Pethimbo lyuukwatwa wawo muBabilon Aaisrael oya li ye na omayeleko ogendji keitaalo lyawo. Sadrak, Meshak naAbednego oyu umbilwa meziko lyomulilo gwa hanya, ihe Kalunga okwe ya kutha mo nomwenyo. Konima, sho Babilon sha dhengwa kAamedia nAapersia, Daniel oku umbilwa mekololo lyoonime, ihe Kalunga okwe mu gamene wo mokumutikitha omakana goonime.

Lwahugunina omukwaniilwa gwAapersia Kores okwa mangulula Aaisrael. Yo oya shuna koshilongo shaandjawo oomvula 70 komutse konima sho yo ya li ya falwa kuBabilon oyo oonkwatwa. Shimwe shomiinima yotango mbyoka yo ya longo konima yokugalukila kwawo kuJerusalem osha li okutameka okutunga otempeli yaJehova. Ihe aatondi oyo ya li ya kankameke mbala iilonga yawo. Ano osha li oomvula 22 lwaampono sho yo ya galukile kuJerusalem opo lwahugunina yo ya mane otempeli.

Tashi landula ko otatu ki ilonga kombinga yolweendo lwaEsra okuya kuJerusalem a ka opaleke otempeli. Osha li lwopoomvula 47 konima sho otempeli ya pu. Opo nduno oomvula 13 konima yolweendo lwaEsra, Nehemia okwa kwathele okutungulula omankolokuma omateki gaJerusalem. Oshitopolwa OSHITITANO otashi hokolola oomvula 152 dhondjokonona sigo opethimbo ndyoka..