ESIKU limwe aakuluntugongalo yaali oya li ya pula omumwatate Fernando * ya ka popye po. Sho e shi uvu okwa li a tila noonkondo. Konima yetalelopo kehe lyomutonatelishikandjo, aakuluntugongalo oya kala noku mu yelithila shoka e na okuninga, opo a kale a gwana okupewa iinakugwanithwa yilwe megongalo. Fernando okwa kala hi ipula olundji ngele opu na ngaa siku a ka langekwe po e li omukuluntugongalo. Omutonatelishikandjo opo owala a adhika a talele po egongalo lyawo. Mbela aakuluntugongalo otaye ke mu lombwela shike?

Fernando okwa li a shoka okutsi sho aakuluntugongalo taya popi naye. Omumwatate okwa tumbula oohapu ndhoka dhi li muTimoteus gwotango 3:1 e ta tsikile ko ta ti kutya egongalo olya yakula ontumwafo ndjoka tayi ti kutya okwa langekwa po e li omukuluntugongalo. Sho Fernando e shi uvu okwa li a kumwa e ta pula omumwatate ta ti: “Shike?” Omumwatate okwe endulula shoka a popi, na Fernando okwa tameke okwiimemeha. Ayehe megongalo oya li wo tayi imemeha sho etseyitho lya ningwa.

Mbela osha puka okukala wa hala iinakugwanithwa megongalo? Hasho nando. Timoteus gwotango 3:1 otayi ti: “Omulumentu ngoka a hala okuninga omuwiliki gwegongalo lyaKalunga, oye okwa hala oshilonga oshiwanawalela.” Aamwatate oyendji ohaya tula miilonga ekumagidho ndyoka. Ohaya humu komeho pambepo, nokupewa iinakugwanithwa megongalo. Oshizemo, aakuluntugongalo naayakuligongalo omayovi ya pyokoka ohaya langekwa po ya kwatele komeho oshigwana shaKalunga. Ihe molwaashoka omagongalo otagi indjipala noonkondo, aamwatate otaya ladhipikwa ya kale ya hala okuninga aayakuligongalo naakuluntugongalo. Ihe mbela omukalo omwaanawa gwoku shi ninga oguni? Mboka ya hala okulangekwa po, mbela oya pumbwa okulala ondangala, ngaashi Fernando?

Uutumbulilo “ehalo lyokuninga” mboka wa longithwa mOmbiimbeli, owa tolokwa okuza koshityalonga shOshigreka shoka tashi gandja eityo lyokukala wa halelela oshinima nenge lyokwiiyeka wu shi adhe. Edhiladhilo ndyoka otali gandja eityo lyomuntu ngoka  ta laalele oshiyimati oshiwanawa komuti, opo e shi toonone ko. Ihe katu na okukokeka unene ehalo lya puka lyokuninga ‘aawiliki’ megongalo. Omolwashike mbela? Omolwashoka mboka ya hala uuthembahenda wokukala aakuluntugongalo oya “hala oshilonga oshiwanawalela,” handondo.

Opo omuntu a pewe oshilonga oshiwanawalela, oku na okugwanitha po iitegelelwa mbyoka yi li muTimoteus gwotango 3:2-7 nosho wo Titus 1:5-9. Omumwatate Raymond ngoka a kala omukuluntugongalo ethimbo ele, okwa popi kombinga yiitegelelwa mbyoka a ti: “Kungame, uukwatya womuntu owo unene wu na oshilonga. Okupopya naantu noku ya longa osha simana, ihe iinima mbyoka oyi na okweendela pamwe nuukwatya ngaashi okukala twaa na oshipo, eidhiliko, okwiikwata nawa, elandulathano, okuyakula aayenda nosho wo ondjele.”

Omumwatate ngoka e na lela ehalo lyokuninga omutonateli, ohu ulike kutya ke na nando oshipo shasha, ngele oha kukuma iineya yoludhi kehe nosho wo omikalo dha nyata. Oku na okukala e na eidhiliko, hi ikwata nawa, e na elandulathano nosho wo ondjele. Aamwahe oye na okukala yi inekela kutya ota vulu oku ya kwatela komeho noku ya kwathela nomaupyakadhi gawo. Ota ka kala onzo yeladhipiko kaagundjuka nokwaamboka opo ye ya mo moshili, ngele oha yakula aayenda. Molwaashoka oku hole okulonga uuwanawa, ota ka hekeleka nokwaambidhidha aakokele naamboka taya ehama. Oha kokeke omaukwatya ngaka, opo a kwathele yalwe. Ihe ihe shi ningi owala sho a hala a langekwe po. *

Aakuluntugongalo otaya vulu okupa omumwatate ngoka a hala okuninga omutonateli omayele nosho wo eladhipiko. Ihe opo a kale a gwana, oku na okugwanithwa po iitegelelwa yopamanyolo. Henry, omukuluntugongalo ngoka e na owino okwa ti: “Ngele owa hala okuninga [omutonateli], longa nuudhiginini wu ulike kutya owa gwana.” Konima sho a tumbula Omuuvithi 9:10, okwa yelitha ta ti: “‘Longa ashihe to vulu niikaha yoye, shi longa noonkondo dhoye.’ Oshilonga kehe shoka aakuluntugongalo taye ku pe shi longa nawalela. Kala wu hole iilonga ayihe mbyoka wa pewa megongalo, mwa kwatelwa okukomba. Mokweendela ko kwethimbo, ayehe otaya ka ndhindhilika iilonga yoye  noonkambadhala ndhoka to ningi.” Ngele owa hala okuninga omukuluntugongalo sikulimwe, kala ho longo nuudhiginini nowu li omwiinekelwa miilonga iiyapuki ayihe. Onkalamwenyo yoye ayihe nayi kale tayi pangelwa keifupipiko, ihe hakuuntsa. —  Mat. 23:8-12.

Mboka ya hala iinakugwanithwa megongalo otashi vulika ya kambadhale okunwetha mo aakuluntugongalo ye ya langeke po. Yamwe ngele taya pewa omayele kaakuluntugongalo ohaya kala yu uvite nayi. Aantu mboka onawa yi ipule taya ti: ‘Mbela otandi lalakanene uuwanawa wandje mwene, nenge onda hala ngaa okusila oshimpwiyu oonzi dhaJehova neifupipiko?’

Mboka ya hala okuninga aakuluntugongalo, naya kale ye “shi kuholelwa kegongalo.” Shoka oshimwe shomiitegelelwa ya simana. (1 Pet. 5:1-3) Ngoka e shi kuholelwa kegongalo oku na okukala omunashili, ha longo shoka shu uka nomwiidhidhimiki, kutya nduno okwa langekwa po nenge hasho. Ngele omuntu okwa langekwa po e li omukuluntugongalo itashi ti kutya okwa gwanenena. (Num. 12:3; Eps. 106:32, 33) Otashi vulika omumwatate ye mwene a kale e na “eiyuvo lya yela,” ihe yalwe otashi vulika ya kale ye wete inaa gwana okulangekwa po manga. (1 Kor. 4:4) Onkee ano, ngele to pewa omayele gopaMbiimbeli kaakuluntugongalo, pulakena nawa. Pehala lyokukala wu wete taye ku ningile nayi, tula oohapu dhawo dhopahole miilonga.     

Aamwatate oyendji ohaya kala ye wete ya tegelela ethimbo ele unene ya langekwe po. Ngele owa kala omimvo odhindji wa “hala okuninga omuwiliki,” ihe ino langekwa po sigo onena, mbela ohashi ku imbi oomposi? Ngele osho, tala koohapu ndhika dha nwethwa mo sho tadhi ti: “Etegelelo lyethimbo eleeleka ohali gombokitha omwenyo, ihe ondjuulukwe ya gwanithwa oyo omuti gwomwenyo.” —  Omayel. 13:12.

Omuntu oha kala nomutima gwa ziyalala, ngele elalakano lye inali gwanithwa po. Tatekulululwa Abraham naye osho a li u uvite ngawo. Jehova okwa li e mu uvanekele kutya ota ka vala okanona kokamati. Ihe yo naSara oya kala kaaye na oluvalo omimvo odhindji. (Gen. 12:1-3, 7) Sho e li mepipi lyuukokele, Abraham okwa pula a ti: “Omuwa Omupangeliawike, uuwanawa owashike to u ningile ndje, oshoka kandi na aanona  . . . Ino pa ndje aanona.” Ihe Jehova okwa li a shilipalekele Abraham kutya ota ka vala okanona kokamati. Nonando ongawo, opwa li pwa piti omimvo dhi vulithe 14, opo euvaneko lyaKalunga li gwanithwe. —  Gen. 15:2-4; 16:16; 21:5.

Mbela sho Abraham a kala a tegelela, okwa li a kanitha enyanyu lye mokulongela Jehova? Aawe. Okwa kala nokuli a tegelela nondjuulukwe, e na uushili kutya euvaneko lyaKalunga otali ka gwanithwa. Omuyapostoli Paulus okwa nyola a ti: “Abraham okwi idhidhimike e ta pewa shoka Kalunga e mu uvanekela.” (Heb. 6:15) Abraham okwa lalekwa nuuyamba shi vulithe pwaashoka a li a tegelela. Oshike tatu ilongo moshiholelwa she?

Ngele owa hala okuninga omukuluntugongalo, tsikila okukala wi inekela muJehova, nonando opu pite omimvo odhindji inoo langekwa po. Ino kanitha enyanyu lyoye sho to longele Jehova. Omumwatate Warren ngoka a kwathela aantu oyendji ya hume komeho  pambepo, okwa yelitha a ti: “Ohapu piti ethimbo nuule, opo gumwe a kale a gwana okulangekwa po. Muule wethimbo iikala ye nosho wo nkene hu ungaunga niinakugwanithwa ye, oyo tayi ka holola kashona nakashona uunkulungu we neihumbato lye. Yamwe oye wete kutya ngele oya pewa oshinakugwanithwa shontumba, opo owala ya pondola. Edhiladhilo lya tya ngawo olya puka. Otali vulu okuningitha omuntu a kale ti ipula unene. Ngele oto longele Jehova nuudhiginini, oto ka pondola kehe mpoka wu li, nomukehe shoka to ningi.”

Omumwatate gumwe okwa kala a tegelela omimvo dha konda po 10, opo a langekwe po e li omukuluntugongalo. Okwa popi ehokololo lya tseyika nawa ndyoka li li montopolwa yo 1 yembo lyaHesekiel. Okwa ti: “Jehova oha hingi etemba lye, nenge ehangano lye, kondapo ndjoka a hala. Ethimbo ndyoka li na oshilonga halyetu, ihe olyaJehova. Onkee ano, ngele tashi ya pokulangekwa po ndi li omukuluntugongalo, ihashi ningwa molwaashoka nda hala. Otashi vulika shoka nda hala, Jehova e shi kutya hasho nda pumbwa.”

Ngele owa hala okuninga omuwiliki megongalo sikulimwe, owa hala oshilonga oshiwanawa. Ihe opo wu shi mone, kala aluhe nokuhumitha komeho ombili megongalo. Ngele owu wete ethimbo lya kala ko, kokeka eidhidhimiko ngoye ino vulwa okutegelela. Omumwatate Raymond ngoka a tumbulwa metetekelo okwa ti: “Uuntsa ohawu tetekele epunduko. Mboka haya kala aluhe ye na oshimpwiyu sha pitilila, ohaya hunutha enyanyu ndyoka hali zi mokulongela Jehova.” Kokeka iiyimati yombepo yaKalunga, unene tuu eidhidhimiko. Ninga oonkambadhala wu koke pambepo okupitila mokukonakona Oohapu dhaKalunga. Tamununa mo iilonga yoye yokuuvitha onkundana ombwanawa nomokukonakona Ombiimbeli naamboka ye na ohokwe. Kala ho kwatele komeho aanegumbo yoye miinima yopambepo nomelongelokalunga lyuukwanegumbo. Ompito kehe to mono kala ho nyanyukilwa pamwe naamwaho. Sho wu li poku adha ethikilo, oto ka nyanyukilwa olweendo lwoye.

Ngele oto longo nuudhiginini opo wu kale wa gwana okupewa iinakugwanithwa megongalo, Jehova ote ke ku laleka nuuyamba. Ye nosho wo ehangano lye inaya hala mboka ya hala okuninga aakuluntugongalo ya kale ya geya noitaya longo nenyanyu. Kalunga oha ambidhidha noha laleke nuuyamba mboka taye mu longele nomitima dhu uka. Odhoshili kutya omalaleko nuuyamba agehe ngoka he tu pe, kugo iha “gwedha ko uudhigu washa.” —  Omayel. 10:22, NW.

Ngele owa kala wa hala okuninga omukuluntugongalo uule wethimbo, oto vulu natango okuhuma komeho pambepo momukalo gwa dhenga mbanda. Sho to kambadhala wu kokeke uukwatya mboka wa pumbiwa, naasho to longo nuudhiginini megongalo nokukwathela aanegumbo lyoye, iilonga yoye iiwanawa itayi ka dhimbiwa. Nyanyukilwa aluhe okulongela Jehova, kashi na nduno mbudhi kutya owa pewa oshinakugwanithwa shashike.