1. Oshike sha ningitha Jesus ‘u udhithwe enyanyu kombepo ondjapuki’? (Tala kethano lyopetameko.)

KAMBADHALA okukala ando wa fa wu wete Jesus ‘u udhithwa enyanyu kombepo ondjapuki.’ Otashi vulika omuntu wa li to vulu okumona enyanyu moshipala she. Otashi vulika wo a li ti imemeha. Ihe oshike sha li she mu nyanyudha? Okwa adhika owala opo a tumu aalongwa ye 70 * ye ku uvithe onkundana ombwanawa yUukwaniilwa waKalunga. Jesus okwa li a halelela okuuva kutya oye shi enditha ngiini, oshoka opwa li pu na aatondi oyendji mboka taya pataneke onkundana ombwanawa. Yamwe yomaatondi mboka aanongompango nAafarisayi. Aantu mbaka oya li ya longwa noya li yi ishi oondunge. Kaya li ya hala Jesus naalongwa ye ya kale ya simanekwa kaantu. Oya li ya hala aantu ya kale taya ti kutya Jesus omuhongi gwowala gwiipilangi nosho wo kutya aalongwa ye “aantu inaa longwa sha.” (Iil. 4:13; Mark. 6:3) Ihe shika inashi shololitha aalongwa, oshoka oyu uvithile aantu ayehe, nonando oya li taya patanekwa nokoompwidhuli nokuli. Naasho ya galuka, oya li yu udha enyanyu. Oshike sha li she ya kwathele ya kale ye na enyanyu nosho wo uulaadhi? —  Lesha Lukas 10:1, 17-21.

2. (a) Omolwashike aalongwa yaJesus ya li ya fa aanona? (b) Oshike sha kwathele aalongwa yaJesus yu uve ko oshili yOmbiimbeli yomuule?

 ² Jesus okwa lombwele He a ti: “Otandi ku hambelele, Tate, Omuwa gwegulu nogwevi, oshoka iinima mbika ongoye we yi holeke aanongo naanamayele nowe yi hololele mboka ya fa uunona. Eeno, Tate, shika osho she ku opalela.” (Mat. 11:25, 26) Omolwashike Jesus i ithana aalongwa ye aanona? Omolwaashoka aalongwa oya li ye na ehalo okulongwa naaifupipiki ngaashi aanona. (Mat. 18:1-4) Kaya li ya fa aanongompango nAafarisayi aanuuntsa mboka ya li aalongwantu nohaya dhiladhila kutya yo aanandunge. Jehova okwa longitha ombepo ye ondjapuki e ya kwathele yu uve ko nawa oshili yOmbiimbeli yomuule, molwaashoka oya li aaifupipiki. Ihe aawiliki yelongelokalunga oya li ya tsikithwa kuSatana nokuuntsa wawo.

3. Otatu ka kundathaneni shike moshitopolwa shika?

³ Ngashingeyi otu wete kutya omolwashike Jesus a li a nyanyukwa. Okwa li a nyanyukwa, oshoka Jehova okwa hololele aantu mboka inaaya longwa, oshili yOmbiimbeli yomuule. Sigo onena Kalunga ina lunduluka. Okwa hala natango aantu mboka inaaya longwa yu uve ko oshili. Ohe shi ulike ngiini? Moshitopolwa shika otatu ki ilonga nkene Jehova ta hololele aantu mboka inaaya longwa, oshili yOmbiimbeli yomuule.

4. Oshungolangelo yOshiingilisa sha pupalekwa oya kwathela ngiini aaleshi?

⁴ Ehangano lyaKalunga ngashingeyi otali tsu omuthindo kutya osha simana aantu ya longwe momukalo omupu nogwa yela. Natu taleni kiiholelwa itatu tayi landula. Oshiholelwa shotango, Oshungolangelo yOshiingilisa sha pupalekwa. * Ohayi kwathele aantu oyendji, mwa kwatelwa mboka haya nyengwa okulesha nenge kaaye shi nawa elaka. Aavali oya mona kutya oyana ngashingeyi oyu uvite ko nawa Oshungolangelo, molwaashoka oya nyolwa momukalo omupu okuuviwa ko. Aantu oyendji ohaye tu nyolele taya pandula sho pwa nyanyangidhwa Oshungolangelo ndjoka. Pashiholelwa, omumwameme gumwe okwa ti kutya okwa li ha kala a tila okuyamukula pEkonakono lyOshungolangelo. Ihe konima sho Oshungolangelo yOshiingilisa sha pupalekwa ya piti, ka li we ha kala a tila. Okwa nyola a ti: “Ngashingeyi ihandi kala we nda tila. Ohandi yamukula nokuli shi vulithe pulumwe. Otandi pandula Jehova nosho wo aamwatate.”

5. Ombiimbeli yOshiingilisa yo-New World Translation of the Holy Scriptures ndjoka ya tolokululwa, omolwashike ombwanawa?

⁵ Oshitiyali, Ombiimbeli yOshiingilisa yo-New World Translation of the Holy Scriptures ndjoka ya tolokululwa. Oya li ya piti mo 5 Kotoba 2013, poshigongi shetu shokomumvo. * Oshike sha lunduluka mo? Oovelise odhindji odhi na ngashingeyi iitya iishona. Edhiladhilo moovelise ndhoka inali lunduluka,  ihe oompu okuuviwa ko. Pashiholelwa, Job 10:1 ndjoka ya li yi na iitya 27, ngashingeyi oyi na iitya 19 nosho wo Omayeletumbulo 8:6 ndjoka ya li yi na iitya 20, ngashingeyi oyi na iitya 13. Oovelise ndhika ngashingeyi odha yela shi vulithe nale. Omumwatate gumwe omugwayekwa ngoka a kala ta longele Jehova nuudhiginini uule woomvula odhindji, okwa ti: “Opo ashike nda mana okulesha embo lyaJob mOmbiimbeli ompe. Onda fa owala opo tandi li lesha lwotango.” Haye awike u uvite ngaaka.   

6. Owu uvite ngiini sho wu uvite ko nawa Mateus 24:45-47?

⁶ Oshititatu, omukalo moka tu uvite ko omanyolo gontumba. Pashiholelwa, mOshungolangelo yo 15 Juli 2013 omwa li mu na efatululo lya yela nawa kombinga ‘yomumati omwiinekelwa nomunandunge’ nenge omupiya omudhiginini nomunandunge. (Mat. 24:45-47) Oshungolangelo ndjoka oya yelitha nawa kutya omupiya omudhiginini, Olutuwiliki. Oya yelitha wo kutya “aamati ooyakwawo” oya kwatela mo aagwayekwa nosho wo ‘oonzi dhilwe’ ndhoka tadhi paluthwa komupiya. (Joh. 10:16) Ohatu nyanyukilwa okwiilonga kombinga yiinima mbika noku yi longa wo ooyakwetu. Oshike ishewe tashi tu ulukile kutya Jehova okwa hala aantu ya longwe momukalo gwa yela nawa nomupu okuuviwa ko?

7, 8. Iinima yini nomahokololo geni mOmbiimbeli taga thaneke iinima yi li komeho, nenge taga thaneke iinima yilwe yi ili?

⁷ Iileshomwa yetu ngashingeyi ohayi yelitha omahokololo gamwe gOmbiimbeli momukalo gwi ili. Ngele owa kala to longele Jehova ethimbo ele otashi vulika we shi koneka. Olundji, nale otwa li hatu ti kutya omahokololo gamwe otaga thaneke oshinima shimwe shi ili nenge oshinima shoka tashi ka ningwa monakuyiwa. Mbela oshi li ngaa mondjila okufatulula omahokololo gOmbiimbeli momukalo ngoka? Oshi li mondjila, oshoka naJesus osho a li a ningi. Pashiholelwa okwa popi kombinga ‘yoshikumithalonga shomuhunganeki Jona.’ (Lesha Mateus 12:39, 40.) Okwa tsikile nokuyelitha kutya ethimbo ndyoka Jona a kala mela lyondjambameya, otali thaneke ethimbo ndyoka Jesus a li ta ka kala mombila.

⁸ Ehokololo ndyoka halyo alike. Opu na wo omahokololo galwe ngoka taga thaneke iinima mbyoka tayi ka ningwa monakuyiwa. Gamwe gomomahokololo ngoka oga popiwa komuyapostoli Paulus. Pashiholelwa, okwa popi kombinga yekwatathano pokati kaAbraham naakulukadhi ye yaali, Hagar naSara. Ekwatathano ndyoka olya li tali thaneke ekwatathano pokati kaJehova noshigwana shaIsraeli sho sheneshene nehangano lye megulu. (Gal. 4:22-26) Opu na iinima yilwe nayo ya li tayi thaneke iinima yi li komeho ngaashi etsalihangano, otempeli, Esiku lyEkwatakanitho  nomuyambi omukuluntu. Iinima ayihe mbika yomOmpango oya li “efano lya dhimeya lyiinima iiwanawa tayi ke ya.” (Heb. 9:23-25; 10:1) Sho tatu konakona omahokololo ngaka gomOmbiimbeli naashoka taga thaneke, otashi koleke eitaalo lyetu. Ihe mbela kehe omuntu, oshiningwanima nenge oshinima kehe sha popiwa mOmbiimbeli otashi thaneke omuntu nenge oshinima shilwe shi ili?   

9. Ehokololo lyaNabot olya li hali fatululwa ngiini nale?

⁹ Nale iileshomwa yetu oya li hayi yelitha kutya omuntu, oshiningwanima nenge oshinima kehe sha popiwa mOmbiimbeli otashi thaneke omuntu nenge oshinima shilwe shi ili. Pashiholelwa, Ombiimbeli otayi popi kombinga yomunyekadhi Isebel ngoka a dhipagitha Nabot, opo omusamane gwe Ahab a kuthe po oshitsambe shaNabot. (1 Aak. 21:1-16) Momumvo 1932 Oshungolangelo oya yelithile kutya Ahab naIsebel otaya thaneke Satana nehangano lye, omanga Nabot ta thaneke Jesus. Nomolwaashono ya tile kutya eso lyaNabot otali thaneke eso lyaJesus. Ihe mo 1961, embo “Let Your Name Be Sanctified” olya tile kutya Nabot ota thaneke aagwayekwa, omanga Isebel ta thaneke omalongelokalunga giifundja gopaKriste. Oshikwawo, olya ti okuhepekwa kwaNabot kuIsebel okwa li taku thaneke okuhepekwa kwaagwayekwa momasiku gahugunina. Omafatululo ngaka oga kala taga koleke eitaalo lyoshigwana  shaKalunga uule woomvula odhindji. Ihe omolwashike ngashingeyi tatu ga fatulula momukalo gwi ili?

10. (a) Omolwashike taku tiwa kutya omupiya omudhiginini okwa kala a tonata ngele tashi ya pokufatulula omahokololo gOmbiimbeli? (b) Iileshomwa yetu nena ohayi gandja eitulomo kushike?

¹⁰ Jehova okwa kala ta kwathele “omumati omwiinekelwa nomunandunge” nenge omupiya omudhiginini a kale a tonata. Okwe mu kwathele ngiini? Ngashingeyi omupiya omudhiginini oha popi owala kutya ehokololo lyomOmbiimbeli otali thaneke oshinima shimwe shi ili, ngele opu na uumbangi wa gwana. Omayelitho gamwe ge nasha nomahokololo ngoka taga thaneke iinima yi li komeho, oga li omadhigu okuuviwa ko nokudhimbulukiwa. Osha li wo oshidhigu oku ga tula miilonga. Shoka ehokololo tali tu longo osho unene sha simana. Ihe ohashi kana ngele omuntu ota gandja owala eitulomo kwaashoka ehokololo tali thaneke. Iileshomwa yetu nena ohayi gandja unene eitulomo kwaashoka omahokololo gomOmbiimbeli tage tu longo. Otage tu longo eitaalo, eidhidhimiko, etilokalunga nosho wo uukwatya wulwe. *

11. (a) Ngashingeyi ehokololo lyaNabot otu li uvite ko ngiini, noshiholelwa she otashi tu kwathele ngiini? (b) Omolwashike iileshomwa yetu ihaayi popi we naanaa unene kutya ehokololo lyontumba otali thaneke oshinima shilwe? (Tala oshileshwa “Omapulo ga za kaaleshi” shi li moshifo shika.)

¹¹ Ehokololo lyaNabot ngashingeyi epu okuuviwa ko. Eso lye itali thaneke eso lyaJesus nenge lyaagwayekwa. Nabot okwa si, molwaashoka a li a tokola okukala omuvuliki kuKalunga. Nonando okwa li ta patanekwa nonyanya komupangeli omunankondo, okwa li a tokola toko okuvulika kOmpango yaJehova. (Num. 36:7; 1 Aak. 21:3) Ina tulila po tuu aapiya yaKalunga yonena mboka tashi vulika nayo taya hepekwa oshiholelwa oshiwanawa! (Lesha 2 Timoteus 3:12.) Aakriste ayehe otaya vulu oku li uva ko nawa, oku li dhimbulukwa, okutula miilonga shoka tali tu longo nokukoleka eitaalo lyawo.   

12. (a) Opehulithodhiladhilo lini kaatu na okuthika ngele tashi ya pomahokololo gomOmbiimbeli? (b) Oshike she tu kwathele tu kale hatu fatulula iinima yomuule momukalo omupu okuuviwa ko? (Tala enyolo lyopevi.)

¹² Mbela otu na okuthika pehulithodhiladhilo kutya omahokololo agehe gomOmbiimbeli oge lile po owala oku tu longa sha, ihe itaga thaneke sha shilwe? Aawe. Iileshomwa yetu ngashingeyi ohayi gandja owala unene eitulomo kunkene omahokololo ga pambathana pehala lyokutala kwaashoka taga thaneke. Pashiholelwa, uudhiginini waNabot sho a li ta hepekwa naasho a li a taalela eso, otawu tu dhimbulukitha uudhiginini waJesus nowaagwayekwa. Otawu tu dhimbulukitha wo uudhiginini ‘woonzi dhilwe.’ Osha  yela kutya Jehova ote tu longo momukalo omupu. *

13. Iiholelwa yini tayi ulike kutya ngashingeyi ohatu fatulula omayele gaJesus momukalo gwa yela nomupu okuuviwa ko?

¹³ Maantu mboka ya li kombanda yevi, Jesus Kristus oye a li omulongi omunene kwaana we. Okwa li e hole okulongitha omayele nenge iiholelwa sho ta longo aantu. (Mat. 13:34) Iiholelwa iiwanawa, oshoka ohayi kwathele omuntu u uve ko iinima mbyoka iidhigu okuuviwa ko. Ohayi kwathele wo omuntu a dhiladhile nohayi gumu omutima. Iileshomwa yetu oya kala hayi fatulula omayele gaJesus momukalo omupu nogwa yela. Shika osho sha kala hashi ningwa uule woomvula. Pashiholelwa, Oshungolangelo 15 Juli 2008 oya li ye tu kwathele tu uve ko nawa eyele lyaJesus lyefulika, lyomuma yosinapi nolyoshiyulitho shoohi. Ngashingeyi otu shi kutya omayele ngaka agehe otaga popi kombinga yUukwaniilwa waKalunga. Euvoko ndika olya kwathela aantu oyendji ya kale kokule nuuyuni mbuka wa nyata nokuninga aalongwa yaJesus.   

14. (a) Otwa li hatu fatulula ngiini eyele lyOmusamaria omunamutimahenda? (b) Nena otu uvite ko ngiini eyele lyaJesus lyOmusamaria omunamutimahenda?

¹⁴ Otu na okuuva ko ngiini omayele galwe gaJesus ngoka ge na uuyelele owindji? Gamwe otaga popi iinima yopathaneko omanga gamwe ge na iinima yopahunganeko. Omayele galwe otage tu longo iinima mbyoka tu na okutula miilonga monkalamwenyo yetu. Ihe otatu shi tseya ngiini kutya ehokololo lyongandi oli na iinima yopathaneko? Momukokomoko gwoomvula, iinima mbika oye ende tayi tu yelele. Natu taleni koshiholelwa. Nale otwa li hatu fatulula ngiini eyele lyaJesus lyOmusamaria omunamutimahenda? (Luk. 10:30-37) Momumvo 1924, Oshungolangelo oya tile kutya Omusamaria ota thaneke Jesus. Oshifo shoka osha ti, molwaashoka ondjila ndjoka ya za kuJerusalem yu uka kuJeriko oye enda tayi kuluka, otayi thaneke onkalo yaantu, ndjoka tayi ende tayi nayipala okuza sho Adam naEva ya yono. Aayugi oya li taya thaneke omahangano omanene gopaipindi naanangeshefa aanalwiho. Omulevi nomuyambi oya li taya thaneke omalongelokalunga giifundja gopaKriste. Ihe iileshomwa yetu nena ohayi longitha eyele ndyoka yi tu dhimbulukithe kaatu kale tu na okatongo. Otu na okukwathela kehe gumwe i ilonge oshili kombinga yaKalunga. Ohashi tu nyanyudha okumona nkene Jehova te ende ta yelitha oshili.

15. Oshike tatu ka kundathana moshitopolwa tashi landula?

¹⁵ Moshitopolwa tashi landula, otatu ka kundathana kombinga yeyele lyaJesus lyaakadhona omulongo. (Mat. 25:1-13) Momasiku ngaka gahugunina Jesus okwa hala aalanduli ye yu uve ko ngiini ethaneko ndika lya simanenena? Mbela omuntu kehe, oshinima nenge oshiningwanima tashi popiwa mo otashi thaneke omuntu nenge sha shilwe shomonakuyiwa? Nenge pamwe Jesus okwa li a hala oku tu longa sha shoka tashi ke tu kwathela momasiku gahugunina? Natu shi taleni.