1, 2. (a) Josef okwa li a ningilwa shike shoka shaaha li pauyuuki? (b) Jehova okwa li e shi ende ngiini opo u ukithe iinima?

SHOKA sha ningilwa omulumentu omugundjuka Josef ngoka a li e na ondjelo ombwanawa kasha li pauyuuki. Nonando ina longa omuyonena gwasha, okwa li a tulwa mondjedhililo nokwa lundilwa kutya okwa hala okukwata onkonga omukulukadhi gwamwene gwe. Ihe shika hasho oshikando shotango ta ningilwa okwaahenuuyuuki. Sho e na oomvula 17 okwa li a kengelelwa kaamwahe mboka ya ale ye mu dhipage. Oye mu landitha po kaakwiilongo a ka ninge omupika. Sho a tindi okuya moluhondelo nomukulukadhi gwamwene gwe, omukulukadhi okwe mu lundile, naashika osho sha li she mu tu litha mondjedhililo. Shinikitha oluhodhi, Josef okwa li a fa keehe na omupopili.

² Ihe Kalunga ngoka e ‘hole uuyuuki noshili’ okwa li e wete oshinima shoka. (Episalomi 33:5) Okwa katuka onkatu meendelelo u ukithe iinima opo Josef a mangululwe. Konima yaashono, Josef ngoka a li a tulwa “mondjedhililo” okwa ningwa omupangeli omukuluntu moshilongo sho a tulwa pondondo ndjoka ya tumbala. (Genesis 40:15; 41:41-43; Episalomi 105:17, 18) Hugunina, osha ka monika mo kutya Josef ka li e na ondjo miinima ayihe mbyoka ta lundililwa nokwa li a longitha ondondo ndjoka a pewa a humithe komeho elalakano lyaKalunga.—Genesis 45:5-8.

3. Omolwashike itaashi kumitha sho atuhe hatu kala twa hala okuungaungwa natse pauyuuki?

³ Ehokololo ndika itali gumu tuu omitima dhetu! Olye gwomutse inaa mona nenge inaa ningilwa okwaahenuuyuuki? Atuheni ohatu kala twa hala okuningilwa shoka shi  li mondjila noshu uka. Shika itashi kumitha, molwaashoka Jehova okwe tu pa omaukwatya ga fa ge, nuuyuuki owo wumwe womugo. (Genesis 1:27) Opo tu mu tseye nawa, otu na okukala tu shi uuyuuki we. Kungeyi, otatu ka pandula iilongankondo ye oyindji notashi ke tu inyengitha tu hedhe popepi lela naye.

4. Aantu olundji ohaya tala ko ngiini uuyuuki?

⁴ Pataloko lyopantu, olundji uuyuuki ohawu talika ko wu li owala okugwanitha po oshipango shopaveta. Embo Right and Reason—Ethics in Theory and Practice otali ti: “Uuyuuki owu na ekwatathano nompango, iitegelelwa, omauthemba niinakugwanithwa nohawu utha kutya aantu oye na okumona ondjambi ndjoka yi ilongela nopwaahe na ontondo.” Ihe uuyuuki waJehova owa kwatela mo oshindji kaashi shi owala okutula miilonga omakotampango ngoka molwaashoka wu na oku shi ninga.

5, 6. (a) Oshitya “uuyuuki” osha tolokwa ngiini momalaka gopetameko? (b) Osha hala okutya shike sho Kalunga ti ithanwa omuyuuki?

⁵ Otatu vulu owala okuuva ko nawa uuyuuki waJehova mokukonakona nkene iitya yomelaka lyopetameko ya longithwa mOmbiimbeli. Omanyolo gOshihebeli oga longitha iitya itatu. Oshitya shoka hashi tolokwa olundji “uuyuuki” otashi vulu wo okutolokwa ‘okulonga shoka shu uka.’ (Genesis 18:25) Iitya iyali mbyoka ya longithwa ohayi tolokwa olundji “uuyuuki.” MOmanyolo gOshigreka oshitya shoka sha tolokwa “uuyuuki” otashi ti “oshinima shi li mondjila noshu uka.” Onkee ano, iitya ayihe mbyoka ya longithwa melaka lyopetameko oyi na eityo limwe alike.—Amos 5:24.

⁶ Sho Ombiimbeli tayi ti kutya Kalunga omuyuuki, otayi tu lombwele kutya oha ningi shoka shi li mondjila noshu uka nohe shi ningi aluhe nopwaahe na ontondo.  (Aaroma 2:11) Odhoshili kutya Jehova ita vulu nando okulonga uugoyoki. Elihu ngoka a li omudhiginini okwa ti: “Omunankondoawike iha goyokitha uuyuuki.” (Job 34:12) Osha yela kutya Kalunga ita “vulu okulonga uuwinayi.” Omolwashike mbela? Omolwomatompelo gaali ga simana.

7, 8. (a) Omolwashike Jehova itaa vulu okuninga shoka inaashu uka? (b) Oshike hashi inyengitha Jehova a katuke pauyuuki?

⁷ Lyotango, Jehova omuyapuki. Ngaashi twe shi mona mOntopolwa 3, okwa yogoka lela nomuyuuki. Onkee ano, ita vulu okulonga nandonando shoka inaashu uka. Tala kutya shika otashi ti ngiini. Otu na omatompelo ge shi okwiinekelwa kutya Tate yetu gwomegulu ke na siku a ninge nayi oyana molwaashoka omuyapuki. Jesus naye oku na einekelo lya tya ngaaka. Uusiku we wahugunina kombanda yevi okwa galikana a ti: “Tate Omuyapuki, ya gamena koonkondo dhedhina lyoye, opo ya ninge omuntu gumwe naanaa, ngashika ngame nangoye tu li gumwe.” (Johannes 17:11) Jehova oye awike ti ithanwa “Tate Omuyapuki” mOmanyolo. Shika oshe eleka molwaashoka kapu na he gwopantu ta vulu okukala omuyapuki ngaashi ye. Jesus okwi itaala thiluthilu kutya He ngoka a yogoka nokwa yela noke na nando ondjo yasha ota ka gamena aalongwa ye.—Mateus 23:9.

⁸ Etiyali, Kalunga ki ihole ye mwene. Ohu ungaunga nayalwe pauyuuki omolwohole ye. Ihe okwaahenuuyuuki ohaku hwahwamekwa olundji kuukwamuhoko, kontondo nokuukwatya wokakombo noludhi. Olundji iinima mbyoka ohayi etithwa kolwiho nokokwiihola mwene, omaukwatya ngoka taga kondjithathana nohole. Ombiimbeli otayi tu shilipaleke kombinga yohole yaKalunga tayi ti: “OMUWA oye omuyuuki noku hole iilonga iiwanawa.” (Episalomi 11:7) Jehova oti ipopi ta ti: “Ondi hole uuyuuki.” (Jesaja 61:8)  Mbela itashi hekeleke okutseya kutya Kalunga ketu oha nyanyukilwa okulonga shoka shi li mondjila nenge shu uka?—Jeremia 9:24.

9-11. (a) Ekwatathano lini li li pokati kuuyuuki nohenda yaJehova? (b) Uuyuuki waJehova nohenda ye oyi iwetikile ngiini momukalo moka hu ungaunga naantu aalunde?

⁹ Uuyuuki waJehova owa gwanenena, ngaashi naanaa omaukwatya ge galwe ga tongomana. Moses okwa tumbaleke Jehova a ti: “Oye emanya; iilonga ye oyolela, noondjila dhe adhihe odhu uka.” (Deuteronomium 32:3, 4) Uuyuuki we ohe wu longitha pandjele, ke na ohenda ya pitilila, ye ke shi omuhahu.

¹⁰ Uuyuuki waJehova nohenda ye oya pambathana lela. Episalomi 116: 5 otali ti: “OMUWA oye omunamutimahenda nomuyuuki; Kalunga ketu oye omunalukeno.” Eeno, ye omuyuuki nomunahenda nomaukwatya ngoka itaga kondjithathana. Ngele te tu sile ohenda itashi ti kutya uuyuuki we owu vulike kohenda ye. Ihe omaukwatya ngoka gaali olundji ohe gu ulike oshita. Natu tale oshiholelwa.

¹¹ Aantu ayehe oya thigulula uulunde noyi ilongela eso. (Aaroma 5:12) Ihe Jehova iha nyanyukilwa eso lyomulunde. Pehala lyaashono, ‘oha dhimi po oondjo, omunahenda nomunahole.’ (Nehemia 9:17) Molwaashoka ye omuyuuki iha hokwa okwaahenuuyuuki. Ihe ongiini ta vulu okuulukila aantu ohenda mboka ya thigulula uulunde? Eyamukulo otali adhika muyimwe yomooshili ndhoka dhi li mOohapu dhe. Oshili ndjoka oyo kutya Jehova okwa gandja iikulila opo aantu ya vule okuhupithwa. Otatu ki ilonga oshindji kombinga yelongekidho ndyoka lyopahole mOntopolwa 14. Elongekidho ndyoka otali ulike shili kutya Jehova omuuyuuki nohenda ye onenenene. Okupitila mulyo, ota ka sila ohenda aayoni mboka tayi iyele ombedhi  nopwaahe na okuya moshipala omithikampango dhe dhuuyuuki wa gwanenena.—Aaroma 3:21-26.

12, 13. (a) Omolwashike uuyuuki waJehova tawu tu hedhitha popepi naye? b) David okwa thiki pehulithodhiladhilo lini shi na ko nasha nuuyuuki waJehova, naashika otashi tu hekeleke ngiini?

¹² Uuyuuki waJehova ohawu tu hilile popepi naye. Ombiimbeli oye shi popya sha yela kutya uuyuuki we ohawu endele pamwe nolukeno lwe. Natu konakoneni omikalo dhimwe tadhi nyanyudha omutima nkene Jehova hu ulike uuyuuki we.

¹³ Uuyuuki waJehova wa gwanenena ohawu mu inyengitha u ulike kutya ye omudhiginini kaapiya ye. Omupisalomi David okwa li a kwathelwa koshimoniwa she a mone kutya Jehova omuyuuki. Okupitila moshimoniwa she nomokukonakona oondjila dhaKalunga, okwa li a thiki pehulithodhiladhilo lini? Okwa ti: “OMUWA oku hole shoka shu uka noihe etha aantu ye aainekelwa. Ote ya gamene sigo aluhe.” (Episalomi 37:28) Eshilipaleko ndika itali hekeleke tuu! Kalunga ketu ite ke etha nando esiku limwe mboka aadhiginini kuye. Otatu vulu okwiinekela kutya oku li popepi natse nohe tu sile oshimpwiyu pahole. Uuyuuki we otawu shi koleke.—Omayeletumbulo 2:7, 8.

14. Ompango ndjoka ya li ya pewa Aaisraeli otayi ulike ngiini kutya Jehova oku na ko nasha naamboka taya mono iihuna?

¹⁴ Omolwuuyuuki we Kalunga oku na ko nasha naamboka taya mono iihuna. Okunakonasha kwe okwi iwetikile mOmpango ndjoka a li a pe Aaisraeli. Pashiholelwa, mOmpango omwa li mu na elombwelo kutya oothigwa naaselekadhi naya silwe oshimpwiyu. (Deuteronomium 24:17-21) Molwaashoka okwa li e shi kutya ohaya nana nuudhigu, Jehova okwa li Omupopili nOmugameni ‘nomuuthili gwoothigwa naaselekadhi.’ (Deuteronomium 10:18;  Episalomi 68:5) Jehova okwa li a londodha Aaisraeli kutya ngele otaya ningi onyanya aakiintu naanona mboka kaaye na omupopili, ote yu uvu sho taye mu kugile ekwatho. Okwa ti: ‘Otandi ka geya.’ (Eksodus 22:22-24) Nonando ongeyo kayi li nando uukwatya waJehova wa tongomana, oha geye ngele aantu taya longo owina okwaahenuuyuuki, unene tuu ngele iihakanwa yokwaahenuuyuuki itayi vulu okwiikwatha.—Episalomi 103:6.

15, 16. Oshike tashi ulike shili kutya Jehova ke na nando okayoya?

¹⁵ Jehova okwe shi koleka wo kutya “ke na ontondo ye iha taamba oombumbo.” (Deuteronomium 10:17) Ina fa aapangeli yopantu oyendji mboka haya vulu okudhengwa okati koonyala nenge ya tale eholokopo lyomuntu. Ye ke na nando okayoya. Natu tale oshinima oshindhindhilikwedhi shoka tashi ulike kutya ke na okayoya. Ompito ndjoka Jehova a gandja opo yalwe ya ninge aalongeli ye yashili noya ka mone omwenyo gwaaluhe ine yi pa owala aantu aashona. Pehala lyaashono, “ngoka he mu tila noha longo shoka shu uka, Kalunga ote mu taamba, na kale ogwomoshigwana sha tya ngiini.” (Iilonga 10:34, 35) Etegameno ndika ekumithi olye egulukila aantu ayehe nopwaahe na okutala ondondo yawo, oshipa shawo nenge oshilongo moka ya za. Mbela mboka kawu shi tuu uuyuuki washili?

¹⁶ Opu na oshinima shilwe shoka tashi ulike kutya otu na okugandja eitulomo nokusimaneka uuyuuki waJehova wa gwanenena. Oshinima shono osho omukalo moka hu ungaunga naamboka taya yono omithikampango dhe dhuuyuuki.

17. Yelitha kutya omolwashike okwaahenuuyuuki hoka ku li muuyuni itaaku ulike kutya Jehova ke shi omuyuuki.

¹⁷ Yamwe otashi vulika yi ipule: Omolwashike Kalunga e etha aantu ya mone iihuna noya longelwe omiyonena ngele ihi ipwililikile okwaahenuuyuuki? Oshinima shoka itashi ulike nando kutya Kalunga ke shi omuyuuki. Aantu ohaya mono iihuna muuyuni kunena molwaashoka oya thigulula uulunde kuAdam. Muuyuni mbuka tu li moka aantu inaaya gwanenena ya hogolola oondjila dhawo dhuulunde, omu udha okwaahenuuyuuki, ihe itaku kalelele.—Deuteronomium 32:5.

18, 19. Oshike tashi ulike kutya Jehova ite ki idhidhimikila mboka taya yonene owina oompango dhe?

¹⁸ Nonando Jehova oha sile ohenda mboka taya hedha kuye nomutima aguhe, ite etha onkalo ndjoka tayi shekitha edhina lye eyapuki yi kale po sigo aluhe. (Episalomi 74:10, 22, 23) Kalunga kuuyuuki iha nyenkelwa, ye iha gamene mboka taya yonene owina kiilanduliko ya kwata miiti. Jehova ‘Kalunga omunamutimahenda, omunalukeno nomutalanteni, iha geye mbala noku udha esilohenda nuudhiginini. Ihe ite etha okugeela aayoni.’ (Eksodus 34:6, 7) Metsokumwe noohapu ndhoka, omathimbo gamwe Jehova okwa li a mono shu uka okugeela mboka ya yonena owina oompango dhe dhu uka.

¹⁹ Pashiholelwa, tala nkene a li u ungaunga nAaisraeli yonale. Nokuli sho ya yi mEvi lyEuvaneko, iikando niikando oya li ye etha po uudhiginini wawo. Nonando oye mu “nikitha oluhodhi” omolwiilonga yawo, ine yi iteka po nziya. (Episalomi 78:38-41) Pehala lyaashono, okwe ya pe ompito nokwe yi indile ya lundulule oondjila dhawo. Okwa ti: “Itandi nyanyukilwa omulunde ta si. Onda hala, i itedhulule ye a kale e na omwenyo. Israeli, etha uulunde to u ningi. Omolwashike mwa hala okusa?” (Hesekiel 33:11) Molwaashoka Jehova omwenyo okwe gu tala ko gu na ondilo, okwa kala noku ya tumina aapolofeti opo ye ethe iilonga yawo iiwinayi. Ihe molwaashoka oya li ya kukutika omitima dhawo, oya tindi okupulakena nokwiiyela ombedhi. Lwahugunina, omolwedhina lye eyapuki naashoka lya kwatela mo, Jehova  okwa li e ya gandja miikaha yaatondi yawo.—Nehemia 9:26-30.

20. (a) Okuungaunga kwaJehova nAaisraeli otaku tu longo shike kombinga ye? (b) Omolwashike she eleka sho onime tayi thaneke uuyuuki waJehova?

²⁰ Omukalo moka Jehova a li u ungaunga nAaisraeli otagu tu longo oshindji kombinga ye. Otwi ilongo kutya Jehova oku wete okwaahenuuyuuki akuhe naashika ohashi mu gumu komutima. (Omayeletumbulo 15:3) Otashi tu hekeleke wo okutseya kutya oha sile aantu ohenda, ngele opu na etompelo oku shi ninga. Kakele kaashono, otwi ilonga kutya uuyuuki we ihawu mu ningitha nando u ukithe iinima meendelelo. Molwaashoka Jehova ohi idhidhimike noha tala onteni, aantu oyendji oya thika pehulithodhiladhilo lya puka kutya ke na siku a ka geele aakolokoshi. Ihe shoka kashi shi shoshili nando, molwaashoka omukalo ngoka Jehova u ungaunga nAaisraeli ogwe tu longa wo kutya ontalanteni ye oyi na ongamba. Uuyuuki we owa kolelela. Mepingathano naantu mboka olundji ihaaya longo shoka shu uka, Jehova oku na uulaadhi okupopila shoka shu uka. Onkee ano, oshe eleka sho shimwe shomiishitwa mbyoka ya monika ya dhingilila oshipangelapundi shaKalunga shi na oshipala shonime ndjoka tayi thaneke okugwanitha  nuulaadhi uuyuuki we. * (Hesekiel 1:10; Ehololo 4:7) Ano otatu vulu okukala nuushili kutya ota ka gwanitha po euvaneko lye okuhulitha po okwaahenuuyuuki kombanda yevi. Omukalo gwe gwokugeela otagu vulu okungongwa ngaashi tashi landula: Ohu ulike uudhiginini mpoka sha pumbiwa nohenda uuna tashi wapa.—2 Petrus 3:9.

21. Uuna tatu tedhatedha nkene Jehova hu ulike uuyuuki, otu na okudhiladhila kutya okwa tya ngiini, nomolwashike?

²¹ Ngele tatu tedhatedha nkene Jehova hu ulike uuyuuki we, katu na okudhiladhila kutya oku li omupanguli omukwanyanya ngoka e hole owala okupangula aakolokoshi. Otu na oku mu dhiladhila e li Tate omunahole ngoka hu ungaunga aluhe noyana momukalo omwaanawaelela noihe ye ethele. E li Tate omuyuuki, Jehova oha katuka pandjele nonolukeno uuna tu ungaunga noyana yokombanda yevi mboka ya pumbwa ekwatho lye nosho wo edhiminopo.—Episalomi 103:10, 13.

22. Omolwuuyuuki we, Jehova okwe tu pa etegameno lyashike, nomolwashike hu ungaunga natse momukalo ngoka?

²² Inatu nyanyukwa tuu sho uuyuuki wopakalunga wa kwatela mo oshindji kaashi shi owala okupangula aayoni! Omolwuuyuuki we, Jehova okwe tu uvanekela etegameno lituntula lyomwenyo sigo aluhe muuyuni uupe moka “tamu ka kala uuyuuki.” (2 Petrus 3:13) Kalunga ketu ohu ungaunga natse momukalo nguka molwaashoka uuyuuki we ohawu mu inyengitha a tale nkene ta vulu oku tu hupitha, pehala lyoku tu pangula. Odhoshili kutya ngele otu uvite ko nawa uuyuuki waJehova, otashi tu hilile kuye. Montopolwa tayi landula, otatu ka tala nkene hu ulike omaukwatya ge kwaahe na we.