IITOPOLWA YI IKOLELELA KOSHIPALANYOLO SHOKOMBANDA
Oonzapo dhaJehova odho oolye?
Omukiintu Omwaamerika gwedhina Becky okwa ti: “Onda tseya Mike ethimbo ele ngashingeyi. Oku li Onzapo yaJehova. Ihe eitaalo ndyoka ohali limbilike ndje. Ano Jehova olye naanaa? Omolwashike Oonzapo ihaadhi dhana omasiku gomafudho nenge gomatango omanene? Mbela Mike oku li moshiveva?”
Omulumentu Omukanada hi ithanwa Zenon okwa ti: “Sho aashiinda ya tameke okukonakona Ombiimbeli nOonzapo dhaJehova, onda li tandi ipula: ‘Ano edhina Oonzapo dhaJehova otali ti naanaa shike? Onda li ndi wete edhina ndyoka lyi ipa okwiithanwa elongelokalunga.’”
Omusamane Omwaamerika gwedhina Kent okwa ti: “Ngame nanekulu lyandje otwa li hatu dhiladhila kutya Oonzapo dhaJehova ohadhi talele po aantu, opo dhi ya ningithe ya kale yu uvite ye na ondjo, sho inaaya ya komambo. Otwa li tatu dhiladhila kutya ngele oongeleka oonene kadhi na lela elongo ndyoka twa hala, noshimpaga showala shOonzapo dhaJehova itashi kala nelongo ndyoka.”
Omukiintu Omudenmark gwedhina Cecilie okwa ti: “Ngame kanda li ndi shi kutya [Oonzapo] odho oolye nodhi itaala shike.”
Otashi vulika ho dhi mono tadhi uvitha egumbo negumbo nenge pomahala gomalandithilo. Nenge tadhi gandja iileshomwa yopaMbiimbeli nokulesha naantu Ombiimbeli nopwaahe na oku ya futitha. Otashi vulika oshifo shika we shi pewa kugumwe gwomudho, ihe owu li natango to ipula kutya Oonzapo dhaJehova odhi itaala shike. Mbela owu na etaloko lya fa lyaantu mboka ya tumbulwa metetekelo?
Ngele owu na omapulo nomalimbililo, openi to vulu okumona omayamukulo? Oshike tashi ke ku kwathela wu tseye shoka Oonzapo dhaJehova dhi itaala? Mbela ohadhi futwa sho tadhi uvitha? Openi hadhi adha iimaliwa yokutunga nokukaleka po omatungo gadho? Omolwashike hadhi uvitha egumbo negumbo nopomahala gomalandithilo?
Meme Cecilie okwa tsikile ko ta ti: “Onda lesha oshindji kointaneta kombinga yOonzapo dhaJehova. Ondu uva omitotolombo dhontumba niipopiwa mbyoka tayi dhi popile muuwinayi. Okuza mpono, onda kala ndi dhi tonde.” Konima yethimbo onda ka popya nadho mwene, nodha li dha pe ndje omayamukulo nde ga hokwa.
Mbela ino hala okumona omayamukulo gothaathaa kombinga yOonzapo dhaJehova? Ngele osho, dhi mona moshitopolwa sheni. Oshifo shika osha nyanyangidhwa kehangano lyadho. (Omayeletumbulo 14:15) Iitopolwa tayi landula ko, otayi ke ku kwathela wu uve ko kutya Oonzapo dhaJehova odho oolye, odhi itaala shike nosho wo iilonga mbyoka hadhi longo.
