Ombiimbeli oye tu lombwela kutya ehulilo otali ka kala lya kwatela mo ehanagulo lyuuyuni. Oya popi tayi ti: “Omasiku ngoka otaku kala uudhigu uunene inaau kala ko nale okuza ketameko lyuuyuni sigo ongashingeyi . . . Omasiku ngoka ando itaga fupipikwa, ando kaku na nando omuntu ta hupithwa.” (Mateus 24:21, 22) Kalunga okwe tu uvanekela kutya aantu oyendji otaya ka hupa. Ombiimbeli otayi ti: “Uuyuni niinima ayihe yi li mo otayi hulu po . . . , ihe ngoka ta longo shoka Kalunga a hala, ota kala e na omwenyo aluhe.” —  1 Johannes 2:17.

Ngele owa hala wu ka hupe pehulilo lyuuyuni mbuka ‘nokukala nomwenyo sigo aluhe,’ oshike wu na okuninga? Mbela owu na okutameka to gongele iinima yopamaliko nenge to ningi omalongekidho goye paumwene? Hasho nando. Ombiimbeli otayi tu ladhipike ya mana mo tu lalakanene iinima yopambepo. Otayi ti: ‘Ngele ano iinima ayihe otayi ka yonwa po pamukalo nguno, ne aantu omu na okwaadhika mwa tya ngiini? Omu na okweenda moondjenda oondjapuki nomiilonga yometilokalunga, sho mwa tegelela esiku lyaJehova’ (2 Petrus 3:10-12, yelekanitha NW.) Oshitopolwa shika otashi ulike kutya “iinima ayihe” otayi ka hanagulwa po, mwa kwatelwa aapangeli yuuyuni mbuka wa yonuka nosho wo mboka ya hogolola okupangelwa kuyo, pehala lyokupangelwa kuKalunga. Osha yela kutya ando otwa li tu na okugongela iinima yopamaliko, andola nani itashi ke tu hupitha kehanagulo.

Odhoshili kutya okuhupithwa kwetu okwa kwatela mo okwiigandjela Jehova Kalunga, okukala tu na eihumbato ewanawa nokuninga shoka tashi mu nyanyudha. (Sefanja 2:3) Inatu pumbwa okulandula oondjila dhoyendji kunena nokwiipwililikila omandhindhiliko ngoka gi iwetikile taga ningwa methimbo ndika lya simana. Pehala lyaashono, otu na ‘okukala twa tegelela esiku lyaJehova.’ Oonzapo dhaJehova otadhi vulu oku ku ulukila mOmbiimbeli, nkene to vulu oku ka hupa mesiku ndyoka twa tegelela.