1, 2. Omupolofeti Jesaja okwa li a mono emoniko lyashike, notashi tu longo shike kombinga yaJehova?

JESAJA okwa li a mono emoniko lye mu kumitha okuza kuKalunga. Olya li lya fa oshinima shoshili. Konima yethimbo Jesaja okwa nyola kutya okwa ‘mona OMUWA’ e li koshipangelapundi she. Oongenge dhoonguwo dhaJehova odha li dhu udhitha otempeli onene muJerusalem.—Jesaja 6:1, 2.

² Jesaja okwa li wo a kumithwa unene komawi ngoka ga li tagi imbi mokule, notempeli ayihe mwa kwatelwa ekankameno lyayo oya li ya kakama. Aayengeli mboka ya li tayi imbi, aaserafi, iishitwa yopambepo mbyoka yi na ondondo yopombanda. Oyi imbi momuko gumwe oohapu tadhi hokitha taya ti: “Omuyapuki, omuyapuki, omuyapuki! [Omuwa, Kalunga koongundu dhaakwiita, OB-1954]. Eadhimo lye olyu udha uuyuni.” (Jesaja 6:3, 4) Oya tsu omuthindo oshitya “omuyapuki” lwiikando itatu naashoka oshe eleka, molwaashoka Jehova omuyapuki kaku na we. (Ehololo 4:8) Uuyapuki we otawu tsuwa omuthindo mOmbiimbeli ayihe. Opu na oovelise odhindji ndhoka tadhi kwatakanitha kumwe oshitya “omuyapuki” nosho wo “uuyapuki” nedhina lyaKalunga.

3. Ongiini omataloko ga puka kombinga yuuyapuki waJehova ga ningitha aantu oyendji ye mu pilamene pehala lyokuhedha popepi naye?

³ Osha yela kutya oshinima shimwe sha simanenena shoka Jehova a hala tu uve ko kombinga ye, osho uuyapuki we. Ihe aantu oyendji kunena ihaye shi ningi. Yamwe ohaya dhiladhila papuko kutya omuyapuki omuntu ngoka i ishi uuyuuki nenge uukalunga. Aantu mboka ye na etaloko lya puka otashi vulika ya kale ye wete uuyapuki waKalunga oshinima oshitilithi, pehala lyokukala tashi hokitha. Otashi vulika ya kale ye na uumbanda kutya itaya vulu okuhedha nando popepi naKalunga ngoka omuyapuki. Oyendji oya pilamena Kalunga omolwuuyapuki  we. Shika otashi yemateke, molwaashoka uuyapuki waKalunga owo hawu tu hedhitha popepi naye. Omolwashike mbela? Omanga inaatu yamukula epulo ndyoka natu tale kutya uuyapuki washili oshike.

4, 5. (a) Uuyapuki oshike, nokawu shi shike? (b) Jehova “okwi ikalekelwa” momikalo mbali dhini dha simana?

⁴ Uutumbulilo omuyapuki inawu hala okutya Kalunga okwi ishi uungame, omunuuntsa nokwa dhina yalwe. Pehala lyaashono, oku tonde omaukwatya ngoka. (Omayeletumbulo 16:5; Jakob 4:6) Oshitya “omuyapuki” osha hala lela okutya ngiini? Oshitya shOshihebeli “omuyapuki,” osha za kuutumbulilo mboka tawu ti “okwiikalekelwa.” Melongelokalunga, “uuyapuki” otawu ulike koshinima shoka sha yooloka ko kiikwawo nenge sha yapulwa. Oshitya shoka otashi gandja wo edhiladhilo lyuuyogoki nokukala wa yela sheke. Omolwashike Jehova e eleka okwiithanwa omuyapuki? Mbela shika osha hala okutya “okwiikalekelwa” noke na ekwatathano lyasha naantu inaaya gwanenena?

⁵ Hasho nando. Jehova ‘Omuyapuki Omunene gwaIsraeli,’ oti ipopi mwene e li “mokati” kaantu ye, nonando oya li aalunde. (Jesaja 12:6; Hosea 11:9) Onkee ano, uuyapuki we inawu mu hedhitha kokule naantu ye. Omomukalo guni ‘i ikalekelwa’? Omomikalo mbali dha simana. Gwotango, okwi ikalekelwa kiishitwa ayihe molwaashoka oye awike Omupangeli. Okwa yela nokwa yogoka noke na nando okapethili kasha. (Episalomi 40:5; 83:18) Omutiyali, Jehova oku li i ikalekelwa thiluthilu kaantu ayehe aalunde naashoka otashi tu hekeleke. Omolwashike mbela?

6. Omolwashike tashi tu hekeleke okuuva kutya Jehova okwi ikalekelwa thiluthilu noke na uulunde washa?

⁶ Muuyuni mbuka tu li uuyuuki washili owa pumba. Kehe shimwe muulipamwe waantu mboka yi iteka Kalunga osha nyata momikalo dhontumba nosha kakekwa kuulunde nokokwaahagwanenena. Atuheni otu na okukondjitha uulunde mboka wu li mutse. Atuhe otatu vulu okuninga iihakanwa yuulunde ngele  inatu kotoka. (Aaroma 7:15-25; 1 Aakorinto 10:12) Jehova ina kwatelwa mo mwaashoka. Ye ke na uulunde washa nokawu na siku wu mu nwethe mo. Shoka otashi tu shilipaleke kutya Jehova oku li Tate a dhenga mbanda, molwaashoka oku shi okwiinekelwa thiluthilu. Ke na siku nando e tu kotokele, a kanithe eipangelo nenge a kale e na onyanya ngaashi ootate yetu yopantu aalunde tashi vulika ya ninge. Molwaashoka ye omuyapuki ita vulu okuninga ngaaka. Omathimbo gamwe Jehova okwa li ha gana i ikolelela kuuyapuki we, shoka sha li hashi ningi egano lye li kale li shi okwiinekelwa thiluthilu. (Amos 4:2) Mbela shoka itashi tu hekeleke?

7. Omolwashike tatu vulu okutya uuyapuki ohawu nwetha mo kehe shoka Jehova ta ningi?

⁷ Uuyapuki ohawu nwetha mo kehe shoka Jehova ta ningi. Shika osha hala okutya ngiini? Oku shi thaneka: Dhiladhila kiitya “omuntu” nosho wo “okwaahagwanenena.” Ito vulu okupopya kombinga yomuntu inoo dhiladhila kokwaahagwanenena. Okwaahagwanenena ohaku nwetha mo kehe shimwe tatu ningi. Ngashingeyi tala komayooloko giitya iyali, “Jehova” nosho wo “uuyapuki.” Jehova omuyapukielela. Okwa yogoka, okwa yela noke na okapethili kasha. Itatu vulu okutseya Jehova ngaashi naanaa e li ngele katu uvite ko eityo lyomuule lyoshitya “uuyapuki.”

8, 9. Oshike tashi ulike kutya Jehova oha kwathele aantu inaaya gwanenena ya kale aayapuki momikalo dhontumba?

⁸ Molwaashoka Jehova oku na uukwatya mboka, oshe eleka i ithanwe kutya oye onzo yuuyapuki auhe. Uukwatya mboka wi ikalekelwa ohe wu pe yalwe, te shi ningi nehalo ewanawa pehala lyokukala oye awike e wu na. Sho Kalunga a li a popi naMoses okupitila momuyengeli poshihwa sha hwama, ehala mpoka Moses a li a thikama olya ningi eyapuki omolwaJehova.—Eksodus 3:5.

⁹ Mbela Jehova ota vulu okukwathela aantu inaaya gwanenena ya kale aayapuki? Eeno, ota vulu oku shi ninga momukalo gwontumba. Okwa li a pe oshigwana she shaIsraeli etegameno  lyokukala shi li ‘oshigwana oshiyapuki.’ (Eksodus 19:6) Okwa li e shi laleke nuuyamba nelongelokalunga eyapuki, lya yela nolya yogoka. Uuyapuki otawu tsuwa omuthindo mOmpango yaMoses. Omusaaseri omukuluntu okwa li e na okuzala okapapa koshingoli kegala lye ka kambakana mombamba yoshipala opo ayehe ya vule oku ka mona sho taka adhima uuna e li muuyelele. Kokapapa hoka okwa li kwa nyolwa oohapu tadhi ti: ‘Uuyapuki owOMUWA.’ (Eksodus 28:36) Onkee ano, omuthikampango gwopombanda gwuuyogoki ogwa li gwa ndhindhilikitha mo omukalo gwawo gwokulongela Kalunga nogwonkalamwenyo yawo. Jehova okwa li e ya lombwele a ti: “Kaleni aayapuki, oshoka ngame OMUWA Kalunga keni omuyapuki.” (Levitikus 19:2) Uuna Aaisraeli taya vulika komalombwelo ge oya li taya vulu okukala aayapuki momukalo gwontumba, nonando oya li inaaya gwanenena.

10. Eyooloko lini lya li pokati kAaisraeli yonale niigwana mbyoka ye ya dhingoloka shi na ko nasha nuuyapuki?

¹⁰ Molwaashoka uuyapuki owa li wa tsuwa omuthindo melongelokalunga lyAaisraeli, osha li sha ningitha omukalo gwawo gwokulongela Kalunga gu kale gwa yooloka ko kwaangoka gwiigwana mbyoka ye ya dhingoloka. Iigwana yaapagani oya li hayi longele iikalunga mbyoka yaaha li ko nandonando noyi li iinima yowala, mbyoka ya li haku tiwa oyi hole elongithonkondo, iinalwiho noyi na omikalo dha nyata. Iikalunga mbyoka kaya li iiyapuki nando. Osha ningitha mboka ya li haye yi longele ya kale kaaye shi aayapuki. Onkee ano, Jehova okwa li a londodha aapiya ye yi iyoolole ko kiigwana mbyoka nokelongelokalunga lyayo lya nyata.—Levitikus 18:24-28; 1 Aakwaniilwa 11:1, 2.

11. Uuyapuki waJehova owi iwetikile ngiini mehangano lye lyomegulu (a) maayengeli? (b) maaserafi? (c) muJesus?

¹¹ Oshigwana shaJehova oshihogololwa, Israeli shonale kasha li oshiyapuki ngaashi ehangano lyaKalunga lyomegulu, nokuli nopoompito mpoka sha li tashi shi enditha nawa. Iishitwa yopambepo omamiliyona mbyoka tayi longele Kalunga nuudhiginini otayi popiwa yi li “aayapuki omayuvi ogendji.” (Judas 14) Aayengeli mboka otayu ulike eadhimo lyuuyapuki nuuyogoki waKalunga momukalo gwa gwanenena.  Dhimbulukwa wo aaserafi mboka Jesaja a mono memoniko. Oshikalimo sheimbilo lyiishitwa iinankondo yopambepo otashi ulike kutya otayi dhana onkandangala ya simana yokutseyitha uuyapuki waJehova meshito alihe. Ihe Omwana gwe epona oye oshishitwa shopambepo shoka shi vule aayengeli ayehe. Jesus oku ulika uuyapuki waKalunga momukalo dhingi. Okwa tseyika e li ‘Omuyapuki gwaKalunga.’—Johannes 6:68, 69.

12, 13. (a) Omolwashike edhina lyaKalunga eyapukielela? (b) Omolwashike edhina lyaKalunga li na okuyapulwa?

¹² Ongiini kombinga yedhina lyaKalunga mwene? Ngaashi twe shi mono mOntopolwa 1 edhina ndyoka ka li shi owala edhinasimaneko, ihe otali tu lombwele oshindji kombinga yomaukwatya ge. Onkee ano, Ombiimbeli otayi tu lombwele kutya “edhina lye olyo eyapuki.” (Lukas 1:49) Ompango yaMoses oye shi popya sha yela kutya ngoka ta sheke edhina lyaKalunga na dhipagwe. (Levitikus 24:16) Ndhindhilika shoka Jesus a pititha komeho megalikano sho a ti: “Tate yetu, ngu u li megulu: Edhina lyoye nali yapulwe.” (Mateus 6:9) Okuyapula oshinima shontumba otashi ti kutya okukala we shi ikalekela nowe shi simaneka molwaashoka oshiyapuki. Ihe omolwashike edhina lyaKalunga ndyoka eyapukielela nale li na ishewe okuyapulwa?

¹³ Edhina lyaKalunga eyapuki olya kala lya dhinika nokunyatekwa niifundja nolya kala nokupopilwa muuwinayi. MuEden, Satana okwa li a lundile Jehova kutya ye Omupangeli omukwanyanya. (Genesis 3:1-5) Okuza mpono Satana omupangeli gwuuyuni mbuka wa nyata okwa kala nokutaandelitha iifundja kombinga yaKalunga. (Johannes 8:44; 12:31; Ehololo 12:9) Aawiliki yomalongelokalunga oya longa aantu kutya oompango dhaKalunga oondhigu noke na ko nasha natse noku li wo omuhahu. Ohaya ti kutya Kalunga okwa kala nokwaambidhidha iita mbyoka mwa kanena omwenyo odhindji. Eshito ekumithi lyaKalunga olundji ohaku tiwa kutya olye ya po owala kulyo lyene nenge paevolusi. Eeno, edhina lyaKalunga olya kala nokupopilwa muuwinayi. Onkee ano, osha pumbiwa opo edhina lye  li yapulwe nokukala lya tumbalekwa ishewe. Otwa tegelela nondjuulukwe sho edhina lyaKalunga tali ka yapulithwa nokusimaneka uunamapangelo we notwa nyanyukwa sho tu na ombinga moshinima shoka.

14. Omolwashike ombepo yaKalunga hayi ithanwa ondjapuki, nomolwashike oku yi sheka ku li oshinima sha kwata miiti?

¹⁴ Opu na wo oshinima shimwe shoka sha pambathana naJehova thiluthilu noshinima shoka osho ombepo ondjapuki nenge oonkondo dhe tadhi longo. (Genesis 1:2) Jehova oha longitha oonkondo ndhoka oonenenene okugwanitha po omalalakano ge. Kehe shimwe shoka ha ningi oshiyapuki, osha yela nosha yogoka, onkee ano, oonkondo dhe tadhi longo odhe eleka okwiithanwa ombepo ondjapuki. (Lukas 11:13; Aaroma 1:4) Ngoka ta sheke ombepo ondjapuki mwa kwatelwa okulonga owina shoka tashi tsu ompinge nomalalakano ge, ita ka dhiminwa po.—Markus 3:29.

15. Omolwashike etilokalunga lya pambathana nuuyapuki, netilo ndyoka olya kwatela mo shike?

¹⁵ Oshipu okuuviwa ko sho Ombiimbeli tayi ulike kutya opu na ekwatathano pokati kuuyapuki waKalunga netilokalunga ndyoka omuntu e na. Pashiholelwa, Episalomi 99:3 otali ti: “Kehe gumwe oku na okusimaneka edhina lye ekumithi netilithi. Oye omuyapuki!” Ihe ka tu na okutila Jehova netilo lyokukakama. Pehala lyaashoka, otu na oku mu tila netilosimaneko momukalo omwaanawa. Oshi li she eleka okukala tu uvite ngaaka, molwaashoka uuyapuki we kaku na we. Owa yela shekesheke notawu kumitha. Ihe kawu na oku tu imba tu hedhe popepi naye. Pehala lyaashono, etaloko lyu uka lyuuyapuki we otali tu hedhitha popepielela naye. Omolwashike mbela?

16. (a) Uuyapuki ohawu faathanithwa ngiini neopalo? Gandja oshiholelwa. (b) Emoniko kombinga yaJehova otali ulike ngiini uuyogoki nuuyelele we?

¹⁶ Oshinima shimwe, Ombiimbeli otayi faathanitha uuyapuki neopalo. MuJesaja 63:15 egulu otali hokololwa li li ‘ehala lyuuyapuki neadhimo’ lyaKalunga. Oshihokitha okutala iinima yo  opala. Pashiholelwa, tala kethano ndyoka li li pepandja 33. Mbela ino hokwa oku li tala? Oshike shi li mo tashi hokitha? Tala komeya ngoka ge li mo ga yela nawa. Ombepo oya yela nawa molwaashoka ewangandjo embulau notali adhima. Ihe ngele ethano ndyoka olya lundululwa e tali kala nomeya taga kunguluka gu udha iiyagaya, omiti nomamanya ga nyolwagulwa nosho wo ombepo ya nyatekwa kolwithi, itatu ka kala we twa hokwa oku li tala. Olundji eopalo ohali faathanithwa nuuyogoki nosho wo nuuyelele. Iitya mbika otayi vulu okulongithwa okupopya uuyapuki waJehova. Itashi tu kumitha tuu sho emoniko ndyoka tali mu popi lituntula! Eopalo lyaKalunga ketu omuyapuki olya fa eadhimo lyuuyelele, omamanya taga adhima, eadhimo lyomulilo nenge lyoshitenda shi li meziko.—Hesekiel 1:25-28; Ehololo 4:2, 3.

17, 18. (a) Petameko Jesaja okwa li a gumwa ngiini kemoniko ndyoka a mono? (b) Jehova okwa li a longitha ngiini omuserafi a hekeleke Jesaja, nomuserafi okwa li a ningi shike oshindhindhilikwedhi?

¹⁷ Mbela uuyapuki waKalunga otawu tu ningitha tu kale tu uvite e tu vule noonkondo? Eeno, Jehova oku tu vule kokulekule noitatu vulu naanaa oku shi uva ko thiluthilu. Mbela shika oshi na oku tu hedhitha kokule naye? Natu tale nkene Jesaja a li i inyenge sho u uvu aaserafi tayi imbi kombinga yuuyapuki waJehova. “Onda popi nda ti: ‘Yaye ngame! Otandi ka kana, oshoka ngame omulumentu ndi na omilungu dha nyata, nonda kala mokati kaantu ye na omilungu dha nyata, nonomeho gandje mwene onda tala Omukwaniilwa, OMUWA [gwoongundu dhaakwiita, OB-1954].’” (Jesaja 6:5) Uuyapuki waJehova kaawu shi okuyelekwa owa li wa dhimbulukitha Jesaja kutya ye omulunde noina gwanenena. Petameko omulumentu ngoka omudhiginini okwa li a haluka, ihe Jehova ine mu etha a kale monkalo ndjoka.

¹⁸ Omuserafi okwa li e mu hekeleke nziya. Ngiini mbela? Omuyengeli okwa li a tuka e ta yi koshiyambelo e ta kutha ko ekala nokwe li gumitha omilungu dhaJesaja. Shoka osha li tashi monika sha fa tashi ehameke pehala lyokuhekeleka. Ihe dhimbulukwa kutya shoka osha li owala emoniko li na omaityo  gopathaneko ogendji. Omujuda omudhiginini, Jesaja okwa li e shi kutya koshiyambelo shotempeli ohaku ningilwa omafikiloyambo omolwedhimopo lyoondjo. Omuserafi okwa li a dhimbulukitha Jesaja nohole kutya nonando ina gwanenena noku na “omilungu dha nyata,” ota vulu okukala a yela koshipala shaKalunga. * Jehova okwa li a tala ko omuntu inaa gwanenena nomulunde e li omuyapuki momukalo gwontumba.—Jesaja 6:6, 7.

19. Ongiini tatu vulu okukala aayapuki momikalo dhontumba nonando inatu gwanenena?

¹⁹ Kunena osho wo shi li ngaaka. Omafikiloyambo ngoka ga li haga yambwa koshiyambelo muJerusalem oga li owala omuzizimba gwekuliloyambo lya gwanenena ndyoka Jesus a gandja mo 33 E.N. (Aahebeli 9:11-14) Ngele tatu iyele ombedhi shili, tatu opaleke omapuko getu nokukala tu na eitaalo tali longo mekuliloyambo ndyoka, otatu ka dhiminwa po. (1 Johannes 2:2) Otatu vulu wo okukala twa yogoka koshipala shaKalunga. Onkee ano, omuyapostoli Petrus ote tu dhimbulukitha ta  ti: “Enyolo otali li ti: ‘Omuna okukala aayapuki, oshoka ongame omuyapuki.’” (1 Petrus 1:16) Ndhindhilika kutya Jehova ina tya kutya otu na okukala aayapuki ngaashi ye. Ina tegelela tu ninge shoka itaatu vulu. (Episalomi 103:13, 14) Pehala lyaashoka, Jehova ote tu lombwele tu kale aayapuki molwaashoka ye omuyapuki. Otu na okukambadhala oku mu holela ngaashi tatu vulu tu li “oyana aaholike,” nonando inatu gwanenena. (Aaefeso 5:1) Otu na okukala tatu lalakanene uuyapuki. Ohatu koko pambepo ‘mokulalakanena okukala aayapuki’ esiku nesiku.—2 Aakorinto 7:1.

20. (a) Omolwashike sha simana okutseya kutya otatu vulu okukala twa yogoka momeho gaKalunga ketu omuyapuki? (b) Jesaja okwa li i inyenge ngiini sho a tseya kutya omayono ge oga dhimwa po?

²⁰ Jehova oku hole shoka shu uka nosha yogoka. Oku tonde uulunde. (Habakuk 1:13) Ihe ke tu tonde. Ote ke tu dhimina po ngele ohatu tala ko omayono ngaashi ye, mokutonda shoka oshiwinayi, mokuhola shoka oshiwanawa nomokukambadhala okulandula oshiholelwa shaJesus Kristus sha gwanenena. (Amos 5:15; 1 Petrus 2:21) Ngele otwa kala tu shi kutya otwa yogoka momeho gaKalunga ketu omuyapuki, otashi ke eta iizemo iiwanawa noonkondo. Dhimbulukwa kutya uuyapuki waJehova owo wa li wa dhimbulukitha Jesaja kutya ina yogoka. Okwa popi a ti: “Yaye ngame!” Ihe sho a tseya kutya omayono ge oga dhimwa po osha li sha lundulula etaloko lye. Sho Jehova a pula kutya olye ta vulu okwiiyamba e mu tume, Jesaja okwa li a yamukula nziya, nonando ka li e shi kutya oshilonga shoka osha kwatela mo shike. Okwi igidha a ti: “Otandi yi! Tuma ndje!”—Jesaja 6:5-8.

21. Omolwashike tu na einekelo kutya otatu vulu okukala aayapuki?

²¹ Otwa shitwa oshifetha shaKalunga omuyapuki, tu na omikalo omiwanawa nohatu vulu okuuva ko iinima yopambepo. (Genesis 1:26) Atuheni otatu vulu okukala aayapuki. Ngele tatu tsikile okukala aayapuki, Jehova ota ka kala a nyanyukwa oku tu kwathela. Sho tatu shi ningi otatu ka hedha popepi naye. Sho tatu ka konakona omaukwatya ge moontopolwa tadhi landula, otatu ka mona kutya opu na omatompelo ga kola okuhedha popepi naye.