Ontopolwa 77

Ompata yi na ko nasha nuuthiga

OSHA yela kutya aantu oye shi shi kutya Jesus ota li omwiha megumbo lyOmufarisayi. Onkee ano aantu omayuvi otaya gongala pondje notaya tegelele Jesus a ze mo. Aantu otaya pulakene Jesus nehalo enene nosho wo nolupandu, inaya fa Aafarisayi mboka haye mu pataneke nohaya tegamene a popye sha sha puka opo ya kambadhale oku mu kwata.

Jesus ota popi tango naalongwa ye ta ti: “Kotokeleni efulika lyaafarisayi nokutya uufudhime wawo.” (OB-1986) Ngaashi shu ulikwa pokulya, omulandu aguhe gwelongelokalunga lyAafarisayi ogu udha iihelele. Ihe nonando uuwinayi wAafarisayi owa siikilwa keimonikitho lyetilokalunga lyokombanda, hugunina otau ka hololwa. Jesus ota ti: “Kaku na shoka sha siikilwa [itaashi] siikululwa, nokaku na shoka sha holekwa, [itaashi] hololwa.”

Jesus ote endulula ano eladhipiko ndyoka a gandjele kwaamboka 12 sho e ya tumine molweendo lweuvitho kuGalilea. Ota ti: “Inamu tila mboka haa dhipaga olutu nokaye na sho taa vulu we okuninga.” Oshoka Kalunga iha dhimbwa nando enza limwe, Jesus ota shilipaleke aalanduli ye kutya Kalunga ite ke ya dhimbwa. Ota ti: “Nongele taye mú fala koosinagoga koshipala shaawa noshaakuluntu, . . . Ombepo Ondjapuki otayi mú longo pethimbo ndyoka shono mu na oku shi popya.”

Omulumentu gumwe ota popi mengathithi lyaantu. Ote mu galikana ta ti: “Omuhongi, lombwela omumwameme, tu topolelathane uuthiga.” Ompango yaMoses otayi ti kutya omumati osheeli oku na okupewa iitopolwa yuuthiga iyali, onkee ano inashi pumbiwa pu kale oontamanana. Ihe osha yela kutya omulumentu okwa hala oshindji kaashi shi owala oshitopolwa she shuuthiga shoka e na okupewa paveta.

Jesus ota tindi shi li mondjila okukala a kwatelwa mo. Ota pula ta ti: “Mentu ngoye, olye a tula ndje, ndi ninge omuuthi nomutokoli guuthiga weni?” Opo nduno ota gandja ekumagidho ndika lya simana noonkondo kengathithi lyaantu ta ti: “Lungameni, ne mu angale uuhalu weliko, oshoka omwenyo gwomuntu ihagu hupithwa kegwano lyeliko lye.” Eeno, kutya nduno omuntu oku na iinima oyindji yi thike peni, ye ona si e ta thigi po ayihe. Opo a tse omuthindo oshili ndjika nosho wo okuulika nkene sha nika uugoya okukala waa he na edhina ewanawa puKalunga, Jesus ota longitha eudhi. Ota yelitha ta ti:

“Epya lyomuyamba gwontumba olya vala nawa. Oye nokwa dhiladhila momwenyo gwe: Otandi ningi ngiini, oshoka kandi na mpoka tandi pungula iilya yandje? Nokwa ti: Otandi ningi ngeyi, otandi hanagula po iigandhi yandje note tungu po iinene e tandi pungula mo iilya yandje neliko lyandje e tandi lombwele omwenyo gwandje: omwenyo, wa pungulilwa iipalutha oyindji yomimvo odhindji, fudha ihe, lya, nwa, ngu u nyanyukwe. Ihe Kalunga okwe mu lombwele: Egoya ngoye, uusiku mbuka wonena omwenyo gwoye oto gu kuthwa, ano ayihe mbino we yi ilikolele, [otayi] ningi yalye?”

Lwahugunina Jesus ota ti: “Osho ta ningwa ngoka ti ilikolele eliko, ye ke na uuyamba puKalunga.” Nonando aalongwa otashi vulika inaaya kwatwa kuugoya wokwiigongelela uuyamba, molwiimpwiyu yonkalamwenyo yesiku kehe, yo otaya vulu okukutha ko eitulomo lyawo nuupu kokulongela Jehova nomutima aguhe. Onkee ano Jesus ota longitha ompito okweendulula omayele omawanawa ngoka a gandjele pwa pita omvula netata lwaampono mEuvitho lyokOndundu. Ota lombwele aalongwa ye ta ti:

“Onkee ano tandi mú lombwele: inamu sila oomwenyo dheni oshimpwiyu, mu lye shike, nomalutu geni, mu zale shike. . . . Taleni omakola, go ihaga kunu noihaga teya nongaashi gaa na oondunda dhokupungula mo iinima nenge iigandhi, Kalunga note ga palutha. . . . Taleni oongala dhomavo nkene hadhi koko, dho itadhi longo noitadhi yogoha. Ihe otandi mú lombwele: naSalomo meopalo lye alihe ina zala kwo opala ongoyimwe yadho. . . .

“Nane wo inamu konga shono, mu shi lye nenge mu shi nwe, ne inamu lalakanena mbyoka iileeleka. Oshoka ayihe mbyoka ohayi kongwa kaapagani yomuuyuni, ihe Ho yeni oku shi shi mwe yi pumbwa. Ihe kongeni [uukwaniilwa waKalunga, KB], naambyoka otamu yi gwedhelwa po.”

Unene tuu pomathimbo guudhigu wopamahupilo oohapu dhaJesus odhi na okudhiladhilwa nawa. Omuntu ngoka ta kala e na oshimpwiyu sha pitilila shi na ko nasha noompumbwe dhe dhopanyama nota tameke okusa uunye omalalakano gopambepo, muushili wo wene, otu ulike kutya ye ke na eitaalo moonkondo dhaKalunga okusila aapiya Ye oshimpwiyu. Lukas 12:1-31; Deuteronomium 21:17.

▪ Otashi vulika omolwashike omulumentu ta pula Jesus kombinga yuuthiga, nekumagidho lini Jesus ta gandja?

▪ Eudhi lini Jesus ta longitha, noshike tashi ilongwa mulyo?

▪ Omayele geni Jesus te endulula, nomolwashike ge eleka?