1, 2. Pethimbo sho Ombiimbeli tayi nyolwa, Kalunga okwa li a longo iikumithalonga yini, naashika ohashi ningitha aantu nena ya kale tayi ipula nashike uuna taye ehama?

NGELE opu na ethimbo limwe wa li to ehamenene, otashi vulika wi ipulile to ti: ‘Otandi ti po ngaa hwepo?’ Nenge tashi vulika to ipula ngele omuntu gwaandjeni nenge kuume koye ngoka te ehama ngele ota aluka ngaa. Inashi puka okukala wa hala ngoye naaholike yoye mu kale mu na uundjolowele. Ombiimbeli otayi hokolola aantu mboka ya li ya hala okutseya ngele otaya ka aluka ngaa. Pashiholelwa, omukwaniilwa Ahasia, omwanamati gwaAhab naIsebel, okwa li a hala okuuva ngele ota aluka kuuvu we. Omukwaniilwa Benhadad gwaSiria naye okwa li a pula ngele ota aluka ngaa. — 2 Aakwaniilwa 1:2; 8:7, 8.

² Ombiimbeli otayi ti wo kutya nale Jehova omathimbo gamwe okwa li ha aludha aantu pashikumithalonga. Okwa longitha nokuli aahunganeki ya yumudhe aantu yamwepo. (1 Aakwaniilwa 17:17-24; 2 Aakwaniilwa 4:17-20, 32-35) Aantu yamwe nena ohaya kala tayi ipula ngele Kalunga ota vulu oku ya aludha pashikumithalonga.

3-5. Jehova naJesus oye na oonkondo dhokuninga shike, notatu ka kundathana omapulo geni?

 ³ Jehova oku na oonkondo dhokwaaludha nokugeela aantu nuuvu. Okwa li a geele aantu yontumba nuuvu. Pashiholelwa okwa geele Farao pethimbo lyaAbraham nokonima okwa geele Miriam, omumwayinakadhona gwaMoses. (Genesis 12:17; Numeri 12:9, 10; 2 Samuel 24:15) Okwa geele wo Aaisraeli ‘nomavu nomalega’ sho inaaya vulika kuye. (Deuteronomium 28:58-61) Poompito dhilwe Jehova okwa gamene oshigwana she komikithi. (Eksodus 23:25; Deuteronomium 7:15) Yamwe yomaapiya ye okwe ya aludha nokuli. Pashiholelwa, okwa aludha Job ngoka a li te ehamenene nokwa li a hala okusa. — Job 2:7; 3:11-13; 42:10, 16.

⁴ Osha yela kutya Jehova oku na oonkondo dhokwaaludha. Jesus naye ota vulu okwaaludha. Sho a li kombanda yevi, okwa li a aludha aantu mboka ye na oshilundu nenge oshintona. Okwa aludha aaposi naamboka ya sa ombanda. (Lesha Mateus 4:23, 24; Johannes 9:1-7) Iilongankondo mbyoka otayi tu ningitha tu kale twa yuulukwa iinima iiwanawa mbyoka Jesus te ke tu ningila muuyuni uupe. Pethimbo mpoka “kape na nando ogumwe muSioni ta ka tya: ‘Otandi ehama.’” — Jesaja 33:24.

⁵ Mbela shika otashi ti kutya uuna tatu ehamenene, Jehova nenge Jesus otaye tu aludha pashikumithalonga? Oshike tu na okudhiladhila manga inaatu hogolola epango lyontumba?

6. Ombiimbeli otayi ti ngiini kombinga yiikumithalonga mbyoka Aakriste ya li haya longo pethimbo lyaayapostoli?

⁶ Methelemumvo lyotango nenge pethimbo lyaayapostoli, Jehova okwa pele Aakriste ombepo ye ondjapuki ndjoka ya pe yamwe yomuyo oonkondo dhokulonga iikumithalonga. (Iilonga 3:2-7; 9:36-42) Pashiholelwa, oya aludha aantu noya popi omalaka gi ili nogi ili. (1 Aakorinto 12:4-11) Ihe ngaashi Ombiimbeli ye shi popya, iikumithalonga mbyoka oya hulu. (1 Aakorinto 13:8) Onkee ano katu na okutegelela Kalunga e tu aludhe nenge a aludhe aaholike yetu pashikumithalonga.

7. Episalomi 41:3 otayi tu tsu ngiini omukumo?

⁷ Ngele oto ehama, Jehova ote ku kwatha note ku hekeleke ngaashi a li e shi ningile aapiya ye yonale. Omukwaniilwa David okwa nyola a ti: “Aanelago oomboka ye na oshimpwiyu noohepele; Omuwa ote ya kwatha, uuna ye li muudhigu. Omuwa ote ya gamene e te ya shigi kiiponga; ote ya kaleke nawa moshilongo; ite ya ethele miikaha yaatondi yawo.” (Episalomi 41:1, 2) Ihe David ka li a hala okutya aantu yopethimbo lye mboka ya li ye na oshimpwiyu noohepele, itaya si nenge ya mone oshiponga. Ano nani Jehova oha kwathele ngiini aantu mboka? David okwa yelitha a ti: “Omuwa ote ya kwatha, uuna ye li muuvu note ya galulile uukolele wawo.” (Episalomi 41:3) Jehova oku shi uudhigu mboka aapiya ye ye na, noihe ya dhimbwa.  Ota vulu oku ya tsa omukumo noku ya pa uunongo. Jehova okwa shita olutu lwomuntu momukalo moka talu vulu okwaaluka kulwo lwene.

8. MEpisalomi 41:4, David okwa pula Jehova e mu ningile shike sho a li te ehamenene?

⁸ David ota hokolola mEpisalomi 41 sho a li te ehamenene nokwa li u uvite a nkundipala noku na oshimpwiyu komwenyo. Pethimbo mpoka opwa fa opo Absalom a li ta kambadhala oku mu umba ko koshipundi. David okwa li ta alukwa noonkondo noka li ta vulu okukondjitha Absalom. Okwa li e shi shi kutya uupyakadhi mboka owe etithwa keyono lyawo naBatseba. (2 Samuel 12:7-14) Okwa ningi po shike? Okwa galikana a ti: “Ngame onda ti: ‘Onda yono kungoye, Omuwa; sila ndje ohenda e to aludha ndje.’” (Episalomi 41:4) David okwa li e shi shi kutya Jehova okwe mu dhimina po nokwa li e mu inekela nonando okwa li te ehama. Ihe mbela okwa li a tegelela a aludhwe pashikumithalonga?

9. (a) Jehova okwa kwathele ngiini omukwaniilwa Hiskia? (b) David okwa li a tegelela Jehova e mu ningile shike?

⁹ Odhoshili kutya omathimbo gamwe Kalunga oha tokola okwaaludha aantu yamwe. Pashiholelwa, okwa aludhile omukwaniilwa Hiskia sho a li e li pokusa. Hiskia okwa tsikile okukala nomwenyo oomvula 15. (2 Aakwaniilwa 20:1-6) Ihe David ka li a tegelela a aludhwe pashikumithalonga. Pehala lyaashono okwa li a tegelela Kalunga e mu kwathele ngaashi ha kwathele ‘mboka ye na oshimpwiyu noohepele.’ David okwa li e na ekwatathano ewanawa naJehova, onkene okwa li ta vulu oku mu pula e mu hekeleke noku mu sile oshimpwiyu sho te ehama. Okwe mu pula wo e mu kwathele a aluke. Natse otatu vulu okupula Jehova e tu kwathele. — Episalomi 103:3.

10. Oshike sha ningilwa Trofimus naEpafroditus, naashika otashi tu longo shike?

¹⁰ Pethimbo lyaayapostoli, hAakriste ayehe ya aludhilwe pashikumithalonga, nonando omuyapostoli Paulus nooyakwawo yalwe oya li ye na oonkondo dhokwaaludha. (Lesha Iilonga 14:8-10.) Omuyapostoli Paulus okwa aludhile he yaPublius ngoka a li e niwe kolwiidhi te ehamenene. Paulus okwa “galikana, e te mu tenteke iikaha nokwe mu aludha.” (Iilonga 28:8) Ihe Paulus ina aludha ookuume ke ayehe mboka ya li taya ehama. Pashiholelwa, kuume ke Trofimus okwa li a yi pamwe naye molweendo lwuutumwa. (Iilonga 20:3-5, 22; 21:29) Sho a akukilwa kuuvu, Paulus ine mu aludha. Onkene Paulus okwa thigi Trofimus muMileto a tye po hwepo. (2 Timoteus 4:20) Kuume kaPaulus gulwe, Epafroditus, naye okwa kwatelwe kuuvu mboka waale wu mu lye. Ihe Ombiimbeli inayi popya kutya Paulus okwe mu aludha. — Aafilippi 2:25-27, 30.

11, 12. Ombiimbeli otayi popi shike kombinga yaLukas, notashi vulika a li a kwathele ngiini Paulus?

¹¹ Lukas ngoka a li he ende naPaulus okwa li ondohotola. (Iilonga 16:10-12; 20:5, 6; Aakolossa 4:14) Oku na okukala a li ha panga Paulus nooyakwawo uuna taye ehama, sho ye li molweendo lwawo lwuutumwa. (Aagalati 4:13) Ngaashi naanaa Jesus e shi popi, “aavu” oya pumbwa okuya kondohotola. — Lukas 5:31.

¹² Lukas ka li owala omugandjimayele kombinga yiinima yopaunamiti, ihe okwa li  a dheulilwa uundohotola. Ombiimbeli inayi popya kutya okwa dheulilwa peni nuunake. Ihe otayi popi kutya Paulus okwa tumu omakundo kAakolossa ga za kuLukas. Onkee otashi vulika Lukas a dheulilwa mosikola yuunamiti moLaodikea, oshilando shi li popepi naKolossa. Sho Lukas a nyola Evaangeli lye nosho wo embo Iilonga yAayapostoli okwa longitha iitya yopaunamiti. Molwaashoka okwa li ondohotola, okwa hokolola wo omahokololo ogendji ge na ko nasha naJesus ta aludha aavu.

13. Oshike tu na okudhimbulukwa manga inaatu pa omuntu omayele nenge manga inaatu landula omayele kombinga yepango?

¹³ Kunena, kapu na omumwatate ta vulu oku tu aludha pashikumithalonga. Ihe otashi vulika ye tu pe omayele nando inatu ge ya pula, oshoka oya hala oku tu kwathela. Odhoshili kutya omayele gamwe omawanawa. Pashiholelwa, Paulus okwa lombwele Timoteus a nwe omaviinu omashona. Timoteus okwa li e na uuvu womepunda, tashi vulika we etwa komeya ga nyata. * (Lesha 1 Timoteus 5:23.) Ihe otu na okukala twa kotoka. Otashi vulika omumwatate a kambadhale oku tu lombwela tu nwe omiti niihemba yontumba, tu lye nenge tu ethe po iikulya yontumba. Otashi vulika e tu lombwele kutya oya kwathelele omuntu gwaandjawo ngoka a li e na uupyakadhi wa fa woye. Ihe shoka itashi ti kutya nangoye otayi ke ku kwathela. Otu na okudhimbulukwa kutya nonando omuti nenge epango lyontumba olya kwathela aantu oyendji, otashi vulika li ku etele oshiponga. — Lesha Omayeletumbulo 27:12.

14, 15. (a) Aantu yeni tu na okukotokela? (b) Omayeletumbulo 14:15 otayi tu longo shike?

¹⁴ Atuhe otwa hala okukala tu na uundjolowele, opo tu tyapule onkalamwenyo notu longele Jehova nuudhiginini. Ihe tse aalunde, onkee itatu vulu okukala itaatu kwatwa komikithi. Uuna tatu ehama, otashi vulika pu kale pu na omiti dhi ili nodhi ili. Otu na uuthemba wokutokola kutya odhinipo twa hala. Mupyamunene, opu na aantu nomahangano gamwe, ngoka haga ti oga mona po omiti ndhoka tadhi panga uuvu wetu. Ihe elalakano lyawo okwiilikolela oshimaliwa oshindji. Otashi vulika nokuli ya tye aantu oyendji oya pangwa nomuti ngoka e taya ti po hwepo. Ngele oto ehama, otashi vulika wu kale wa hala okulongitha kehe shimwe shoka taku tiwa otashi ku pe uukolele nenge tashi ku kaleke nomwenyo omule. Ihe ino dhimbwa omayele ngoka ge li mOohapu dhaKalunga, ngoka taga ti: “Omuntu gwanathangwa oti itaale shaa ohapu, ihe onkotoki ota ndhindhilike oonkatu dhe.” — Omayeletumbulo 14:15.

¹⁵ Ngele otu na oondunge nenge twa kotoka, otatu ka dhinda nawa omayele kehe tatu  pewa, unene tuu ngele ngoka te ge tu pe ina dheulilwa nawa uunamiti. Otu na okwiipula ngeyi: ‘Ota ti ngaa kutya ovitamine ndjika, oshihemba nenge iikulya mbino oya kwathela aantu, ihe mbela oshoshili ngaa? Ihe nando oshoshili, ondi shi shi ngiini kutya nangame otayi ka kwathela ndje? Mbela tango ondi na oku yi konakona nawa nokupopya naantu mboka ye shi okupanga uuvu wandje?’ — Deuteronomium 17:6.

16. Otu na okutala kushike uuna tatu ningi omatokolo ge na ko nasha nepango?

¹⁶ Uuna tatu tokola kutya ekonakono lini nenge epango lini twa hala, otwa pumbwa “oondunge” (NW), nenge okulongitha omutse. (Titus 2:12) Shika osha simana, unene tuu ngele ekonakono nenge epango otali limbilike. Mbela omuntu ngoka tatu pula ota vulu ngaa oku tu lombwela kutya ekonakono nenge epango ndyoka ohali longo naanaa ngiini? Mbela efatululo lye otali limbilike? Oondohotola odhindji odha zimina ngaa kutya ekonakono nenge epango ndyoka ohali aludha shili? (Omayeletumbulo 22:29) Otashi vulika ishewe omuntu e tu lombwele kutya opwa monika omuti omupe kehala lyokokule, ngoka noondohotola dhetu kaadhi gu shi nokuli. Ihe mbela opu na ngaa uumbangi washa moshinima shoka? Aantu yamwe otashi vulika nokuli ye tu  pange nomiti ndhoka kaatu shi kutya odha longwa moshike nenge dhi na oonkondo dhaashiwike. Shika osha nika lela oshiponga. Dhimbulukwa kutya Kalunga ote tu londodha kaatu longithe ondjongo nenge uumpulile. — Deuteronomium 18:10-12; Jesaja 1:13.

17. Ohatu kala twi ihalela shike?

¹⁷ Pethimbo lyaayapostoli, olutuwiliki olwa nyolelele omagongalo ontumwafo lu ga lombwele iinima mbyoka ge na okuyanda. Pehulilo lyontumwafo ndjoka, olutuwiliki olwa ti: “Otamu opaleke, ngele tamu idhilike iinima mbika. Kalii po nawa!” (Iilonga 15:29) Nonando oohapu dhopehulilo lyontumwafo ndjoka odha nuninwa ashike okulaleka egongalo, otadhi tu dhimbulutha kutya inashi puka okukala twi ihalela uundjolowele.

18, 19. Otwa tegelela oku ka ningilwa shike muuyuni uupe?

¹⁸ Molwaashoka tse aalunde, itatu vulu okukala itaatu kwatwa komikithi. Uuna tatu ehama, katu na okutegelela Jehova e tu aludhe pashikumithalonga. Ihe otatu vulu okutegamena onakuyiwa, sho Kalunga te ke tu aludha thiluthilu. MEhololo 22:1, 2, omuyapostoli Johannes okwa popi kombinga yomulonga “gwomeya gomwenyo” nosho wo “omuti gwomwenyo,” ngoka tagu ka aludha aantu ayehe. Omuti ngoka kagu shi iihemba mbyoka tayi vulu oku tu aludha ngele otwe yi li ngashingeyi nenge monakuyiwa. Ihe iinima mbyoka Jehova naJesus taye ke tu ningila, opo tu vule okukala nomwenyo gwaaluhe. — Jesaja 35:5, 6.

¹⁹ Otwa tegelela ompito ndjoka ombwanawa nomwenyo aguhe. Ihe mongashingeyi, natu kale tu shi shi kutya Jehova oku tu hole noku wete nkene hatu kala tu uvite uuna tatu ehama. Otu na omukumo, ngaashi David, kutya ngele otwa kwatwa kuuwehame, Jehova ite tu etha. Ayehe mboka haya vulika kuye ote ya sile oshimpwiyu. — Episalomi 41:12.