1, 2. Omolwashike taku vulu okutiwa kutya omukwaniilwa David okwa li a tsakaneke oonkalo dhontumba moka yamwe yu ulika okwaahenuudhiginini?

OMUKWANIILWA DAVID okwa li a tsakaneke oonkalo dhontumba moka yamwe yu ulike okwaahenuudhiginini. Oshikando shimwe aantu yomoshigwana she oya li ya hala oku mu kutha koshipundi miineya. Okwa li wo a kengelelwa kaantu mboka ya li ookuume ke kopothingo. Gumwe oMikal omukulukadhi gwe gwotango. Petameko “okwa li e hole David” nokwa li he mu ambidhidha miilonga ye yuukwaniilwa. Ihe konima yethimbo ‘okwe mu dhini’ nokwe mu ula kutya “okwi ishundula ye mwene a fa egoya.”—1 Samuel 18:20; 2 Samuel 6:16, 20.

² David okwa li wo a kengelelwa komugandjimayele gwe Ahitofel. Omayele ge oga li ga fa ohapu ya za kuJehova. (2 Samuel 16:23) Ihe konima yethimbo, kuume ke ngoka omwiinekelwa okwe mu kengelele e ta gama kwaamboka ye mu tukulile oshipotha. Olye a li a pangele ompangela ndjoka yomeholamo? Omwana gwaDavid Absalom. Okwa kala ta longitha iineya ‘okuyula omitima dhAaisraeli’ i ininge ye mwene omukwaniilwa. Uunashipotha waAbsalom owa humu komeho unene nomukwaniilwa David okwa li e na okuya ontuku a ka hupithe omwenyo gwe.—2 Samuel 15:1-6, KB, 12-17.

3. David okwa li e na einekelo lini?

³ Mbela opwa li ngaa ngoka omudhiginini kuDavid? Okwa li e shi kutya opu na gumwe omudhiginini kuye nonando oku li muupyakadhi. Olye mbela? OJehova Kalunga. David okwa lombwele Jehova a ti: “OMUWA, ongoye [omudhiginini, NW] mokukalathana naamboka ye ku inekela.” (2 Samuel  22:26) Uudhiginini oshike na Jehova oku ulika ngiini kutya oku li oshiholelwa dhingi shuukwatya mbuka?

4, 5. (a) “Uudhiginini” oshike? (b) Uudhiginini waantu owa yooloka ko ngiini kwaamboka wiinima kaayi na omwenyo?

⁴ Oshitya “uudhiginini” shoka sha longithwa mOmanyolo gOshihebeli otashi ulike kolukeno ndoka lwa kwatathana pahole noshinima sigo elalakano lyasho lya gwanithwa. * Pashiholelwa, omupisalomi okwa popi omwedhi a ti kutya ogu li “ombangi yi shi kwiinekelwa” molwaashoka ohagu piti aluhe kongulohi. (Episalomi 89:37) Kungawo, otaku vulu okutiwa kutya omwedhi omudhiginini. Ihe itagu vulu okukala omudhiginini meityo lya faathana naandyoka omuntu ta vulu okukala omudhiginini. Omolwashike mbela? Omolwaashoka uudhiginini womuntu otawu ulike kutya oku na ohole, uukwatya mboka itawu vulu okuulikwa kiinima mbyoka kaayi na omwenyo.

⁵ Omanyolo otaga popi kutya uudhiginini okukala nohole ya hwama. Ngele omuntu omudhiginini komuntu  gwontumba, otu ulike kutya oku na ekwatathano naangoka tu ulukile uukwatya mboka. Uudhiginini mboka ihawu ulikwa owala omathimbo gamwe. Inawu fa omakuthikuthi gomefuta ngoka haga telaganithwa kombepo mpoka yu uka. Pehala lyaashono, uudhigini nenge ohole yi na uudhiginini ohayi kwathele omuntu a pondole nomonkalo ondhigu.

6. (a) Uudhiginini owa pumba shi thike peni maantu, nOmbiimbeli oye shi ulika ngiini? (b) Omukalo dhingi okwiilonga shoka uudhiginini wa kwatela mo oguni, nomolwashike?

⁶ Uudhiginini wa tya ngaaka owa pumba kunena. Olundji ookuume kopothingo ‘ohaya hanagula po’ uukuume wawo. Ohatu uvu olundji ookuume kopandjokana ya thiga po ooyakwawo. (Omayeletumbulo 18:24; Maleaki 2:14-16) Uukengeleledhi owu li apuhe kunena notashi vulika tu kale tu uvite ngaashi omupolofeti Mika ngoka a ti: “Aadhiginini ya pwa mo moshilongo.” (Mika 7:2, KB) Nonando olundji aantu ohaya ndopa okuulika uuwanawahenda, Jehova ohe wu ulike momukalo gwa dhenga mbanda. Onkee ano, omukalo dhingi moka tatu vulu okwiilonga kutya uudhiginini owa kwatela mo shike, omokukonakona nkene Jehova he wu ulike wu li oshitopolwa sha simanenena shohole ye.

7, 8. Omolwashike taku tiwa kutya Jehova oye awike omudhiginini?

⁷ Ombiimbeli otayi popi Jehova tayi ti: ‘Oye awike omudhiginini.’ (Deuteronomium 7:9) Omolwashike tayi tile ngawo? Mbela aantu naayengeli inaya kala nokuulika uudhiginini? (Job 1:1; Ehololo 4:8) Ongiini shi na ko nasha naJesus? Mbela ke shi “omudhiginini” thiluthilu kuKalunga? (Episalomi 16:10, NW) Omolwashike ano taku tiwa kutya Jehova oye awike omudhiginini?

⁸ Tango, dhimbulukwa kutya uudhiginini owu li oshitopolwa shohole. Molwaashoka ‘Kalunga oye ohole,’ oye mwene gwuukwatya mboka. Mbela olye ta vulu oku wu ulika thiluthilu e mu fa? (1 Johannes 4:8) Odhoshili kutya aantu naayengeli  otaya vulu okuulika uukwatya waKalunga, ihe oye owala hu ulike uudhiginini momukalo gwa dhenga mbanda. E li “Omusamane gwomimvo” okwa kala nokuulukila aantu uuwanawahenda ethimbo ele e vule iishitwa ayihe yokombanda yevi noyomegulu. (Daniel 7:9, OB-1954) Onkee ano, oye oshiholelwa dhingi shuudhiginini. Okwe wu ulika momukalo gwa shiga ko. Natu tale kiiholelwa yontumba.

9. Ongiini Jehova “[omudhiginini] miilonga ye ayihe”?

⁹ Jehova “[omudhiginini, NW] miilonga ye ayihe.” (Episalomi 145:17) Ngiini mbela? Episalomi 136 otali gandja eyamukulo. Iilonga ye yokuhupitha oya nyolwa mEpisalomi ndyoka, mwa kwatelwa oshiningwanima oshikumithi shokuhupitha Aaisraeli pEfuta Etiligane. Oshindhindhilikwedhi osho kutya oovelise adhihe mepisalomi ndyoka odha hulitha tadhi ti: “Oshoka aluhe uuwanawahenda [nenge uudhiginini] we tawu kala po.” (KB) Episalomi ndika olya kwatelwa momapulo gokutedhatedha ngoka ge li pepandja 289. Sho to lesha oovelise ndhoka oto ka kala wa kuminwa omikalo odhindji moka Jehova u ulukila oshigwana she uuwanawahenda. Eeno, ohu ulike kutya oku li omudhiginini kaapiya ye aadhiginini sho ha pulakene nokukatuka oonkatu e ya kwathele pauthwathimbo lye ngele taya kongo ekwatho. (Episalomi 34:6) Ohole yaJehova yuudhiginini yokuhola aapiya ye ihayi tengauka ngele oya kala aadhiginini kuye.

10. Jehova oku ulika ngiini kutya omudhiginini komakotampango ge?

¹⁰ Jehova oku ulika kutya ye omudhiginini kaapiya ye mokukala aluhe metsokumwe nomakotampango ge. Ina fa aantu mboka kaaye shi okwiinekelwa, haya wilikwa owala komaiyuvo nohaya ningi iinima nopwaahe na elalakano lyasha. Etaloko lye lyaashoka shi li mondjila naashoka sha puka ihali tengauka. Uumpulile, okulongela iikalunga nokudhipaga ohe ku tala ko naanaa ngaashi a kala he ku tala ko uule womathelemimvo ga pita. Okwa popi okupitila momupolofeti gwe Jesaja ta ti: ‘Otandi mú gamene sigo tamu kulupa.’ (Jesaja 46:4) Otatu vulu okukala neinekelo kutya otatu ka mona  uuwanawa ngele tatu landula ewiliko lyopamikalo ewanawa ndyoka li li mOohapu dhe.—Jesaja 48:17-19.

11. Gandja iiholelwa mbyoka tayi ulike kutya Jehova omudhiginini mokugwanitha po omauvaneko ge.

¹¹ Jehova oku ulika wo uudhiginini mokugwanitha po omauvaneko ge. Ngele u uvaneke sha ohe shi gwanitha. Okwa ti: ‘Oohapu dhandje tadhi zi mokana kandje, itadhi galukile kungame owala inaadhi gwanitha ehalo lyandje; otadhi tsakanitha elalakano ndyoka nde dhi li tumine.’ (Jesaja 55:11) Jehova ohu ulike kutya ye omudhiginini kaapiya ye mokugwanitha oohapu dhe. Ihe ya uvanekele iinima mbyoka itaa ka gwanitha. Oku ulike kutya omwiinekelwa thiluthilu, nomolwaashono omupiya gwe Josua a popi a ti: “OMUWA okwa dhiginine euvaneko lye kehe a li u uvanekele oshigwana shaIsraeli.” (Josua 21:45) Otu na okukala neinekelo kutya katu na siku tu ki ilye ominwe molwaashoka Jehova inaa gwanitha po shoka e tu uvanekela.—Jesaja 49:23; Aaroma 5:5.

12, 13. Omomikalo dhini uuwanawahenda waJehova ‘tawu kala aluhe’?

¹² Ngaashi sha popiwa metetekelo, Ombiimbeli oye tu lombwela kutya uuwanawahenda waJehova ‘otawu kala aluhe.’ (Episalomi 136:1) Omeityo lini? Oha dhimine po thiluthilu aantu oondjo dhawo. Ngaashi sha kundathanwa mOntopolwa 26, Jehova iha ka kongolola oondjo dhonalenale ndhoka a dhima po. Molwaashoka “aantu ayehe oya yona, kaye na oonkondo dhaKalunga dhoku ya hupitha,” kehe gumwe gwomutse oku na okupandula sho uuwanawahenda we tawu kala aluhe.—Aaroma 3:23.

¹³ Ihe uuwanawahenda waJehova otawu kala aluhe meityo lilwe. Oohapu dhe otadhi ti kutya omuyuuki ‘okwa fa omuti gwa mena mooha dhomatondokelo gomeya hagu imi pethimbo lyu uthwa, nomafo gagwo ihaga ganya. Ashihe shoka te shi longo, otashi eta eyambeko.’ (Episalomi 1:3) Dhiladhila komuti hagu imi nawa gu na omafo ihaaga ganya. Natse ngele otu hole okulesha Ombiimbeli, otatu ka kala nomwenyo ethimbo ele twa nyanyukwa notatu imike iiyimati.  Omayambeko ngoka Jehova ta ka pa aapiya ye aadhiginini ogaaluhe. Muuyuni uupe wuuyuuki mboka te ke eta, aantu aavuliki otaya ka mona uuwanawahenda we sigo aluhe.—Ehololo 21:3, 4.

14. Jehova oha pandula ngiini uudhiginini waapiya ye?

¹⁴ Jehova okwa kala nokuulika uudhiginini we iikando niikando. Molwaashoka okwa gwanenena thiluthilu, uudhiginini we mboka hu ulukile aapiya ye kawu na siku wu hule po. Omupisalomi okwa nyola a ti: “Ngame ngashingeyi onda kulupa, onda kala muuyuni ethimbo ele, ihe inandi mona nando olumwe omuyuuki e ethiwa kOMUWA, nenge oyana taa hehela iikulya. Oshoka OMUWA oku hole shoka shu uka, noihe etha [aadhiginini ye, KB].” (Episalomi 37:25, 28) E li Omushiti otwa gwana oku mu longela shili. (Ehololo 4:11) Molwaashoka ye omudhiginini oha pandula iilonga yetu mbyoka hatu mu longele nuudhiginini.—Maleaki 3:16, 17.

15. Yelitha nkene uudhiginini waJehova wi iwetikile momukalo moka u ungaunga noshigwana shaIsraeli.

¹⁵ Omolwuuwanawahenda we, Jehova oha kwathele oshigwana she lwiikando ngele shi li monkalo ondhigu. Omupisalomi ota ti: “Ota gamene aantu ye [nenge aadhiginini] note ya hupitha miikaha yaakolokoshi.” (Episalomi 97:10) Tala nkene a li u ungaunga noshigwana shaIsraeli. Konima yoku ya hupitha mEfuta Etiligane pashikumithalonga, oye mu imbile taya ti: “Owa dhiginine euvaneko lyoye, owa wilike oshigwana shoka we shi mangulula.” (Eksodus 15:13) Jehova oku ulike ohole ye yuudhiginini sho a hupitha oshigwana she pEfuta Etiligane. Moses okwe ya lombwele a ti: “OMUWA ke ku hole ye ine ku hogolola ando molwashoka u vule iigwana yilwe muuwindji, aawe, owa li okagwana okashona miigwana ayihe yokombanda yevi. Ihe OMUWA okwa li e ku hole nokwa hala okudhiginina euvaneko e li uvanekele oohokulu. Omolwashoka e ku tembudha mo noshikaha  she shoonkondo e te ku mangulula muupika womukwaniilwa gwaEgipiti.”—Deuteronomium 7:7, 8.

16, 17. (a) Aaisraeli oya li yu ulike ngiini kutya kaye na olupandu, nongiini Jehova e ya sile ohenda? (b) Aaisraeli oyendji oya li yu ulike ngiini kutya ‘itaa vulu okuyanda’ ondjahi yaJehova, nongiini shoka shi li elondodho kutse?

¹⁶ Osha yela kutya oshigwana shaIsraeli inashi pandula uuwanawahenda waJehova, sho e shi hupitha, osha ‘tsikile okuyona kuye; inashi vulika kungoka gwokombandambanda.’ (Episalomi 78:17) Oya kala noku mu tsila ondumbo iikando niikando e taye mu pilamene nokulongela iikalunga nokulandula omikalo dhaapagani ndhoka dhe ya nyateke, pehala lyoku ye etela uuwanawa. Ihe Jehova ina hulitha po ehangano lye nayo. Okwa lombwele oshigwana she okupitila momupolofeti Jeremia a ti: “Israeli ngoka wi ite ka ndje, galukila kungame . . . itandi ku geele sigo aluhe [molwaashoka ngame omudhiginini, NW].” (Jeremia 3:12) Ngaashi twe shi mono mOntopolwa 25, Aaisraeli oyendji inaya lundulula iikala yawo. Oya “dhini aatumwa yaKalunga, oya dhini oohapu dhe e taa yolo aahunganeki, sigo pehulilo.” Oshizemo osha li shike? Lwahugunina “ondjahi yOMUWA okugeela aantu ye oya ningi onene, noinaa vula oku yi yanda.”—2 Ondjalulo 36:15, 16.

¹⁷ Oshike tatu ilongo moshinima shoka? Omolwuudhiginini we, Jehova ihi ipwililikile uuwinayi noitatu vulu oku mu enda mevi. Odhoshili kutya “oku udha esilohenda nuudhiginini,” noha sile aantu ohenda mpoka tashi vulika. Ihe ongiini mbela ngele omuyoni oku na omutse omukukutu? Moshinima shoka, Jehova oha dhiginine omithikampango dhe dhuuyuuki mokupangula omuntu ngoka nopwaahe na ohenda yasha. Okwa lombwele Moses kutya “itandi etha okugeela omayono.”—Eksodus 34:6, 7.

18, 19. (a) Sho Jehova ta ka pangula aakolokoshi omolwashike shi li euliko kutya ye omudhiginini? (b) Omomikalo dhini Jehova u ulika kutya omudhiginini kaapiya ye mboka ya hepekwa sigo omeso?

¹⁸ Kalunga oha katukile aakolokoshi onkantu omolwuudhiginini  we. Ngiini mbela? Euliko limwe otali adhika membo lyEhololo moka a pe aayengeli yaheyali omalombwelo a ti: “Indeni, mu ka tilehi iiyaha mbyoka iheyali yondjahi yaKalunga kombanda yevi!” Sho omuyengeli omutitatu a tilehi oshiyaha she “momilonga nomoothithiya dhomeya,” omeya oga shituka ombinzi. Omuyengeli okwa lombwele Jehova a ti: ‘[Omudhiginini, NW] ngoka wu li ko nowa li ko, omapangulo goye oge na uuyuuki. Oyo oya tilehi ombinzi yaantu yoye noyaahunganeki, onkee owe ya nwetha ombinzi. Oyo oya pewa shoka ye shi ilongela.’—Ehololo 16:1-6.

¹⁹ Ndhindhilika kutya sho omuyengeli ngoka a gandja etumwalaka lyepangulo, okwa popi kutya Jehova “omudhiginini.” Omolwashike mbela? Molwaashoka mokuhanagula po aakolokoshi oku ulike kutya ye omudhiginini kaapiya ye mboka yamwe yomuyo ya hepekwa sigo omeso. Omolwuudhiginini we aapiya ye mboka ya sa nale oye li medhimbuluko lye. Okwa yuulukwa oku ya mona ishewe, nOmbiimbeli oye shi koleka kutya okwa halelela oku ke ya yumudha. (Job 14:14, 15) Jehova iha dhimbwa aapiya ye aadhiginini molwaashoka kaaye li momwenyo. Mepingathano naashoka, ‘ayehe oye na omwenyo.’ (Lukas 20:37, 38) Elalakano  lye okuyumudha mboka ya sa ye li medhimbuluko lye, oli li euliko lya kola kutya ye omudhiginini.

20. Oolye ‘iiyuma yesilohenda,’ na Jehova oheyu ulukile ngiini uudhiginini we?

²⁰ Mondjokonona, Jehova okwa kala noku ulukila aapiya ye mboka ye mu inekela kutya omudhiginini kuyo. Uule womimvo omayovi okwa kala “nokwiidhidhimikila nolukeno olunene iiyuma yondjahi mbyoka ya gwana okuyonagulwa po.” Omolwashike mbela? “Opo a tseyithe uuwindji wesimano lye miiyuma yesilohenda mbyoka e yi longekidhila nale esimano.” (Aaroma 9:22, 23, KB) ‘Iiyuma yesilohenda’ oomboka ye na iikala iiwanawa mboka ya gwayekwa nombepo ondjapuki opo ya ka pangele pamwe naKristus mUukwaniilwa  we. (Mateus 19:28) Opo iiyuma yesilohenda mbika yi ka hupithwe, Jehova okwa kala omudhiginini kuAbraham, ngoka a ningi ehangano naye sho e mu uvanekele a ti: “Omungoye nomoluvalo lwoye aantu yomigwana ayihe otaa ka lalekwa nuuyamba, oshoka owa vulika kelombwelo lyandje.”—Genesis 22:18.

21. (a) Jehova oku ulika ngiini uudhigini ‘kongundu onene’ ndjoka yi na etegameno lyoku ka hupa ‘muudhigu unene’? (b) Uudhiginini waJehova otawu tu inyengitha tu ninge shike?

²¹ Jehova oku ulukila wo uudhiginini “ongundu onene” ndjoka yi na etegameno lyoku ka hupa ‘muudhigu unene’ noku ka kala nomwenyo sigo aluhe moparadisa kombanda yevi. (Ehololo 7:9, 10, 14, OB-1954) Nonando aapiya ye inaya gwanenena, okwe ya pa ompito yoku ka kala nomwenyo sigo aluhe moparadisa kombanda yevi. Okwe shi ninga ngiini? Okupitila mekuliloyambo ndyoka li li euliko kaaku na we kutya ye omudhiginini. (Johannes 3:16; Aaroma 5:8) Uudhiginini we ohawu hilile mboka ya sa ondjala yuuyuuki momitima dhawo kuye. (Jeremia 31:3) Mbela ku uvite wa nanenwa popepi naJehova omolwuudhiginini we mboka e ku ulukila naamboka te ke ku ulukila? Molwaashoka otwa hala okuhedha popepi naye, ohole ye nayi tu inyengithe tu kale twa tokola toko oku mu longela nuudhiginini.