OSHITOPOLWA SHO-1
‘Otandi ka konga oonzi ndhoka dha kana’
Onzi oshinamwenyo shimwe shoka ihaashi vulu okwiigamena. Yo ngele oya kala ya pwila mokunapa ohashi vulika yi puke. Ihayi kala we yi wete kutya omusita gwayo oku li peni nosho wo oonzi oonkwawo. Onzi ndjoka ngele oyi li mehala moka hamu yanga iilikama, etango e tali ka pa oyana, nena oyi li moshiponga. Ihe uuna yu uvu ewi lyomusita ohayi mono kutya oyi li megameno. Omusita oha matuka e te yi yambula po, nohe yi ukata momaako ge noku yi fala kegumbo.
JEHOVA oti ifaathanitha lwiikando oyindji nomusita a tya ngaaka. Ote tu shilipaleke mOmbiimbeli ta ti: “Ongame mwene tandi ka konga oonzi dhandje noku dhi sila oshimpwiyu.” — Hesekiel 34:11, 12.
‘Oshigunda shoonzi shoka tandi palutha’
Oolye ye li oonzi dhaJehova? Aantu mboka ye mu hole nohaye mu longele. Ombiimbeli otayi ti: “Ileni, tu isizimikeni kuye, tu mu simanekeni; tu tseni oongolo koshipala shOmuwa, Omushiti gwetu! Oye Kalunga ketu; otse oonzi dhuusita we, aantu he ya sile oshimpwiyu.” (Episalomi 95:6, 7) Ngaashi owala oonzi hadhi landula omusita gwadho, naalongeli yaJehova ohaye mu landula nehalo ewanawa, molwaashoka oye Omusita gwawo. Mbela aantu mboka haya longele Jehova oya gwanenena? Hasho nando. Ombiimbeli otayi popi kutya aapiya yaKalunga omathimbo gamwe ohaya kala ya fa “oonzi dha halakanithwa” noya “fa oonzi dha kana.” (Hesekiel 34:12; Mateus 15:24; 1 Petrus 2:25) Jehova ihe ekelehi omuntu ngoka a za moshigunda she. Oha kala a tegelela nondjuulukwe a galukile kuye natango.
Mbela Jehova oku li ngaa natango Omusita gwoye? Jehova okwe shi ulika ngiini kutya ye oku li Omusita omwaanawa nokunena? Tala komikalo ndatu tadhi landula:
Ohe tu palutha pambepo. Jehova ota popi mOohapu dhe ta ti: “Otandi ke dhi napitha . . . momasilu gomwiidhi gweleshuleshu. Otadhi ka napa komahala agehe ga ziza.” (Hesekiel 34:14) Jehova ohe tu pe aluhe iikulya yopambepo pethimbo lyo opala. Mbela opu na oshitopolwa miileshomwa yetu, oshipopiwa nenge okavidio hoka ka li ka yamukula epulo lyoye? Mbela shoka inashi ku tompa wu itaale kutya Jehova oku na ko nasha nangoye paumwene?
Jehova ohe tu gamene noku tu ambidhidha. Jehova oku uvaneka moohapu dhe a ti: ‘Otandi ka galula ndhoka dha puka, otandi ka manga ndhoka dha teka nokupanga ndhoka tadhi alukwa.’ (Hesekiel 34:16) Jehova oha manga, sha hala okutya, oha ambidhidha mboka ya nkundipala naamboka ye li moothina. Oha panga oonzi dhe moku dhi kwathela dhi aluke. Oha kwathele oonzi ndhoka dha za mo moshigunda dhi galuke nosho wo ndhoka tadhi kondjo nomaiyuvo omawinayi. Ohashi vulika a longithe ooitaali ooyakwetu ye tu kwathele.
Jehova oku na ko nasha natse. Jehova okwa popya mOohapu dhe ta ti: ‘Otandi ka kongolola oonzi dhandje komahala agehe hoka dha halakanithilwa.’ Okwa ti ishewe: “Otandi ka konga ndhoka dha kana.” (Hesekiel 34:12, 16) Jehova oha kala e na etegameno kutya onzi ye ndjoka ya kana otayi vulu okugaluka. Uuna onzi ye yimwe ya kana oha kala e shi wete, nohe ke yi konga. Oha kala a nyanyukwa noonkondo ngele okwe yi mono. (Mateus 18:12-14) Shimwe ishewe, Jehova oti ithana ayehe mboka haye mu longele moshili ta ti: “Ne oonzi dhandje, oshigunda shoka tandi palutha.” (Hesekiel 34:31) Shoka otashi ti kutya nangoye wo owu li gumwe gwomoonzi dhe ndhoka.
Jehova oha kala e na etegameno kutya onzi ye ndjoka ya kana otayi vulu okugaluka. Oha kala a nyanyukwa uuna onzi ye ya monika
“Pepaleka omasiku getu ngashika muushitonale”
Omolwashike Jehova te ku kongo note ku ithana wu galukile kuye? Ote shi ningi, molwaashoka okwa hala wu kale wa nyanyukwa. Oku uvanekela oonzi dhe kutya ote “ke dhi yambeka niihomo yomvula.” (Hesekiel 34:26) Omayambeko ngoka nangoye owe ga ningilwa nale. Shoka oshi li euliko kutya Jehova oha gwanitha po lela omauvaneko ge.
Dhiladhila owala pethimbo sho wa tameke okwiilonga kombinga yaJehova. Mbela omutima gwoye kagwa li tuu tagu hunga kenyanyu sho wi ilongo oshili kombinga yedhina lyaKalunga nomalalakano ge kombinga yaantu? Mbela oto dhimbulukwa nkene wa li ho talalekwa kAakriste ooyakweni piigongi iishona niinene? Ongiini ngele owa li wu uvithile gumwe onkundana ombwanawa ngoka ta pulakene nawa? Mbela kwa li ho galukile kegumbo wu uvite ombili nowa nyanyukwa?
Nangoye oto vulu natango okumona enyanyu nombili ndyoka. Aapiya yaKalunga yonale oya li ya galikana taya ti: “Tu galulila kungoye, Omuwa, notatu galukile ko. Pepaleka omasiku getu ngashika muushitonale.” (Oontakumandjimbo 5:21) Jehova okwa li a yamukula egalikano lyawo ndyoka. Oshizemo, aapiya ye oya li ya galukile kuye noku mu longela ya nyanyukwa noonkondo. (Nehemia 8:17) Jehova ota vulu oku ku ningila oshinima sha faathana.
Okugalukila kuye oshipu okupopya, ihe oshidhigu oku shi ninga. Tala komashongo ngoka ga kwatelwa mo nosho wo nkene to vulu oku ga taaguluka.
