Ontopolwa 57

Olukeno molwaamboka ya mona iihuna

KONIMA sho Jesus a nyana Aafarisayi molwomithigululwakalo dhawo dhokwiiholamwene, ota zi po pamwe naalongwa ye. Inapu pita ethimbo ele, ngaashi tashi vulika to dhimbulukwa, oonkambadhala dhe a ze po pamwe naalongwa ye ya ka fudhe po kashona, odha li dha piyaganekwa sho engathithi lyaantu lye ya mono. Ngashingeyi ye naalongwa ye otaya zi po taya yi kiitopolwa yaTiro naSidon, pu na ookilometa odhindji okuza mpoka wu uka kolundume. Osha yela kutya nduka olwo aluke olweendo ndoka Jesus ta yi pamwe naalongwa ye kombanda yoongamba dhaIsrael.

Sho a mono egumbo moka ta kala, Jesus ota tseyitha kutya ye ina hala aantu ya tseye kutya oye li peni. Ihe nokuli moshitopolwa shika shaamboka kaaye shi Aaisrael, ita vulu okukala inaa monika. Omukiintu Omugreka, ngoka a valelwa muka muFoinikia shaSiria, ote mu mono nota tameke oku mu hehela ta ti: “Omuwa, omuna gwaDavid, sa ndje ohenda! Omumwandje omukadhona [ota] hepekwa nayi kompwidhuli.” Ihe Jesus ite mu yamukula nando osho oshitya shimwe.

Hugunina, Jesus ota lombwelwa kaalongwa ye taya ti: “Mu utha, ote tu kudhile konima yetu.” Jesus ote ya yelithile kutya omolwashike te mu ipwililikile, ta ti: “Ongame inaandi tuminwa okaantu yalwe, okoonzi ndhoka dha kana dhomegumbo lyaIsrael, odho adhike.”

Ihe omukiintu ita si uunye. Ota hedha kuJesus nota tsu oongolo koshipala she. Ote mu indile ta ti: “Omuwa; kwatha ndje!”

Omutima gwaJesus itagu inyengithwa tuu keindilo lya hwama lyomukiintu ngoka! Ihe otu ulike ishewe koshinakugwanithwa she shotango, okukwathela oshigwana shaKalunga Israel. Osha yela kutya pethimbo opo tuu mpono, opo a tale ngele omukiintu oku na eitaalo, ota longitha etaloko li na okayoya lyAajuda nkene haya tala ko mboka yomiigwana yilwe ta ti: “Inashi opala okukutha oshikwiila shaanona noku shi umbila uumbwena.”

Dhoshili, Jesus ota hololele mboka kaaye shi Aajuda olukeno lwe newi lye lyohenda noneinyengo lyoshipala she. Ota nengeneke nokuli efaathanitho lyAapagani noombwa moku ya luka ‘uumbwena.’ Pehala lyokuninga omwenyo omwiinayi, omukiintu ota popi shi na ko nasha nokupopya kwaJesus kombinga yokayoya hoka taka ningilwa Aajuda nota popi neifupipiko ta ti: “Eeno, Omuwa; nuumbwena ohau li uundjagumuke mbuka hau gu koshililo shooyene yawo.”

“Omukiintu, eitaalo lyoye enene,” Jesus ta ti. “U ningilwe ngashika wa hala.” Nosho tashi ningwa! Sho a galukile kegumbo lye, okwa adha omwanakadhona e li kombete, a aluka thiluthilu.

Jesus naalongwa ye otaya zi koshitopolwa shokomunkulofuta shaSidon yu uka handiyaka yomulonga gwaJordan. Osha yela kutya otaya taaguluka omulonga gwaJordan pehala lyontumba kolundume lwEfuta lyaGalilea notaye ya moshitopolwa shaDekapolis shi li kuuzilo wefuta. Moka otaya londo kondundu, ihe engathithi lyaantu oli ya wete notali eta iilema, iitiningili, aaposi naathitamawi, naavu niimbembe nayalwe oyendji kuJesus. Otaye ya langeke poompadhi dhaJesus, note ya aludha. Aantu otaye shi kuminwa, sho ye wete aathitamawi taya popi, iitiningili tayi ende naaposi taa mono ko; notaya hambelele Kalunga kaIsrael.

Jesus ota gandja eitulomo lyi ikalekelwa komulumentu gumwe ngoka omuthitamatsi noiha vulu naanaa okupopya. Aathitamatsi olundji ohaya ngwangwana nuupu, unene tuu ngele ye li mokati kengathithi lyaantu. Jesus otashi vulika elyalyakano enene lyomulumentu nguka e li wete. Onkee ano Jesus te mu kutha mo nolukeno mengathithi lyaantu ye ki ikalele. Sho ye li oyo ayeke, Jesus ote mu ulukile shoka te ke mu ningila. Ota tsu ominwe dhe momakutsi gomulumentu, nokonima sho a hiya omayeye, ota gumu elaka lye. Opo nduno Jesus ota ligamene kegulu, ta fudha olule nota ti: “Thituluka.” Ano omakutsi gomulumentu otaga thituluka, nota vulu okupopya nawa.

Konima sho Jesus a ningi omaaludho ngano ogendji, omangathithi gaantu otagi inyenge nolupandu. Otaga ti: “Ayihe okwe yi longo nawa, oombolo ohe ya thitulula omakutsi [naathitawi] ohe ya ningi taa popi.”—Yelekanitha OB-1986. Mateus 15:21-31; Markus 7:24-37.

▪ Omolwashike Jesus itaa aludhile nziyanziya okanona komukiintu Omugreka?

▪ Konima yaashino, openi Jesus ta fala aalongwa ye?

▪ Ongiini mbela Jesus ta kwathele nolukeno omulumentu omuthitamatsi ngoka ihaa vulu naanaa okupopya?