Ontopolwa 88

Omuyamba naLasarus

JESUS okwa adhika opo a popi naalongwa ye kombinga yelongitho nawa lyeliko lyopanyama noku ya yelithila kutya itatu vulu okukala aapiya yalyo nopethimbo opo tuu mpono aapiya yaKalunga. Aafarisayi otaya pulakene wo Jesus, notaya tameke oku mu sheka oshoka oye hole iimaliwa. Onkee ano te ya lombwele ta ti: “One tuu mboka hamu ipe uuyuuki montaneho yaantu, ihe Kalunga e lwete oomwenyo dheni, oshoka shono sha simana paantu, osho iihuna koshipala shaKalunga.”

Ethimbo olya thikana opo onkalo yi pilukile aantu mboka aayamba miiniwe yuuyuni, moonkondo dhopapolotika nosho wo mokupangela nomokunwetha mo elongelokalunga. Oye na okushundulwa. Ihe aantu mboka taya zimine kutya oya pumbwa sha shopambepo, oye na okulengwa. Jesus ota popi elunduluko lya tya ngaaka sho ta tsikile nokulombwela Aafarisayi ta ti:

“Ompango nooprofeti odha hulile muJohannes [Omuninginithi], kesiku ndyoka [uukwaniilwa waKalunga notau, KB] uvithwa ihe, ayehe notaa matukile mo koonkondo. Okuhula po kwegulu nevi okupu ku vulike kokugwa pevi nando okanyolo kamwe komompango.”

Aanongoraamata nAafarisayi oyu uvitile uuntsa okupopya kwawo kutya oya dhiginina Ompango yaMoses. Dhimbulukwa kutya sho Jesus a tonatitha omulumentu gwontumba pashikumithalonga muJerusalem, oyi itadhele taya ti: “Otse aalongwa yaMoses. Otu shi shi, Kalunga okwa popitha Moses.” Ihe ngashingeyi Ompango yaMoses oya gwanitha elalakano lyayo lyokuukitha aaneifupipiko kOmukwaniilwa gwaKalunga ngoka a langekwa po, Jesus Kristus. Onkee ano petameko lyuukalele waJohannes, aantu yi ili noyi ili, unene tuu aaneifupipiko naathigona, oya kambadhala noonkondo okuninga aalelwa yUukwaniilwa waKalunga.

Molwashoka Ompango yaMoses otayi gwanithwa ngashingeyi, oshinakugwanithwa shoku yi dhiginina otashi ka kuthwa po. Ompango ohayi pitike ehengathano molwomatompelo gi ili nogi ili, ihe Jesus ngashingeyi ota ti: “Kehe tuu ngoka ta henge po omukiintu gwe nota hokana gulwe, oye ta hondele, naangoka ta hokana omuhengwa, ota hondele.” Oohapu dha tya ngaaka itadhi geyitha tuu Aafarisayi, unene tuu sho haya pitike ehengathano molwomatompelo ogendji!

Jesus ota tsikile ta popi nAafarisayi note ya hokololele eudhi lyaalumentu yaali mboka ondondo nenge onkalo yawo lwahugunina ya lunduluka noonkondo. Oto vulu mbela okumona kutya oolye taya thanekwa kaalumentu mbaka nonokutya elunduluko lyoonkalo dhawo otali ti shike?

“Okwa li ku na omulumentu omuyamba,” Jesus ta yelitha, “a zala oonguwo oontiligane noontokele oombwanawa nokwa nyanyukwa omasiku agehe nokutuwalala. Ihe ohepele gumwe, edhina lye Lasarus, a lala posheelo shaangwiyaka nokwa li ku udha omathina, nokwa hala okwiikutitha koondjagumuke ndhoka dha gu koshililo shomuyamba. Noombwa odhe ya nodha latha omathina ge.”

Jesus ota longitha mpaka omulumentu omuyamba okuthaneka aawiliki yelongelokalunga lyOshijuda, inaamu kwatelwa owala Aafarisayi naanongoraamata ihe omwa kwatelwa wo Aasadukayi naasaseri aakuluntu. Yo aayamba momauthembahenda nomoompito dhopambepo, noye na omikalo dha fa dhomuyamba. Oonguwo dhawo oontiligane dhuuyamba otadhi thaneke ondondo yawo ombwanawa, noonguwo oontokele otadhi thaneke okukala yi ishi uuyuuki kwawo.

Ongundu ndjika yi na uuntsa yomuyamba oya dhina oohepele, aantu yowala noye ya luka ‘am ha·’aʹrets, nenge aantu yokevi. Ano Lasarus omuheheli ota thaneke aantu mboka aawiliki yelongelokalunga haya tindi oku ya pa iipalutha yopambepo iiwanawa nosho wo omauthembahenda omawanawa gopambepo. Ngaashi Lasarus ngoka u udha omathina, ano aantu yowala nayo osho ya dhinika ya fa aantu mboka taye ehama pambepo noya gwana owala okukala pamwe noombwa. Ihe mboka yongundu yaLasarus oya sa ondjala nenota lyiikulya yopambepo nomolwashono ye li posheelo, opo ya pewe oondjagumuke kehe dhiikulya yopambepo ndhoka tashi vulika tadhi gu koshililo shomuyamba.

Ngashingeyi Jesus ota tsikile ta hokolola omalunduluko gonkalo yomuyamba naLasarus. Omalunduluko ngaka oshike, notaga thaneke shike?

Onkalo yomuyamba naLasarus tayi lunduluka

Omuyamba ota thaneke aawiliki yelongelokalunga mboka ye na omauthembahenda noompito dhopambepo dhi li nawa, na Lasarus ota thaneke aantu yowala mboka ya sa ondjala yiipalutha yopambepo. Jesus ota tsikile ehokololo lye nota hokolola elunduluko enene moonkalo dhaalumentu mbaka.

Jesus ota ti: “Pwa ningi ihe ohepele a si nokwa papatelwa kaayengeli, ye mu fala mekolo lyaAbraham, nomuyamba okwa si wo nokwa fumvikwa. Ihe mokukala muuwehame moshaasi, sho kwa ligamene, okwa mono Abraham kokule naLasarus mekolo lye.”

Molwashoka omuyamba naLasarus kaye shi aantu yolela ihe otaya thaneke oongundu dhaantu, osha yela kutya eso lyawo nalyo wo olyopathaneko. Eso lyawo otali thaneke mbela shike?

Jesus opo owala a mana okuulika kelunduluko lyoonkalo mokutya kutya ‘ompango nooprofeti odha hulile muJohannes Omuninginithi, ihe okuza tuu kesiku ndyoka uukwaniilwa waKalunga otau uvithwa.’ Ano omuyamba naLasarus otaya si shi na ko nasha noonkalo dhawo dhonale pethimbo lyeuvitho lyaJohannes naJesus Kristus.

Mboka yongundu yaLasarus yi ifupipika noyi iyela ombedhi, otaya si shi na ko nasha nonkalo yawo yonale yoluhepo lwopambepo notaye ya pondondo ya hokiwa kuKalunga. Nale oya kala yi inekela aawiliki yelongelokalunga molwokashona hoka haka gu koshililo shopambepo, ihe ngashingeyi ooshili dhopamanyolo ndhoka tadhi gandjwa kuJesus otadhi gwanitha po oompumbwe dhawo. Ano otaye etwa mekolo nenge pomuthika omwaanawa, gwaAbraham Omukuluntu, Jehova Kalunga.

Ihe mepingathano naashika, mboka yongundu yomuyamba inaya hokiwa kuKalunga molwashoka otaya tsikile nokutinda etumwalaka lyUukwaniilwa ndyoka Jesus ta longo. Onkee ano otaya si shi na ko nasha nonkalo yawo yonale ndjoka pakutala ya fa ombwanawa. Dhoshili, otaya popiwa ongo ya fa ye li muuwehame wopathaneko. Ngashingeyi pulakena omuyamba sho ta popi:

“Tate Abraham, sa ndje ohenda, ngu u tume Lasarus, a yaye ondungu yomunwe gwe momeya, ye a talaleke elaka lyandje, oshoka ngame ndi li mo tandi ehamekwa nayi momulilo ngu gwa hwama!” Omatumwalaka gaKalunga gokupangula ga hwama ngoka taga tseyithwa kaalongwa yaJesus otage ehameke iilyo yongundu yomuyamba. Oya hala aalongwa ye ethe po okuuvitha omatumwalaka ngaka, nokokuninga ngawo otashi poleke uuwehame wawo.

“Ihe Abraham okwa ti: Omumwandje, dhimbulukwa, ongoye owa pelwe uuwanawa woye manga wa li u na omwenyo, nosho tuu Lasarus uuwinayi, ano ngashingeyi oye ta talalekwa muka, ihe ngoye to ehamekwa. Nokuli oku na olumbogo olunenenene lwa tulwa pokati ketu nane, opo ayehe mbeyaka ya hala okutaagulukila kune, kaa wape, naamboka ye li nkoka, kaa wape okuya kutse.”

Kashi li tuu pauyuuki noshe eleka sho tapu ningwa elunduluko enene li thike mpono pokati kongundu yaLasarus nongundu yomuyamba! Elunduluko lyoonkalo otali ningwa konima yoomwedhi dhontumba poPentekoste 33 E.N., sho ehangano lyOmpango ekulu tali pingenwa po kehangano epe. Opo nduno osha yela mo nawa kutya aalongwa oyo ya hokiwa kuKalunga, hAafarisayi naawiliki yelongelokalunga yalwe. Onkee ano “olumbogo olunenenene” ndoka lwa yoolola ko omuyamba gwopathaneko kaalongwa yaJesus, otalu thaneke ano okupangula kwaKalunga hoka ihaaku lunduluka noku li pauyuuki.

Omuyamba oti indile natango “tate Abraham” ta ti: “Tuma [Lasarus] kegumbo lyatate, oshoka ondi na aamwameme aalumentu yatano.” Onkee ano omuyamba okwa zimina kutya ye oku na ekwatathano enene nahe gulwe i ili, ngoka muushili wo wene oye Satana Ondiaboli. Omuyamba oti indile Lasarus a hekule omatumwalaka gaKalunga ge na ko nasha nokupangula opo ‘aamwayina aalumentu yatano,’ ookuume ke palongelokalunga, “yaa ye mehala ndi lyuuwehame.”

“Ihe Abraham okwa ti: Oyo ye na Moses nooprofeti, naa uve mbeyaka.” Eeno, ngele ‘aamwayina aalumentu yatano’ oya hala okuhenuka uuwehame, oye na owala okupulakena omanyolo gaMoses nAaprofeti, ngoka tagu ulike kutya Jesus oye Messias nopo nduno otaya ningi aalongwa ye. Ihe omuyamba ota tindi ta ti: “Aawe, tate Abraham, andola gumwe gwomaasi ta yi kuyo, ando taa itedhulula.”

Ihe ota lombwelwa taku ti: “Ngele itaa uvu Moses naaprofeti, itaa tompwa, nando namu yumuke gumwe gwomaasi.” Kalunga ita ka gandja omandhindhiliko nenge iikumithalonga yi ikalekelwa okwiitaalitha aantu. Oye na okulesha Omanyolo nokukala pago ngele oya hala okupandika kuye. Lukas 16:14-31; Johannes 9:28, 29; Mateus 19:3-9; Aagalati 3:24; Aakolossa 2:14; Johannes 8:44.

▪ Omolwashike eso lyomuyamba nolyaLasarus li li lyopathaneko, neso lyawo otali thaneke shike?

▪ Pakupopya kwaJesus, elunduluko lini lya ningwa po petameko lyuukalele waJohannes?

▪ Oshike shi na okukuthwa po konima yeso lyaJesus, nongiini tashi kala shi na ko nasha nehengathano?

▪ Oolye taya thanekwa komuyamba nokuLasarus meudhi lyaJesus?

▪ Uuwehame mboka omuyamba ta mono oshike, nota pula u polekwe nashike?

▪ “Olumbogo olunenenene” otalu thaneke shike?

▪ Olye e li shili he gwomuyamba, naamwayina aalumentu yatano oyo oolye?