1, 2. (a) Oshike hashi vulu okunwetha mo shoka tu wete? (b) Otatu vulu okukala nuushili washike shi na ko nasha nUukwaniilwa waKalunga?

OTASHI vulika we shi mona kutya aluhe uuna aantu ya li poshiningwanima shontumba ohaya dhimbulukwa po iinima ya yoolokathana. Sha faathana, otashi vulika shi kale oshidhigu komuntu okudhimbulukwa kutya ndohotola okwe mu lombwele kutya oku na uupyakadhi washike. Nenge tashi vulika pu na omuntu ngoka ha mono nuudhigu iipatululo ye nenge omakende ge, nonando otashi vulika ge li owala puye. Oonkalo adhihe ndhika odha kwatela mo uuposi mboka wa popiwa kaakongi yomauyelele, ano okwaahamona sha, nenge okudhimbwadhimbwa, molwaashoka wi ipyakidhila nasha. Otaku tiwa kutya shika oshi li oshitopolwa shankene uuluyi wetu hawu longo.

² Aantu oyendji kunena oye na naanaa uuposi wa fa mboka uuna tashi ya piiningwanima yuuyuni. Otashi vulika ya zimine kutya uuyuni owa lunduluka noonkondo okuza mo 1914, ihe kaye wete eityo lyolela lyiiningwanima mbyoka. Tu li aakonakonimbiimbeli, otu shi shi kutya Uukwaniilwa waKalunga owa li we ya mo 1914 sho Jesus a li a langekwa e li Omukwaniilwa megulu. Ihe otu shi shi kutya omwa kwatelwa oshindji mokuyamukula egalikano “[Uukwaniilwa woye nawu ye, NW], Ehalo lyoye nali gwanithwe kombanda yevi wo ngaashi megulu.” (Mat. 6:10) Osha yela kutya, shoka osha kwatela mo  ehulilo lyonkalelo ndjika ya kolokosha. Ehalo lyaKalunga otali ka gwanithwa owala kombanda yevi ngaashi megulu uuna shoka sha ningwa.

3. Okukonakona Oohapu dhaKalunga ohaku tu etele uuwanawa washike?

³ Molwaashoka ohatu konakona Oohapu dhaKalunga pandjigilile, otu wete kutya omahunganeko otaga gwanithwa ngashingeyi. Inatu yooloka ko tuu kaantu muuyuni! Aantu oyi ipyakidhila unene noonkalamwenyo dhawo nonomalalakano gawo nohashi ya ningitha ya kale kaaye wete uunzapo wi iwetikile kutya Kristus okwa kala ta pangele okuza mo 1914 noku li popepi a tumwe kuKalunga a pangule uuyuni. Ihe dhiladhila kepulo ndika paumwene: Ngele onda kala tandi longele Kalunga uule woomvula omilongo, mbela ondi na ko ngaa nasha nethimbo ndyoka tu li mulyo ngaashi nda li oomvula dha ka pita? Nokuli nando opo nda ningi Onzapo, eitulomo lyandje onde li ukitha kushike? Kutya nduno eyamukulo lyoye olini, natu ka kundathaneni omatompelo gatatu ga simana kutya omolwashike tatu vulu okukala neinekelo kutya Omukwaniilwa ngoka a langekwa po kuKalunga masiku ota ka katuka oonkatu dha gwedhwa po, opo ehalo lyaHe li gwanithwe pakuudha kombanda yevi.

4, 5. (a) Jesus okwa kala ta ningi shike okuza mo 1914? (Tala kethano ndyoka li li petameko.) (b) Aakayili yuukambe yatatu otaya thaneke shike, nehunganeko ndyoka olya gwanithwa ngiini?

⁴ Jesus Kristus, ngoka ta thanekwa a kayila okakambe okatokele, okwa li a pewa oshishani she shomegulu mo 1914. Okwa yi nziya a ka hanagule po onkalelo yaSatana ya kolokosha. (Lesha Ehololo 6:1, 2.) Ehunganeko ndyoka li li mEhololo ontopolwa 6 olya gandja etompelo lyokukala twa tegelela kutya konima sho Uukwaniilwa waKalunga wa dhikwa po, oonkalo dhuuyuni odha li tadhi ka nayipala ngaashi iita, ondjala, omikithi nosho wo iiyetithi yeso yilwe. Iiningwanima mbika otayi thanekwa kaakayili yuukambe yatatu mboka ya landula Jesus Kristus. — Eh. 6:3-8.

⁵ Ngaashi sha hunganekwa, ‘evi alihe olya li lya homonenwa iita,’ nonando aantu otaya uvanekelathana okulongela kumwe nokukaleka po ombili muuyuni awuhe. Iita yoTango yUuyuni otayi vulu okutalika ko yi li owala etameko lyiita iinene, ngaashi owala shu ulikwa kiiningwanima yomuuyuni mbyoka opo ya ningwa. Kakele kehumokomeho enene miinima yopashimaliwa nosho wo yopaunongononi ndyoka lya kala nokuningwa okuza mo 1914, iikulya otayi tsikile okukala omukundu muuyuni. Natango, olye ta vulu okupatana kutya omikithi dhi ili nodhi ili, iiponga yopaunshitwe, ‘nomageelo galwe omadhigu’ otaga tsikile nokuhulitha po aantu omamiliyona omumvo kehe? Iiningwanima mbika oyi indjipala, ya nika oshiponga noonkondo nohayi dhipaga aantu oyendji shi vulithe nale mondjokonona. Mbela owu wete ngaa kutya shika osha hala okutya shike?

6. Oolye ya li ya ndhindhilike egwanitho lyomahunganeko gOmbiimbeli, naashika osha li she ya inyengitha ya ninge shike?

⁶ Aantu oyendji oya li ya piyaganekwa kIita yoTango yUuyuni mbyoka ya li ya tukuka nosho wo kegwililila lyaSpania. Ihe, Aakriste aagwayekwa oya kala ya tegelela nondjuulukwe omumvo 1914 moka ‘ethimbo lyAapagani’ lya li tali ka hula. (Luk. 21:24) Kaya li lela ye na uushili waashoka sha li tashi ka ningwa po. Ihe nando oongawo, oya li ye shi shi kutya omumvo 1914 ogwa li tagu ka kala omundhindhilikwedhi shi na ko nasha nepangelo lyaKalunga. Nziya sho ya dhimbulula kutya ehunganeko ndyoka lyOmbiimbeli olya gwanithwa, oya lombwele yalwe nuuladhi kutya elelo lyaKalunga olya tameka. Oonkambadhala dhawo dhokuuvitha Uukwaniilwa odha li dhe ya ningitha ya hepekwe noonkondo. Shoka osha li sha ningwa miigwana oyindji noshi li egwanitho lyomahunganeko. Moomvula omilongo dha ka landula ko, aatondi yUukwaniilwa oya li ya tokola ‘okupopila uukolokoshi.’ Oya li ya monitha aamwatate iihuna komalutu, ye ya tula moondholongo, noku ya dhipaga moku ya endjeleleka, ye ya yaha noku ya teta omitse. — Eps. 94:20; Eh. 12:15.

7. Omolwashike aantu oyendji inaaya dhimbulula kutya iiningwanima yomuuyuni otayi ti lela shike?

 ⁷ Nonando opu na uunzapo owundji kutya Uukwaniilwa waKalunga owa dhikwa po nale megulu, omolwashike oyendji ihaayi itaale eityo lyaashika? Omolwashike itaaya vulu okumona kutya iiningwanima yomuuyuni otayi gwanitha omahunganeko gOmbiimbeli naanaa ngaashi oshigwana shaKalunga sha kala noku shi popya muule woomvula odhindji? Mbela otashi vulika omolwaashoka oyendji otaya gandja owala eitulomo kwaashoka taya vulu okumona nomeho? (2 Kor. 5:7) Mbela okukala kwawo yi ipyakidhila niinima yopantu okwe ya tsikitha kaaya mone shoka Kalunga ta ningi? (Mat. 24:37-39) Mbela yamwe otaya piyaganekwa kiifundja yaSatana? (2 Kor. 4:4) Ohashi pula eitaalo netaloko lyopambepo, opo omuntu a dhimbulule shoka Uukwaniilwa waKalunga tawu gwanitha po. Inatu nyanyukwa tuu sho tu wete shoka tashi inyenge muuyuni!

8-10. (a) 2 Timoteus 3:1-5 ota gwanithwa ngiini kunena? (b) Omolwashike tatu vulu okutya uukolokoshi otawu tsikile nokunayipala?

⁸ Opu na etompelo etiyali kutya omolwashike tu shi shi kutya itapu ka kala ethimbo ele manga Uukwaniilwa waKalunga inaawu tula iinima ayihe kombanda yevi mepangelo lyawo: Uukolokoshi mboka wu li muuyuni otawu nayipala. Konyala uule woomvula ethele, oonkalo ndhoka dha hunganekwa mu 2 Timoteus 3:1-5 odha kala dhi iwetikile. Oonkalo ndhoka odhi ihanena nuuyuni awuhe, dha kala po ethimbo ele notadhi ningwa kepaya taku zi. Mbela ku wete kutya ehunganeko ndika oli li metifa lyokugwanithwa? Natu ka konakoneni iiholelwa yimwe mbyoka tayi yelitha nawa oshinima shika. — Lesha 2 Timoteus 3:1, 13.

⁹ Dhiladhila owala kekondjithathano ndyoka li li pwaashoka sha li tashi halukitha momimvo dho 1940 nasha nenge dho 1950 nasha naashoka hashi ningwa kunena miilonga, momainyanyudho, momaudhano nosho wo miinima yoshinanena. Elongithonkondo nosho wo onyata yiipala oyi li apuhe ngashingeyi. Aantu ohaya kala taya ningi omathigathano opo ya monike kutya oye na oonkondo ye vule yalwe, oye na eihumbato lya nyata nenge ye na onyanya ye vule yalwe. Momimvo dho 1950 nasha shoka sha li sha talika ko nale ko-TV kutya oshiwinayi, ngashingeyi osha talika ko kutya oshiwanawa komaukwanegumbo. Naantu  oyendji oye wete kutya omashenge otaga dhana onkandangala momainyanyudho nomomizalo dhoshinanena, taga humitha komeho onkalo yago mokati kaantu. Inatu nyanyukwa tuu sho tu shi etaloko lyaKalunga miinima mbika! — Lesha Judas 14, 15.

¹⁰ Nenge Omukriste ota vulu okudhiladhila kwaashoka sha li sha talika ko kutya oshi li uunashipotha kaagundjuka mo-1950 nasha mepingathano naashoka tashi ningwa kunena. Aavali oya li haya kala ye na omaipulo, noshi li mondjila okukala ngaaka, tayi ipula ngele oyana oya li taya hili omakaya, taya nu iikolitha nenge taya ndaanisa taya ndinyauka. Kunena oonkundana tadhi halukitha odhi li apuhe: Omunasikola gwoomvula 15 okwa li a yaha aanona yomongundu yawo e ta dhipaga 2, nokweehameka 13. Ongundu yaagundjuka ya kolwa, oya li ya dhipaga shinyanyalithi okakadhona koomvula omugoyi e taya dhenge he yako nomumwayinagona gwako. Aagundjuka yokoshilongo shimwe shi li muAsia otaku tiwa kutya oyo ya ninga etata lyomiyonena ndhoka dha ningwa moomvula omulongo dha ka pita. Mbela opu na ngaa omuntu ta vulu okutinda kutya iinima kunena otayi nayipala?

11. Omolwashike aantu oyendji ihaaya dhimbulula kutya iinima otayi nayipala?

¹¹ Omuyapostoli Petrus okwa popi sha yela a ti: “[Pomasiku gahugunina, NW] otaku ka holoka aantu mboka taa endithwa kuuhalu wawo. Oyo otaye ke mú fundjaleka taa ti: ‘Oye oku uvaneke tuu, ta ka galuka? Oku li peni? Ootate oya sa nale, ihe iinima ayihe oyi li, ngaashi ya kala shito okuza keshito.’” (2 Pet. 3:3, 4) Oshike tashi vulu okuyelitha kutya omolwashike aantu haya katuka momukalo nguka? Osha fa shi li ngeyi kutya shampa onkalo yi li apuhe, aantu oyendji ihaya kala ye na ko nasha nayo. Okwaahenomikalo hoka taku ende taku koko apuhe muyuuni otashi vulika kaa ku ku haluthe naanaa, ihe ngele owu uvu gumwe ngoka wu shi nawa a ninga oshinima oshitilithi otashi vulika wu haluke. Ihe nonando ongawo, okuhutuka pamikalo hoka taku ende taku humu komeho miigwana okwa nika oshiponga.

12, 13. (a) Omolwashike iiningwanima yomuuyuni kaayi na oku tu teya omukumo? (b) Ongele twa dhimbulula shike osho tashi ke tu kwathela tu idhidhimikile oonkalo “oondhigu okukaliwa mudho”?

¹² Omuyapostoli Paulus okwe tu londodha kutya “momasiku gahugunina,” (NW) oonkalo odha li tadhi ka kala “oondhigu okukaliwa mudho.” (2 Tim. 3:1) Ihe itadhi nyengana okuungaungiwa nadho, onkee ano katu na okwiipwililikila uushili mboka wu li po. Kekwatho lyaJehova, ombepo ye ondjapuki nosho wo egongalo lyopaKriste, otatu vulu okusinda uupyakadhi kehe nenge uumbanda kehe mboka tawu tu adha. Otatu vulu okukala aadhiginini. Kalunga oye he tu pe ‘oonkondo ndhoka kaadhi li mutse yene,’ ihe hatse yene. — 2 Kor. 4:7-10.

¹³ Oshi li nawa tu ndhindhilike kutya Paulus okwa li a tameke ehunganeko kombinga yomasiku gahugunina nuutumbulilo “dhimbulukwa aluhe kutya.” Oohapu ndhoka otadhi gandja eshilipaleko kutya shoka tashi landula ko itashi kala inaashi ningwa. Nopwahe na omalimbililo aantu mboka kaaye na etilokalunga otaya tsikile okunayipala sigo opethimbo mpoka Jehova ta ka ya mo olunyala e wu hulithe po. Aanandjokonona oya nyola kutya uuna omithikampango dhaashoka shi li mondjila nenge shoka sha puka dha tulwa pevi noonkondo, aantu yamwe nenge oshigwana ashihe ohashi gwile pevi. Omithikampango dhaashoka shi li mondjila naashoka sha puka inadhi gwa nando onale pevi ngaashi kunena muuyuni awuhe. Aantu oyendji ohayi ipwililikile egwanitho lyaashoka, ihe iiningwanima mbika okuza mo 1914 oyi na oku tu ulukila kutya otatu vulu okukala neinekelo kutya Uukwaniilwa waKalunga masiku otawu ka katuka onkatu.

14-16. Etompelo etitatu olini ndyoka tali tu kwathele tu itaale kutya Uukwaniilwa waKalunga otawu ‘ya’ masiku?

¹⁴ Opu na wo etompelo etitatu ndyoka tali tu pe einekelo. Shoka sha ningwa mokati koshigwana shaKalunga otashi ulike kutya ehulilo  oli li popepi. Pashiholelwa, manga Uukwaniilwa waKalunga inaawu dhikwa po megulu, opwa li pu na ongundu yaagwayekwa aadhiginini ndjoka ya li tayi longele Kalunga yi itula mo. Sho shoka ya li ya tegelela inaashi gwanithwa po mo 1914, oya li ya ningi po shike? Oyendji yomuyo oya li ya kakatele uudhiginini wawo sho ya li taya hepekwa noya li ya tsikile okulongela Jehova. Konyala aagwayekwa oyendji mboka ya li ko pethimbo mpono oya kala aadhiginini uule womimvo sigo ya mana oondjenda dhawo dhokombanda yevi.

¹⁵ Mehunganeko lye kombinga yehulilo lyonkalelo yiinima, Jesus okwa ti: “[Epipi ndika itali hulu po, NW], manga ayihe mbika inaayi gwanithwa.” (Lesha Mateus 24:33-35.) Otu uvite ko kutya sho Jesus a ti “epipi ndika,” okwa li ta popi koongundu mbali dhAakriste aagwayekwa. Ongundu yotango oondjoka ya li po mo 1914, noya li ya mono endhindhiliko lyokukala po kwaKristus momumvo ngoka. Mboka ye li mongundu ndjika kaya li owala ye li momwenyo mo 1914, ihe oya li ya gwayekwa nombepo ye li oyana yaKalunga momumvo ngoka nenge manga omumvo ngoka inaagu thika. — Rom. 8:14-17.

¹⁶ Ongundu ontiyali ndjoka ya kwatelwa ‘mepipi ndika’ aagwayekwa mboka ya li ya gwayekwa nombepo ondjapuki pethimbo mpoka iilyo yimwe yomongundu yotango ya li natango momwenyo kombanda yevi. Onkee ano, hakehe omugwayekwa kunena a kwatelwa mo ‘mepipi ndika’ ndyoka lya popiwa kuJesus. Kunena, mboka yomongundu ontiyali omimvo dhawo otadhi ende tadhi hedha ko. Nonando oongawo, Oohapu dhaJesus ndhoka dhi li muMateus 24:34 otadhi tu pe einekelo kutya ‘epipi limwe ndika itali hulu po’ manga inaali mona etameko lyuudhigu uunene. Shika oshi na oku tu ningitha wo tu kale tu wete lela kutya oku na owala ethimbo efupi manga Omukwaniilwa gwUukwaniilwa waKalunga inaa katuka onkatu a hanagule po aakolokoshi ye e ete uuyuni uupe moka tamu ka kala uuyuuki. — 2 Pet. 3:13.

17. Otatu vulu okuthika pehulithodhiladhilo lini sho twa kundathana omauyelele gatatu ngoka twa zi nokukonakona?

¹⁷ Otatu vulu okuthika pehulithodhiladhilo lini sho twa kundathana omauyelele gatatu ngoka twa zi nokukonakona? Jesus okwa li e tu londodha kutya katwa li tatu ka kala tu shi esiku lyokondandalunde nenge owili. (Mat. 24:36; 25:13) Ihe otatu vulu notu shi “ethimbo,” ngaashi Paulus e shi popi. (Lesha Aaroma 13:11.) Otu li pethimbo ndyoka, ano momasiku gahugunina. Ngele otwa kala hatu gandja eitulomo lela komahunganeko gOmbiimbeli nokwaashoka Jehova Kalunga naJesus Kristus taya ningi, otashi ka kala shili she tu yelela kutya otu li lela pehulilo lyonkalelo ndjika yiinima.

18. Mboka taya tindi okutaamba ko Uukwaniilwa waKalunga, oya tegelela oku ka ningilwa shike?

¹⁸ Mboka haya tindi okupangelwa kuJesus Kristus, Omulondi gwokakambe okatokele ngoka ta ka sindana, masiku otaya ka thiminikwa ya zimine epuko lyawo. Itaya ka mona mpoka taya ka hupila. Pethimbo mpoka, oyendji otaya ka lila ya tila, taya ti: “Olye ta vulu oku li keelela?” (Eh. 6:15-17) Ihe, ontopolwa ya landula ko yEhololo otayi gandja eyamukulo. Aagwayekwa nosho wo mboka ye na etegameno lyoku ka kala kombanda yevi otaya ka “thikama” shili mesiku ndyoka molwaashoka ya hokiwa kuKalunga. Opo nduno “ongundu onene,” yoonzi dhilwe otayi ka hupa puudhigu uunene. — Eh. 7:9, NW, 13-15.

19. Wu li gumwe ngoka e na einekelo kutya ehulilo oli li popepi, owa tegelela shike nondjuulukwe?

¹⁹ Ngele otwa kala tatu gandja eitulomo komahunganeko gOmbiimbeli ngoka taga gwanithwa pethimbo ndika lituntula, itatu ka piyaganekwa kiinima yomuuyuni waSatana. Tse itatu ka posipalekwa kaatu mone eityo lyolela lyiiningwanima yomuuyuni. Masiku Kristus ota ka sindana molugodhi ndwoka talu ka adha aakaanakalunga moku ka hinga iita yahugunina yopauyuuki. (Eh. 19:11, 19-21) Dhiladhila owala kutya otatu ka kala twa nyanyukwa shi thike peni konima yaashoka! — Eh. 20:1-3, 6; 21:3, 4.