Methelemumvo lyotango, omuyapostoli Paulus okwa lombwelele aakuluntugongalo yomegongalo lyaEfeso a ti: ‘Itonateleni ano, ne mu tonatele wo oshigunda ashihe shoka mwe shi pewa kombepo ondjapuki. Litheni egongalo lyaKalunga ndyoka e li ilikolele neso lyOmwana.’ (Iil. 20:28) Ombepo ondjapuki ohayi dhana onkandangala yini nena uuna aakuluntugongalo nosho wo aayakuligongalo taya langekwa po?

Tango, aanyoli yOmbiimbeli mboka ya popya iitegelelwa mbyoka aakuluntugongalo nosho wo aayakuligongalo ye na okugwanitha po manga inaaya langekwa po, oya nwethwa mo kombepo ondjapuki. MuTimoteus gwotango 3:1-7 otamu adhika iitegelelwa 16, mbyoka aakuluntugongalo ye na okugwanitha po. Yilwe otayi adhika wo muTitus 1:5-9 nomuJakob 3:17, 18. Iitegelelwa yaayakuligongalo oya popiwa muTimoteus gwotango 3:8-10, 12, 13. Oshitiyali, mboka haya popile omumwatate gwontumba a langekwe po, ohaya galikana, opo ombepo yaJehova yi ya wilike, sho taya tala ngele omumwatate ngoka okwa gwanitha po iitegelelwa yopamanyolo. Oshititatu, omumwatate ngoka ta popilwa a langekwe po, oku na okukala hi imike iiyimati yombepo yaKalunga monkalamwenyo ye. (Gal. 5:22, 23) Onkee ano, sho omumwatate ta langekwa po, ombepo ondjapuki yaKalunga ohayi dhana onkandangala okuza petameko sigo opehulilo.

Ihe olye naanaa ha langeke po aamwatate mboka? Nale, uuyelele waamwatate mboka taya popilwa ya ninge aakuluntugongalo nosho wo aayakuligongalo owa li hawu tuminwa koshitayimbelewa. Aamwatate koshitayimbelewa, mboka ya langekwa po kOlutuwiliki, oya li haya pewa oshinakugwanithwa shokutalulula uuyelele mboka nokulangeka po mboka ya gwanitha po iitegelelwa. Opo ihe oshitayimbelewa ohashi tseyithile olutu lwaakuluntugongalo. Aakuluntugongalo ohaya lombwele aamwatate mboka kutya oya langekwa po noku ya pula wo ngele oya hala nongele otaya vulu okulonga oshilonga shoka. Opo ihe egongalo olya li hali tseyithilwa kutya omumwatate gwontumba okwa langekwa po.

Ihe pethimbo lyaayapostoli, aakuluntugongalo naayakuligongalo oya li haya langekwa po ngiini? Omathimbo gamwe aayapostoli oyo ya li haye shi ningi. Pashiholelwa, oya langekele po aalumentu yaheyali, opo ya topolele aaselekadhi iikulya esiku kehe. (Iil. 6:1-6) Ihe aalumentu mbaka otashi vulika ya li nale aakuluntugongalo sho ya pewa oshilonga shika.

Nonando Ombiimbeli inayi yelitha naanaa kondandalunde nkene aalumentu ayehe ya li ya langekwa po, otayi tu kwathele tu uve ko kashona nkene shika sha li hashi ningwa pethimbo lyonale. Ombiimbeli otayi ti kutya sho Paulus naBarnabas taya zi molweendo lwawo lwotango yu uka kegumbo, ‘oya hogololele  ihe omagongalo agehe aakuluntu, naasho ye ya galikanene nokwiidhilika iikulya, oye ya gandja miikaha yOmuwa ngoka ye mu inekela.’ (Iil. 14:23) Konima yoomvula dhontumba, Paulus okwa li a nyolele omweendi pamwe naye, Titus a ti: ‘Onde ku thigi muKreta, opo u pongolole iinima mbyoka ya pumbwa okutulwa melandulathano nowu hogolole aakuluntu yegongalo momukunda kehe. Dhimbulukwa omalombwelo gandje.’ (Tit. 1:5) Sha faathana, Timoteus ngoka a li ha talele po omagongalo olundji pamwe nomuyapostoli Paulus, naye okwa lombwelelwe wo a langeke po aakuluntugongalo. (1 Tim. 5:22) Osha yela kutya, aatonateli aayendi oyo ya li haya langeke po aakuluntugongalo nenge aayakuligongalo, ihe haayapostoli naakuluntu muJerusalem.

Omolwoshinima shika Olutuwiliki lwOonzapo dhaJehova olwa lundulula omukalo moka aakuluntugongalo naayakuligongalo haya langekwa po. Okuza me 1 Septemba 2014 otashi kala hashi ningwa ngeyi: Omutonatelishikandjo kehe oye ta kala ta konakona uuyelele waamboka taya popilwa ya langekwe po. Sho ta talele po egongalo, ota ka kambadhala okutseya aamwatate mboka taya popilwa nokulonga pamwe nayo momapya mpoka tashi wapa. Konima ngele omutonatelishikandjo a kundathana nolutu lwaakuluntugongalo kombinga yaamboka taya popilwa, ota ka kala e na oshinakugwanithwa shokulangeka po aakuluntugongalo naayakuligongalo momagongalo moshikandjo she. Shika oshi li popepi naashoka sha li hashi ningwa pethimbo lyaayapostoli.

Oolye taya ka kutha ombinga moshinima shika? Ngaashi sha kala nale, “omupiya omudhiginini nomunandunge” oku na oshinakugwanithwa shokupa aamati ooyakwawo iikulya. (Mat. 24:45-47, NW) Shika osha kwatela mo okukonakona Omanyolo nekwatho lyombepo ondjapuki, opo a gandje omayele gankene omakotampango gOmbiimbeli taga vulu okutulwa miilonga ngoka ge na ko nasha nankene omagongalo muuyuni awuhe ge na okuunganekwa. Omupiya omudhiginini oha langeke po wo aatonatelishikandjo niilyo yOkomitiye yOshitayimbelewa. Oshitayimbelewa kehe ohashi gandja ekwatho nkene omalombwelo gomupiya ge na okutulwa miilonga. Olutu kehe lwaakuluntugongalo olu na oshinakugwanithwa sha kwata miiti shokukonakona nawa ngele aalumentu mboka lwa hala okulangeka po megongalo lyaKalunga oya gwanitha po iitegelelwa yopamanyolo. Omutonatelishikandjo kehe oku na oshinakugwanithwa oshinene shokukonakona nawa uuyelele waamboka taya popilwa kaakuluntugongalo pamwe negalikano, opo ihe ta langeke po mboka ya gwanitha po iitegelelwa.

Ngele otu uvite ko nkene aamwatate haya langekwa po, otashi ke tu kwathela tu uve ko nawa onkandangala ndjoka ombepo ondjapuki hayi dhana moshinima shika. Ohatu kala wo twi inekela thiluthilu mboka ya langekwa po megongalo lyopaKriste, notwe ya simaneka. —  Heb. 13:7, 17.

Ehololo 11:3 otayi popi kombinga yaahokololi yaali mboka taya ka popya elaka lyaKalunga omasiku 1 260. Ehokololo olya tsikile ko kutya oshilikama “otashi ke ya sinda e tashi ya dhipaga.” Ihe konima “yomasiku gatatu netata,” aahokololi mbaka yaali otaya ka yumuka, naashika otashi ka tilitha mboka taye shi mono. —  Eh. 11:7, 11.

Aahokololi mbaka yaali oyo oolye? Ehokololo otali tu kwathele tu mone kutya oyo oolye. Tango, otatu lombwelwa kutya oyo “oomono mbali noolamba mbali.” (Eh. 11:4) Shika otashi tu dhimbulukitha omiti mbali dhooholivi noshihukikwanyeka, mbyoka ya popiwa mehunganeko lyaSakaria. Ooholivi ndhoka odhi lile po “aalumentu yaali [omupangeli Serubbabel nomuyambimukuluntu Josua] mboka Kalunga a hogolola nokwe ya gwayeka, ye mu longele.” (Sak. 4:1-3, 14) Oshitiyali, aahokololi mbaka yaali otaya popiwa kutya otaya longo iilongankondo ya fa mbyoka ya longelwe kuMoses nokuElia. —  Yelekanitha Ehololo 11:5, 6 naNumeri 16:1-7, 28-35 nosho wo Aakwaniilwa yotango 17:1; 18:41-45.

Oovelise ndhika otadhi popi kombinga yoshinima shini sha faathana? Adhihe otadhi popi kombinga yaalongelikalunga mboka ya li taya kwatele komeho pethimbo edhigu. Onkee ano, megwanithopo lyehunganeko ndyoka lya popiwa mEhololo ontopolwa 11, aamwatate aagwayekwa mboka ya li taya kwatele komeho sho Uukwaniilwa waKalunga wa dhikwa megulu mo 1914, oya li yu uvitha “ya zala omahahi” uule woomvula ndatu netata.

Aamwatate mbaka oya li ya dhipagwa pathaneko konima yokuuvitha kwawo ya zala omahahi, sho ya tulwa mondholongo ethimbo efupi, uule womasiku gatatu netata. Pakutala kwaatondi yoshigwana shaKalunga, oshilonga shaamwatate osha li sha hulithwa po, naashika osha li sha nyanyudha aatondi yawo. —  Eh. 11:8-10.

Ihe oya li ya yumudhwa konima yomasiku gatatu netata ngaashi sha hunganekwa. Aagwayekwa oya li ya mangululwa mo mondholongo, na Kalunga okwa pe mboka ya kala aadhiginini oshilonga shi ikalekelwa okupitila mOmuwa gwawo, Jesus Kristus. Mo 1919 aagwayekwa mboka, oya langekwa po ye li “omupiya omudhiginini nomunandunge,” opo ya paluthe oshigwana shaKalunga pambepo momasiku gahugunina. —  Mat. 24:45-47, NW; Eh. 11:11, 12.

Ehololo 11:1, 2 otayi popi kutya iiningwanima mbika otayi ningwa sho otempeli yopambepo tayi konakonwa. Ontopolwa ontitatu yaMaleaki oya popi wo kombinga yokukonakonwa kwotempeli yopambepo nosho wo yeyogolo lyayo. (Mal. 3:1-4) Otempeli oya konakonwa nokuyogolwa uule wethimbo li thike peni? Osha ningwa okuza mo 1914 sigo opetameko lyo 1919. Ethimbo ndyoka olya kwatela mo omasiku 1 260 (oomwedhi 42) nosho wo omasiku gatatu netata gopathaneko ngoka ga popiwa mEhololo ontopolwa 11.

Otwa nyanyukwa noonkondo sho Jehova a longekidha opo e tu yelithe, tu ninge aantu ye mwene ya hala okulonga uuwanawa. (Tit. 2:14) Oshikwawo, otwa pandula wo oshiholelwa oshiwanawa shoka aagwayekwa aadhiginini mboka ya li taya kwatele komeho pethimbo ndyoka edhigu ye tu tulila po. Kungeyi oya gwanitha po ehunganeko kombinga yaahokololi yaali. *