1. Jehova oha kala u uvitile ngiini iilonga ye, noshe mu inyengitha a ninge shike?

JEHOVA oha nyanyukilwa iilonga ye. (Eps. 135:6; Joh. 5:17) Okwa hala wo iishitwa ye iinandunge yi kale hayi nyanyukilwa iilonga yayo. Okwe yi pe iilonga mbyoka hayi nyanyudha notayi mbilipaleke. Pashiholelwa, sho Jehova ta shiti iinima okwa li a longitha Omwana, omutango gwiishitwa ayihe. (Lesha Aakolossa 1:15, 16.) Ombiimbeli otayi tu lombwele kutya manga Jesus inee ya kombanda yevi, okwa li ta longo pamwe naKalunga megulu e li “engomba.” —  Omayel. 8:30.

2. Oshike tashi ulike kutya iishitwa yopambepo oya kala aluhe hayi longo iilonga ya simana notayi mbilipaleke?

² Okuza muGenesis sigo omEhololo, omu na iiholelwa mbyoka tayi ulike kutya Jehova okwa kala aluhe ha pe oyana yopambepo iilonga. Konima sho Adam naEva ya yono, oya li ya tidhwa mo mOparadisa moka ya li. Kalunga ‘okwa langeke kuuzilo weyana aakerubi ye na egongamwele tali yeta omulilo, opo li keelele shaa ngoka ta hedha komuti gwomwenyo.’ (Gen. 3:24) Ehololo 22:6 otali ulike kutya Jehova okwa li a “tumu omuyengeli gwe, a tseyithile aapiya ye shoka tashi ka ningwa.”

3. Jesus sho a li kombanda yevi okwa landula ngiini oshiholelwa shaHe?

³ Sho Jesus a li kombanda yevi, okwa li ha nyanyukilwa okulonga iilonga mbyoka a pewa kuJehova. Jesus okwa li wo a landula oshiholelwa shaHe, sho a pe aalongwa ye iilonga ya simana. Okwa li a hala ya kale taya nyanyukilwa iilonga yawo. Okwe ya lombwele a ti: “Ngame otandi mu lombwele oshili: Kehe ngoka i itaala ndje, ota ka longa wo iilonga mbyoka tandi longo. Eeno, oye ota ka longa nokuli iilonga iinene yi vule mbika, oshoka ngame otandi yi kuTate.” (Joh. 14:12) Opo Jesus u ulike kutya iilonga yawo oya li ye endelela, okwa yelitha a ti: “Tse otu na okukala tatu longo iilonga yaanguka a tumu ndje, manga tu na omutenya. Uusiku otau ya, uuna kaape na we ngoka ta vulu okulonga.” —  Joh. 9:4.

4-6. (a) Omolwashike tu na okupandula sho Noa naMoses ya li ya gwanitha po shoka Jehova e ya lombwele? (b) Uuwanawa wuni hawu zi miilonga mbyoka Jehova a gandja kaantu?

⁴ Nale manga Jesus inee ya kombanda yevi, aantu oya li ya pewa iilonga tayi mbilipaleke. Ihe nonando Adam naEva oya li ya ndopa okugwanitha po iilonga mbyoka ya pewa kuKalunga, yalwe oya li ye yi longo. (Gen. 1:28) Noa okwa li a pewa omalombwelo gokondandalunde nkene e na okutunga onguluwato, opo aantu ya hupile mo pethimbo lyEyelu. Okwa li a ningi naanaa ngaashi Jehova e mu lombwele a ninge. Ngashingeyi otu na omwenyo, molwaashoka Noa okwa landula ashihe shoka Jehova e mu lombwele. —  Gen. 6:14-16, 22; 2 Pet. 2:5.

⁵ Moses naye okwa li a pewa omalombwelo gokondandalunde nkene e na okutunga etsalihangano nosho wo nkene aayambi ye na okulangekwa po. Okwa ningi naanaa ngaashi a lombwelwa kuJehova. (Eks. 39:32; 40:12-16) Molwaashoka Moses okwa li a gwanitha po oshinakugwanithwa she nuudhiginini, sigo okunena ohatu mono uuwanawa mokuvulika kwe. Ngiini mbela? Omuyapostoli Paulus okwe shi yelitha kutya etsalihangano nelongekidho lyokulangeka po aayambi, otali thaneke ‘iinima iiwanawa mbyoka tayi ke ya.’ —  Heb. 9:1-5, 9; 10:1.

⁶ Omathimbo nomathimbo, iilonga mbyoka Jehova ha gandja kaapiya ye ohayi kala ya yoolokathana. Ihe otayi humitha komeho okugwanithwa kwomalalakano ge. Iilonga mbyoka ohayi simanekitha aluhe Jehova, nohayi etele aantu mboka ye na eitaalo uuwanawa. Jesus okwa li a ningi sha faathana manga inee ya kombanda yevi naasho e ke ya ko. (Joh. 4:34; 17:4) Iilonga mbyoka twa pewa kuJehova kunena, otayi mu simanekitha. (Mat. 5:16; lesha 1 Aakorinto 15:58.) Omolwashike taku vulu okutiwa ngawo?

7, 8. (a) Hokolola iilonga mbyoka Aakriste ye na uuthembahenda wokulonga kunena. (b) Otu na okwiinyenga ngiini ngele Jehova te tu wilike?

⁷ Nonando inatu gwanenena, oshi li uuthembahenda lela sho twa hiywa kuJehova tu li aalongi pamwe naye. (1 Kor. 3:9) Ngaashi Noa naMoses ya li ya ningi, Aakriste yamwe oye na uuthembahenda wokulonga miilonga yokutunga. Yamwe otaya kwathele mokutunga Iinyanga yiigongi, Iinyanga yUukwaniilwa nosho wo iitayimbelewa. Kala wa lenga iilonga mbyoka wa pewa, kashi na nduno mbudhi kutya oyokwoopalekulula iinyanga yUukwaniilwa yomoshitopolwa sheni, nenge oyokutunga oombelewa oonene koWarwick, moNew York. (Tala kethano ndyoka li li petameko.) Iilonga ayihe iiyapuki lela. Ihe nonando yamwe owala taya longo miilonga yokutunga omatungo, Aakriste ayehe oya hiywa ya longe miilonga yokutunga pambepo, ano iilonga yokuuvitha. Iilonga mbyoka ohayi simanekitha Jehova nohayi etele aantu aavuliki uuwanawa. (Iil. 13:47-49) Molwaashoka ehangano lyaKalunga olyo tali wilike iilonga yokuuvitha, otashi vulika tu pewe iinakugwanithwa iipe.

⁸ Aapiya yaJehova aadhiginini oya kala aluhe haya nyanyukilwa okuvulika kewiliko lye. (Lesha Aahebeli 13:7, 17.) Otashi vulika tu kale kaatu uvite ko kutya omolwashike tatu pewa iinakugwanithwa iipe. Ihe nonando ongawo, ohatu yi gwanitha po, molwaashoka otu shi kutya omalunduluko ga tya ngawo otaga zi kuJehova niizemo otayi ka kala iiwanawa.

9. Aakuluntugongalo oye tu tulila po oshiholelwa shini ngele tashi ya piilonga megongalo?

 ⁹ Momukalo moka aakuluntugongalo haya wilike egongalo, otagu ulike kutya oya halelela okugwanitha po ehalo lyaJehova. (2 Kor. 1:24; 1 Tes. 5:12, 13) Ohaya ulike kutya oye na ehalo lyokulonga nuudhiginini nosho wo okweendela pamwe nomalunduluko ngoka tashi vulika ga ningwe po. Ohaya taamba ko wo nehalo ewanawa omikalo omipe nkene ye na okuuvitha kombinga yUukwaniilwa mboka wa dhikwa po kuKalunga. Otashi vulika yamwe ya li taya kwatakwata okulongitha omukalo gwokuuvithila aantu mongodhi, pomatulilosikepa nosho wo momapandaanda. Ihe sho ye shi ningi, oya mono iizemo iiwanawa. Pashiholelwa, aakokolindjila yondjigilile yane moNdowishi, oya li ya tokola ya ka longe pomahala gokulandithila mpoka ya li ye etha okulonga po nale. Omumwatate Michael ota hokolola ta ti: “Otwa li tatu hala okuhita mevi, molwashoka opwa li pwa pita omimvo odhindji inaatu longitha omukalo ngoka gwokuuvitha. Otashi vulika Jehova a li e shi kutya otashi ke enda nawa, molwaashoka okwe shi ningi tashi wapa tu longe nawa ongula ndjoka. Otwa li twa nyanyukwa noonkondo sho twa landula omalombwelo ngoka ge li mUukalele Wetu wUukwaniilwa, nokukala twi inekela Jehova e tu ambidhidhe.” Mbela oho kambadhala ngaa okulongitha omikalo omipe uuna to uvitha moshitopolwa sheni?

10. Omalunduluko geni ga ningwa kehangano momathimbo opo ga zi ko?

¹⁰ Ehangano ohali ningi omalunduluko omathimbo gamwe. Ethimbo opo lya zi ko, iitayimbelewa yimwe iishona oya li ya hengumukile mumwe. Shoka osha li sha gumu mboka haya longo mo. Ayehe oya li ye na okuninga omalunduluko, ihe konima yethimbo oya ka mona uuwanawa mugo. (Omuuv. 7:8) Mboka taya longo nehalo ewanawa miitayimbelewa mbyoka inaya nyanyukwa tuu sho ye na ombinga mondjokonona yoshigwana shaJehova kunena!

11-13. Omashongo geni yamwe ya li ya taalele omolwomalunduluko ngoka ga ningwa mehangano?

¹¹ Otatu vulu okwiilonga iiyilongomwa ya simanenena kwaamboka ya li ya longo kiitayimbelewa mbyoka ya hengumukile mumwe. Oyendji yomuyo oya longa mo uule womimvo odhindji. Aaihokani yamwe mboka ya longa moBetel onshona moCentral America oya pulwa ya tembukile koBetel yaMeksiko ndjoka yi vule yawo lwiikando 30 muunene. Omumwatate Rogelio ota ti: “Osha li oshidhigu noonkondo kutse okuthiga po yaandjetu nookuume.” Omumwatate Juan ngoka naye a li a pulwa a tembukile koBetel yaMeksiko ota ti: “Osha li sha fa omuntu ta tameke nonkalamwenyo ompe kungame. Onda li ndi na okukonga ookuume aape. Onda li ndi na okwiigilila omikalondjigilile omipe dhamo nokudhiladhila momikalo dhi ili.”

¹² Aabetel ya za kiilongo yimwe yaEuropa mboka ya pulwa ya tembukile koshitayimbelewa shaNdowishi, nayo oya li ya taalelwa komashongo. Molwaashoka ohashi kala oshidhigu kukehe gumwe ngele e na okutembuka moshilongo shawo, kasha li oshipu kAabetel mboka ya pulwa ya tembuke moSwitzerland. Oya li ye hole moshitopolwa shawo shoka sha kundukidhwa koondundu oombwanawa dhaAlps. Omanga mboka ya tembuka moAustria ya kala ya yuulukwa oBetel yawo moka ya li nale mu na aantu aashona.    

¹³ Aamwatate naamwameme mboka haya tembukile kiitayimbelewa yokiilongo yilwe ohaya ningi omalunduluko omanene. Oye na okwiigilila ehala epe, okukonga ookuume aape nokwiilonga iilonga yilwe iipe. Oye na wo okwiigilila egongalo epe nosho wo oshitopolwa oshipe moka hayu uvitha. Omathimbo gamwe oye na okwiilonga elaka epe. Okuninga omalunduluko ngoka ohashi vulika ku kale okudhigu. Ihe Aabetel oyendji ohaya ningi omalunduluko ngoka ga pumbiwa. Omolwashike mbela? Pulakena sho yamwe yomuyo taya ti.

14, 15. (a) Oyendji oyu ulike ngiini kutya oya lenga uuthembahenda wokulonga pamwe naJehova kutya nduno oye li peni notaya longo shike? (b) Oye tu tulila po oshiholelwa oshiwanawa shini?

 ¹⁴ Omumwameme Grethel ota ti: “Onda tembukile koshilongo shilwe, molwaashoka onda li nda hala okuulikila Jehova kutya ohole yandje yoku mu hole oyi vulithe pwaandjoka ndi hole nayo oshilongo shetu, etungo, nenge uuthembahenda wontumba.” Omumwameme Dayska ota ti: “Onda tembuka nenyanyu, molwaashoka ondi wete kutya Jehova oye ta tumu ndje.” Omumwatate André nomukadhi Gabriela oya ti: “Kungeyi otwa li twa mono ompito ya gwedhwa po okulongela Jehova mokupititha ehalo lye komeho yolyetu. Otwi ilombwele tse yene tatu ti: ‘Uuna ehangano lyaJehova tali ningi omalunduluko, oshi li nawa oku ga taamba ko nomwenyo aguhe, pehala lyokukala ompinge nago.’”

¹⁵ Sho iitayimbelewa ya hengumukile mumwe, Aabetel yamwe oya pulwa ya ninge aakokolindjila. Aabetel oyendji oya li ya yi miilonga yuukokolindjila sho oshitayimbelewa shaDenmark, shaNorway noshaSweden ya hengumukile mumwe noshitayimbelewa shaScandinavia. Omumwatate Florian nomukadhi Anja oya ti: “Otwa li twa nyanyukilwa oshilonga shetu oshipe. Kutse osha li oshinima oshiwanawa okulongithwa kuJehova shaampono. Otatu vulu okutya otwa yambekwa lela kuJehova.” Ihe oyendji yomutse otashi vulika inaatu iyadha nale monkalo ya fa ndjoka. Mbela itatu vulu okuholela aamwatate naamwameme mbano mokupititha iinima yUukwaniilwa komeho? (Jes. 6:8) Jehova oha laleke aluhe nuuyamba mboka ya lenga uuthembahenda wawo wokulonga pamwe naye, kutya nduno oye li peni notaya longo shike.    

16. (a) Aagalati 6:4 otaye tu lombwele tu ninge shike? (b) Iinakugwanithwa ya simanenena yashike tatu vulu okukala tu na?

¹⁶ Aantu inaya gwanenena oye hole okwiiyelekanitha nayalwe. Ihe Oohapu dhaKalunga otadhi tu lombwele tu longe ngaashi tatu vulu miilonga ye. (Lesha Aagalati 6:4.) Oyendji yomutse katu na iinakugwanithwa yiilonga yontumba  mehangano. Shimwe ishewe, atuhe itatu vulu okuninga aakuluntugongalo, aakokolindjila, aatumwa nenge Aabetel. Iilonga mbyoka iiwanawa notu na okukala twe yi lenga. Ihe inatu dhimbwa nando kutya uuthembahenda wa simana atuheni tatu vulu okukala tu na, owo okukala aauvithi yonkundana ombwanawa naalongi pamwe naJehova. Natu kale twe u lenga.

17. Omangambeko geni hashi vulika tu iyadhe mugo sho tu li muuyuni waSatana, nomolwashike kaatu na okuteka omukumo?

¹⁷ Okulongela kwetu Jehova okwa ngambekwa, molwaashoka otu li muuyuni waSatana. Otashi vulika iinakugwanithwa yomomagumbo, omaunkundi nosho wo oonkalo dhilwe dhi tu ngambeke. Ihe katu na okuteka omukumo. Kutya nduno otu na omangambeko geni, otatu vulu aluhe okuuvitha kombinga yedhina lyaJehova nosho wo yUukwaniilwa we. Shoka sha simanenena osho okuninga ngaashi tatu vulu mokulonga pamwe naJehova. Otu na wo okugalikana a laleke nuuyamba mboka taya vulu okuninga oshindji ye tu vule. Onkee ano, natu dhimbulukwe kutya kehe ngoka ta tanga edhina lyaJehova, oku na ongushu momeho ge.

18. Oshike kaatu na okulalakanena, nomolwashike?

¹⁸ Odhoshili kutya inatu gwanenena notu na omaunkundi. Ihe Jehova okwa nyanyukwa sho tu li aalongi pamwe naye. Onkee ano, natu kale twa lenga uuthembahenda wokulonga pamwe naKalunga ketu momasiku ngaka gahugunina. Shino oshi na oku tu inyengitha kaatu kale owala tatu lalakanene uuwanawa wetu yene. Otwa tseya kutya muuyuni uupe, Jehova ote ke tu pa “okukalamwenyo kwashili,” hoka ku li omwenyo gwaaluhe muuyuni uupe wombili moka tatu ka kala twa nyanyukwa lela. —  1 Tim. 6:18, 19.    

19. Jehova okwe tu uvanekela shike monakuyiwa?

¹⁹ Uuyuni uupe owu li pokuya masiku. Onkee ano, otu na okudhiladhila shoka Moses a li a lombwele oshigwana shaIsraeli sho shi li pokuya mEvi lyEuvaneko. Okwa ti: “Omuwa ote ke ku yambekela ayihe to yi ningi.” (Deut. 30:9) Konima yiita yaArmagedon, mboka ya kala taya longo pamwe naKalunga, otaya ka thigulula evi ndyoka e yu uvanekela. Konima yaashono, opo ihe otatu ka gandja eitulomo kiilonga yetu iipe yokuninga evi alihe oparadisa ombwanawa.