1, 2. Omolwashike Paulus a li u uvitile mboka aankundi olukeno?

OMATHIMBO GAMWE atuheni ohatu iyadha twa nkundipala. Otashi vulika tu kwatwe kekunku nenge kuuvu wulwe mboka tawu vulu oku tu nkundipaleka e tatu kala itaatu vulu okulonga oshindji. Ihe dhiladhila ando wa tyololoka uule woomwedhi. Ito ka pandula ngaa yalwe ngele oyu ungaunga nangoye nolukeno?       

² Omuyapostoli Paulus okwa li e shi nkene omuntu ha kala u uvite ngele a nkundipala uuna a gwililwa po kiimpwiyu omolwiinima mbyoka tayi ningwa pondje nosho wo megongalo. Nokuli pomathimbo gamwe, okwa kala e wete itaa vulu we. (2 Kor. 1:8; 7:5) Sho Paulus a tala kuupyakadhi mboka a tsakaneka monkalamwenyo ye e li Omukriste omudhiginini, okwa pula a ti: “Olye ngoka omunkundi, ngame ndaa kale ando omunkundi pamwe naye?” (2 Kor. 11:29) Paulus okwa faathanitha iilyo yolutu niilyo yegongalo lyopaKriste, ta ti kutya “mbyoka tatu yi tala ya fa iinkundi, olutu olwe yi pumbwa unene.” (1 Kor. 12:22) Okwa li a hala okutya shike? Omolwashike tu na okutala ko mboka ya fa  aankundi ngaashi Jehova he ya tala ko? Notatu ka likola uuwanawa wuni ngele otwe shi ningi?

3. Oshike tashi vulu okunwetha mo etaloko lyetu li nasha niilyo yegongalo mbyoka ya pumbwa ekwatho?

³ Otu li muuyuni moka aantu yi itaala kutya, opo wu pondole owu na okukala wa nyashuka nowa ndjanga. Oyendji ohaya lalakanene esimano kutya nduno otashi pula shike, nolundji ohaya thindile aankundi kongudhi. Ihatu kala twa hokwa omikalo dha tya ngaaka, ihe mokwaashi sha, natse otapeya tu tameke okukala twa dhina mboka ya pumbwa ekwatho, nokuli niilyo yegongalo. Ashike otatu vulu wo oku ya tala ko ngaashi Kalunga he ya tala ko.

4, 5. (a) Oshiholelwa shoka shi li 1 Aakorinto 12:21-23 otashi tu kwathele ngiini tu uve ko nkene Jehova a tala ko aankundi? (b) Uuwanawa wuni tatu ka mona ngele otwa kwatha aankundi?

⁴ Moshiholelwa shi li montumwafo yotango yaPaulus ndjoka a nyolele Aakorinto, otatu vulu okwiilonga mo oshindji nkene Jehova a tala ko aankundi. Montopolwa 12, Paulus okwa ti kutya oshilyo kehe sholutu, kutya nduno oshiwinayi kiikwawo nenge oshinkundi, oshi na oshilonga. (Lesha 1 Aakorinto 12:12, 18, 21-23.) Aantu mboka yi itaala moevolusi oya kala nokupataneka oshinima shika. Ashike shoka sha monika momakonakono golutu lwomuntu, osha holola kutya kehe okantimbu molutu hoka ka fa inaa ka simana, ohaka dhana onkandangala ya simanenena. * Pashiholelwa, yamwe ohaya ti kutya okanwe okashona kokompadhi kake na oshilonga sha sha; ihe osha dhimbululwa mo ngashingeyi kutya okanwe hoka ohaka kwathele omuntu ki ihate po.

⁵ Oshiholelwa shoka Paulus a gandja otashi holola kutya iilyo ayihe yegongalo lyopaKriste oya simana. Satana oha ningitha aantu ya kale ye wete inaaya simana, ihe Jehova oku wete aapiya ye ayehe ‘ya pumbiwa unene,’ mwa kwatelwa naamboka ya fa aankundi. (Job 4:18, 19) Shoka ohashi tu kwathele tu kale tu wete kutya otu na oshilonga momagongalo getu nomokati koshigwana shaKalunga. Pashiholelwa, otashi vulika to dhimbulukwa oshikando shimwe wa kwatele omwiitaali omukokele keti. Otapeya shika she ku pula we ende kashona. Mbela ndyoka kalya li ekwatho lya simana ndyoka lye ku uvitha wo nawa? Eeno, oshoka uuna tatu kwathele yalwe, ohatu kala twa nyanyukwa, ohatu ilongo okwiidhidhimika, ohole yetu ohayi kolo nohatu koko pambepo. (Ef. 4:15, 16) Tate yetu oku shi shi kutya egongalo ohali kala li na ohole nondjele, ngele iilyo ayihe oya simanekathana, nonando yimwe oyi na omangambeko.

6. Paulus okwa li ta ti shike sho a popi “uunkundi” nosho wo “mboka ya kola meitaalo”?

⁶ Sho Paulus a nyolele Aakorinto, okwa longitha oshitya “aankundi” nosho wo “uunkundi” u ulike nkene mboka kaaye shi ooitaali ya li ya tala ko Aakriste yomethelemumvo lyotango nankene a li i iyuvitile. (1 Kor. 1:26, 27; 2:3) Ihe Paulus sho a popi kombinga yaamboka ‘ya kola meitaalo,’ kali a hala Aakriste yamwe ya kale yu uvite ye vule yakwawo. (Rom. 15:1) Pehala lyaashono, okwa li ta lombwele Aakriste mboka ya kola yi idhidhimikile mboka ya li inaaya kola natango moshili.

7. Oshike hashi vulu oku tu imba tu kwathele mboka ya pumbwa ekwatho?

⁷ Uuna tatu kwathele ‘oohepele,’ itatu holele owala Jehova, ihe otatu ka kala wo twa  hokiwa kuye. (Eps. 41:1; Ef. 5:1) Ihe omathimbo gamwe, okukala twa tala ko nayi mboka ya pumbwa ekwatho, ohaku tu imbi oku ya kwathela. Nenge molwashoka katu shi kutya natu tye shike, otashi vulika tu se ohoni e tatu kala inaatu kwathela ngoka e li muudhigu. Cynthia, *omumwameme ngoka e ethiwa komusamane gwe okwa ti: “Ngele aamwatate itaye ku kwathele nenge itaye ku ningile ngaashi wa tegelela, ohashi ehameke. Uuna wu li muudhigu, owa pumbwa aantu pungoye.” Omukwaniilwa David oku shi nkene omuntu ho kala wu uvite uuna kaapu na ngoka e na ko nasha nangoye. —  Eps. 31:12.        

8. Oshike tashi ke tu kwathela tu kale tu na olukeno?

⁸ Otatu ka kala tu na olukeno ngele otwa dhimbulukwa kutya aamwatate oya nkundipalekwa kuupyakadhi wontumba, ano tashi vulika kaaye na uukolele, ya polimana nenge haya kala naanegumbo mboka kaaye li moshili. Otashi vulika esiku limwe natse tu kale monkalo ya fa ndjoka. Manga Aaisraeli, mboka ya li oohepele naankundi muEgipiti inaaya ya mEvi lyEuvaneko, oya dhimbulukithwa kutya kaye na ‘okukukutikila aamwayina aathigona oomwenyo dhawo.’ Jehova okwa li a tegelela ya kwathele oohepele. —  Deut. 15:7, 11; Lev. 25:35-38.

9. Oshike tu na okuninga tango uuna tatu kwathele mboka ye li muupyakadhi? Gandja oshiholelwa.

⁹ Otu na okukwathela aamwameme pambepo mboka ye li moonkalo oondhigu, pehala lyoku ya pa uusama nenge lyokukala twe ya limbililwa. (Job 33:6, 7; Mat. 7:1) Pashiholelwa, ngele omuhingi okwa mono oshiponga e ta falwa koshipangelo, mbela aapangi ohaye mu pula ngele oye e etitha oshiponga? Aawe, ohaye mu panga nziya. Sha faathana, uuna omwiitaali omukwetu a nkundipalekwa kuupyakadhi wontumba, shoka tu na okuninga tango, oku mu kwathela pambepo. —  Lesha 1 Aatessalonika 5:14.

10. Ongiini yamwe mboka ya fa aankundi, ‘aayamba meitaalo’?

¹⁰ Ngele otwa dhiladhila nawa koonkalo dhaamwameme, otashi ke tu kwathela tu tale ko uunkundi wawo momukalo omuwanawa. Dhiladhila kaamwameme aakiintu mboka yi idhidhimikile okupatanekwa kuyaandjawo uule woomvula. Yamwe otashi vulika ya monike ya fa aankundi, ihe oye na eitaalo lya kola. Oho kala wu uvite ngiini, shampa wa mono omuvali he ya oye awike noyana kokugongala ethimbo alihe? Nenge aagundjuka mboka ya dhamenena moshili, nando ohaya thiminikwa kuyalwe kosikola? Ayehe mboka ya fa aankundi, ‘aayamba meitaalo’ ngaashi naanaa yalwe mboka ye li moonkalo oombwanawa. —  Jak. 2:5.

11, 12. (a) Oshike tashi ke tu kwathela tu lundulule omadhiladhilo getu kombinga yaamboka ya nkundipala? (b) Otwi ilongo shike momukalo moka Jehova u ungaunga naAaron?

¹¹ Okutala kunkene Jehova u ungaunga naapiya ye yamwe, otashi ke tu kwathela tu uve ko nkene a tala ko mboka ya fa ya nkundipala. (Lesha Episalomi 130:3.) Natu tye ando owa li pamwe naMoses sho Aaron ti ipopile kutya omolwashike a ningi oshiyelekela shontana yoshingoli, mbela ando Aaron owe mu tala ko ngiini? (Eks. 32:21-24) Nenge ando owa kala wa tala ko ngiini Aaron sho a nwethwa mo komumwayina, Mirjam, a pe Moses uusama sho a hokana omukiintu omukwiilongo? (Num. 12:1, 2) Mbela ando owi inyenge ngiini sho Aaron naMoses inaaya simaneka Jehova, sho E ya pe omeya pashikumithalonga puMeriba? —  Num. 20:10-13.

¹² Iikando ayihe mbyoka, Jehova okwa li ta vulu okugeela Aaron moompadhi oontalala.  Ihe okwa mono kutya Aaron ke shi omukolokoshi. Aaron otapeya a ningi omapuko ngoka molwaashoka okwe etha oonkalo nenwethomo kuyalwe li mu pugumithe mo mondjila yu uka. Ihe okwa li a zimine omapuko ge nokwa taamba ko epukululo ndyoka a pewa kuJehova. (Eks. 32:26; Num. 12:11; 20:23-27) Jehova okwa mono kutya Aaron oku na eitaalo nokwi iyela ombedhi. Konima yomathelemimvo, Aaron noluvalo lwe oya dhimbulukiwa natango kutya oya li aatilikalunga. —  Eps. 115:10-12; 135:19, 20.

13. Ongiini tatu vulu okulundulula omukalo moka hatu dhiladhila? Gandja oshiholelwa.

¹³ Opo tu kale hatu dhiladhila ngaashi Jehova, otu na okukonakona nkene hatu tala ko mboka taya monika ya fa ya nkundipala. (1 Sam. 16:7) Pashiholelwa, ohatu inyenge ngiini uuna omugundjuka gwoomvula omulongo nasha itaa hogolola noondunge omainyanyudho nenge omuhasha? Pehala lyoku mu pa unene uusama, omolwashike itaatu mu kwathele a koke pambepo? Otatu vulu okukatuka tango tu ya kwathe, nuuna tatu shi ningi, otatu ke yi idhidhimikila nohole yetu yoku ya hola otayi ki indjipala.

14, 15. (a) Jehova okwa li u uvite ngiini sho Elia a li a teka omukumo? (b) Oshike tatu vulu okwiilonga kunkene Jehova u ungaunga naElia?

¹⁴ Otatu kwathelwa wo tu mbwalangandjeke etaloko lyetu lyokutala ko yalwe mokuyelekanitha okudhiladhila kwetu nankene Jehova a li i inyenge sho tu ungaunga naapiya ye yamwe mboka ya li ya polimana. Elia ogumwe gwomuyo. Nonando Elia okwa li a dhipaga aapolofeti 450 yaBaal, sho a kundana kutya omukwaniilwakiintu Isebel okwa hala oku mu dhipagitha, okwa yi ondapo. Okwe ende ookilometa 150 lwaampoka u uka kuBeersheba nokwa yi mokati kombuga. Molwashoka okwa li a vulwa noonkondo omolwomutenya, okwa gondjo momuzile gwoshingondjo  nokwa li “a hala a se.” —  1 Aak. 18:19; 19:1-4.

¹⁵ Jehova okwa li u uvite ngiini sho a mono omupolofeti gwe omudhiginini i ihupula? Sho a polimana nokee na we omukumo, mbela Jehova okwe mu ekelehi? Aawe. Jehova okwa mono kutya Elia okwa nkundipala e ta tumu omuyengeli e mu kwathe. Omuyengeli okwe mu ladhipike lwaali a lye, opo ‘ondjila yaahe mu vule oonkondo.’ (Lesha 1 Aakwaniilwa 19:5-8.) Nokuli nomanga Jehova inaa pa Elia omalombwelo, Jehova okwa kala ha pulakene kuye noku mu kwathela.         

16, 17. Ongiini tatu vulu okukwathela aamwameme ngaashi Jehova he shi ningi?

¹⁶ Ongiini tatu vulu okuholela Kalunga ketu omunahole? Katu na okweendelela okugandja omayele. (Omayel. 18:13) Otashi ka kala shi li nawa okuulukila tango olukeno mboka ye wete “ya fa yaa na esimano” molwonkalo moka ye li. (1 Kor. 12:23) Opo nduno otatu ka kala tu shi kutya oya pumbwa naanaa shike notatu ka vula oku ya kwathela.       

¹⁷ Pashiholelwa, dhiladhila kuCynthia ngoka a popiwa metetekelo, ngoka a thigilwa oyanakadhona yaali sho omusamane gwe e mu etha po. Ye noyana oya li ye wete kaaye niwe nayo. Mbela aamwameme yamwe megongalo oyi inyenge ngiini? Cynthia ota ti: “Sho twe ya lombwele mongodhi shoka sha ningwa po, meni lyominute 45 oye ya kaandjetu. Oya li taya lili. Uule womasiku agehe gaali nenge gatatu lwaampono inaye tu etha. Molwashoka katwa li tu na ehalo lyokulya notwa li twa yemata noonkondo, oye tu edhilile momagumbo gawo uule wokathimbo.” Shika otashi tu dhimbulukitha shoka sha nyolwa kuJakob a ti: “Natu tye, oku na ooitaali ooyakweni aalumentu nenge aakiintu ye na onkayi nondjala. Ngele to ya lombwele to ti: ‘Indii po nawa. Ki isiikileni e tamu li nawa,’ otashi kwatha shike, ngele inamu ya pa shoka ye shi pumbwa? Ano neitaalo osho li li: ngele eitaalo [olyowala,] lyaa na iilonga, nena eitaalo lya tya ngaaka olya sa.” (Jak. 2:15-17) Ekwatho ndyoka aamwameme ya gandja kuCynthia nokoyanakadhona olye ya kumike e taya kutha uukwathelikokolindjila konima owala yoomwedhi hamano. —  2 Kor. 12:10.

18, 19. (a) Otatu ka kwathela ngiini mboka ya nkundipala pakathimbo? (b) Oolye haya mono uuwanawa sho tatu kwathele mboka ya nkundipala?

¹⁸ Otashi vulika wu shi shi nawa kutya ohashi pula ethimbo, opo wu aluke kuuvu wontumba. Sha faathana, Omukriste ngoka a nkundipalekwa kuudhigu wontumba nenge kusha shilwe, otashi vulika a pumbwa ethimbo, opo a yambuke po ishewe pambepo. Osha yela kutya omwiitaali omukwetu oku na okukonakona paumwene, okugalikana nokwiipyakidhila niinima yopambepo, opo a koleke eitaalo lye. Ihe mbela otatu ke mu idhidhimikila ngaa sigo oompoka? Mbela otatu ke mu ulukila ohole sho ta yambuka po? Mbela otatu ka ninga oonkambadhala tu kwathele mboka ya nkundipala pokathimbo, ya kale yu uvite kutya oya simana notu ya hole? —  2 Kor. 8:8.

¹⁹ Sho tatu ambidhidha aamwameme, otatu ka kala twa nyanyukwa. Ohatu ilongo wo okukala tu uvitile yalwe olukeno nokukala neidhidhimiko. Hatse owala hatu mono uuwanawa. Egongalo alihe otali ka kala lyu udha ohole. Sha simanenena, otatu holele Jehova ngoka kehe gumwe e na ondilo momeho ge. Eeno, atuheni natu vulikeni kelombwelo ndika tali ti: ‘Kwatheni aankundi.’ —  Iil. 20:35.