1, 2. Jehova oha kala u uvite ngiini, uuna tatu kambadhala twa mana mo tu kale aanashili?

ESIKU LIMWE, manga okamatyona kamwe taka zi kosikola ku uka kegumbo, oka toola okandjato ku udha iimaliwa. Oka ningi po shike? Iimaliwa mbyoka oka li taka vulu oku yi kutha po. Ihe pehala lyaashono, oka gandja okandjato kiimaliwa kumwene gwako. Yina yokamatyona hoka, okwa li u uvite lela uuntsa nuunambano, sho u uvu shoka ka ningi.

² Aavali oyendji ohaya kala ya nyanyukwa, uuna oyana aanashili. Tate yetu gwomegulu, Jehova, oku li ‘Kalunga omunashili,’ noha kala a nyanyukwa, uuna tu li aanashili. (Deuteronomium 32:4) Otwa hala oku mu nyanyudha ‘mokukala aanashili miinima ayihe.’ (Aahebeli 13:18, NW) Natu ka kundathaneni iinima ine mbyoka hayi vulu oku shi ningitha oshidhigu okukala aanashili monkalamwenyo yetu. Opo nduno, otatu ka tala wo komauwanawa gamwe ngoka tatu ka mona, ngele otwa kala aanashili.

3-5. (a) Ongiini tatu vulu okwiifundjaleka? (b) Oshike tashi vulu oku tu kwathela kaatu ifundjaleke?

³ Ngele otwa hala okukala aanashili uuna tatu ungaunga nayalwe, katu na okwiifundjaleka. Ihe shoka haaluhe  hashi kala oshipu. Methelemimvo lyotango, aamwatate yomegongalo lyokuLaodikea oya li tayi ifundjaleke mokudhiladhila kutya Kalunga okwe ya hokwa, ihe paushili wo wene ka li e ya hokwa. (Ehololo 3:17) Natse otashi vulika tu ifundjaleke, ngele tashi ya kunkene twi itala ko.

⁴ Omulongwa Jakob okwa yelitha a ti: “Ngele oku na ngoka ta dhiladhila kutya ota longele Kalunga, ndele ita pangele okupopya kwe, nena elongelokalunga lye itali tompola sha, oti ifundjaleke owala.” (Jakob 1:26) Ngele ohatu dhiladhila kutya sho twa longa uuwanawa washa, Kalunga ota ka kala e tu hokwa, kutya nduno otwa kala kaatu na omikalo nenge hatu sheke nenge hatu fundju, otatu ifundjaleke. Oshike tashi vulu oku tu kwathela tu yande okwiifundjaleka?

⁵ Uuna tatu italele mesipili, ohatu mono eholokopo lyetu lyokombanda. Ihe uuna tatu lesha Ombiimbeli, ohashi tu kwathele tu mone uuntu wetu womeni. Ombiimbeli otayi vulu oku tu kwathela tu mone mpoka tatu shi enditha nawa nosho wo omaunkundi getu. Ohayi tu kwathele wo tu mone kutya otwa pumbwa okuninga omalunduluko geni, ngele tashi ya pokudhiladhila kwetu, iilonga yetu nosho wo okupopya kwetu. (Lesha Jakob 1:23-25.) Ihe ngele otatu ifundjaleke kutya katu na epuko lyasha, itatu ka ninga omalunduluko ngoka ga pumbiwa. Onkee ano, otwa pumbwa okulongitha Ombiimbeli, opo tu ikonakone nawa. (Oontakumandjimbo 3:40; Haggai 1:5) Okugalikana nako otaku vulu oku tu kwathela tu mone kutya otwa tya lela ngiini. Otatu vulu okupula Jehova megalikano e tu konakone noku tu kwathele tu mone omapuko getu, opo tu vule okuninga omalunduluko. (Episalomi 139:23, 24) Natu dhimbulukwe kutya “omugoyoki oye iihuna koshipala shOmuwa, ihe Omuwa okwi inekela aayuuki.” — Omayeletumbulo 3:32.

6. Omolwashike omusamane nomukulukadhi ye na okukala aanashili?

⁶ Aanegumbo ayehe oya pumbwa lela okukala aanashili. Ngele omusamane nomukulukadhi oya mangulukilathana, ohaya kala ye uvite ye li megameno nohaya kala yi inekelathana shili. Aaihokani otashi vulika ya ulike kutya kaye shi aanashili momikalo odhindji. Pashiholelwa, kuume kopandjokana otashi vulika a kale e na iihole nomuntu gulwe, ha tala omathano giipala nenge ta endelathana nagulwe meholamo. Ndhindhilika shoka omupisalomi a ti: “Kandi na uukuume naantu yaa fele; kandi na ko nasha naayiningithi.” (Episalomi 26:4) Ngele ku shi omunashili  kukuume koye kopandjokana, nowu na iihole nomuntu gulwe nokuli nomomadhiladhilo, nena oto tula ondjokana yeni moshiponga.

7, 8. Ongiini to vulu okulongitha Ombiimbeli wu longe aanona esimano lyokukala aanashili?

⁷ Aanona oya pumbwa wo okulongwa kutya osha simana okukala aanashili. Aavali otaya vulu okulongitha Ombiimbeli, sho taye ya longo. MOmbiimbeli omu na iiholelwa iiwinayi yaamboka ya li kaaye shi aanashili. Omu na shaAkan, ngoka a li omufuthi, Gehasi ngoka a li a fundju, opo i ilikolele iimaliwa nosho wo shaJudas ngoka a li ha yaka iimaliwa, nolwanima okwa ka gwaaleka Jesus, omolwiisiliveli 30. — Josua 6:17-19; 7:11-25; 2 Aakwaniilwa 5:14-16, 20-27; Mateus 26:14, 15; Johannes 12:6.

⁸ MOmbiimbeli omu na wo iiholelwa iiwanawa oyindji yaantu mboka ya li aanashili. Omu na shaJakob ngoka a li a lombwele oyanamati ya shunithe ko iimaliwa mbyoka ya li ya adha moompunda dhawo. Omu na wo shaJefta nomwanakadhona mboka ya li ya gwanitha po shoka Jefta a li u uvanekele Kalunga. Omu na natango shaJesus ngoka a kala omunashili nokuli nomoonkalo oondhigu. (Genesis 43:12; Aatokolihapu 11:30-40; Johannes 18:3-11) Iiholelwa mbyoka otayi vulu okukwathela aanona yu uve ko kutya osha simana okukala aanashili.

9. Ngele aavali aanashili, shoka otashi ka kwathela ngiini oyana?

⁹ Aavali otaya vulu okwiilonga sha mekotampango lyOmbiimbeli lya simana, ndyoka tali ti: ‘Ngoye oho longo yalwe, ihe omolwashike ihoo ilongo ngoye mwene? Oho uvithile aantu yaa yake, ngoye oho yaka.’ (Aaroma 2:21) Aanona ohaya kala ye shi wete, uuna aavali itaaya tula miilonga shoka taye ya lombwele. Ngele otwa kala hatu lombwele aanona yetu ya kale aanashili, ihe tse yene katu shi aanashili, otatu ya ngwangwaneke. Ngele aanona oya  mono kutya aavali yawo ohaya fundju, nokuli nomuunima uushona, nayo otashi vulika ya ninge sha faathana. (Lesha Lukas 16:10.) Mepingathano naashono, uuna aanona ya ndhindhilike kutya aavali yawo aanashili, otashi ke ya kwathela nayo ya ka kale aavali ye shi okwiinekelwa monakuyiwa. — Omayeletumbulo 22:6; Aaefeso 6:4.

10. Ongiini tatu vulu okukala aanashili, uuna tatu popi nooitaali ooyakwetu?

¹⁰ Otwa pumbwa wo okukala aanashili, uuna tatu popi naamwatate naamwameme. Oonkundathana dhakwalukehe otadhi vulu okushituka nuupu olwaambo nenge nokuli okulundila. Ngele ohatu popi lwiikando iinima mbyoka kaatu shi ngele oyoshili, otashi vulika tu taandeleke iifundja. Otwa pumbwa okukala hatu “ikwata mokupopya.” (Omayeletumbulo 10:19) Okukala aanashili itashi ti kutya otu na okukala hatu popi kehe shoka tatu dhiladhila, shoka tu shi nenge shoka tu uva. Nonando shoka twa hala okupopya oshoshili, otashi vulika shi kale inaashi tu pamba nenge inaashi pumbiwa noitashi ka kala oshiwanawa oku shi endulula. (1 Aatessalonika 4:11) Aantu yamwe mboka kaaye na ko nasha, ohayi ipopile taya ti: “Ngaye ote popi owala oshili shandje.” Ihe tu li oshigwana shaJehova, otwa hala aluhe oohapu dhetu dhi kale oombwanawa nodhohenda. — Lesha Aakolossa 4:6.

11, 12. (a) Ongiini omuntu ngoka a yona ta vulu okunayipaleka onkalo, ngele okwa fundju? (b) Otashi vulika tu ipopile tatu ti ngiini? (c) Ongiini tatu vulu okukala aanashili kehangano lyaJehova?

¹¹ Jehova okwa pa aakuluntugongalo oshinakugwanithwa shokutonatela egongalo. Aakuluntugongalo otaye ke tu kwathela nuupu, ngele otwa kala hatu ya lombwele oshili. Omolwashike mbela? Natu tye nduno owa yi kundohotola to ehama, mbela oto ke mu holeka  omandhindhiliko gamwe guuvu woye? Ngele owe mu holeke, mbela ote ke ku kwathela ngaa? Sha faathana, ngele otwa yono sha kwata miiti, inatu fundja. Pehala lyaashono, otu na okuya kaakuluntugongalo, e tatu ya lombwele oshili. (Episalomi 12:2; Iilonga 5:1-11) Dhiladhila ishewe konkalo ndjika: Ongiini ngele owa mono kutya kuume koye okwa yona eyono lya kwata miiti? (Levitikus 5:1) Mbela oto ki ipopila to ti: “Ngele ngame okuume ke kashili, otandi shi mwenene owala”? Nenge oto ka dhimbulukwa kutya aakuluntugongalo oye lile po oku mu pa ekwatho ndyoka a pumbwa, opo a kale ishewe e na ekwatathano naJehova? — Aahebeli 13:17; Jakob 5:14, 15.

¹² Otwa pumbwa wo okukala aanashili kehangano lyaJehova, ngele tashi ya pokuudhitha olopota yiilonga yokuuvitha. Otu na wo okukala aanashili uuna tatu udhitha oofooloma dhuukokolindjila nenge dhiilonga yilwe. — Lesha Omayeletumbulo 6:16-19.

13. Ongiini tatu vulu okukala aanashili, ngele tashi ya pokukutha ombinga miinima yopangeshefa nooitaali ooyakwetu?

¹³ Aamwatate naamwameme inaya pumbwa okuninga iinima yopangeshefa pethimbo yi ipyakidhila niilonga yaJehova. Pashiholelwa, katu na okungeshefa, uuna tu li pOshinyanga shUukwaniilwa nenge miilonga yokuuvitha. Ihatu nyokoma wo aamwatate miinima yopangeshefa. Ngele owa kutu ooitaali ooyakweni, ya futa pethimbo, ya futa shoka we ya uvanekela, ya pa wo omauwanawa ngoka ga tulwa po kompango yoshilongo. Omauwanawa ngoka otashi vulika ga kwatela mo eshilipaleko li na ko nasha niinima yopaunamiti nenge okufuta omasiku gefudho. (1 Timoteus 5:18; Jakob 5:1-4) Ngele owa kutwa komwiitaali omukweni, ino kala wa tegelela okuningilwa omauwanawa ngoka ihaaga ningilwa aaniilonga ooyakweni. (Aaefeso 6:5-8) Shilipaleka kutya oho longo  oowili ndhoka mu uvathana nokulonga iilonga yi thike pwaashoka to futwa. — 2 Aatessalonika 3:10.

14. Oshike Aakriste ye na okuninga, manga inaaya ya mongeshefa?

¹⁴ Ongiini ngele otatu ningi ongeshefa nomumwatate nenge nomumwameme? Otashi vulika yi kale ya kwatela mo okupungula nenge okulya omukuli. Moonkalo dha tya ngeyi, opu na ekotampango lyOmbiimbeli ndyoka tali vulu oku mu kwathela, tali ti: Iinima ayihe nayi kale ya nyolwa. Sho omuhunganeki Jeremia a landa epya, okwa li a nyola omikanda mbali dhelandakanitho, gumwe ogwa shainwa koombangi nokwe dhi pungula adhihe mbali, opo dhi ka vule okulongithwa monakuyiwa. (Jeremia 32:9-12; tala wo Genesis 23:16-20.) Yamwe ohaya kala yu uvite kutya ngele oya nyola euvathanotsokumwe, oya fa inaayi inekela aamwahe. Ihe uushili owo kutya, okuninga ngawo ohaku keelele okwaauvathana, okuyematekwa nosho wo okunyokomwa. Nokuli nomiinima yopangeshefa, natu dhimbulukwe kutya ombili yegongalo oyo ya simanenena yi vule oshinima kehe shopangeshefa. — 1 Aakorinto 6:1-8; tala eyelitho eti-30.

15. Jehova oha kala u uvitile ngiini okwaa na oshili hoka ku li moongeshefa?

¹⁵ Otu na okukala aanashili kukehe gumwe, kutya nduno ke shi Onzapo yaJehova. Jehova okwa tala ko okukala aanashili ku li oshinima sha simana. Ombiimbeli otayi ti: “Oshiviha shomakoto osho iihuna kOmuwa, ihe oomasandjundo dhu udha ote dhi hokwa.” (Omayeletumbulo 11:1; 20:10, 23) Pethimbo lyOmbiimbeli, iiviha oyo ya li hayi longithwa unene moongeshefa. Ihe aashingithi yamwe oya li haya nyokoma aalandi yawo, moku ya pa iinima inaayi ihwapo nenge moku ya futitha oshindji. Ngaashi sha li pethimbo lyOmbiimbeli, okwaa na oshili okwa  ha moongeshefa pethimbo lyetu. Nokunena Jehova oku tonde okwaa na oshili ngaashi owala pethimbo lyonale.

16, 17. Oonkalo dhini dhi li apuhe tu na okuyanda?

¹⁶ Atuhe ohatu vulu okwiiyadha moonkalo ndhoka tadhi vulu oku tu ningitha kaatu kale aanashili. Pashiholelwa ngaashi okuudhitha oofooloma dhokukonga iilonga, oofooloma dhepangelo nenge uuna tatu nyola ekonakono. Oyendji oyu uvite kutya inashi puka okufundja, okugwedhela nenge okugandja omayamukulo kaage shi goshili. Shika ihashi tu kumitha. Ombiimbeli oya hunganeka kutya momasiku gahugunina, ‘aantu otaya ka kala nokwiihola, ye hole eliko noye tonde uuwanawa.’ — 2 Timoteus 3:1-5.

¹⁷ Omathimbo gamwe otashi vulika aantu mboka kaaye shi aanashili ya kale taya monika ya fa taye shi enditha nawa muuyuni. (Episalomi 73:1-8) Omukriste ota vulu nokuli okukanitha iilonga ye, kaa futwe shi ihwapo nenge a ungaungiwe naye nayi kiilonga, molwaashoka omunashili. Nonando ongawo, okukala omunashili oshinima oshiwanawa kaaku na we. Omolwashike mbela?

18. Omolwashike okukala omunashili kwa simanenena?

¹⁸ Okukala omunashili nomwiinekelwa, oshinima sha simana nosha pumba muuyuni wonena. Kehe gumwe gwomutse ota vulu okukala e na uukwatya mboka. (Mika 7:2) Odhoshili kutya aantu yamwe otashi vulika ye ku yole, sho wu li omunashili, noku ku tala ko egoya. Ihe yamwe otaye ke ku pandula notaya ka kala ye ku inekela. Oonzapo dhaJehova muuyuni awuhe, odha tseyikila uunashili. Aagandji yiilonga yamwe oye hole oku dhi kuta miilonga omolwuunashili wadho. Aaniilonga yalwe ohaya tidhwa miilonga molwaashoka kaaye shi aanashili, omanga olundji Oonzapo ihaadhi tidhwa mo.

19. Ongiini okukala omunashili haku gumu ekwatathano lyoye naJehova?

 ¹⁹ Okukala omunashili miinima ayihe otaku ke ku kwathela wu kale wu na eiyuvo lya yela nosho wo ombili yopamadhiladhilo. Otatu vulu okukala ngaashi Paulus ngoka a ti: “Tse otu na eiyuvo lya yela.” (Aahebeli 13:18) Shoka sha simanenena, Tate yetu omunahole, Jehova, oku wete oonkambadhala dhoye dhokukala omunashili miinima ayihe note ke ku pandula. — Lesha Episalomi 15:1, 2; Omayeletumbulo 22:1.