“OMULUMENTU Omubrazil gwoomvula 24, gwedhina Sidnei, okwa li hi ipula ta ti: Omolwashike shi na okuningilwa ndje? Kalunga okwe ethele shike ndi shi ningilwe?” Sidnei okwa li a mono oshiponga sho ta thenunukile mokandama kokumbwinda. Okwa lemana nongashingeyi ohe ende mokatemba.

Okumona iihuna hoka haku holoka po uuna gumwe ngoka tu hole te ehama, a si, uuna pwa holoka iiponga yopaunshitwe niita ohayi tu ningitha tu yematele Kalunga. Shika kashi shi oshinima oshipe. Tatekulululwa Job okwa li a adhika kuupyakadhi wa landulathana. Omolwokwaahe shi sha, okwa li a pe Kalunga ombedhi a ti: “Kalunga, otandi ku kugile ekwatho, ihe ito yamukula; otandi ku galikana, ihe ngoye ito tala ndje. Ongoye wa pilukile ndje; nowa ponokele ndje noshikaha shoye shoonkondo.” — Job 30:20, 21.

Job ka li e shi kutya uupyakadhi otawu zi peni, nomolwashike e li muwo. Shoka tashi nyanyudha, Ombiimbeli oye tu lombwela kutya omolwashike iinima yi li ngaaka hayi holoka nankene tu na okuungaunga nayo.

Ombiimbeli otayi popi Kalunga tayi ti: “Oye emanya; iilonga ye oyolela, noondjila dhe adhihe odhu uka. Kalunga omudhiginini kee na uugoyoki, omuyuuki nomunashili.” (Deuteronomium 32:4) Mbela otatu vulu ngaa okukala neinekelo nenge tu shi lela kutya Kalunga ngoka “omuyuuki nomunashili” okwa shita aantu nelalakano ya mone iihuna? Nenge okwe ya shita nelalakano a kale te ya geele nomaupyakadhi, opo yi itedhulule?

Mepingathano naashoka, Ombiimbeli otayi ti: “Omuntu ngele a adhika kemakelo lyoku mu yeleka, ina tya: ‘Emakelo ndika olya zi kuKalunga.’ Oshoka Kalunga iha makelwa kuuwinayi noiha makele nando omuntu.” (Jakob 1:13) Ombiimbeli otayi ti kutya Kalunga okwa shiti aantu ya gwanenena. Okwa pe aantu yotango, Adam naEva oshikunino oshiwanawa, shi na iinima ayihe. Okwa li wo e ya pe iilonga tayi nyanyudha. Kalunga okwe ya lombwele a ti: “Valathaneni, ne mu indjipale nokuudha evi alihe. Li tuleni mepangelo lyeni.” Adam naEva kaya li ye na etompelo lyokuyematela Kalunga. — Genesis 1:28.

Ihe kunena, ombanda yevi otayi lilwa kukehe gumwe, oshinima shoka sha kala tashi kemwa olule. Osha popiwa nawa kOmbiimbeli kutya: “Sigo ongashingeyi kehe shimwe shomeshito otashi fudhagana kuuwehame.” (Aaroma 8:22) Oshe ende ngiini?

Opo tu mone kutya omolwashike, otwa pumbwa okutala kutya olye e etitha okumona iihuna. Adam naEva oya hekwa komuyengeli omunashipotha, ngoka a ka ninga Satana Ondiyapoli. Kalunga okwa lombwele Adam naEva kutya kaye na okulya “komuti gwokutseya uuwanawa nuuwinayi.” Ihe yo inaya pulakena. Oya pulakene kOndiyapoli sho ya lombwele Eva kutya itaya si shili, kutya nduno nee itaya vulika kuKalunga. Satana okwa lundile wo Kalunga kutya ina pa aantu uuthemba wokutokola kuyo yene shoka sha puka naashoka shi li mondjila. (Genesis 2:17; 3:1-6) Satana okwa fundju sho a ti kutya aantu otaya ka kala ye li nawa ngele itaya pangelwa kuKalunga. Oshinima shoka oshe e ta po epulo lya simana kutya, mbela Kalunga okwa gwana tuu shili okupangela aantu?

Ondiyapoli oye e titha po ishewe uupyakadhi wulwe. Oya lundile aantu kutya otaya longele owala Kalunga molwaashoka yi ihole yoyene. Okwa li a lombwele Kalunga kombinga yaJob ngoka a li omudhiginini a ti: “Oshoka owala ho mu gamene pamwe negumbo lye naashihe shoka e shi na . . . Ando u yelekele e to ganeke oshikaha shoye, u yone po eliko lye, nena ote ku iteka po mbala.” (Job 1:10, 11) Satana okwa li a popi kombinga yaJob, ihe elundilo lye olya kwatela mo aantu ayehe kutya otaya longele Kalunga omolwokwiihola mwene.

Olye ta ka kandula po uupyakadhi mboka palumwe nosigo aluhe? Kalunga, ngoka omunaendungeelela, ota ka ninga po sha. Shoka ta ka ninga itaashi ke tu yemateka. (Aaroma 11:33) Okwe etha aantu ya pangele uule wokathimbo, opo ku monike kutya olye lela a gwana okupangela.

 Oonkalo dhuuyuni ndhoka dha nayipala otadhi ulike kutya aantu itaya vulu okwiipangela yoyene. Omapangelo muuyuni inaga ponya owala okweeta ombili, egameno nenyanyu, ihe oga yonagula wo evi hoka tu li. Shika otashi ambidhidha uushili wa simana mboka wu li mOmbiimbeli kutya: “Kaku na omuntu hu utha okukalamwenyo kwe.” (Jeremia 10:23) Epangelo lyaKalunga olyo owala tali ka eta ombili tayi kalelele, enyanyu lyashili nokuhulitha po okumona iihuna hoka ku li mokati ketu kunena. Kalunga ote ke shi ninga molwaashoka ndyoka olyo lya li elalakano lye lyopetameko sho a shiti aantu. — Jesaja 45:18.

Kalunga ote ke shi enda ngiini? Dhimbulukwa kutya Jesus okwa li a longo aalanduli ye ya galikane taya ti: “Oshilongo shoye nashi ye, Ehalo lyoye nali gwanithwe kombanda yevi wo ngaashi megulu.” (Mateus 6:10) Uushili owo kutya, pethimbo lyo opala, Kalunga ota ka kutha po iinima ayihe mbyoka hayi etitha okumona iihuna, okupitila mUukwaniilwa we. (Daniel 2:44) Oluhepo, omikithi neso otayi ka hulithwa po. Ombiimbeli otayi ti kutya Kalunga “ota hupitha ohepele ngo te mu lilile.” (Episalomi 72:12-14) Ombiimbeli oyu uvaneka kutya: “Kape na nando ogumwe muSion ta ka tya: ‘Otandi ehama.’” (Jesaja 33:24) Jesus okwa ti: “Ethimbo otali ya, uuna oonakusa ayehe mboka ye li moombila, taa ka uva ewi lye.” Kalunga ota ka dhimbulukwa oonakusa. (Johannes 5:28, 29) Ngoka omauvaneko omawanawa lela!

Konima yoomvula 17 sho a mono oshiponga, Sidnei ngoka a tumbulwa petameko lyoshitopolwa shika, okwa ti: “Ihandi pewe Jehova Kalunga ombedhi omolwoshiponga shoka, ihe otandi shi zimine kutya petameko oye nda li handi pe ombedhi. Omasiku gamwe ohandi kala nda gwililwa po noonkondo, nohandi lili uuna nda dhiladhila kombinga yuulema wandje. Ihe mOmbiimbeli ondi ilongo mo kutya oshiponga shoka nda mono kashi shi egeelo lya za kuKalunga. Ombiimbeli otayi ti: ‘Ethimbo neuthilo otali tu adha atuhe.’ Okugalikana kuJehova nokulesha omanyolo gontumba osha nkondopaleka ndje pambepo nosha kwathela ndje ndi kale ndi na etaloko ewanawa.” — Omuuvithi 9:11; Episalomi 145:18; 2 Aakorinto 4:8, 9, 16.

Okukaleka momadhiladhilo kutya omolwashike Kalunga e etha okumona iihuna ku kale po nankene taku ka hulithwa po, otashi tu kwathele kaatu kale twe mu yematela. Kalunga ote tu shilipaleke kutya “ota futu ayehe mboka taye mu kongo.” Kapu na nando omuntu ngoka i inekela Kalunga nOmwana ta ka yemetekwa. — Aahebeli 11:6; Aaroma 10:11.