OMANGA Jesus te ende moshilongo, ye ota aludha aavu. Onkundana yiikumithalonga mbika oyi ihanene momikunda nomiilando ayihe yomomudhingoloko. Ano aantu otaye eta iitiningili naaposi noombolo kuye, nosho wo yalwe oyendji mboka taya alukwa. Jesus nota aludha ayehe.

Oomvula odhindji dhi vulithe pundatu odha piti po okuza sho Johannes a ninginitha Jesus. Jesus nota ti kaayapostoli ye kutya meni lyokathimbo ye ota ka ya kuJerusalem, hoka ye ta ka dhipagwa, nopo nduno ota ka yumuka kuusi. Pethimbo opo tuu mpoka Jesus ota tsikile okwaaludha aavu.

Esiku limwe Jesus ota longo mEsabati. Esabati olyo esiku lyevululuko lyAajuda. Omukiintu ngoka ngoye u wete mpaka, okwa li a ala noonkondo. Ye okwe ende uule woomvula 18 a andalala, noka li ta vulu okuthikama u ukilila. Jesus ota tenteke oshikaha she kuye, nota tameke okweenda u ukilila. Ye okwa aluka!

Shika otashi geyitha aawiliki yomalongelokalunga. ‘Opu na omasiku gahamano ngoka tse tu na okulonga,’ gumwe gwomuyo ti igidha mongundu yaantu. ‘Ngoka ogo omasiku gokuya mu aludhwe, hamEsabati!’

Ihe Jesus ota yamukula: ‘One aalumentu aawinayi. Kehe gumwe gwomune oha mangulula mo okasino ke note ka fala komeya ka ka nwe mEsabati. Omukiintu nguka, ngoka a li a ala uule woomvula 18, oye ke na nduno okwaaludhwa mEsabati?’ Eyamukulo lyaJesus otali sitha ohoni aalumentu mbano aawinayi.

Konima Jesus naayapostoli ye otaa yi molweendo lwokuya kuJerusalem. Sho taye ya owala pondje yoshilando shaJeriko, aakwanaluhepo yaali aaposi otayu uvu kutya Jesus ota piti po. Ano yo otayi igidha: ‘Jesus, tu kwatha!’

Jesus oti ithana aalumentu aaposi ye ye kuye nota pula: ‘Omwa hala ndi mu ningile shike?’ Yo otaa ti: ‘Omuwa, tonatitha omeho getu.’ Jesus ota gumu omeho gawo, nombala yo otaa vulu okumona ko! Owa tseya mbela kutya omolwashike Jesus ta longo iikumithalonga ayihe mbino? Omolwashoka ye oku hole aantu nokwa hala yo ye mu itaale. Ano tse otatu vulu okukala nuushili kutya uuna ye ta pangele oye Omukwaniilwa itapu ka kala we gumwe kombanda yevi ta alukwa.