nawa edhina lyaKalunga sho a li a lesha oohapu ndhoka. — Luk. 4:16-21.

⁹ Pamuthigululwakalo gwOshijuda, aawiliki yomalongelokalunga oya li yi indike aantu kaaya longithe edhina lyaKalunga uule woomvula odhindji manga Jesus ineeya kombanda yevi. Otatu vulu okukala nuushili kutya Jesus ka li a taamba ko omuthigululwakalo gwa tya ngaaka ngoka kaagu li pamanyolo. Okwa li a lombwele aapataneki ye a ti: ‘Ongame onde ya medhina lyaTate, one noinamu taamba ndje. Ngele taku zi gulwe i ili te ya molwe mwene, one otamu mu taamba.’ (Joh. 5:43) Opo nduno omasiku omashona  manga inaa sa, Jesus okwa li ulike shoka a pititha komeho monkalamwenyo ye sho a galikana a ti: “Tate, simanekitha edhina lyoye.” (Joh. 12:28) Onkee itashi tu kumitha sho Jesus a popi iikando niikando kombinga yedhina lyaHe megalikano ndika tatu konakona ngashingeyi.

10, 11. (a) Oshike sha li sha kwatelwa mokutseyitha kwaJesus edhina lyaHe? (b) Aalongwa yaJesus oye na okulonga ya adhe elalakano lini?

¹⁰ Jesus okwa galikana a ti: “Aantu mboka yomuuyuni we ya pa ndje, onde ya tseyithile edhina lyoye. Oyo oyoye, ongoye nowe ya pe ndje. Oyo oya vulika koohapu dhoye. Ngashingeyi ngame otandi ya kungoye. Ngame kandi li we muuyuni, ihe yo oye li [muuyuni]. ‘Tate Omuyapuki, ya gamena koonkondo dhedhina lyoye, opo ya ninge omuntu gumwe naanaa, ngashika ngame nangoye tu li gumwe.’” — Joh. 17:6, 11.

¹¹ Okutseyithila aalongwa ye edhina lyaHe okwa li kwa kwatela mo oshindji shi vulithe owala oku li tumbula mokana. Jesus okwa li wo e ya kwathele ya tseye kutya edhina lyaKalunga olya kwatela mo shike, ano omaukwatya omawawana gaKalunga nosho wo omukalo moka hu ungaunga natse. (Eks. 34:5-7) Shimwe ishewe, e li pondondo ya tumbala megulu, Jesus ota tsikile nokukwathela aalongwa ye ya tseyithile uuyuni awuhe edhina lyaJehova. Onelalakano lini mbela? Olyokukwathela aantu oyendji ya ninge aalongwa manga ehulilo lyonkalelo ndjika ya kolokosha inaali thika. Jehova ite ki iningila tuu edhina ekumithi sho ta ka hupitha oonzapo dhe oondhiginini! — Hes. 36:23.

12. Iinima itatu yini twa pumbwa opo tu pondole moshilonga shika shokuhupitha oomwenyo?

¹² Manga a li kombanda yevi, Jesus okwa li a longo nuudhiginini a kwathele aalongwa ye ya sinde uunkundi wawo. Shika osha li sha pumbiwa, opo ya gwanithe po oshilonga shoka Jesus a tamekele. Jesus okwa galikana a ti: “Ngame onde ya tuma muuyuni, ngaashi ngoye wa tuma ndje [muuyuni].” Jesus okwa tsu omuthindo iinima itatu mbyoka ya pumbwa okuninga, opo ya pondole moshilonga shika shokuhupitha oomwenyo. Shotango, okwa galikana kutya aalongwa ye inaya kala oshitopolwa shuuyuni mbuka waSatana wa nyata. Oshitiyali, okwa galikana opo ya yapulwe, nenge ya kale aayapuki mokutula miilonga oshili yOohapu dhaKalunga. Oshitatu, Jesus okwi indile opo aalongwa ye ya kale ya hangana mohole ngaashi ndjoka yi li pokati ke naHe. Shika otashi pula twi ikonakone tse yene. Kehe gumwe gwomutse ni ipule ta ti: ‘Mbela otandi katuka ngaa metsokumwe nomaindilo gaJesus gatatu?’ Okugandja eitulomo kiinima mbika, Jesus okwa li inekela kutya ‘uuyuni otawu ki itaala kutya ongoye wa tuma ndje.’ — Lesha Johannes 17:15-21.

13. Egalikano lyaJesus olya li lya yamukulwa ngiini methelemumvo lyotango E.N.?

¹³ Mokukonakona embo ndyoka lya landula omavaangeli gane, Iilonga yAayapostoli, otatu ka mona kutya egalikano lyaJesus olya yamukulwa. Opwa li tapu vulu okuholoka etopoko mokati kAakriste mboka yopetameko, mboka yamwe yomuyo ya li Aajuda naamboka kaaye shi Aajuda, aayamba noohepele, aapika nooyene yaapika. Ihe oya li ya hangana lela shoka sha li tashi vulu okufaathanithwa niitopolwa ya yoolokathana yolutu na Jesus e li omutse gwawo. (Ef. 4:15, 16) Shoka kashi shi tuu oshikumithi mokati kuuyuuni mbuka waSatana wa topoka! Eeno, olupandu aluhe nalu ye kuJehova, ngoka e shi ningi tashi wapa mokulongitha ombepo ye ondjapuki. — 1 Kor. 3: 5-7.

14. Egalikano lyaJesus olya yamukulwa ngiini pethimbo lyetu?

¹⁴ Shinikitha oluhodhi, konima yeso lyaayapostoli, okuhangana huka okukumithi inaku kalelela. Ngaashi sha hunganekelwe, uushunimonima owa holoka po, naashoka oshe etitha  po iimpaga yomalongelokalunga giifundja gopaKriste. (Iil. 20:29, 30) Ihe momumvo 1919, Jesus okwa li a mangulula aalanduli ye aagwayekwa muupika womalongelokalunga giifundja e te ya mangele kumwe ‘nepaya tali vulu okumangela iinima ayihe kumwe.’ (Kol. 3:14) Iilonga yawo yokuuvitha oya li ya gumu ngiini uuyuni awuhe? ‘Oonzi dhilwe’ dhi vulithe pomamiliyona gaheyali ndhoka dha “zi maantu yomomihoko adhihe, momaludhi agehe, miigwana ayihe nomomalaka agehe” odha gongelwa moshigunda shimwe pamwe naagwayekwa yaKalunga. (Joh. 10:16; Eh. 7:9) Shika kashi shi tuu eyamukulo lya dhenga mbanda kegalikano lyaJesus, sho a galikana a ti kutya “opo uuyuni u tseye kutya ongoye [Jehova] owa tuma ndje nou ya hole, ngashika u hole ndje”! — Joh. 17:23.

15. Eindilo lini li ikalekelwa Jesus a li i indile pehala lyaalongwa ye aagwayekwa?

¹⁵ Petameko lyongulohi yo 14 Nisan, Jesus okwa li a simanekitha aayapostoli ye mokuninga ehangano nayo ya ka pangele pamwe naye mUukwaniilwa we. (Luk. 22:28-30; Joh. 17:22) Shi na ko nasha naayehe mboka ya li taya ka ninga aalanduli ye aagwayekwa, Jesus okwa galikana a ti: “Tate, ongoye we ya pa ndje, onkee onda hala, ndi kale pamwe nayo nkoka ndi li, opo ya tale eadhimo lyandje, eadhimo ndyoka we li pa ndje, oshoka ngoye owa kala u hole ndje, nomanga uuyuni inaau shitwa.” (Joh. 17:24) Pehala lyokukala ya sila aagwayekwa efupa, oonzi dhilwe dhaJesus odha nyanyukwa, shoka tashi gandja natango uunzapo wuukumwe mboka wu li mokati kAakriste yashili kombanda yevi kunena.

16, 17. (a) Etokolotoko lini Jesus a li u ulike pehulitho lyegalikano lye? (b) Otu na okukala twa tokola toko okuninga shike?

¹⁶ Aantu oyendji muuyuni oya nwethwa mo kaawiliki yomalongelokalunga e ta ya hogolola okwiipwililikila uunzapo wa yela kutya Jehova oku na oshigwana sha hangana shoka shi mu shi nawa. Shika osha li sha faathana nopethimbo lyaJesus. Onkee okwa hulitha noohapu ndhika oombwanawa a ti: “Tate omuyuuki, uuyuni inau ku tseya, ihe ngame ondi ku shi, naamboka yandje oye shi shi kutya ongoye owa tuma ndje. Ongame onde ya tseyithile edhina lyoye notandi ka tsikila oku shi ninga, opo ohole ndjoka u hole ndje nayo yi kale muyo, nangame ndi kale muyo.” — Joh. 17:25, 26.

¹⁷ Opu na ngaa mbela gumwe ta vulu okutya Jesus ina katuka metsokumwe negalikano lye? E li Omutse gwegongalo, ota tsikile oku tu kwathela tu tseyithe edhina lyaHe nelalakano lye. Ano natu tsikile okukala tatu vulika kuukwamutse we mokuvulika nuulaadhi kelombwelo lye lyokuuvitha nokuninga aantu aalongwa. (Mat. 28:19, 20; Iil. 10:42) Natu longe wo nuudhiginini tu kaleke po uukumwe wetu wu na ondilo. Mokuninga iinima mbika, otatu ka katuka metsokumwe negalikano lyaJesus naashika otashi ka simanekitha edhina lyaJehova notatu ka kala nenyanyu sigo aluhe.