JOSEF okwa fudhile mo ombepo ya tsima ompyu, nokwa li u uvite ezimba lyoongala nosho wo lyiimeno yilwe. Okwa li naahalithi mboka ya li taya taakana momalusilu gomatondokelo gomulonga gwaNiili. Kala andola wa fa wu wete aalumentu ya landulathana ya kayila oongamelo taye ende kooha dhomatondokelo gomeya yu uka kondoolopa yilwe yaEgipiti, haya ningi ye ende mokati kookandoko noku ya tukitha po. Josef okwa dhiladhila ishewe kuukwanegumbo waandjawo mboka wa li pehala kaapu na egameno kombepo komalusilu gaHebron, shoka sha li kokule naye ookilometa omathele; ngashingeyi okwa li muuyuni wi ili.

Kala andola wa fa wu wete oondjima tadhi kudhile dho otadhi kugu dha londa koondungu dhomilunga hoka haku zi oo-date nokomikwiyu. Josef ka li u uvite ko elaka lyaamboka ya li ye ende puyo. Otashi vulika a li a kambadhala a koneke iitya nomatumbulo ngoka omapu kuye. Otashi vulika wo a li e gi ilongo. Okwa li e shi shi kutya, kaandjawo ka li ta ka shuna ko we.

Josef okwa li poomvula 17 nenge 18, ihe okwa li a piti momashongo ngoka ga li taga vulu okutilitha aalumentu oyendji aakuluntu. Aamwahe mboka ya li ya sile Josef ondumbo molwaashoka oye a li e holike unene kuhe, okonyala ye mu dhipage. Ihe pehala lyaashono, oye mu landitha po kaahalithi mboka. (Genesis 37:2, 5, 18-28) Konima sho ye ende iiwike, aahalithi otashi vulika ya tameke okukala ya pupalelwa sho ye li pokuthika moshilando oshinene moka ya li ye na elalakano lyoku ka mona oshimaliwa ngele ya landitha po Josef nosho wo iinima yawo yilwe yongushu mbyoka ya li ye na. Josef okwa li i ikeelele ngiini kokukala a nika oluhodhi momwenyo gwe nosho wo kokukala u uvite nayi? Nongiini natse kunena tatu vulu okuyanda okukanitha eitaalo lyetu omolwomashongo nosho wo iiyimbi mbyoka hayi holoka moonkalamwenyo dhetu? Otu na oshindji okwiilonga kuJosef.

“Aaismaeli oya fala Josef kuEgipiti e taye mu landa po, naPotifar, elenga lyomukwaniilwa, omukuluntu gwaalangeli yuuwa.” (Genesis 39:1) Paufupi, ehokololo ndika lyOmbiimbeli otali tu kwathele tu dhiladhile kokusithwa ohoni kwomulumentu omugundjuka sho a li a landithwa po ishewe. Ka li tuu a talika ko e li oshinima showala. Otashi vulika tu kale twa fa tu wete Josef a landula mwene gwe omupe, elenga ekuluntu muuwa waEgipiti, taye ende momapandaanda mu na aantu yi ipyakidhila noongeshefa sho yu uka kehala epe hoka taku ka kala Josef.

KuJosef, egumbo olya li lya yooloka ko noonkondo kulyaandjawo. Okwa li a putukila muukwanegumbo mboka hawu tembukatembuka wa li hawu kala mootenda sho tawu litha oonzi dhawo. Ihe Omuegipiti, omuyamba Potiphar okwa li megumbo ewanawa, nolya paindwa nawa. Aalafululi oya popi kutya Aaegipiti yonale oya li ye hole iikunino yi li momalugumbo gomakuma mu na omiti dhomizile nosho wo uundama woopapilusa nomavo, niimeno yilwe yomomeya. Omagumbo gamwe oga li gi ikalela ge li miikunino, ge na uuwalanda wu li piiyelo mpoka omuntu ha kuutumba u uve ombepo, omakende ge li pombanda gokupitila ombepo, noondunda odhindji, mwa kwatelwa ondunda onene yokulila nosho wo omihandjo dhaapiya.

Mbela Josef okwa li a fuulwa sha pitilila kuuyamba mboka? Otashi monika sha fa haasho. Pehala lyaayihe mbyono, otashi vulika a li u uvite uuwike noonkondo. Aaegipiti oya li aakwiilongo kuye melaka, momizalo nokwiiyopaleka kwawo okwa li kwa yooloka ko kukwe, nuunene tuu elongelokalunga lyawo olya li lyi ili. Oya li haya galikana iikalunga iinene ya yoolokathana, haya anekele nokuninga iinima yuumpulile, noya li haya ningi iinima yi na ko nasha nokukala ya nyanyala eso ihe oya fa ngaa haye li nyanyukilwa nosho wo nomwenyo  konima yeso. Ihe opu na oshinima shimwe shoka sha li sha kwathele Josef kaa gwililwe po kuuwike. Ombiimbeli otayi tu lombwele tayi ti: “Omuwa [Jehova] okwa li pamwe naJosef.” (Genesis 39:2) Osha yela kutya Josef okwa li a mbumbulile Kalunga omutima gwe. Ombiimbeli otayi ti kutya “Omuwa [Jehova] oku li popepi naayehe mboka taye mu ithana.” (Episalomi 145:18) Josef okwa li ishewe a hedha popepi naKalunga ke momukalo guni?

Omulumentu nguka omugundjuka ine etha nando okuuva nayi ku mu gwilile po, nokwa li a lalakanene okulonga iilonga ye ngaashi ta vulu. Kungawo okwa li a ningi oshindji shoka she mu ningitha a yambekwe kuJehova, nanziya Josef okwa kala a hokiwa kumwene gwe omupe. Potiphar okwa li a ndhindhilike kutya omupiya nguka omugundjuka okwa li a yambekwa kuJehova, Kalunga koshigwana shaJosef, nopwaahe na omalimbililo omayambeko ngoka oga li ge eta uuyamba megumbo ndyoka lyOmweegipiti. Josef okwe endele ko ta hokiwa kumwene gwe Potiphar, sigo e mu pe a tonatele iinima ayihe.— Genesis 39:3-6.

Josef okwa tulila po aagundjuka mboka taya longele Kalunga kunena oshiholelwa sha simanenena. Pashiholelwa, uuna ye li kosikola, otashi vulika omathimbo gamwe yi iyadhe momudhingoloko moka yu uvite inaaya taambiwa ko nokaye shi yamo, muuyuni moka aantu ye hole uumpulile nokaye na etaloko ewanawa li na ko nasha nonkalamwenyo. Ngele owu li monkalo yi li ngawo, dhimbulukwa kutya Jehova ina lunduluka. (Jakob 1:17) Natango oha kala pamwe naamboka haya kala aadhiginini kuye nohaya kambadhala okulonga nuudhiginini momukalo ngoka tagu mu nyanyudha. Ohe ya laleke nuuyamba, nosho te ke ku ningila.

Ehokololo olyo tuu ndyoka olye tu lombwele kutya Josef okwa tsikile nokukoka. Omugundjuka ngoka okwa ningi omulumentweelela, nokwa li ishewe “omwaanawa a shitika.” Oohapu ndhoka otadhi gandja edhiladhilo kombinga yoshiponga shoka sha li shi li pokuya, molwaashoka omagano gokukala omwaanawa kolutu ohaga e ta okupewa eitulemo inaali pumbiwa nokaali li mondjila.

Josef okwa li a lenga uudhiginini; ihe omukulukadhi gwaPotiphar, ka li nando e wu lenga. Ombiimbeli otayi ti: “Omukulukadhi gwaPotifar okwa haluka Josef e te mu lombwele ta ti: ‘Tu lale.’” (Genesis 39:7) Mbela Josef okwa li i iyethele memakelo a lale nomukiintu nguka omupagani? Ombiimbeli inayi tu pa omatompelo tu dhiladhile kutya Josef okwa li kee na omahalo ngoka haga kala ge niwe kaalumentu aagundjuka nenge kutya, omukulukadhi nguka e ethelwa gwomukuluntu gwomuuwa omuyamba nokwa simana, okwa li kee shi omwaanawa pakutala. Mbela Josef okwa li te ki ipwililikila uushili mboka kutya mwene gwe ite ke shi tseya? Mbela okwa li ta ka yelekwa a dhiladhile kutya ota ka mona uuwanawa womaliko mboka wa li tawu ka za monyata yoluhondelo?

 Uushili owo kutya, itatu vulu okutseya ashihe shoka sha li tashi ingaana momadhiladhilo gaJosef. Ihe otu na uushili wa yela kutya oshike sha li momutima gwe. Uushili wa yela owu li meyamukulo ndyoka a li a gandja sho a ti: “Tala ko, mwene gwandje ke na oshimpwiyu shasha megumbo muka, oshoka omo ndi li. Okwa ningi ndje omutonateli gwaayihe e yi na. Megumbo muka ondi na mo oonkondo dhi thike pudhe, noina keelela ndje sha shilwe, kakele koye. Ondi longe ngiini uuwinayi u thike mpono, ndi yone kuKalunga?” (Genesis 39:8, 9) Kala andola wa fa wu wete omulumentu nguka omugundjuka sho ta popi oohapu ndhika i itula mo lela. Osha li she mu uvitha nayi nokuli okudhiladhila kwaashoka omukiintu ngoka a li a hala a longe. Omolwashike mbela?

Ngaashi Josef a popi, mwene gwe okwa li e mu inekela. Potiphar okwa li a tula egumbo lye alihe metonatelo lyaJosef, naashoka a li owala e mu keelele, omukulukadhi gwe. Josef okwa li ta ka yona po ngiini einekelo ndyoka? Okwa li e tonde okudhiladhila ku li ngaaka. Ihe okwa li a dhiladhila muule kombinga yoshinima shimwe sha nyata: okuyona kuKalunga ke, Jehova. Josef okwa li i ilongo oshindji kaavali ye kombinga yetaloko lyaKalunga li na ko nasha nondjokana nosho wo okukala omudhiginini kondjokana. Jehova okwa li a hokanitha aantu yotango nokwa li a popi sha yela nkene a tala ko ondjokana. Omulumentu nomukiintu oya li ye na okukala kumwe, okuninga “omuntu gumwe.” (Genesis 2:24) Mboka ya li ya kambadhala okuyona po ekwatathano ndyoka oya li taya ka ya moshiponga shokugeelwa kuKalunga. Pashiholelwa, aalumentu mboka ya ale ya ye moluhondelo nomukulukadhi gwaAbraham, ngoka a li yinakululululwa yaJosef, nosho wo omukulukadhi gwaIsak, kuku gwaJosef, oya ale yaye moshiponga oshinene. (Genesis 20:1-3; 26:7-11) Josef okwa li i ilongo oshiilongomwa shoka, nokwa li a hala e shi landule.

Omukulukadhi gwaPotiphar ka li a panda shoka u uvu. Omolwashike, dhiladhila owala sho a tindwa komupika nguka gwowala, nokuli a ti kutya shoka a li e mu pula a ninge “uuwinayi wu thike mpono”! Ihe nonando oongawo, omukulukadhi ina shuna omutse miipeta. Otashi vulika a li e ehamekwa omolwuuntsa we, nokwa li a tokola toko a ningithe Josef i itaale a lale naye. Kungawo okwa li u ulike ombepo ngaashi ndjoka yaSatana, ngoka a li a makele Jesus. Oonkambadhala dhaSatana odha ponyo wo, nopehala lyoku mu etha, Satana okwa li owala e “mu thigi po manga.” (Lukas 4:13) Onkee ano, aantu mboka aadhiginini oya pumbwa okukala ya tokola toko noya dhiginina. Josef naye osho a li i ihumbata ngaaka. Nonando onkalo osho ya kala ngaaka “esiku nesiku,” ka li a zimine. Ombiimbeli otayi ti: ‘Ina zimina.’ (Genesis 39:10) Ihe nonando oongawo, omukulukadhi gwaPotiphar okwa li a tokola toko oku mu yula.

Okwa li a kongo ompito mpoka aapiya ayehe ya li kaaye mo megumbo. Okwa li e shi shi kutya Josef ote ke ya mo megumbo a longe iilonga ye. Naasho e ya mo, okwa kambadhala oku mu yula. Okwa kwata onguwo ye, nokwe mu indile ishewe oshikando shahugunina, a ti: “Tu lale.” Josef okwa katuka onkatu nziya. Sho te mu ikanyuna, okwi inana po puye, ihe okwa kala a dhama onguwo ye. Okwa zi mo miikaha ye, nokwe yi mu thigile. Nokwa yi ondapo!— Genesis 39:11, 12.

Otashi vulika tu dhimbulukwe omayele ga nwethwa mo gomuyapostoli Paulus ngaka taga ti: “Yandeni oluhondelo.” (1 Aakorinto 6:18) Josef ina tulila po tuu Aakriste ayehe yashili oshiholelwa oshiwanawa! Onkalamwenyo otashi vulika yi tu thiminike tu ye popepyeelela naantu mboka inaaya simaneka oompango dhaKalunga dhopamikalo, ihe shoka itashi ti kutya otu na okwiiyethela momanwethomo ga puka. Kutya nduno otashi tu pula shike, otu na okuya ondapo.

Moshinima shaJosef, uupyakadhi owa li owundji. Omukulukadhi gwaPotiphar okwa li a hala oku mu shunithila uuwinayi. Nziyanziya okwa tameke ta kugu, ti ithana aapiya yalwe ye ye megumbo. Okwa ti kutya aniwa Josef okwa li a hala oku mu kwata koonkondo nokwa fadhuka po sho a kugu. Okwa kala po nonguwo yaJosef, opo u ulike aniwa kutya okwa ninga oshinima oshiwinayi nokwa li a tegelele omusamane gwe a galuke. Sho Potiphar e ya megumbo, omukulukadhi okwa popi iifundja yi li ngaaka, ta ti kutya omusamane gwe oye e na ondjo sho e eta omukwiilongo nguka megumbo lyawo. Potiphar okwa li i inyenge ngiini? Otatu lesha: “Okwa geye noonkondo,” e ta kwata Josef e te mu tula mondjedhililo.— Genesis 39:13-20.

Katu na ontseyo oyindji kutya oondholongo dhAaegipiti odha li dha tya ngiini pethimbo lyonale. Aalafululi oyi itsa iikulukuma yomahala ngoka, omakuma omanene ga kola mu na oondjedhililo nosho wo oondholongo dhomevi. Konima Josef okwa li a popi kutya ehala ndyoka oli li ngiini a longitha oshitya “ondjedhililo” nenge tu tye, ‘ondholongo,’ shoka tashi ti lela oshilambo,  shoka tashi gandja edhiladhilo lyehala li na omilema noka mu na onkalamwenyo. (Genesis 40:15, yelekanitha NW.) Omapisalomi oga ti kutya Josef okwa li ishewe a hepekwa, oga ti: “Oye okwa kwatwa e ta tulwa momalyenge nokwa tulwa olinga yosheela mothingo.” (Episalomi 105:17, 18) Omathimbo gamwe Aaegipiti oya li haya mangele omaako gaanandholongo konima okuza muungolo nomalyenge; yalwe oya li haya tulwa oolinga dhosheela moothingo. Josef ka li tuu a mono iihuna sho u ungaungiwa naye nayi ye inaa ninga sha sha puka!

Shimwe ishewe, uudhigu mboka kawa li owala wopakathimbo. Ehokololo otali tsikile ko tali ti kutya Josef ‘omo a kala e edhililwa moka.’ Okwa kala mo oomvula mehala ndyoka ewinayi! * Na Josef ka li we e shi ngele oku na esiku a mangululwe mo. Sho omasiku ngoka omawinayi ge ende taga ningi iiwike, taga ningi oomwedhi, okwa kala nokwiikeelela ngiini kaa kale kee na etegameno lyasha nokwa gwililwa po?

Ehokololo ndyoka otali tu pe eyamukulo tali shilipaleke: “Omuwa okwa li naJosef e te mu yambeke.” (Genesis 39:21) Kapu na nando omakuma goondholongo, omalyenge, oondholongo dhi li mevi tadhi keelele ohole yaJehova kaayi thike kaapiya ye aadhiginini. (Aaroma 8:38, 39) Otashi vulika tu dhiladhile kunkene Josef a li a mbumbulile omutima gwe ngoka gwa li muudhigu Tate gwe gwomegulu omuholike megalikano nokwa li a mono ombili nengungumano ndyoka hali gandjwa owala ‘kuKalunga, ngoka kuye haku zi ekwatho alihe.’ (2 Aakorinto 1:3, 4; Aafilippi 4:6, 7) Jehova okwa li ishewe a ningile Josef shike? Otatu lesha kutya okwa pitike ‘omukuluntu gwondjedhililo e mu hokwe.’

Otashi ulike kutya aanandholongo oya li ya pewa iilonga, na Josef okwa li a longo sha shoka sha li she mu yambekithitha kuJehova. Okwa li a longo nuudhiginini, ta longo ngaashi ta vulu mukehe oshilonga a li e shi pewa nokwa li e ethele iinima ayihe yilwe miikaha yaJehova. Omolwomayambeko ngoka a li a pewa kuJehova, Josef okwa kala i inekelwa nokwa simanekwa, ngaashi naanaa sho a li muukwanegumbo waPotiphar. Otatu lesha kutya: “Okwa langeke Josef, a ninge omutonateli gwoonkwatwa adhihe e te mu inekelele iinima ayihe mondjedhililo. Omukuluntu gwondjedhililo ka li we e na oshimpwiyu shasha, oshoka ayihe oya li miikaha yaJosef, nOmuwa okwe mu pe elago ewanawa mwaayihe e yi longo.” (Genesis 39:22, 23) Kasha li tuu sha hekeleke Josef okutseya kutya Jehova okwa li te mu sile oshimpwiyu!

Otashi vulika tu iyadhe moonkalo dha nika oshiponga nodha kitakana monkalamwenyo, nokuli tashi vulika tu ningilwe iinima yaali pauyuuki, ihe otatu vulu okwiilonga sha meitaalo lyaJosef. Ngele otwa kala popepi naJehova okupitila megalikano, nokukala aadhiginini kiipango ye, notatu longo nuudhiginini mwaashoka shi li mondjila momeho ge, ote ke tu yambeka. Kakele komayambeko ngoka ga li ga pewa Josef, Jehova oku tu nine nokuli omayambeko ge vule mpoka, teke tu yambeka shi vulithe po, ngaashi tatu ke shi lesha miitopolwa yomonakuyiwa moshifo shika.