1, 2. (a) Yelitha kutya omolwashike Moses a li a fa e li moshiponga. (Tala kethano ndyoka li li petameko.) (b) Omolwashike Moses a li inaa tila Farao?

FARAO okwa li omupangeli omukwanyanya, nAaegipiti oya li ye mu tala ko ongokalunga. Embo When Egypt Ruled the East olya ti kutya Aaegipiti oya li ye mu tala ko “e na uunongo noonkondo e vule iishitwa ayihe.” Farao okwa li ha zala oshikoloni shi na ethano lyefu lya tagananeka omutse lyi ilongekidha okukomona. Shika osha li tashi dhimbulukitha aatondi yaFarao kutya ote ya hanagula po mbala. Ipula owala nkene Moses a li u uvite sho Jehova a ti kuye: “Ngashingeyi otandi ku tumu komukwaniilwa gwaEgipiti, opo u tembudhe mo aantu yandje moshilongo she.” —  Eks. 3:10.

² Moses okwa yi kuEgipiti e ta lombwele Farao etumwalaka lyaKalunga ndyoka lya li lye mu geyitha. Konima yegeelo etimugoyi, Farao okwa ti kuMoses: “Inandi ku mona we! Esiku to shi ningi, oto si!” (Eks. 10:28) Moses manga inaa za po puFarao okwe mu lombwele kutya osheeli she otashi ka sa. (Eks. 11:4-8) Nena Moses okwa lombwele Aaisraeli ayehe ya dhipage onzigona nenge oshikombo nokugwayeka ombinzi yasho kiikulo nokiipamba yomiyelo dhawo. Onzi ondumentu oya li oshinamwenyo oshiyapuki koshikalunga shAaegipiti  shedhina Ra. (Eks. 12:5-7) Farao okwi inyenge ngiini? Moses ka li a tila Farao. Omolwashike? Omolweitaalo lye ndyoka lye mu vulikitha kuJehova, ‘noina tila ondjahi yomukwaniilwa. Moses okwa li e na omukumo ongaangoka a mono Kalunga, nando iha monika.’ —  Lesha Aahebeli 11:27, 28.

3. Otatu ka kundathana shike kombinga yeitaalo lyaMoses ‘muKalunga, ngoka ihaa monika’?

³ Mbela eitaalo lyoye olya kola ngaa ongaangoka e ‘wete Kalunga’? (Mat. 5:8) Natu kundathaneni kombinga yaMoses, opo omeho getu geitaalo ga kale ga tsa tu mone “Kalunga, nando iha monika.” Eitaalo lye muJehova olye mu kwathele ngiini kaa kale a tila aantu? Oku ulike ngiini kutya okwi inekela omauvaneko gaKalunga? Nokumona kwe “Kalunga, nando iha monika” okwe mu kwathele ngiini noshigwana she sho ya li moshiponga?

4. Pataloko lyopantu, Moses okwa li ngaa ta vulu okuyelekwa naFarao?

⁴ Pataloko lyopantu, Farao okwa li e vule Moses. Onkalamwenyo yaMoses, onkalonawa ye nonakuyiwa ye oya li ya fa yi li momake gaFarao. NaMoses ye mwene okwa li a pula Jehova a ti: “Ongame lye? Ote vulu ngiini okuya komukwaniilwa nokutembudha mo Aaisraeli muEgipiti?” (Eks. 3:11) Oomvula 40 dha piti, Moses okwa li a tauka mo muEgipiti. Otashi vulika a li ti ipula: ‘Mbela oshi li ngaa pandunge ndi shune kuEgipiti, shoka tashi vulika shi geyithe Omukwaniilwa?’

5, 6. Oshike sha li sha kwathele Moses a tile Jehova pehala lyokutila Farao?

⁵ Manga Moses inaa shuna kuEgipiti, Kalunga okwe mu longo ekotampango lya simana ndyoka konima Moses a ka nyola membo lyaJob, a ti: “Okutila Kalunga okwo uunongo.” (Job 28:28) Opo Jehova a kwathele Moses a kale e na etilo ndyoka noku katuke pandunge, okwe mu lombwele eyooloko pokati kaantu naKalunga Omunankondoawike. Okwe mu pula a ti: “Olye a shitile omuntu okana? Olye te mu ningi ombolo nenge omuthitawi? Olye te mu pe omeho nenge te mu tsikitha? Ongame OMUWA.” —  Eks. 4:11.

⁶ Oshiilongomwa osho kutya, Moses ka li e na okukala a tila. Oshoka okwa tumwa kuJehova ngoka a li ta vulu oku mu pa kehe shimwe a pumbwa, opo a gandje etumwalaka lye kuFarao. Oshikwawo, Farao ita vulu okuyelekwa naJehova. Nokuli shika kasha li oshikando shotango aapiya yaKalunga ya li muupyakadhi kohi yepangelo lyaEgipiti. Moses otapeya a li ta dhimbulukwa nkene Jehova a li e mu gamene naasho a gamene wo Abraham naJosef kaaleli yalwe yaEgipiti. (Gen. 12:17-19; 41:14, 39-41; Eks. 1:22–2:10) Molwashoka Moses okwa li i itaala muJehova, ‘Kalunga, ngoka ihaa monika,’ okwa yi kuFarao e te mu lombwele ashihe shoka Jehova a ti na popye.

7. Ongiini eitaalo muJehova lya gamene omwiitaali gumwe?

⁷ Eitaalo muJehova olya li wo lya gamene omumwameme Ella kaa tile aantu. Mo 1949, Ella okwa li a kwatwa po kaapolisi yomonanguwi moEstonia. Oye mu hula oonguwo dhe e taya kala ye mu tala. Okwa ti: “Onda li shili nda sa ohoni. Ihe konima sho nda galikana kuJehova onda li ndi na ombili yokomutima.” Konima Ella okwe edhililwa omasiku gatatu mokandunda okashona oye awike. Okwa hokolola ta ti: “Aapolisi oya li yi igidha taya ti: ‘Otatu ka shilipaleka kutya edhina Jehova itali ku uvikiwa mo we moEstonia! Ngoye oto falwa kokamba, omanga yakweni taya falwa koSiberia.’ Oya sheke ndje ya ti: ‘Jehova gweni oku li nduno peni?’” Mbela Ella okwa li a tila aantu nenge oJehova? Sho ta pulwapulwa kopolisi, okwa li a popi kee na uumbanda a ti: “Oshinima shika onde shi dhiladhila nale nawa nonda tokola kutya pehala lyokumangululwa e tandi teya po ekwatathano lyandje naKalunga nokukala inaandi hokiwa we kuye, oshihwepo ndi kale mondholongo ndi na natango ekwatathano ewanawa naKalunga.”  Ella okwa li e wete kutya Jehova omuntu gwolela ngaashi ashike aalumentu mboka ya li taye mu hepeke. Omolweitaalo lye lya kola, okwa kanyatele uudhiginini we.

8, 9. (a) Oshike hashi kwathele omuntu a kale inaa tila aantu? (b) Owu na okudhiladhila kombinga yalye, ngele owa kwatwa kuumbanda wokutila aantu?

⁸ Eitaalo otali ke ku kwathela wu sinde uumbanda. Ngele aapangeli oya kambadhala oku ku indika wu longele Kalunga wa manguluka, otashi vulika wu kale wu wete omwenyo gwoye, onkalonawa yoye nonakuyiwa yoye ya fa yi li momake gawo. Otashi vulika nokuli wu ipule ngele oshi li ngaa pandunge okutsikila nokulongela Jehova e to geyitha aapangeli. Dhimbulukwa kutya eitaalo olyo tali ke ku kwathela waa tile aantu. (Lesha Omayeletumbulo 29:25.) Jehova ota pula ta ti: “Otamu vulu ngiini okukala mwa tila omuntu omusi, omuna gwomuntu, ngoka a fa omwiidhi tagu ganya?” —  Jes. 51:12, 13.

⁹ Kala aluhe ho dhiladhila kombinga yaTate yetu Omunankondoawike. Oku wete noku uvitile ayehe mboka taya hepekwa kaaleli aakwanyanya uukwawo wanankali nohe ya kwathele. (Eks. 3:7-10) Nonando owu na okupopila eitaalo lyoye montaneho yaapangeli aanankondo, ‘ino kala wu na oshimpwiyu kutya oto ka popya shike, oshoka oto ka pewa pethimbo tuu ndyoka shoka wu na oku shi popya.’ (Mat. 10:18-20) Aapangeli yopantu itaya vulu nando okuyelekwa naJehova. Ngele owa koleke eitaalo lyoye ngashingeyi, oto ka mona kutya Jehova Omuntu gwolela ngoka a halelela oku ku kwathela.

10. (a) MuNisan 1513 K.E.N., Jehova okwa li a pe Aaisraeli omalombwelo geni? (b) Omolwashike Moses a li a vulika komalombwelo ngoka?

¹⁰ Momwedhi gwaNisan 1513 K.E.N., Jehova okwa lombwele Moses naAaron ya lombwele Aaisraeli oshinima oshikumithi. Okwe ya lombwele ya dhipage onzi nenge oshikombo oshilumentu shaa na oshipo, e taya gwayeke ombinzi yasho kiikulo yomiyelo dhawo. (Eks. 12:3-7) Moses okwa li e shi ningi? Omuyapostoli Paulus okwa ka nyola a ti: “Eitaalo olyo lya longitha Moses, opo a dhike Opaasa nokupopya kutya ombinzi oyi na okugwayekwa komiyelo dhomagumbo, opo omuyengeli gweso kaa vule okudhipaga po iisheeli yAaisraeli.” (Heb. 11:28) Moses okwa li e shi kutya Jehova oku shi okwiinekelwa nokwa li i itaala kutya Jehova ota ka dhipaga iisheeli ayihe yaEgipiti ngaashi u uvaneke.

11. Omolwashike Moses a londodha ooyakwawo?

¹¹ Oyanamati yaMoses oya adhika ye li natango kuMidian, kokule ‘nomuyengeli gweso.’ (Eks. 18:1-6) Ihe nonando ongawo, omolwohole yokuhola yalwe, Moses okwa londodha Aaisraeli ooyakwawo mboka iisheeli yawo ya li moshiponga. Ombiimbeli otayi ti: “Moses okwa hiya aawiliki ayehe yaIsraeli e ta ti kuyo: ‘Shaa ngoka gwomune oku na okuhogolola onzigona nenge oshikombo noku shi dhipaga, opo omagumbo geni ga dhane Opaasa.’” —  Eks. 12:21.

12. Etumwalaka lini lya simana Jehova a hala tu uvithe?

¹² Aapiya yaJehova otaya wilikwa kaayengeli yu uvithe etumwalaka lya simana, tali ti: “Tileni Kalunga, ne mu simaneke uunene we! Oshoka ethimbo lyokupangula aantu olya thikana. Galikaneni Kalunga, ngoka a shiti egulu, evi, efuta noothithiya dhomeya!” (Eh. 14:7) Ngashingeyi olyo ethimbo lyokuuvitha etumwalaka ndyoka. Otu na okulondodha yakwetu ya ze mo muBabiloni oshinene, opo ‘kaaya ihilile omageelo gasho!’ (Eh. 18:4) Aakriste aagwayekwa pamwe ‘noonzi dhilwe’ otaya indile ayehe mboka ye li kokule naKalunga ya ‘hanganithwe naye.’ —  Joh. 10:16; 2 Kor. 5:20.

13. Oshike tashi ka kokeka ehalo lyoye lyokuuvitha onkundana ombwanawa?

¹³ Otwi itaala kutya “ethimbo lyokupangula aantu” olya thikana. Otwi itaala wo kutya Jehova  ita shendjula sho ta ti iilonga yetu yokuuvitha noyokuninga aantu aalongwa oyi na okulongwa neendelelo. Omuyapostoli Johannes okwa li a mono memoniko “aayengeli yane ya thikama koombinga ne dhevi noya keelele oombepo dhokoombinga ndhoka ne.” (Eh. 7:1) Mbela owu wete ngaa nomeho goye geitaalo aayengeli mboka ye li pokweetha uudhigu uunene wu tameke kombanda yevi? Ngele owa kala wu ya wete nomeho goye geitaalo, oto ku uvitha onkundana ombwanawa nuulaadhi.

14. Oshike hashi tu inyengitha ‘tu londodhe omulunde i itedhulule noku ethe oondjila dhe oombwinayi’?

¹⁴ Aakriste yashili oye na nale ekwatathano lyopothingo naJehova noye na etegameno lyomwenyo gwaaluhe. Ihe otu shi kutya otu na oshinakugwanithwa ‘shokulondodha omulunde i itedhulule noku ethe oondjila dhe oombwinayi.’ (Lesha Hesekiel 3:17-19.) Ihatu uvitha owala molwashoka twa tila okukala nondjo yombinzi. Ihe ohatu shi ningi oshoka otu hole Jehova nayakwetu. Meyele lye lyOmusamaria omunamutimahenda, Jesus okwe tu yelithile nkene ohole nohenda yi na okuulikwa. Otatu vulu okwiipula kutya, ‘Mbela ohandi uvithile ngaa yalwe molwashoka ndi ya “uvitile olukeno” ngaashi Omusamaria?’ Inatu hala okukala ngaashi omuyambi nOmulevi gwomeyele lyaJesus ngoka ‘a tsu moluha.’ (Luk. 10:25-37) Eitaalo momauvaneko gaKalunga nohole yokuhola yakwetu otayi ke tu inyengitha tu uvithe twa mana mo manga ethimbo inaali pwa po.

15. Omolwashike Aaisraeli ya li ye wete ya kondekwa?

¹⁵ Eitaalo lyaMoses ‘muKalunga, ngoka ihaa monika,’ olye mu kwathele sho  Aaisraeli ya li muudhigu pethimbo taya zi muEgipiti. Ombiimbeli otayi ti: “Aaisraeli sho ya mono omukwaniilwa netangakwiita lye taye ya landula, oya haluka e taa kugile OMUWA ekwatho.” (Eks. 14:10-12) Mbela oshinima shino oya li ye shi tegelela? Eeno, oshoka Jehova okwa li a hunganeke a ti: “Otandi ka kukutika omwenyo gwe note ke mú landula, ihe esindano lyandje lyokusinda iita ye otali ka simanekitha ndje. Nena Aaegipiti otaya ka tseya kutya ongame OMUWA.” (Eks. 14:4) Ihe nando ongaaka, Aaisraeli oya li ye wete owala shoka omeho gawo gokomutse taga vulu okumona, ngaashi Efuta etiligane ndyoka lya li komeho gawo, omatembakwiita gaFarao haga endelele ngoka ga li konima yawo nomusita gwoonzi gwomimvo 80 ngoka te ya wilike. Oya li ye wete ya kondekwa.

16. Eitaalo olya kumike ngiini Moses pEfuta etiligane?

¹⁶ Ihe Moses ka li a tila. Omolwashike? Omolwashoka omeho ge geitaalo oge mu kwathele kaa kale owala e wete efuta nenge etangakwiita. Okwa li i inekela ‘mehupitho ndyoka OMUWA te ya hupitha nalyo’ nokwa li e shi shi kutya Jehova ota ka kondjela Aaisraeli. (Lesha Eksodus 14:13, 14.) Eitaalo lyaMoses olya li lya tsu oshigwana shaKalunga omukumo. Ombiimbeli otayi ti: “Eitaalo olyo lya kumike Aaisraeli, ya vule okutaaguluka Efuta etiligane ya fa taa ende puukukutu, Aayegipiti sho ya yelekele oku shi ninga, oya siikilwa komeya e taa si.” (Heb. 11:29) Okuza mpoka aantu “oya tila OMUWA; oyo noyi itaale OMUWA nomuntu gwe Moses.” —  Eks. 14:31.

17. Iinima yini tayi ka yeleka eitaalo lyetu monakuyiwa?

¹⁷ Masiku onkalamwenyo yetu otayi ka kala ya fa yi li moshiponga. Pehulilo lyuudhigu uunene, omapangelo guuyuni mbuka otaga ka adhika ga hanagula po thiluthilu omalongelokalunga omanene ge tu vule. (Eh. 17:16) Jehova okwa hunganeke kutya otatu ka kala twa fa ‘oshilongo sha weya, twa kala miilando yaa na eshigo lyedhingililokuma mo kamu na omiyelo nomakumba.’ (Hes. 38:10-12, 14-16) Pataloko lyopantu otashi vulika tu monike twa fa itaatu ka hupa. Mbela oto ki inyenga ngiini?

18. Yelitha kutya omolwashike kaatu na okukala twa tila uudhigu uunene.

¹⁸ Inatu pumbwa okukala twa tila. Omolwashike? Omolwashoka Jehova okwa hunganeke kutya oshigwana she otashi ka ponokelwa. Okwa hunganeke wo kutya oshizemo otashi ka kala shini. “OMUWA Omupangeliawike ota ti: ‘Mesiku ndyoka Gog ta homona Israeli, ondjahi yandje otayi tukuluka. Otandi [ka popya] muupyundjahi wandje.’” (Hes. 38:18-23) Jehova ota ka hanagula po ayehe mboka ya hala okuhanagula po oshigwana she. Ngele owu na eitaalo kutya Jehova ote ke ku gamena ‘mesiku lye enene netilithi,’ otashi ke ku kwathela wu ‘mone ehupitho ndyoka OMUWA te ku hupitha nalyo,’ nowu kanyatele uudhiginini woye. —  Joel 2:31, 32.

19. (a) Ekwatathano lyaMoses naJehova olya li lya kola shi thike peni? (b) Oto ka mona omalaleko nuuyamba geni ngele owa kala wu shi Jehova moondjila dhoye adhihe?

¹⁹ Opo wu ilongekidhile iiningwanima mbyoka, owu na okukala wu na “omukumo ongaangoka a mono Kalunga, nando iha monika.” Kala ho konakona nokugalikana pandjigilile, opo wu koleke uukuume woye naJehova Kalunga. Moses okwa li e na ekwatathano lyopothingo naJehova nokwa longithwa kuye a ninge iinima iinene. Nomolwashono Ombiimbeli tayi ti kutya Jehova okwa popi naMoses “oshipala noshipala.” (Deut. 34:10) Moses ita yelekwa naapolofeti yalwe. Ihe nangoye oto vulu okutseya Jehova ngaashi wu shi omuntu ngoka ho mono kolutu. Oohapu dhaKalunga otadhi ti kutya ngele owa kala ho mu dhiladhila “moondjila dhoye adhihe, nena oondjila dhoye ote dhi yelekanitha.” —  Omayel. 3:6.