1, 2. “Oshiholekwa oshiyapuki” shini tu na okukala twa hokwa, nomolwashike?

AANTU yamwe ihaya vulu okumwenena iiholekwa mbyoka ya lombwelwa tayi nywitha omakutsi, tayi hokitha notayi kumitha. Ombiimbeli otayi ti: “Esimano lyaKalunga olyo okumwenena oohapu.” (Omayeletumbulo 25:2) Eeno, Jehova ngoka e li Omunamapangeloagehe nOmushiti oku na uuthemba okumwenena iinima yaantu sigo ethimbo lye lyoku yi holola lya thiki.

² Ihe opu na oshiholekwa shimwe tashi nywitha omakutsi noshihokitha shoka Jehova a popya mOohapu dhe. Ohashi ithanwa “oshiholekwa [oshiyapuki, NW] shoka a li a hala.” (Aaefeso 1:9) Ngele owe shi ilongo otashi ke ku etela uuwanawa owundji. Oto vulu okukala nomwenyo sigo aluhe nokuuva ko uunongo waJehova ngele owa tseya oshiholekwa shoka.

3, 4. Ehunganeko ndyoka li li muGeneses 3:15 otali gandja ngiini etegameno, ‘noshiholekwa oshiyapuki’ shini sha kwatelwa mo?

³ Sho Adam naEva ya yono, elalakano lyaJehova opo aantu ya gwanenena ya kale moparadisa kombanda yevi, olya li lya fa lya hulile mokwena kwa thita. Ihe Kalunga okwa katuka onkatu nziya u ungaunge nuupyakadhi mboka. Okwa ti: “Otandi tula etondathano pokati keni nomukiintu, nopokati koluvalo lwoye noluvalo lwe. Oluvalo lwe otalu nyanyula omutse gwoye, ongoye noto mu tsu moshithi shompadhi ye.”—Genesis 3:15.

⁴ Oohapu ndhika inadhi yela nawa notadhi limbilike. Omukiintu ota thaneke lye? Eyoka otali thaneke lye? Olye “oluvalo” ndoka talu ka nyanyagula omutse gweyoka? Adam naEva kaya li yu uvite ko ehunganeko ndyoka, oya li owala taya fekele. Oohapu dhaKalunga odha gandja etegameno kukehe gumwe  omudhiginini gwomoluvalo lwaaihokani mboka kaaye shi aadhiginini. Uuyuuki owa li tawu ka sindana. Elalakano lyaJehova otali ka gwanithwa. Ngiini mbela? Oshinima shika osha li oshiholekwa. Ombiimbeli oye shi ithana “uunongo waKalunga mboka wu li moshiholekwa oshiyapuki, owo uunongo wa holekwa.”—1 Aakorinto 2:7, NW.

5. Yelitha to gandja ethaneko okuulika nkene Jehova a holola oshiholekwa she kashona nakashona.

⁵ Jehova e li ‘omuhololi gwiiholekwa,’ hugunina ota ka holola iinima ayihe mbyoka ya kwatelwa moshiholekwa shika. (Daniel 2:28) Ihe ote ke shi ninga kashona nakashona. Oku shi thaneka: Natu tye ando okamati otaka pula he taka ti: “Tate, onda za peni ano?” Tate omunandunge ota ka gandja owala uuyelele mboka okamati ke taka vulu okuuva ko pethimbo ndyoka. Sho take ende taka koko, ote ka lombwele uuyelele owundji. Sha faathana, Jehova ota ka hololela oshigwana she ehalo nelalakano lye uuna ethimbo lye lya thiki.—Omayeletumbulo 4:18; Daniel 12:4.

6. (a) Ehangano nenge euvathanotsokumwe ohali ningwa nelalakano lyashike? (b) Omolwashike shi li oshindhindhilikwedhi sho Jehova a hangana naantu?

⁶ Jehova okwa holola ngiini oshiholekwa shoka? Okwe ende ta ningi omahangano nenge omauvathanotsokumwe opo a holole uuyelele owundji. Otashi vulika pwa li ethimbo limwe wa shaina okondalaka wu lande oshihauto nenge wu lye omukuli gwiimaliwa. Okondalaka ndjoka oyi li eshilipaleko lyopaveta kutya iinima mbyoka mu uvathana otayi ka gwanithwa po. Ihe omolwashike Jehova a pumbwa okuninga omahangano gopaveta nenge omauvathanotsokumwe naantu? Osha yela kutya oohapu dhe otadhi vulu okushilipalekela aantu kutya omauvaneko ge otaga ka gwanithwa. Odhoshili kutya Kalunga ita nyengwa okugwanitha po omauvaneko ge, ihe okwa hogolola okuninga omauvathanotsokumwe gopaveta naantu opo a koleke shoka u uvaneka. Omauvathano ngoka ohaga ningitha aantu inaaya gwanenena ya kale ye na einekelo lya kola momauvaneko ge.—Aahebeli 6:16-18.

7, 8. (a) Ehangano lini Jehova a ningi naAbraham, noshiholekwa oshiyapuki osha yelithwa ngiini? (b) Jehova okwe ende ta yelitha ngiini kashona nakashona ezimo moka tamu ka za Oluvalo lwu uvanekwa?

⁷ Oomvula 2 000 dha piti okuza sho aantu ya tidhwa mOparadisa, Jehova okwa lombwele omupiya gwe omudhiginini Abraham a ti: “Otandi ku pe oluvalo olwindji lwa fa oonyothi dhokegulu . . . nomoluvalo lwoye aantu yomiigwana ayihe otaa ka lalekwa nuuyamba, oshoka owa vulika kelombwelo lyandje.” (Genesis 22:17, 18) Shika kasha li owala euvaneko lyowala, ihe Jehova okwe shi koleke okupitila mehangano lyopaveta nokugana kutya shoka otashi ka gwanithwa shili. (Genesis 17:1, 2; Aahebeli 6:13-15) Kashi shi tuu oshindhindhilikwedhi sho Omuwa Omunamapangeloagehe a ninga euvathanotsokumwe lyokulaleka aantu nuuyamba!

⁸ Ehangano lyaAbraham olya holola kutya Oluvalo lwu uvanekwa otalu ka kala omuntu a za mezimo lye. Ihe omuntu ngoka ota ka kala lye? Konima yethimbo, Jehova okwa li a holola kutya omwanamati gwaAbraham, Isak oye ta ka kala hekulululwa yOluvalo ndoka. Konima yaashoka, Jehova oku uvaneke kutya Oluvalo ndoka otalu ka za muJakob omwanamati gwaIsak. (Genesis 21:12; 28:13, 14) Konima yethimbo, Jakob okwa li a lombwele gumwe gwomoyanamati 12 oohapu ndhika dhopahunganeko a ti: “Ondhimbo yuukwaniilwa itayi zi mo muJuda nepangelo moluvalo lwe, sigo taku ya ngoka te li pewa, ngoka iigwana tayi vulika kuye.” (Genesis 49:10) Opo nduno osha tseyika kutya Oluvalo ndoka otalu ka ninga omukwaniilwa ta zi mezimo lyaJuda.

9, 10. (a) Ehangano lini Jehova a ningi noshigwana shaIsraeli, nehangano ndyoka olya gandja egameno lyashike? (b) Ompango oya li yu ulike ngiini kutya aantu oya pumbwa ekulilo?

⁹ Mo 1513 K.E.N., Jehova okwa li a ningi elongekidho lyontumba okugandja uuyelele wa gedhwa po kombinga yoshiholekwa oshiyapuki. Okwa ningi ehangano noluvalo lwaAbraham, oshigwana shaIsraeli. Nonando ehangano lyOmpango yaMoses itali longo kunena olya li tali dhana onkandangala ya simana mokugwanithwa  kwelalakano lyaJehova li na ko nasha nOluvalo lwu uvanekwa. Omolwashike taku vulu okutiwa ngaaka? Natu tale omikalo ndatu. Gwotango, Ompango oya li ya fa ekuma lya gamena oshilando. (Aaefeso 2:14) Iitegelelwa yOmpango yi li pauyuuki oya li ya gamena Aajuda opo kaaya hangane naapagani. Kungeyi, Ompango oya li ya gamene ezimo moka tamu ka za Oluvalo lwu uvanekwa. Shoka oshi shi okupandulwa noonkondo molwaashoka oshigwana shoka oko sha li natango sho euthwathimbo lyaKalunga lya thiki opo Mesiasa a valwe okuza mezimo lyaJuda.

¹⁰ Oshitiyali, Ompango oya li ye shi ulike sha yela kutya aantu oya pumbwa ekulilo. Molwaashoka Ompango oya li ya gwanenena, oya li ya aneke pomutenya uushili kutya aantu inaaya gwanenena itaya vulu oku yi gwanitha po thiluthilu. Oya li ya gandjwa “opo yi ulukile aantu kutya uulunde oshike, noya li ya dhiladhilwa yi kale po, sigo omuna gwaAbraham, ngoka a pewa euvaneko, te ya.” (Aagalati 3:19) Pampango, aantu oya li haya yamba iinamwenyo opo ya dhiminwe po oondjo dhawo pakathimbo. Paulus okwa nyola a ti: “Ombinzi yoontsezi noyiikombo kayi na mpoka nayi ka dhima po oondjo,” onkee ano, omayambo ngoka oga li taga thaneke owala ekuliloyambo lyaKristus. (Aahebeli 10:1-4) KAajuda aadhiginini ehangano ndyoka olya kala po “sigo Kristus e ya.”—Aagalati 3:24.

11. Ehangano lyOmpango olya li lya pe Aaisraeli etegameno ewanawa lini, ihe omolwashike oshigwana shoka ashihe sha li she li kanitha?

¹¹ Oshititatu, ehangano olya li lya pe oshigwana shaIsraeli etegameno ewanawa. Jehova okwe shi lombwela kutya ngele osha kala oshidhiginini kehangano ndyoka otashi ka ninga “uukwaniilwa waasaaseri noshigwana oshiyapuki.” (Eksodus 19:5, 6, KB) Aaisraeli yamwe yopanyama oyo ya li ya ningi iilyo yotango yuukwaniilwa waasaaseri womegulu. Ihe oshigwana ashihe shaIsraeli osha li sha tsu ondumbo nehangano lyOmpango noshe ekelehi Oluvalo lwopaMesiasa e tashi kanitha etegameno ndyoka. Oolye ano ya li taya ka ninga aasaaseri naakwaniilwa? Ihe ongiini oshigwana shoka sha lalekwa nuuyamba sha pambathana nOluvalo lwu uvanekwa? Iinima yi na ko nasha noshiholekwa oshiyapuki otayi ka hololwa peuthwathimbo lyaKalunga.

12. Ehangano lyashike Jehova a li a ningi naDavid, nuuyelele washike lya gandja kombinga yoshiholekwa oshiyapuki?

¹² Methelemimvo eti-11 K.E.N., Jehova okwa li a gandja uuyelele wulwe wu na ko nasha noshiholekwa oshiyapuki sho a ningi po ehangano lilwe. Oku uvanekele Omukwaniilwa omudhiginini David a ti: “Otii ka kwaniileka gumwe gwomaamwoyemati a ninge omukwaniilwa omunene omunankondo. . . . Oluvalo lwe lu tsikile uukwaniilwa sigo osigo.” (2 Samuel 7:12, 13; Episalomi 89:3) Mezimo lyaDavid omo owala mwa li mu na okuza Oluvalo lwu uvanekwa. Ihe mbela aapangeli yopantu otaya ka pangela sigo “aluhe?” (Episalomi 89:20, 29, 34-36) Mbela omukwaniilwa ngoka gwopantu okwa li ta vulu okuhupitha aantu muulunde neso?

13, 14. (a) PaPisalomi 110, Jehova okwa li u uvanekele shike Omukwaniilwa gwe omugwayekwa? (b) Uuyelele wuni wa gwedhwa po wu na ko nasha nOluvalo wa gandjwa okupitila maapolofeti yaJehova?

¹³ David okwa nyola a ti: “OMUWA okwa lombwele omuwa gwandje, omukwaniilwa: ‘Kuutumba mpaka kolulyo lwandje, sigo tandi tula aatondi yoye kohi yoompadhi dhoye.’ OMUWA okwa gana egano lya kola ye ite li lundulula; ‘Ngoye oto ka ninga omuyambi gwaaluhe palandulathano lyopaMelkisedek.’” (Episalomi 110:1,  4) Oohapu dhaDavid odha li tadhi popi kombinga yOluvalo nenge yaMesiasa. (Iilonga 2:35, 36) Omukwaniilwa nguka ita ka pangela okuza kuJerusalem, ihe okuza megulu “kolulyo” lwaJehova. Okwa pewa oonkondopangelo kaadhi shi owala dhokupangela Israeli, ihe uuyuni auhe. (Episalomi 2:6-8) MEpisalomi ndika omwa hololwa wo oshinima shilwe sha pamba oshiholekwa oshiyapuki. Ndhindhilika kutya Jehova okwa li a gana egano kutya Mesiasa ota ka ninga “omuyambi . . . palandulathano lyopaMelkisedek.” Ngaashi owala Melkisedek a li omukwaniilwa nomusaaseri pethimbo lyaAbraham, Oluvalo ndoka talu ke ya, olwa li talu ka ninga Aakwaniilwa nosho wo Aasaaseri.—Genesis 14:17-20.

¹⁴ Momukokomoko gwoomvula dhontumba, Jehova okwa li a longitha aapolofeti okugandja uuyelele wa gwedhwa po kombinga  yoshiholekwa she oshiyapuki. Pashiholelwa, Jesaja okwa li a holola kutya Oluvalo otalu ka sa eso lyopayambo. (Jesaja 53:3-12) Mika okwa li a hunganeke kutya Mesiasa ota ka valelwa peni. (Mika 5:2) Daniel okwa li a hunganeke kutya Oluvalo otalu ka holoka naanaa uunake, nuunake talu ka sa.—Daniel 9:24-27.

15, 16. (a) Oshe ende ngiini opo Omwana gwaJehova a “valwe komukiintu”? (b) Jesus okwa li a thigulula shike kaavali ye yopanyama, nuunake a holoka e li Oluvalo lwu uvanekwa?

¹⁵ Egwanitho lyomahunganeko ngoka olya kala oshiholekwa sigo Oluvalo lwa holoka. Aagalati 4:4 otaya ti: “Ihe ethimbo lyo opala sho lya thikana, Kalunga okwa tumu Omwana. Oye okwa valwa komukiintu.” Momumvo omuti-2 K.E.N., omuyengeli okwa lombwele omukadhona Omujuda gwedhina Maria a ti: “Oto ka ninga omusimba e to vala okanona okamati nou na oku ka luka Jesus. Oye ota ningi omunene e ti ithanwa Omuna gwaKalunga gwokombandambanda. Omuwa Kalunga ote mu ningi omukwaniilwa ongaashi he David . . . Ombepo Ondjapuki otayi ku lambele, noonkondo dhaKalunga gwokombandambanda otadhi ku siikile. Onkee ano omunona nguka ota lukwa Omuna gwaKalunga.”—Lukas 1:31, 32, 35.

¹⁶ Konima yethimbo, Jehova okwa lundululile omwenyo gwOmwana okuza megulu moshivalelo shaMaria, opo a vule okuvalwa komukiintu. Maria okwa li omukiintu inaa gwanenena. Jesus ina thigulula nando okwaahagwanenena, molwaashoka okwa li “Omuna gwaKalunga.” Ihe yina yaJesus nahe ngoka e mu putudha oya li ya za mezimo lyaDavid, nokungeyi, Jesus okwa li e na uuthemba wokuvalwa nowopaveta wokuthigulula uukwaniilwa waDavid. (Iilonga 13:22, 23) Pokuninginithwa kwe mo 29 E.N., Jehova okwe mu gwayeke nombepo ondjapuki a ti: “Nguka oye omumwandje omuholike nde mu hokwa.” (Mateus 3:16, 17) Lwahugunina, Oluvalo olwa holoka. (Aagalati 3:16) Ethimbo olya li lya thika opo uuyelele owundji kombinga yoshiholekwa oshiyapuki wu hololwe.—2 Timoteus 1:10.

17. Ongiini eityo lyaGenesis 3:15 lya yelithwa nawa?

¹⁷ Jesus pethimbo lyuukalele we, okwa li a popi kutya eyoka  ndyoka lya popiwa muGenesis 3:15, oSatana, noluvalo lweyoka olwo aalanduli yaSatana. (Mateus 23:33; Johannes 8:44) Konima yethimbo osha li sha hololwa kutya yo ayehe otaya ka hanagulwa po sigo aluhe. (Ehololo 20:1-3, 10, 15) Omukiintu okwa li a monika mo kutya oye “Jerusalem shomegulu,” ehangano lyaJehova lyomegulu lyiishitwa yopambepo ndyoka lya fa omukiintu gwe. *—Aagalati 4:26; Ehololo 12:1-6.

18. Elalakano ‘lyehangano epe’ olyashike?

¹⁸ Jesus okwa li a holola oshinima oshikumithi noonkondo muusiku mboka wa tetekela eso lye, sho a lombwele aalongwa ye aadhiginini kombinga ‘yehangano epe.’ (Lukas 22:20) Ngaashi naanaa ehangano lyOmpango yaMoses, ehangano ndika epe olya li lya ningitha po “onkwaniilwa yaayambi.” (Eksodus 19:6; 1 Petrus 2:9) Ehangano ndika kalya li lya totwa po noshigwana shopanyama, ihe oshopambepo, ‘Israeli yaKalunga’ shoka sha thikama po maalanduli yaKristus aadhiginini mboka ya gwayekwa nombepo. (Aagalati 6:16, KB) Aakriste yomehangano ndyoka epe otaya ka laleka aantu nuuyamba opamwe naJesus.

19. (a) Omolwashike ehangano epe lya vula okweetitha po “onkwaniilwa yaayambi?” (b) Omolwashike Aakriste aagwayekwa tayi ithanwa “omushitwa omupe,” naantu yangapi taya ka pangela pamwe naKristus megulu?

¹⁹ Omolwashike ehangano epe lya vula okweetitha po “onkwaniilwa yaayambi” ndjoka tayi ka laleka aantu nuuyamba? Omolwaashoka pehala lyokupopya kutya aalongwa yaJesus oye li aalunde, ehangano ndyoka olye shi ninga tashi wapa opo ya kale taya dhiminwa po oondjo dhawo pakankameno lyekuliloyambo lye. (Jeremia 31:31-34) Ngele oya yukipalithwa koshipala she, Jehova ohe ya tala ko ye li oshitopolwa shuukwanegumbo we womegulu nohe ya gwayeke nombepo ondjapuki. (Aaroma 8:15-17; 2 Aakorinto 1:21) Kungawo, ohe ya ‘valulula omolwetegameno  ndyoka e ya pungulila megulu.’ (1 Petrus 1:3, 4, KB) Molwaashoka okukala pondondo ya simana oshinima oshipe lela kaantu, Aakriste aagwayekwa nombepo ohayi ithanwa “omushitwa omupe.” (2 Aakorinto 5:17) Ombiimbeli oye shi popya kutya lwaahugunina aantu ye li 144 000 otaya ka pangela pamwe naJesus okuza megulu, taya pangele aantu mboka ya kulilwa.—Ehololo 5:9, 10; 14:1-4.

20. (a) Oshike sha li sha hololwa mo 36 E.N. kombinga yoshiholekwa oshiyapuki? (b) Oolye taya ka nyanyukilwa omayambeko ngoka gu uvanekelwa Abraham?

²⁰ Ngaashi Jesus, aagwayekwa nayo ohaya ningi “aana yaAbraham.” * (Aagalati 3:29) Mboka ya hogololwa tango oya li ya zi mAajuda yopanyama. Ihe okuza mo 36 E.N., oshitopolwa shimwe shoshiholekwa oshiyapuki osha li sha hololwa: Aantu yomiigwana yimwe mboka kaaye shi Aajuda, oya li wo taya vulu okukala netegameno lyomegulu. (Aaroma 9:6-8; 11:25, 26; Aaefeso 3:5, 6) Mbela aagwayekwa oyo owala taya ka nyanyukilwa omayambeko ngoka Kalunga u uvanekela Abraham? Aawe, ekuliloyambo lyaJesus olya nuninwa okweetela aantu ayehe uuwanawa. (1 Johannes 2:2) Mokweendela ko kwethimbo, Jehova okwa holola kutya “ongundu onene” yaantu ya nyengana okuyalulwa otayi ka hupa pehulilo lyonkalelo yaSatana. (Ehololo 7:9, 14, OB-1954) Aantu omamiliyona ogendji otaya ka yumudhwa opo ya kale netegameno lyomwenyo gwaaluhe kombanda yevi.—Lukas 23:43; Johannes 5:28, 29; Ehololo 20:11-15; 21:3, 4.

21, 22. Oshiholekwa oshiyapuki shaJehova oshu ulika uunongo momikalo dhini?

²¹ Oshiholekwa oshiyapuki osha holola momukalo omukumithi “uunongo waKalunga momalupe gawo agehe gi ili nogi ili.” (Aaefeso 3:8-10) Jehova ina holola tuu uunongo uunenenene sho a toto po oshiholekwa shoka nokweenda te shi holola kashona nakashona! Oku shi kutya euvoko lyaantu olya ngambekwa,  onkene okwa li e ya pe ompito yu ulike iikala yawo yashili yomomutima yi na ko nasha noshiholekwa.—Episalomi 103:14.

²² Jehova oku ulika wo uunongo we kaawu shi kuyelekwa sho a hogolola Jesus a ninge Omukwaniilwa. Jesus oku shi okwiinekelwa e vule oshishitwa kehe shomeshito. Sho a li omuntu gwopanyama, okwa li a taalela omaupyakadhi ogendji. Shika oshe mu kwathele nawa a kale e shi omaudhigu ngoka haga adha aantu. (Aahebeli 5:7-9) Ongiini kombinga yaapangeli pamwe naye? Uule womathelemimvo, aalumentu naakiintu okuza miigwana ayihe, momalaka nomomaputuko ga yoolokathana oya kala nokuhogololwa ya ninge aagwayekwa. Aantu mboka oya kala taya tsakaneke omaupyakadhi gi ili nogi ili monkalamwenyo noye ga pondola. (Aaefeso 4:22-24) Otashi ka kala shi li nawa okupangelwa kaakwaniilwa naasaaseri mboka.

23. Uuthembahenda wuni Aakriste ye na omolwoshiholekwa oshiyapuki shaJehova?

²³ Omuyapostoli Paulus okwa nyola a ti: “Oshiholekwa [oshiyapuki, NW] shoka Kalunga a kala e shi holeka aantu ayehe omathimbo agehe ngoka ga piti, . . . okwe shi hololele aantu ye.” (Aakolossa 1:26) Eeno, aagwayekwa aayapuki yaJehova oyu uvite ko iinima oyindji kombinga yoshiholekwa oshiyapuki nohaya topolelathana ontseyo ndjoka naantu omamiliyona. Atuheni katu na tuu uuthembahenda! Jehova okwe tu “hololele oshiholekwa [oshiyapuki, NW] shoka a li a hala okushi tu hololela.” (Aaefeso 1:9) Natu lombwele yalwe oshiholekwa shika noku ya kwathela ya konakone uunongo waKalunga kaawu shi okuyelekwa.