Pokugongala kwAakriste yopetameko opwa li hapu imbwa, hapu galikanwa, nohapu leshwa Omanyolo noku ga kundathana, ihe kapwa li hapu landulwa omilandu dhomithigululwakalo dhopalongelokalunga. (1 Aakorinto 14:26) Oto ka mona oshinima sha faathana pokugongala kwetu.

Shoka hashi ilongwa pokugongala oshi ikolelela kOmbiimbeli notashi vulu okulongithwa monkalamwenyo. Mehuliloshiwike kehe, egongalo kehe ohali pewa oshipopiwa shopaMbiimbeli shuule wominute 30 kombinga yankene Omanyolo tage tu kwathele monkalamwenyo yetu nomethimbo ndika tu li mulyo. Atuhe ohatu ladhipikwa tu landule mOombiimbeli dhetu yene sho oshipopiwa tashi gandjwa. Konima yoshipopiwa ohapu kala Ekonakono “lyOshungolangelo” uule wowili yimwe moka aakwanegongalo haya kutha ombinga moonkundathana dha kankamena koshitopolwa shi li moshifo shokukonakonwa shOshungolangelo. Oonkundathana ndhika ohadhi tu kwathele tu mone nkene Ombiimbeli tayi vulu oku tu wilika monkalamwenyo yetu. Oshikundathanwa shoka osho ngaa hashi kundathanwa momagongalo getu agehe ge vulithe po-100 000 muuyuni auhe.

Ohatu kwathelwa tu hwepopaleke uunkulungu wetu wokulonga. Ohatu gongala wo mokati koshiwike nenge mehuliloshiwike tu longwe tatu landula opolohalama ndjoka yi na iitopolwa itatu. Tango ohatu ningi Ekonakonombiimbeli lyEgongalo, lyuule wominute 30, ndyoka hali ningwa molupe lwoonkundathana dhomapulo nomayamukulo ndhoka hadhi tu kwathele tu kale tu uvite ko nawa omakotampango nomahunganeko gOmbiimbeli. Taku landula Osikola yOkudheula Aauvithi, yuule wominute 30, ndjoka hayi tameke noonkundathana dhoontopolwa dhontumba dhOmbiimbeli ndhoka aakwanegongalo ya lesha nale kegumbo. Konima yaashono, aanasikola mboka yi inyolitha mosikola ohaya gandja iipopiwa paufupi. Omugandjimayele oha kala a pulakena nawa ye ta konakona sho omunasikola ta gandja oshipopiwa she opo e mu kwathele a hwepopaleke okulesha kwe nosho wo okupopya kwe. (1 Timoteus 4:13) Oshitopolwa shahugunina osho shoka shOkugongala kwoPailonga shoka hashi ningwa uule wominute 30, mpoka hapu gandjwa iipopiwa, hapu ningwa omauliko nosho wo omapulapulo ngoka hage tu kwathele tu ilonge nkene tatu vulu okulonga yalwe Ombiimbeli.

Ngele owa kala po pokugongala kwetu, kapu na omalimbililo kutya oto ka kala wa fuulwa kelongo lyopaMbiimbeli ndyoka to mono. — Jesaja 54:13.

• Oto ka kala wa tegelela okuuva ko shike kokugongala kwOonzapo dhaJehova?

• Opokugongala kwetu kuni taku landula wa hala okukala puko?