Opu na oshinima shimwe shoka hashi yoolola ko unene Oonzapo dhaJehova komaitaalo galwe. Oshike shono? Iilonga yokuuvitha egumbo negumbo, pomahala gomalandithilo naapuhe mpoka tapu inyenge aantu. Omolwashike hatu shi ningile?

Ohatu shi ningi, opo tu simanekithe Kalunga notu longe aantu edhina lye. (Aahebeli 13:15) Ohatu shi ningi wo molwaashoka ohatu vulika kelombwelo lyaJesus ndyoka tali ti: “Indeni ano, ka ningeni aantu ayehe aalongwa yandje, . . . ne mu ya longe okudhiginina ayihe mbyoka nde mu lombwele.” —  Mateus 28:19, 20.

Shimwe ishewe, tse otu hole aantu ooyakwetu. (Mateus 22:39) Otu shi kutya aantu oyendji oye na omaitaalo gawo, na hakehe gumwe e na ko nasha netumwalaka lyaKalunga ndyoka hatu uvitha. Oshikwawo, ohatu uvitha molwaashoka otu shi kutya aantu otaya ka hupithwa owala uuna taya vulika ketumwalaka ndyoka li li mOmbiimbeli. Shika osho hashi tu ningitha tu tsikile nokuuvitha ngaashi Aakriste mboka ya li ko omimvo 2000 nasha dha ka pita. Ombiimbeli otayi ya popi tayi ti: “Oya tsikile okulonga nokuuvitha motempeli nomomagumbo elaka etoye ndyoka tali ti kutya Jesus oye Kristus.” —  Iilonga 5:41, 42.

Aantu oyendji mboka haya lesha omambo niifo yetu, kaye shi Oonzapo dhaJehova. Yo oyendji mboka hatu konakona nayo Ombiimbeli, oye li iilyo yomalongelokalunga gi ili nogi ili. Ihe ohaya kala ya pandula sho hatu ya talele po.

Otashi vulika wu na natango omapulo galwe kombinga yetu. Opo wu mone omayamukulo, ninga iinima tayi landula:

• Pula Oonzapo dhaJehova dho dhene.

• Inda kepandja lyetu lyokointaneta, www.dan124.com/ng.

• Gongala pamwe natse, ito ka futa sha, na kehe gumwe okwa manguluka okuya a pulakene.